ດ້ວຍຈຳນວນ 236 ບັດເຫັນດີ ແລະ 189 ບັດຄັດຄ້ານນັ້ນ, ວັນທີ 17/6, ສະພາຕ່ຳອາເມລິກາໄດ້ເຫັນດີເປັນເອກະສັນເລື່ອນເວລາປ່ອນບັດຄັ້ງທີ 2 ກ່ຽວກັບຮ່າງກົດໝາຍດັດປັບການໜູນຊ່ວຍການຄ້າ (TAA) ຊຶ່ງແມ່ນສ່ວນໜຶ່ງທີ່ສຳຄັນໃນຮ່າງກົດໝາຍກ່ຽວກັບສິດຊຸກຍູ້ການຄ້າ(ຫຼືເອີ້ນວ່າ ສິດເຈລະຈາໄວ TPA) ຮອດວັນທີ 30/7. ປະຈຸບັນ, ບັນຫາ TPA ໃນປະຈຸບັນ ແມ່ນຍັງບໍ່ທັນຮູ້ວ່າ ຈະເປັນແນວໃດ? ແຕ່ມີສິ່ງໜຶ່ງທີ່ເຊື່ອແນ່ວ່າ ຮ່າງກົດໝາຍທີ່ຍັງບໍ່ທັນໄດ້ຮັບຮອງເອົານັ້ນ ໄດ້ເຮັດໃຫ້ວິວັດທະນາການເຈລະຈາສັນຍາຄູ່ຮ່ວມມືຂ້າມປາຊີຟິກ TPP ຖືກຖອຍຫຼັງ ແລະ ວໍຊິງຕັນພວມຊຸກຍູ້, ພ້ອມທັງກໍສະແດງໃຫ້ເຫັນການແບ່ງແຍກຢ່າງເລິກເຊິ່ງຢູ່ພາຍໃນພັກປະຊາທິປະໄຕທີ່ພວມກຳອຳນາດບໍລິຫານ.
ທຳນຽບຂາວ |
ດ້ວຍການຕໍ່ກຳນົດເວລານັ້ນ, ປະທານາທິບໍດີອາເມລິກາ Barack Obama ແລະ ບັນດາຜູ້ສະໜັບສະໜູນ TPA ຈະມີເວລາຕື່ມອີກເພື່ອຊອກຫາບັນດາວິທີການແກ້ໄຂກອບກູ້ເອົາຮ່າງກົດໝາຍຊຸກຍູ້ການຄ້ານີ້. ແຕ່ກາລະໂອກາດເພື່ອໃຫ້ ປະທານາທິບໍດີອາເມລິກາ Barack Obama ບັນລຸ TPA ແລະ ສຳເລັດ TPP ນັ້ນ, ຕາມຂໍ້ສັງເກດຂອງວົງການນັກສັງເກດການແລ້ວ ແມ່ນຕ່ຳທີ່ສຸດ ເພາະກ່ອນໜ້ານັ້ນ, ຮ່າງກົດໝາຍນີ້ໄດ້ປະສົບກັບການຄັດຄ້ານຢ່າງຮຸນແຮງ ຂະນະທີ່ອັດຕາສ່ວນບັດຄັດຄ້ານແມ່ນ 302 ບັດເມື່ອທຽບໃສ່ 126 ບັດເຫັນດີ. ສິ່ງທີ່ຜິດປົກກະຕິ, ນັ້ນແມ່ນຮ່າງກົດໝາຍນີ້ໂດຍແມ່ນບັນດາສະມາຊິກສະພາແຫ່ງຊາດສັງກັດພັກປະຊາທິປະໄຕຂອງປະທານາທິບໍດີອາເມລິກາ Barack Obama ເອງເປັນຜູ້ປະຕິເສດ.
ບັນຫາ TPA ຈະເປັນແນວໃດ ?
TAA ແມ່ນສ່ວນໜຶ່ງໃນຮ່າງກົດໝາຍກ່ຽວກັບສິດຊຸກຍູ້ການຄ້າ TPA. ຮ່າງກົດໝາຍສະບັບນີ້ໄດ້ຮັບການຮຽບຮຽງເພື່ອແນໃສ່ໜູນຊ່ວຍຄົນງານອາເມລິກາທີ່ຖືກວ່າງງານເພາະສັນຍາຄູ່ຮ່ວມມືຂ້າມປາຊີຟິກ TPP ຊຶ່ງວໍຊິງຕັນພວມຊຸກຍູ້. ມາຮອດປະຈຸບັນ, ບັນດາການເຈລະຈາກ່ຽວກັບTPP ເກືອບຄືວ່າ ໄດ້ສຳເລັດ, ແຕ່ບັນດາຄູ່ຮ່ວມມືການຄ້າໃຫ້ຮູ້ວ່າ ເຂົາເຈົ້າຫວັງຢາກອຳນາດການປົກຄອງຂອງປະທານາທິບໍດີອາເມລິກາ Barack Obama ບັນລຸໄດ້TPA ກ່ອນທີ່ສຳເລັດສັນຍາ. ຮ່າງກົດໝາຍນີ້ໄດ້ຮັບການຮັບຮອງເອົາ, ຈະແມ່ນເຄື່ອງມືເພື່ອອະນຸຍາດໃຫ້ປະທານາທິບໍດີອາເມລິກາຍື່ນສະເໜີ້ຕໍ່ສະພາແຫ່ງຊາດຂອງປະເທດນີ້ ບັນດາຂໍ້ຕົກລົງດ້ານການຄ້າຊຶ່ງບັນດາສະມາຊິກສະພາຕ່ຳ ແລະ ສະພາສູງພຽງໃຫ້ສັດຕະຍາບັນຫຼືປະຕິເສດ ຫາກບໍ່ມີສິດປັບປຸງຢ່າງສິ້ນເຊິ່ງ. ຮ່າງກົດໝາຍນີ້ໄດ້ຮັບຖືວ່າ ແມ່ນເງື່ອນໄຂຈຳເປັນເພື່ອໃຫ້ປະທານາທິບໍດີອາເມລິກາ Barack Obama ມີອຳນາດເຕັມເພື່ອຊຸກຍູ້ບັນດາການເຈລະຈາTPP ກັບ 11 ປະເທດຄູ່ຮ່ວມມື ແນໃສ່ສ້າງຕັ້ງເຂດການຄ້າເສລີທີ່ກວມເຖິງ 30% ຍອດວົງເງິນການຄ້າ ແລະ 40%ປະລິມານການຜະລິດເສດຖະກິດທົ່ວໂລກ.
ແຕ່ໃນການປ່ອນບັດຢູ່ສະພາຕ່ຳເມື່ອວັນທີ 12/6, ໂດຍບໍ່ຫົວຊາຕໍ່ຄວາມມານະພະຍາຍາມຂອງປະທານາທິບໍດີອາເມລິກາ Barack Obama ໄປຮອດບ່ອນຂົນຂວາຍ, TAA ຍັງຄົງຖືກປະຕິເສດ. ໃນຂະນະທີ່ສະມາຊິກສະພາແຫ່ງຊາດສັງກັດພັກສາທາລະນະຈຳນວນເກືອບທັງໝົດ ໄດ້ຕອບສະໜອງຕໍ່ TPP ນັ້ນ, ສະມາຊິກສະພາແຫ່ງຊາດສັງກັດພັກປະຊາທິປະໄຕສ່ວນຫຼວງຫຼາຍພັດມີຄວາມເປັນຫ່ວງກັງວົນຕໍ່ TPP ເພາະວ່າພຽງແຕ່ນຳມາເຊິ່ງຜົນປະໂຫຍດໃຫ້ແກ່ບັນດາບໍລິສັດນາໆຊາດ, ສ່ວນຜູ້ອອກແຮງງານຢູ່ພາຍໃນປະເທດຈະຖືກວ່າງງານ ຍ້ອນບັນດາບໍລິສັດອາເມລິກາຊອກຫາແຫຼ່ງຄົນງານດ້ວຍຄ່າແຮງງານຖືກຢູ່ຕ່າງປະເທດ. ພ້ອມກັນນັ້ນ, ຂໍ້ສະເໜີຫຼຸດຜ່ອນ 700 ລ້ານ USD ໃນບ້ວງງົບປະມານ 2,6 ຕື້ USD ຊຶ່ງແມ່ນເງິນປະກັນສຸຂະພາບທີ່ສະຫງວນໃຫ້ຜູ້ອາຍຸສູງເພື່ອໜູນຊ່ວຍໃຫ້ແກ່ໂຄງການ TAA ຂອງ ປະທານາທິບໍດີອາເມລິກາ Barack Obama ກໍຖືກບັນດາສະມາຊິກສະພາແຫ່ງຊາດສັງກັດພັກປະຊາທິປະໄຕຄັດຄ້ານຢ່າງຮຸນແຮງ. ໃນຂະນະນັ້ນ, ການນຳຝ່າຍສ່ວນໜ້ອຍຢູ່ສະພາຕ່ຳ ທ່ານນາງ Nancy Pelosi ໄດ້ຖະແຫຼງປ່ອນບັດຄັດຄ້ານ TAA ເພື່ອສະກັດກັ້ນສິດເຈລະຈາໄວ.
ບັນຫາຕົ້ນຕໍ່ແມ່ນສິດຜົນປະໂຫຍດຂອງຜູ້ອອກແຮງງານ
ເປັນອັນວ່າ ບັນຫາ TPA ຈະເປັນແນວໃດກໍຕ້ອງລໍ່ຖ້າຮອດວັນທີ 30/7ໜ້ານີ້ ຈຶ່ງຮູ້ຢ່າງຊັດເຈນ ແລະ ຮູ້ພຽງແຕ່ວ່າ ການຍາດໄດ້ TPA ແນ່ນອນວ່າ ຈະແມ່ນການແຂ່ງຂັນດ້ວຍຄວາມລຳບາກຂອງທຳນຽບຂາວ. ຄວາມປະລາໄຊຢູ່ສະພາຕ່ຳໃນເວລາທີ່ຜ່ານມາ ໄດ້ສະແດງໃຫ້ເຫັນວ່າ ປະທານາທິບໍດີອາເມລິກາ Barack Obama ຈະຕ້ອງປະເຊີນໜ້າກັບຄວາມຫຍຸ້ງຍາກຫຼາຍຢ່າງ ຂະນະທີ່ຍັງບໍ່ຮອດ 18 ເດືອນ, ທ່ານຈະສິ້ນສຸດອາຍຸການທີ 2 ຂອງຕົນ. ພ້ອມກັນນັ້ນ, ໝາກຜົນນີ້ກໍສະແດງໃຫ້ເຫັນການແບ່ງແຍກຢ່າງເລິກເຊິ່ງຢູ່ພາຍໃນພັກປະຊາທິປະໄຕ. ເຫດຜົນທີ່ພາໃຫ້ບັນດາ ສະມາຊິກສະພາແຫ່ງຊາດເດັດດຽວປົກປ້ອງຜົນປະໂຫຍດຂອງຜູ້ອອກແຮງງານຢູ່ພາຍໃນປະເທດແມ່ນຍ້ອນສາຍພົວພັນຢ່າງສະໜິດແໜ້ນກັບບັນດາອົງການກຳມະບານອາເມລິກາ. ເຂົາເຈົ້າບໍ່ຢາກຖືກສູນເສຍໂອກາດໄດ້ຮັບໄຊຊະນະໃນການເລືອກຕັ້ງໃນອາຍຸການທີ່ຈະມາເຖິງ. ການຄັດຄ້ານຢ່າງຮຸນແຮງຂອງ ບັນດາອົງການກຳມະບານ, ກໍແມ່ນໄພນາບຂູ່ຕໍ່ກໍລະນີຮັບໄຊຊະນະໃນການເລືອກຕັ້ງຄືນໃໝ່ຂອງສະມາຊິກສະພາແຫ່ງຊາດສັງກັດພັກປະຊາທິປະໄຕບໍ່ວ່າທ່ານໃດທີ່ປ່ອນບັດສະໜັບສະໜູນ TPP.
TPP ຈະປະສົບຄວາມຫຍຸ້ງຍາກຫຼາຍຢ່າງກ່ອນທີ່ຈະສຳເລັດ
ເຖິງຢ່າງໃດກໍຕາມ, ນີ້ແມ່ນຍັງບໍ່ທັນຮອດວັນສີິ້ນສຸດຂອງ TPA. ເຖິງວ່າ TAA ຖືກປະລາໄຊກໍຕາມ ແຕ່ TPA ຍັງຄົງມີກາລະໂອກາດນັບແຕ່ນີ້ຫາວັນທີ 30/7. ປະທານາທິບໍດີອາເມລິກາ Barack Obama ຈະມີເວລາຕື່ມອີກເພື່ອເກັ້ຍກອມບັນດາ ສະມາຊິກສະພາແຫ່ງຊາດສັງກັດພັກປະຊາທິປະໄຕ. ເຖິງວ່າໄດ້ຮັບຖືເປັນມໍລະດົກເສດຖະກິດຂອງປະທານາທິບໍດີອາເມລິກາ Barack Obama ກໍຕາມ, ແຕ່ການເຈລະຈາ TPP ອາດຈະຕ້ອງແກ່ຍາວຕື່ມອີກໄລຍະໜຶ່ງທີ່ເຕັມໄປດ້ວຍຄວາມຫຍຸ້ງຍາກ. ໃນສະພາວະທີ່ອາເມລິກາຢາກຢັ້ງຢືນບົດບາດນຳພາຢູ່ອາຊີຕໍ່ໜ້າປະເທດຈີນພວມຟື້ນຕົວນັ້ນ, ວໍຊິງຕັນເຊື່ອແນ່ວ່າ ຈະຕ້ອງຊອກຫາໄດ້ສຽງເວົ້າລວມເພື່ອບໍ່ອາດພາດໂອກາດນຳ TPP ໄປຮອດຈຸດໝາຍປາຍທາງ.