(vovworld)- ໃນຂອບເຂດການຢ້ຽມຢາມທາງລັດຖະກິດສາທາລະນະລັດ ສິງກະໂປ, ຕອນເຊົ້າວັນທີ 30/8, ທ່ານປະທານປະເທດ ເຈີນດ້າຍກວາງ ໄດ້ເຂົ້າຮ່ວມ ແລະ ມີບົດກ່າວປາໄສທີ່ Singapore Lecture 38. ນີ້ແມ່ນເວທີປາໄສມີອິດທິພົນຊື່ສຽງແຖວຫນ້າຂອງ ສິງກະໂປ, ໂດຍສະຖາບັນຄົ້ນຄ້ວາອາຊີຕາເວັນອອກສ່ຽງໃຕ້ (ISEAS) ຈັດຕັ້ງ. ຕໍ່ຫນ້າ ນັກຮຽນຮູ້ສາກົນ 500 ຄົນ ແລະ ການນຳ, ນັກການເມືອງຂອງລັດຖະບານ ສິງກະໂປຫລາຍທ່ານ, ທ່ານປະທານປະເທດ ເຈີຍດ້າຍກວາງ ໄດ້ເນັ້ນຫນັກວ່າ ອາຊຽນ ຄວນສາມັກຄີ, ຮ່ວມແຮງຮ່ວມໃຈກະທຳ ເພື່ອພ້ອມກັນພັດທະນາແບບຍືນຍົງ. ບັນນາທິການ ວິທະຍຸກະຈາຍສຽງຫວຽດນາມ ຂໍຄັດສະເຫນີເນື້ອໃນຕົ້ນຕໍຂອງບົດກ່າວປາໄສດັ່ງກ່າວ.
.jpg)
ທ່ານປະທານປະເທດເຈີນດ້າຍກວາງເຂົ້າຮ່ວມກອງປະຊຸມ
Singapore Lecture 38.
ພາບ:vov
|
ເມື່ອຕີລາຄາກ່ຽວກັບສະພາບການໃນພາກພື້ນ, ທ່ານປະທານປະເທດເຈີນດ້າຍກວາງ ຊີ້ແຈ້ງວ່າ: ອາຊີ -ປາຊີຟີກ ມີທີ່ຕັ້ງພູມສາດ - ຍຸດທະສາດ, ເສດຖະກິດ, ການເມືອງນັບມື້ນັບສຳຄັນໃນໂລກ. ທະເລຕາເວັນອອກ ນອນໃນພາກພື້ນອາຊີຕາເວັນອອກສ່ຽງໃຕ້, ນຳມາເຊິ່ງຜົນປະໂຫຍດສຳຄັນຫລາຍຢ່າງ ບໍ່ພຽງແຕ່ໃຫ້ແກ່ບັນດາປະເທດໃນພາກພື້ນເທົ່ານັ້ນ ຫາກຍັງແມ່ນເສັ້ນທາງຄົມມະນາຄົມບົນທະເລ, ການບິນນທີ່ສຳຄັນຍິ່ງ ຂອງໂລກອີກດ້ວຍ. ທັງພາກພື້ນ ພວມມານະພະຍາຍາມບື່ນຕົວຂຶ້ນ, ຊຸກຍູ້ບັນດາຂໍ້ລິເລິ່ມຮ່ວມສຳພັນ, ຮ່ວມມືທາງດ້ານການເມືອງ, ເສດຖະກິດ, ວັດທະນະທຳ, ການສຶກສາ… ທ່ານປະທານປະເທດ ເຈີນດ້າຍກວາງ ຖືວ່າ: ບັນດາການຜັນແປເປັນຫນ້າວິຕົກກັງວົນໃນໄລຍະມໍ່ໆມານີ້ຢູ່ພາກພື້ນ ແລະ ບົນທະເລຕາເວັນອອກ ໄດ້ ແລະ ພວມສົ່ງຜົນກະທົບຢ່າງຫຍໍ້ທໍ້ເຖິງສະພາບແວດລ້ອມຄວາມໝັ້ນຄົງໃນພາກພື້ນ, ເປັນຕົ້ນແມ່ນຄວາມເສລີ, ຄວາມໝັ້ນຄົງ, ຄວາມປອດໄພໃນການເດີນເຮືອຢູ່ທະເລ, ການບິນ, ມີໄພເຮັດໃຫ້ຄວາມໄວ້ເນື້ອເຊື່ອໃຈຖືກຫລຸດລົງ, ສົ່ງຜົນສະທ້ອນເຖິງວິວັດການຮ່ວມມືໃນພາກພື້ນ.
ຄວາມສາມັກຄີ, ຮ່ວມແຮງຮ່ວມໃຈກະທຳເພື່ອຫັນຄວາມມຸ້ງຫວັງໃຫ້ປະກົດຜົນເປັນຈິງ
ໂດຍຄັດຄຳເວົ້າຂອງອະດີດນາຍົກລັດຖະມົນຕີ ຫລີກູງຢູ ເຄີຍເວົ້າວ່າ: “ເພື່ອນບໍ່ຄວນຍົກອອກບັນດາຄຳໝັ້ນໝາ ຍເທົ່ານັ້ນ ຫາກຕ້ອງປະຕິບັດສິ່ງທີ່ເພື່ອນເວົ້າ”, ທ່ານປະທານປະເທດ ເຈີນດ້າຍກວາງ ຖືວ່າ ເສັ້ນທາງຫນຶ່ງດຽວເພື່ອຫັນຄວາມມຸ້ງຫວັງໃຫ້ປະກົດຜົນເປັນຈິງ ນັ້ນແມ່ນທຸກປະຊາຊາດ ຈົ່ງມີຄວາມສາມັກຄີ, ຮ່ວມແຮງຮ່ວມໃຈກະທຳ, ເພີ່ມທະວີການຮ່ວມມືບົນພື້ນຖານກົດໝາຍສາກົນ, ມີຄວາມສະເຫມີພາບ, ຕ່າງຝ່າຍຕ່າງມີຜົນປະໂຫຍດ.
“ນັ້ນແມ່ນຈຸດໝາຍຂອງ ອາຊຽນ. ໃນຫລາຍປີຜ່ານມາ, ດ້ວຍວິໄສທັດຜ່ານຜ່າບັນດາຜົນປະໂຫຍດສະເພາະຂອງຕົນ, ອາຊຽນ ໄດ້ ແລະ ພວມສະແດງທັດສະນະນັບມື້ນັບເຂັ້ມແຂງ, ມີຄວາມຮັບຜິດຊອບສຳລັບບັນດາຄວາມເອົາໃຈໃສ່ລວມຂອງປະຊາຄົມໂລກ ແລະ ພາກພື້ນ, ເປັນຕົ້ນແມ່ນໃນບັນດາຂົງເຂດຮ່ວມມືພັດທະນາແບບຍືນຍົງ, ຮັບມືກັບການປ່ຽນແປງຂອງດິນຟ້າອາກາດ, ຫລຸດຜ່ອນໄພທຳມະຊາດ, ໂລກລະບາດ… ມາຮອດປະຈຸບັນ, ອາຊຽນ ໄດ້ປະສົບຜົນສຳເລັດໃນການດຶງດູດການແຊກແຊງຍຸດທະສາດຂອງບັນດາປະເທດໃຫຍ່ ເພື່ອຜົນປະໂຫຍດລວມ ນັ້ນແມ່ນສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງຂອງພາກພື້ນ ແລະ ໃນໂລກ. ໂຄງປະກອບຂອງພາກພື້ນຫລາຍຂົ້ວ, ຫລາຍຂັ້ນ ດ້ວຍບົດບາດໃຈກາງຂອງອາຊຽນ ແມ່ນ ເໝາະສົມ ແລະ ຕອບສະຫນອງຜົນປະໂຫຍດຂອງທຸກຝ່າຍ.”
ເພື່ອເສີມຂະຫຍາຍບົດບາດທີ່ມີປະສິດທິຜົນກວ່າອີກໃນການຮັກສາສັນຕິພາບ, ສະຖຽນລະພາບ, ຊຸກຍູ້ການຮ່ວມມື, ໝັ້ນຄົງເຂັ້ມແຂງຕໍ່ຫນ້າຄວາມຫຍຸ້ງຍາກ, ສິ່ງທ້າທາຍ, ທ່ານປະທານປະເທດ ເຈີນດ້າຍກວາງ ຖືວ່າ ອາຊຽນ ຄວນເພີ່ມທະວີຄວາມສະຫນິດຕິດພັນກ່ຽວກັບດ້ານການເມືອງ, ສຸມໃສ່ຊຸກຍູ້ການໂອ້ລົມສົນທະນາ, ສ້າງຄວາມໄວ້ເນື້ອເຊື່ອໃຈ ແລະ ບັນດາມາດຖານການປະພຶດລວມ, ຍູ້ແຮງການຮ່ວມສຳພັນກ່ຽວກັບດ້ານເສດຖະກິດ, ວັດທະນະທຳ, ສັງຄົມ ເພື່ອສ້າງກຳລັງແຮງຂອງປະຊາຄົມ.
ເມື່ອຢັ້ງຢືນຄວາມສາມັກຄີ, ໃນນັ້ນ ມີຄວາມສາມັກຄີສາກົນແມ່ນ “ມູນເຊື້ອອັນລ້ຳຄ່າ ແລະ ບົດຮຽນໃຫຍ່” ຂອງຊາດຫວຽດນາມ, ທ່ານປະທານປະເທດ ເຈີນດ້າຍກວາງ ຖືວ່າ ບັນດາບົດຮຽນນີ້ມີຜົນສະທ້ອນຢ່າງເລິກເຊິ່ງຕໍ່ແນວທາງ, ນະໂຍບາຍການຕ່າງປະເທດ ແລະ ການກະທຳຂອງຫວຽດນາມ.
“ໃນການພົວພັນກັບຕ່າງປະເທດ, ຍາມໃດຫວຽດນາມ ກໍປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະ ພັດທະນາຫລາຍຮູບຫລາຍແບບ ແລະ ຫລາຍຝ່າຍຢ່າງສະເຫມີຕົ້ນສະເຫມີປາຍ, ເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນ ພ້ອມແລ້ວເປັນເພື່ອນ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ແມ່ນສະມາຊິກມີຄວາມຮັບຜິດຊອບໃນປະຊາຄົມໂລກ.”
ກ່ຽວກັບບັນຫາທະເລຕາເວັນອອກ, ທ່ານປະທານປະເທດ ເຈີນດ້າຍກວາງ ຢືນຢັນແຜນນະໂຍບາຍສະເຫມີຕົ້ນສະເຫມີປາຍຂອງຫວຽດນາມ ແມ່ນເດັດດ່ຽວ, ຢືດໝັ້ນຕໍ່ສູ້ປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຢ່າງໝັ້ນຄົງ, ແກ້ໄຂບັນດາການຂັດແຍ້ງໂດຍສັນຕິວິທີ ຜ່ານວິວັດທະນາການດ້ານການເມືອງ, ການທູດ, ນິຕິທຳ, ບົນພື້ນຖານກົດໝາຍສາກົນ, ໃນນັ້ນ ມີສົນທິສັນຍາ ປສຊ ກ່ຽວກັບກົດໝາຍວ່າດ້ວຍທະເລປີ 1982, ຮຽກຮ້ອງບັນດາຝ່າຍກ່ຽວຂ້ອງປະຕິບັດຖະແຫລງການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ແລະ ເຈລະຈາກ້າວໄປເຖິງການສ້າງກົດແຫ່ງການ
ປະພຶດຂອງບັນດາຝ່າຍຢູ່ທະເລຕາເວັນອອກ (COC).
ເຮັດໃຫ້ການພົວພັນຄູ່ຮ່ວມມືຍຸດທະສາດ ຫວຽດນາມ - ສິງກະໂປເລິກເຊິ່ງກວ່າ
ເມື່ອຕີລາຄາກ່ຽວກັບການພົວພັນລະຫວ່າງຫວຽດນາມ ແລະ ສິງກະໂປ, ທ່ານປະທານປະເທດ ເຈີນດ້າຍກວາງ ສະແດງຄວາມເຄົາລົບນັບຖືການພັດທະນາເສດຖະກິດສັງຄົມຂອງສິງກະໂປນັບແຕ່ເມື່ອສ້າງຕັ້ງມາຮອດປະຈຸບັນ. ທ່ານປະທານປະເທດ ເຈີນດ້າຍກວາງ ຖືວ່າ ນີ້ແມ່ນບົດຮຽນອັນລ້ຳຄ່າໃຫ້ແກ່ຫວຽດນາມ ໃນວິວັດການສ້າງສາ ແລະ ປົກປັກຮັກສາປະເທດຊາດ. ພິເສດໃນບັນດາບັນຫາພາກພື້ນ ແລະ ສາກົນ, ຫວຽດນາມ ແລະ ສິງກະໂປ ຕ່າງຝ່າຍຕ່າງມີຜົນປະໂຫຍດໂດຍພື້ນຖານໃນການສ້າງ ອາຊຽນໃຫ້ໝັ້ນຄົງເຂັ້ມແຂງ ແລະ ລະບົບຄູ່ຮ່ວມມືທີ່ໄວ້ເນື້ອເຊື່ອມໃຈ, ຮັກສາຄວາມໝັ້ນຄົງສາກົນໂ ດຍສັນຕິ, ສະຖຽນລະພາບ, ເຄົາລົບ ແລະ ປະຕິບັດຕາມກົດໝາຍສາກົນ.
“ຫວຽດນາມ ປາດຖະຫນາຢາກພ້ອມກັບສິງກະໂປ ຊຸກຍູ້, ເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃນບັນດາຂົງເຂດຢ່າງເລິກເຊິ່ງກວ່າ, ໃນນັ້ນ ຈຸດສຸມແມ່ນດ້ານເສດຖະກິດ, ການຄ້າ, ການລົງທຶນ, ການປ້ອງກັນຊາດ ປ້ອງກັນຄວາມສະຫງົບ, ການຮ່ວມມືບົນທະເລ, ບັນດາເວທີປາໄສພາກພື້ນ ແລະ ສາກົນ. ຈຸດໝາຍຂອງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ ນັ້ນແມ່ນ ສິງກະໂປ ວັດທະນາຖາວອນ, ຫວຽດນາມ ພັດທະນາແບບຍືນຍົງ, ຜ່ານນັ້ນ ປະກອບສ່ວນສ້າງປະຊາຄົມ ອາຊຽນ ໃຫ້ຈະເລີນຮຸ່ງເຮືອງ, ສັນຕິພາບ, ໝັ້ນຄົງ ແລະ ພັດທະນາຢູ່ ອາຊີ ປາຊີຟີກ.”
ມ້ວນທ້າຍ, ທ່ານປະທານປະເທດ ເຈີນດ້າຍກວາງ ປາດຖະຫນາວ່າ ຜ່ານບັນດາການແລກປ່ຽນ, ບັນດາການນຳ, ນັກການເມືອງ, ສະມາຊິກຄະນະລັດຖະບານ, ສາດສະດາຈານ, ນັກຄົ້ນຄ້ວາ ມີຄວາມເຂົ້າໃຈກວ່າກ່ຽວກັບບັນດາບັນຫາພາກພື້ນ ແລະ ສາກົນທີ່ກ່ຽວຂ້ອງເຖິງນະໂຍບາຍການຕ່າງປະເທດຂອງຫວຽດນາມ ແລະ ການພົວພັນລະຫວ່າງຫວຽດນາມ ແລະ ສິງກະໂປ ຈາກນັ້ນ ມີບັນດາການເຄື່ອນໄຫວຮ່ວມມືລະອຽດ, ຮ່ວມແຮງຮ່ວມໃຈເພື່ອຜົນປະໂຫຍດລວມ.