ມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 12 ໄດ້ຍົກອອກ 4 ໝວດມາດຕະການແກ້ໄຂເພື່ອໃຫ້ບັນດາອົງການຈັດຕັ້ງພັກກວດກາ ແລະ ຄວບຄຸມສິດອຳນາດ. ຫາງສຽງໄດ້ຕີລາຄາສູງມະຕິ ແລະ ບັນດາອົງຄະນະພັກຂັ້ນຮາກຖານຊຶ່ງໄດ້ ແລະ ພວມຕັ້ງໜ້າຜັນຂະຫຍາຍປະຕິບັດມະຕິດັ່ງກ່າວ.
ກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 12 |
ຈຸດໃໝ່ຂອງມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 12 ແມ່ນໄດ້ຊີ້ແຈ້ງເຖິງ 27 ຈຸດໃນ 3 ກຸ່ມ, ຂົງເຂດກ່ຽວກັບກ່ຽວກັບການເສື່ອມເສຍທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ ແລະ ກ່ຽວກັບປະກົດການ “ ຜັນແປເອງ”, “ ຫັນປ່ຽນເອງ”ໃນໝູ່ພະນັກງານ, ສະມາຊິກພັກ. ນີ້ແມ່ນຈຸດທີ່ສຳຄັນທີ່ສຸດເພື່ອຮັບປະກັນການຍືນຍົງຄົງຕົວ ແລະ ພັດທະນາຂອງພັກ, ຮັບປະກັນບົດບາດ, ອິດທິພົນຊື່ສຽງ ແລະ ຜົນສະທ້ອນຂອງລັດ.
ບັນດາວິທີການແກ້ໄຂຢ່າງມີປະສິດທິຜົນເພື່ອສ້າງການຫັນປ່ຽນຢ່າງແທ້ຈິງ.
ເລື່ອງຄະນະບໍລິຫານງານສູນກາງພັກຊີ້ແຈ້ງເຖິງບັນດາປະກົດການເສື່ອມເສຍທາງດ້ານແນວຄິດການເມືອງ, ຄຸນສົມບັດ, ວິຖີຊີວິດຂອງພະນັກງານ, ສະມາຊິກພັກ ບໍ່ພຽງແຕ່ສະແດງໃຫ້ເຫັນຄວາມຊື່ຕົງໃນການສັງເກດຕີລາຄາຕົວຈິງຊຶ່ງພວມເກີດຂຶ້ນຢູ່ພາຍໃນພັກປະຈຸບັນເທົ່ານັ້ນ, ຫາກຜ່ານນັ້ນ ເພື່ອໃຫ້ບັນດາອົງການພັກຂັ້ນຮາກຖານຜັນຂະຫຍາຍການຕຳໜິຕິຊົມຕົນເອງ ແລະ ຕຳໜິຕິຊົມກັນ ພ້ອມທັງຊອກຫາວິທີການແກ້ໄຂ. ທ່ານຮອງສາດສະດາຈານ, ປອ ຫງວຽນຈ້ອງຟຸກ ສັງກັດສະຖາບັນການເມືອງແຫ່ງຊາດໂຮ່ຈິມິນ ໄຈ້ແຍກວ່າ :
“ ຄືດັ່ງທ່ານປະທານໂຮ່ຈິມິນໄດ້ເຄີຍຕັກເຕືອນວ່າ ຖ້າຫາກມີຈຸດອ່ອນ ແມ່ນຕ້ອງຍອມຮັບ ແລະ ຕັດສິນໃຈແກ້ໄຂ. ສຳລັບຜູ້ໃດບໍ່ລະເມີດ, ກໍຕ້ອງຮູ້ເພື່ອຫຼີກລ້ຽງການລະເມີດ, ຈາກນັ້ນ ເພື່ອກ້າວໜ້າ ແລະ ພັດທະນາຕົນເອງ. ຜ່ານນັ້ນ, ກໍຍົກສູງລັກສະນະລະບຽບວິໄນ, ລັກສະນະພັກ, ລັກສະນະຕໍ່ສູ້ໃນການດຳເນີນຊີວິດພັກ. ດຳເນີນການສຳຫຼວດກວດຄືນ, ສັງເກດຕີລາຄາ, ຈາກນັ້ນ ຈຶ່ງສ້າງຄຸນນະພາບການນຳພາຂອງອົງການຈັດຕັ້ງພັກ ”
ທ່ານ ເຈືອງມິນຮ່ວາງ ຮອງຫົວໜ້າຄະນະ ສ.ສ.ຊ ສະເພາະກິດແຂວງ ກາເມົາ ຖືວ່າ ຄວນຜັນຂະຫຍາຍປະຕິບັດມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 12 ຢ່າງເລິກເຊິ່ງກ້ວາງຂວາງລົງສູ່ແຕ່ລະອົງການຈັດຕັ້ງພັກ, ໜ່ວຍພັກ ແລະ ສະມາຊິກພັກແຕ່ລະຄົນເພື່ອສ້າງການຫັນປ່ຽນຢ່າງແທ້ຈິງໃນວຽກງານກໍ່ສ້າງພັກ. ທ່ານ ເຈືອງມິນຮ່ວາງ ຮອງຫົວໜ້າຄະນະ ສ.ສ.ຊ ສະເພາະກິດແຂວງ ກາເມົາ ເວົ້າວ່າ:
“ ມີການຫັນປ່ຽນໃນຫມູ່ພະນັກງານສະມາຊິກພັກນັ້ນ, ວຽກງານກໍ່ສ້າງພັກຈຶ່ງປະກົດຜົນເປັນຈິງ. ເພາະວ່າໃນແຕ່ລະຂັ້ນ, ແຕ່ລະເຫດການເມື່ອເກີດຂຶ້ນ, ດີຫຼືບໍ່ດີ ກໍລ້ວນແຕ່ຍ້ອນພະນັກງານ. ມະຕິຂອງຄະນະບໍລິຫານງານສູນກາງພັກກອມມູນິດຫວຽດນາມຕ້ອງໄດ້ຮັບການຜັນຂະຫຍາຍ ຢ່າງເລິກເຊິ່ງກ້ວາງຂວາງ, ລະອຽດ, ສືບຕໍ່ຮ່ຳຮຽນ ແລະ ເຮັດຕາມແບບຢ່າງຄຸນສົມບັດປະທານໂຮ່ຈິມິນ. ພ້ອມກັນນັ້ນ, ພະນັກງານສະມາຊິກພັກແຕ່ລະຄົນຕ້ອງມີໂຄງການເຄື່ອນໄຫວຝຶກຝົນຫຼໍ່ຫຼອມແກ່ຕົນເອງໂດຍລະອຽດ. ຕ້ອງ ຝຶກຝົນຫຼໍ່ຫຼອມເປັນປະຈຳ, ໜ້າທີ່ຮັບຜິດຊອບວຽກງານຕໍ່ມະຫາຊົນຈຶ່ງນັບມື້ນັບດີຂຶ້ນ ”
ໃຫ້ຄະແນນຕາມມາດຖານເພື່ອຕີລາຄາພະນັກງານ
ຜັນຂະຫຍາຍປະຕິບັດມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 12 ໃນວຽກງານກໍ່ສ້າງຖັນແຖວພະນັກງານ ແມ່ນວຽກງານທີ່ຫຍຸ້ງຍາກ. ເພື່ອໃຫ້ມາດຖານຕີລາຄາພະນັກງານມີຄຸນນະພາບ, ຄະນະຈັດຕັ້ງສູນກາງພັກໄດ້ມີແຜນຮ່າງ “ ສ້າງມາດຖານຖານະຕຳແໜ່ງພະນັກງານ, ມາດຖານຕີລາຄາພະນັກງານທີ່ຂຶ້ນກັບການຄຸ້ມຄອງຂອງກົມການເມືອງ, ຄະນະເລຂາສູນກາງພັກ ”. ທ່ານ ມາຍແທງເຢີນ ຫົວໜ້າຄະນະຈັດຕັ້ງຄະນະພັກນະຄອນ ເກີນເທີ ຕີລາຄາວ່າ :
“ ນັບແຕ່ກ່ອນເປັນຕົ້ນມາ, ພວກເຮົາພຽງແຕ່ສຸມໃສ່ລົງເລິກການຕີລາຄາພະນັກງານບັນດາທ້ອງຖິ່ນ ແລະ ຂັ້ນຮາກຖານ. ໃນຄັ້ງນີ້, ສູນກາງພັກໄດ້ຍົກອອກບັນດາມາດຖານລະອຽດເພື່ອຕີລາຄາຖັນແຖວພະນັກງານໂດຍສູນກາງພັກຄຸ້ມຄອງ. ຂ້າພະເຈົ້າຖືວ່າ ນີ້ແມ່ນບາດກ້າວບຸກທະລຸເພື່ອໃຫ້ບັນດາທ້ອງຖິ່ນມີເງື່ອນໄຂປະຕິບັດຢ່າງເຂັ້ມງວດ ແລະ ມີປະສິດທິຜົນໃນການຕີລາຄາພະນັກງານການນຳຄຸ້ມຄອງຂັ້ນຕ່າງໆ ”
ແລະ ກໍຕາມແຜນຮ່າງດັ່ງກ່າວ, ບັນຫາທາງດ້ານມາດຖານ, ວິທີການ, ຂັ້ນຕອນຕີລາຄາພະນັກງານ; ກ່ຽວກັບມາດຖານ, ຖານະຕຳແໜ່ງພະນັກງານ, ການກວດກາ, ເພີ່ມເຕີມການວາງແຜນກຳນົດຊັບຊ້ອນພະນັກງານ; ຂັ້ນຕອນການແຕ່ງຕັ້ງ, ແນະນຳພະນັກງານອອກສະໝັກເລືອກຕັ້ງ… ກໍຈະຖືກປັບປຸງ, ເພີີ່ມເຕີມເພື່ອຮັບປະກັນລັກສະນະຄົບຊຸດ, ບັນລຸປະສິດທິຜົນສູງ.
ການຜັນຂະຫຍາຍປະຕິບັດມະຕິກອງປະຊຸມຄັ້ງທີ 4 ຂອງສູນກາງພັກກ່ຽວກັບການເພີີ່ມທະວີການກໍ່ສ້າງ, ປັບປຸງພັກ, ສະກັດກັ້ນ ແລະ ຍູ້ຖອຍການເສື່ອມເສຍທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ, ບັນດາປະກົດການ “ ຜັນແປເອງ”, “ ຫັນປ່ຽນເອງ” ຢູ່ພາຍໃນ ແມ່ນມີຄວາມໝາຍສຳຄັນທີ່ສຸດ. ການຜັນຂະຫຍາຍປະຕິບັດມະຕິກອງປະຊຸມຄັ້ງທີ 4 ສູນກາງພັກໃຫ້ເປັນຢ່າງດີນັ້ນ, ກໍແມ່ນເງື່ອນໄຂເພື່ອໃຫ້ຄະນະພັກຂັ້ນຕ່າງໆບູລະນະຖັນແຖວພະນັກງານໂດຍຜ່ານການຈັດຕັ້ງວຽກງານວາງແຜນກຳນົດຊັບຊ້ອນພະນັກງານ, ບຳລຸງສ້າງ, ແຕ່ງຕັ້ງ ແລະ ນຳໃຊ້ພະນັກງານຢ່າງເປີດເຜີຍ, ກະຈ່າງແຈ້ງ ແລະ ມີປະຊາທິປະໄຕ. ຜ່ານນັ້ນ ກໍເປັນການປະກອບສ່ວນສ້າງຖັນແຖວພະນັກງານທີ່ມີຄວາມຮູ້, ຄວາມສາມາດ, ຄຸນສົມບັດເພື່ອຜົນປະໂຫຍດລວມຂອງການພັດທະນາ ແລະ ການຍືນຍົງຄົງຕົວຂອງຊາດ.