ບົດລາຍງານຕີລາຄາເພີ່ມເຕີມໝາກຜົນແຫ່ງການພັດທະນາເສດຖະກິດ-ສັງຄົມປີ 2014 ແລະ ສະພາບການຜັນຂະຫຍາຍໜ້າທີ່ໃນຊຸມເດືອນຕົ້ນປີ 2015 ຂອງລັດຖະບານໂດຍທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ສະເໜີທີ່ວາລະໄຂກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຫວຽດນາມຊຸດທີ 13 ເມື່ອຕອນເຊົ້າວັນທີ 20/5 ໄດ້ສະແດງໃຫ້ເຫັນວ່າ ບັນດາຄາດໝາຍເກືອບທັງໝົດທີ່ໄດ້ວາງອອກ ລ້ວນແຕ່ປະຕິບັດສຳເລັດ. ບົດລາຍງານຍັງຊີ້ແຈ້ງເຖິງບັນດາໜ້າທີ່ຈຸດສຸມຊຶ່ງລັດຖະບານໄດ້ວາງອອກໃນຊຸມເດືອນທີ່ຍັງເຫຼືອຂອງປີ 2015 ເພື່ອສູ້ຊົນສຳເລັດແຜນ ພັດທະນາເສດຖະກິດ-ສັງຄົມໃນປີ 2015 ໃຫ້ສູງກວ່າ ແລະ ໜັກແໜ້ນກວ່າເມື່ອທຽບໃສ່ປີ 2014.
ກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຫວຽດນາມຊຸດທີ 13 ຖືກໄຂຂຶ້ນເມື່ອຕອນເຊົ້າວັນທີ 20/5 |
ເສດຖະກິດ-ສັງຄົມປີ 2014 ບັນລຸຕາມຄາດໝາຍທີ່ໄດ້ວາງອອກ
ບົດລາຍງານໃຫ້ເຫັນວ່າ ໝາກຜົນແຫ່ງການພັດທະນາເສດຖະກິດ-ສັງຄົມປີ 2014 ຂອງຫວຽດນາມດ້ວຍ ບັນດາຄາດໝາຍ, ໜ້າທີ່ເກືອບທັງໝົດທີ່ໄດ້ວາງອອກ ລ້ວນແຕ່ປະຕິບັດສຳເລັດ. ໃນ 14 ຄາດໝາຍຕົ້ນຕໍ, ມີ 13 ຄາດໝາຍສາມາດບັນລຸ ແລະ ລື່ນກາຍແຜນການ, 1 ຄາດໝາຍເກືອບບັນລຸຕາມແຜນການ. ກ່ຽວກັບການປະຕິບັດບັນດາຄາດໝາຍການເຕີບໂຕ, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ໃຫ້ຮູ້ວ່າ :
“ ການເຕີບໂຕ GDP ປີ 2014 ບັນລຸ 5,98%, ລື່ນກາຍຄາດໝາຍທີ່ໄດ້ວາງອອກ ແລະ ແມ່ນອັດຕາສູງສຸດນັບແຕ່ປີ 2011 ເປັນຕົ້ນມາ. ເສດຖະກິດມະຫາພາກເປັນປົກກະຕິກວ່າ, ດັດຊະນີລາຄາໃຊ້ສອຍ CPI ເພີ່ມຂຶ້ນ 1,84 %, ຕ່ຳທີ່ສຸດໃນຫຼາຍປີທີ່ຜ່ານມາ. ວົງເງິນສົ່ງອອກເພີ່ມຂຶ້ນ 13,7%; ດຸນການຄ້າສ່ວນເກີນປີທີ 3 ລຽນຕິດ, ມຸນຄ່າສົ່ງອອກເກີນດຸນ 2,1 ຕື້ USD . ການໜູນຊ່ວຍສັງຄົມໄດ້ຮັບປະກັນ, ຊີວິດການເປັນຢູ່ຂອງປະຊາຊົນໄດ້ຮັບການປົວແປງດີຂຶ້ນ. ການປ້ອງກັນຊາດປ້ອງກັນຄວາມສະຫງົບໄດ້ຮັບການເພີ່ມທະວີ, ອະທິປະໄຕຂອງປະເທດຊາດໄດ້ຮັບການປັກປັກຮັກສາຢ່າງໝັ້ນແກ່ນ, ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍສັງຄົມໄດ້ຮັບປະກັນ ,ວຽກງານພົວພັນຕ່າງປະເທດ, ເຊື່ອມໂຍງເຂົ້າກັບສາກົນໄດ້ບັນລຸໝາກຜົນຫຼາຍຢ່າງ… ”
ແລະກໍຕາມທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ແລ້ວ, ບັນລຸໄດ້ບັນດາໝາກຜົນຄືດັ່ງກ່າວ, ແມ່ນຍ້ອນມີຄວາມມານະພະຍາຍາມຢ່າງໃຫຍ່ຫຼວງຂອງທົ່ວພັກ, ທົ່ວປວງຊົນ ແລະ ທົ່ວກອງທັບ.
ເສດຖະກິດ-ສັງຄົມໃນຊຸມເດືອນຕົ້ນປີ 2015 ສືບຕໍ່ຫັນປ່ຽນໄປຢ່າງຕັ້ງໜ້າ
ຕາມບົດລາຍງານ ສະພາບການພັດທະນາເສດຖະກິດ-ສັງຄົມໃນຊຸມເດືອນຕົ້ນປີ 2015 ສືບຕໍ່ຫັນປ່ຽນຢ່າງຕັ້ງໜ້າ ແລະ ບັນລຸບັນດາໝາກຜົນໃນຂົງເຂດເກືອບທັງໝົດ. ລະອຽດຄື : ດັດຊະນີລາຄາໃຊ້ສອຍ CPI ໃນ 4 ເດືອນຕົ້ນປີເພີ່ມຂຶ້ນ 0,04 %, ຕ່ຳທີ່ສຸດໃນຫຼາຍປີທີ່ຜ່ານມາ. ຍອດວົງເງິນສົ່ງອອກເພີ່ມຂຶ້ນ 8,2%. ເງິນລົງທຶນໂດຍກົງຂອງຕ່າງປະເທດເພີ່ມຂຶ້ນ 5%, ບັນລຸ 4,2 ຕື້ USD, GDP ໃນໄຕມາດທີ 1 ເພີ່ມຂຶ້ນ 6,03%, ຊຶ່ງແມ່ນຕົວເລກສູງສຸດໃນ 5 ປີທີ່ຜ່ານມາ.
ກ່ຽວກັບຂົງເຂດວັດທະນະທຳ,ສັງຄົມ, ລັດຖະບານໄດ້ເອົາໃຈໃສ່ປະຕິບັດນະໂຍບາຍບຸລິມະສິດສຳລັບບັນດາຜູ້ທີ່ມີຄຸນງາມຄວາມດີຕໍ່ການປະຕິວັດ, ຈັດຕັ້ງບັນດາການເຄື່ອນໄຫວຕອບບຸນແທນຄຸນ, ແກ້ໄຂວຽກເຮັດງານທຳໃຫ້ແກ່ແຮງງານ 500.000 ຄົນ ເພີ່ມຂຶ້ນ2,7%ເມື່ອທຽບໃສ່ໄລຍະດຽວກັນຂອງປີກາຍ.
ກ່ຽວກັບຂົງເຂດປ້ອງກັນຊາດ ປ້ອງກັນຄວາມສະຫງົບ, ການພົວພັນຕ່າງປະເທດ, ເຊື່ອມໂຍງເຂົ້າກັບສາກົນ, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ຊີ້ແຈ້ງວ່າ :
“ ກຳລັງບົ່ມຊ້ອນດ້ານປ້ອງກັນຊາດປ້ອງກັນຄວາມສະຫງົບສືບຕໍ່ໄດ້ຮັບການເພີ່ມທະວີ, ອະທິປະໄຕຂອງປະເທດຊາດໄດ້ຮັບການປັກປັກຮັກສາຢ່າງໝັ້ນແກ່ນ, ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍສັງຄົມໄດ້ຮັບປະກັນ, ວຽກງານພົວພັນຕ່າງປະເທດໄດ້ຮັບການຜັນຂະຫຍາຍຮອບດ້ານ, ເປັນເຈົ້າການຍາດແຍ່ງການສະໜັບສະໜູນໃນເວທີປາໄສຫຼາຍຝ່າຍ…”
7 ໜ້າທີ່ຕົ້ນຕໍໃນຊຸມເດືອນທີ່ຍັງເຫຼືອຂອງປີ 2015
ໃນຊຸມເດືອນທີ່ຍັງເຫຼືອຂອງປີ 2015 , ລັດຖະບານກຳນົດ 7 ໜ້າທີ່ບຸລິມະສິດອັນດັບໜຶ່ງເພື່ອພັດທະນາເສດຖະກິດສັງຄົມ. ໃນນັ້ນສຸມໃສ່ການປົວແປງສະພາບແວດລ້ອມລົງທຶນ, ແກ້ໄຂຄວາມຫຍຸ້ງຍາກໃຫ້ການຜະລິດ, ດຳເນີນທຸລະກິດ, ຊຸກຍູ້ການເຕີບໂຕ, ຍູ້ແຮງການສ້າງໂຄງປະກອບເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ; ພັດທະນາວັດທະນະທຳສັງຄົມ, ຍົກສູງຊີວິດທາງດ້ານວັດຖຸ ແລະ ຈິດໃຈໃຫ້ແກ່ປະຊາຊົນ, ຍູ້ແຮງການປະຕິຮູບລະບຽບການບໍລິຫານ, ຕ້ານສໍ້ລາດບັງຫຼວງ, ການຟຸມເຟືອຍ, ຍົງສູງປະສິດທິຜົນວຽກງານພົວພັນຕ່າງປະເທດ, ເຊື່ອມໂຍງເຂົ້າກັບສາກົນ, ເພີ່ມທະວີວຽກງານຖະແຫຼງຂ່າວສື່ສານ. ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ຊີ້ແຈ້ງວ່າ : (ເທບ) : “ ປີ 2015, ສູ້ຊົນບັນລຸຄາດໝາຍສັງລວມ ແລະ ບັນດາຄາດໝາຍຕົ້ນຕໍທີ່ໄດ້ວາງອອກ, ໃນນັ້ນ, ລະດັບການເຕີບໂຕ GDP ບັນລຸ 6,2%, ຍອດວົງເງິນສົ່ງອອກເພີ່ມຂຶ້ນ 10%, ລະດັບເພີ່ມຄ່າໃຊ້ສອຍປະມານ 5%, ສ້າງວຽກເຮັດງານທຳໃຫ້ແກ່ແຮງງານ 1,6 ລ້ານຄົນ. ສືບຕໍ່ປະຕິບັດແຜນຮ່າງສັງລວມສ້າງໂຄງປະກອບເສດຖະກິດ ແລະ ບັນດາແຜນຮ່າງສ້າງໂຄງປະກອບຂອງຂະແໜງ, ຂົງເຂດຄືນໃໝ່. ສືບຕໍ່ປະຕິບັດຍຸດທະສາດປົກປັກຮັກສາປະເທດຊາດໃນສະພາບການໃໝ່, ປົກປັກຮັກສາອະທິປະໄຕຜືນແຜ່ນດິນ, ຜົນປະໂຫຍດແຫ່ງຊາດໃຫ້ໝັ້ນຄົງໜັກແໜ້ນ ”
ປີ 2015, ຫວຽດນາມມີບັນດາວັນບຸນໃຫຍ່ ແລະ ເຫດການທີ່ສຳຄັນຍິ່ງ, ທັງແມ່ນປີສຸດທ້າຍຂອງອາຍຸການກອງປະຊຸມໃຫຍ່ຄັ້ງທີ 11 ຂອງພັກ. ທົ່ວພັກ, ທົ່ວກອງທັບ, ທົ່ວປວງຊົນ ຈົ່ງສາມັກຄີກັນ ເປັນຈິດໜຶ່ງໃຈດຽວ, ອອກແຮງແຂ່ງຂັນ, ພະຍາຍາມຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຕັດສິນໃຈປະຕິບັດແຜນການ ພັດທະນາເສດຖະກິດສັງຄົມປີ 2015 ຢ່າງມີໄຊ, ຈັດຕັ້ງສຳເລັດຜົນກອງປະຊຸມໃຫຍ່ອົງຄະນະພັກຂັ້ນຕ່າງໆ, ກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ. ລັດຖະບານສະເໜີ, ສະພາແຫ່ງຊາດ, ແນວໂຮມປະເທດຊາດຫວຽດນາມ, ບັນດາອົງການຈັດຕັ້ງມະຫາຊົນ ແລະ ພໍ່ແມ່ພີນ້ອງຮ່ວມຊາດ ຈົ່ງເພີ່ມທະວີການຕິດຕາມ ກວດກາ, ສົມທົບກະທຳ, ພະຍາຍາມສູ້ຊົນສ້າງການຫັນປ່ຽນຢ່າງແຂງແຮງ ແລະ ຄົບຊຸດກວ່າອີກໃນທຸກວຽກງານ, ຕັດສິນໃຈເຮັດສຳເລັດບັນດາເປົ້າໝາຍ ແລະ ໜ້າທີ່ພັດທະນາເສດຖະກິດສັງຄົມທີ່ໄດ້ວາງອອກຢ່າງມີໄຊ.