ບົດກ່າວປາໄສຂອງທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ທີ່ກອງປະຊຸມສະໄໝສາມັນຄັ້ງປະຖົມມະເລີກ ສະພາແຫ່ງຊາດຫວຽດນາມຊຸດທີ 14 ກໍຄືບັນດາການຊີ້ນຳໃນກອງປະຊຸມຄັ້ງທຳອິດຂອງລັດຖະບານພາຍຫຼັງທີ່ລັດຖະບານໄດ້ຮັບການບູລະນະ ໄດ້ສະແດງໃຫ້ເຫັນຄວາມຕັດສິນໃຈຂອງ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ ບັນດາສະມາຊິກລັດຖະບານໃນການກໍ່ສ້າງລັດຖະບານໃຫ້ມີການປັບປຸງ ແລະ ເຄື່ອນໄຫວດ້ວຍຄວາມທ່ຽງທຳ. ຄວາມຕັດສິນໃຈຂອງ ທ່ານນາຍົກລັດຖະມົນຕີໄດ້ຮັບການກະທົບຕອບຢ່າງຕັ້ງໜ້າຈາກຫາງສຽງ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ |
ສານຂອງ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໃນການຊີ້ນຳ ບໍລິຫານພັດທະນາເສດຖະກິດ-ສັງຄົມ ແມ່ນຈະແຈ້ງ, ແທດຈິງ ແລະ ລະອຽດທີ່ສຸດ. ມັນສະແດງໃຫ້ເຫັນໜ້າທີ່ຄວາມຮັບຜິດຊອບຕໍ່ພັກ, ລັດ ຊຶ່ງປະຊາຊົນໄດ້ມອບໝາຍໃຫ້ແກ່ລັດຖະບານ ແລະ ນາຍົກລັດຖະມົນຕີ.
ບໍ່ທໍ້ຖອຍໃຈຕໍ່ຄວາມຫຍຸ້ງຍາກ
ທ່ານນາຍົກລັດຖະມົນຕີ ໄດ້ສັງເກດວ່າ ປະເທດຊາດພວມຢືນຢູ່ຕໍ່ໜ້າກາລະໂອກາດພັດທະນາ ແຕ່ກໍປະສົບກັບສິ່ງທ້າທາຍບໍ່ແມ່ນໜ້ອຍ. ຫວຽດນາມຕ້ອງເສີມຂະຫຍາຍກຳລັງພາຍໃນ ແລະ ຍາດແຍ່ງແຫຼ່ງກຳລັງເພື່ອຜົນປະໂຫຍດແຫ່ງຊາດ, ເພື່ອພັດທະນາຢ່າງວ່ອງໄວ ແລະ ຍືນຍົງ, ກໍ່ສ້າງປະເທດຊາດໃຫ້ຮັ່ງມີເຂັ້ມແຂງ, ມີທີ່ຕັ້ງບົດບາດນັບມື້ນັບສູງບົນເວທີ່ສາກົນ. ບົນເນື້ອໃນຈິດໃຈດັ່ງກ່າວ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຢືນຢັນວ່າ ແຜນນະໂຍບາຍທີ່ສະເໝີຕົ້ນສະເໝີປາຍຂອງລັດຖະບານຫວຽດນາມ ແມ່ນກໍ່ສ້າງ “ ລັດຖະບານຜ່ານການປັບປຸງ, ເຄື່ອນໄຫວດ້ວຍຄວາມທ່ຽງທຳເພື່ອຮັບໃຊ້ປະຊາຊົນ”. ປັດໄຈເຫຼົ່ານີ້ ຈະສ້າງລັດຖະບານໃຫ້ມີການເຄື່ອນໄຫວຢ່າງມີຄຸນນະພາບໃນການປະຕິບັດບັນດາໜ້າທີ່ພັດທະນາໄລຍະ 2016 – 2021 ຕໍ່ໜ້າບັນດາສິ່ງທ້າທາຍບໍ່ງ່າຍດາຍນັບທັງຢູ່ພາຍໃນປະເທດ, ສາກົນ ແລະ ໃນວິວັດການເຊື່ອມໂຍງເຂົ້າກັບສາກົນ. ທ່ານ ບຸຍວັນເກືອງ ສ.ສ.ຊ ແຂວງ ຢາລາຍ ສະແດງຄວາມເຊື່ອໝັ້ນວ່າ :
“ ໃນອາຍຸການນີ້, ພາຍໃຕ້ການຊີ້ນຳຂອງນາຍົກລັດຖະມົນຕີ ພິເສດແມ່ນການບໍລິຫານ ຈະມີບັນດາການປ່ຽນແປງໃໝ່ ແລະ ຈະຮັບໃຊ້ປະຊາຊົນ, ວິສາຫະກິດໃຫ້ເປັນຢ່າງດີກ່ວາ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ມີສານທີ່ແຂງແຮງ, ອາດຈະເວົ້າໄດ້ວ່າ ຈາກການຊີ້ນຳ, ບໍລິຫານຕະຫຼອດຮອດການປັບປຸງ ແລະ ຮັບໃຊ້, ນີ້ແມ່ນແນວຄິດໃໝ່ທີ່ສຸດ ”
ໂດຍປະຕິບັດເປົ້າໝາຍນີ້, ໃນກອງປະຊຸມຄັ້ງທຳອິດຂອງລັດຖະບານຊຸດໃໝ່, ທ່ານນາຍົກລັດຖະມົນຕີໄດ້ມອບໝາຍ 10 ວຽກງານໃຫ້ແກ່ບັນດາລັດຖະມົນຕີ, ສະມາຊິກລັດຖະບານ. ເຮັດໄດ້ວຽກງານ 10 ປະການນີ້ ແມ່ນສາມາດກຳແໜ້ນທັງໝົດວິວັດທະນາການພັດທະນາຂອງສັງຄົມ. ຕາມນັ້ນແລ້ວ, ທ່ານນາຍົກລັດຖະມົນຕີໄດ້ສະເໜີວ່າ ກ່ອນອື່ນໝົດຕ້ອງຮີບຮ້ອນສ້າງດຳລັດກຳນົດພາລະໜ້າທີ່ຂອງບັນດາອົງການຄຸ້ມຄອງລັດຂັ້ນສູນກາງດ້ວຍຈິດໃຈລັດຖະບານປັບປຸງເພື່ອພັດທະນາ.
ລັດຖະບານຍັງຈະນຳໜ້າໃນການປະຢັດເງິນທຶນຂອງລັດ, ການນຳໃຊ້ຊັບສິນສ່ວນລວມ, ລົດຂອງລັດ; ມີຄວາມຮັບຜິດຊອບຕໍ່ເງິນເສຍພາສີແຕ່ລະດົງຂອງປະຊາຊົນ, ນຳໃຊ້ຢ່າງໂປ່ງໃສ, ມີປະສິດທິຜົນ, ເພື່ອຜົນປະໂຫຍດລວມຂອງປະຊາຊົນ ແລະ ທົ່ວສັງຄົມ.
ທາງດ້ານເສດຖະກິດ, ທ່ານນາຍົກລັດຖະມົນຕີສັງເກດວ່າ ໜ້າທີ່ໃຫ້ບັນລຸລະດັບເຕີບໂຕ 6,7% ໃນປີ 2016 ແມ່ນຫຍຸ້ງຍາກຢູ່ ແຕ່ພວກເຮົາຍັງມີເວລາ, ຍັງມີກາລະໂອກາດ ກໍຕ້ອງພະຍາຍາມ, ເດັດດ່ຽວບໍ່ທໍ້ຖອຍໃຈ. ໃນນະໂຍບາຍຮັບ ແລະ ຄຸ້ມຄອງບັນດາໂຄງການລົງທຶນຕ່າງປະເທດ, ທ່ານນາຍົກລັດຖະມົນຕີຢືນຢັນວ່າ ຈະສືບຕໍ່ຊຸກຍູ້ການສ້າງອາຊີບ, ພັດທະນາວິສາຫະກິດຢ່າງແຂງແຮງ, ເປັນຕົ້ນແມ່ນວິສາຫະກິດພາກເອກະຊົນ, ວິສາຫະກິດຂະໜາດກາງ ແລະ ນ້ອຍ ເຮັດແນວໃດເພື່ອໃຫ້ວິສາຫະກິດຫວຽດນາມເຂົ້າຮ່ວມເລິກໃນລະບົບມູນຄ່າທົ່ວໂລກ ແລະ ປະສົບຜົນສຳເລັດຢູ່ຕະຫຼາດພາຍໃນ ແລະ ສາກົນ.
ຄວາມເຊື່ອໝັ້ນຈາກຫາງສຽງ ແລະ ຄວາມຕັດສິນໃຈກະທຳຂອງລັດຖະບານ.
ສານ ແລະ ການຊີ້ນຳຢ່າງຂ້ຽວຂາດຂອງ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແມ່ນໄດ້ຮັບການກະທົບຕອບຢ່າງຕັ້ງໜ້າຈາກຫາງສຽງ. ທ່ານ ເຈີນຮວາງເງີນ ສ.ສ.ຊ ນະຄອນ ໂຮ່ຈິມິນ ຊີ້ແຈ້ງວ່າ :
“ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ສະແດງໃຫ້ເຫັນທາດແທ້ດ້ານການເມືອງ ແລະ ຄວາມຮັບຜິດຊອບຂອງຕົນຕໍ່ປະຊາຊົນ ແລະ ປະຕິບັດການສ້າງລັດຖະບານມີການກະທຳ, ປະເຊີນໜ້າກັບຕົວຈິງ, ປະເຊີນໜ້າກັບຄວາມຫຍຸ້ງຍາກເພື່ອແກ້ໄຂ. ລັດຖະບານໄດ້ມີສານຈະແຈ້ງ, ກໍ່ສ້າງລັດຖະບານກະທຳຢ່າງໂປ່ງໃສ, ພິເສດ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ສ້າງຄວາມເຊື່ອໝັ້ນໃຫ້ແກ່ວົງການນັກທຸລະກິດ, ຈາກນັ້ນ ກໍປົວແປງສະພາບແວດລ້ອມແຫ່ງການລົງທຶນ ແລະ ດຳເນີນທຸລະກິດ. ນິ້ແມ່ນປັດໄຈສຳຄັນເພື່ອຊ່ວຍໃຫ້ແກ່ການບໍລິຫານ ແລະ ພັດທະນາເສດຖະກິດຂອງປະເທດຊາດໃນໄລຍະທີ່ຈະມາເຖິງແບບຍືນຍົງ ”
ໃນຂະນະນັ້ນ, ທ່ານປະທານຫ້ອງການການຄ້າ ແລະ ອຸດສາຫະກກຳຫວຽດນາມວູ້ຕ້ຽນໂລກ ຢືນຢັນວ່າ :
“ ພາຍຫຼັງທີ່ລັດຖະບານໄດ້ຮັບການບູລະນະດ້ວຍການຊີ້ນຳຢ່າງຂ້ຽວຂາດຂອງທ່ານນາຍົກລັດຖະມົນຕີ, ນັບທັງທາງດ້ານຈີນຕະນາການ, ທັດທະນະ, ລະບຽບວິໄນ ແລະ ໂຄງການເຄື່ອນໄຫວ ເກືອບຄືວ່າ ໄດ້ມີກະແສລົມແຫ່ງການປ່ຽນແປງໃໝ່ຂອງການປະຕິຮູບທີ່ໄດ້ເປັນຮູບປະທຳ ແລະ ເຊື່ອໝັ້ນຕໍ່ສະພາບແວດລ້ອມແຫ່ງການດຳເນີນທຸລະກິດໄດ້ຮັບການປຸກລຸກອີກຄັ້ງໜຶ່ງ. ຂ້າພະເຈົ້າກໍພາກພູມໃຈທີ່ສຸດ ເມື່ອເຫັນວ່າ ເຖິງວ່າ ມີກຳລັງດັນຢ່າງໃຫຍ່ຫຼວງແມ່ນຕ້ອງຍູ້ແຮງການເຕີບໂຕ, ແຕ່ລັດຖະບານຍັງຄົງຍຶດໝັ້ນເປົ້າໝາຍສ້າງເສດຖະກິດມະຫາພາກເປັນປົກກະຕິ, ຢືນຢັນທັດສະນະ ຖືເອົາສະຖຽນລະພາບດ້ານເສດຖະກິດມະຫາພາກເປັນພື້ນຖານໃຫ້ແກ່ການເຕີບໂຕ, ບໍ່ເດີນຕາມຄາດໝາຍການເຕີບດ້ວຍທຸກວິທີ ”
ຄວາມຕັດສິນໃຈກະທຳຂອງລັດຖະບານ ແລະ ນາຍົກລັດຖະມົນຕີ ໃນການຍາດແຍ່ງກາລະໂອກາດ, ສິ່ງທີ່ສະດວກ, ແກ້ໄຂຂໍ້ຄວາມຈຳກັດ, ມານະພະຍາຍາມກະທຳຢ່າງຂ້ຽວຂາດ, ຮັບໃຊ້ປະຊາຊົນແມ່ນກຳລັງດັນທີ່ສຳຄັນ. ຄວາມຕັດສິນໃຈນີ້ ຈະປະກອບສ່ວນຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ, ສ້າງເງື່ອນໄຂເພື່ອໃຫ້ຫວຽດນາມສືບຕໍ່ພັດທະນາແບບຍືນຍົງໃນອະນາຄົດທີ່ຍາວໄກກວ່າ .