ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝີ້ນ ແລະ ພັນລະຍາ (ພາບ: quochoi.vn)

        ໂດຍຮັບຄຳເຊີນຂອງທ່ານປະທານສະພາສູງ ຍີ່ປຸ່ນ Sekiguchi Masakazu, ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝີ້ນ ແລະ ພັນລະຍາ, ພ້ອມກັບຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ເດີນທາງໄປຢ້ຽມຢາມ ຍີ່ປຸ່ນ ຢ່າງເປັນທາງການ, ແຕ່ວັນທີ 03 – 07 ທັນວາ. ການຢ້ຽມຢາມຄັ້ງນີ້ເພື່ອແນໃສ່ຊຸກຍູ້ການພົວພັນຮ່ວມມືຂອງສະພາແຫ່ງຊາດ ຫວຽດນາມ ກັບລັດຖະສະພາ ຍີ່ປຸ່ນ, ສ້າງກຳລັງໜູນໃໝ່ໃຫ້ແກ່ທ່ວງທ່າພັດທະນາຂອງ 2 ປະເທດ.

        ນີ້ແມ່ນການຢ້ຽມຢາມ ຍີ່ປຸ່ນ ຢ່າງເປັນທາງການຄັ້ງທຳອິດຂອງທ່ານປະທານສະພາແຫ່ງຊາດ ເຈິ່ນແທັງເໝີ້ນ, ພ້ອມກັນນັ້ນ, ກໍ່ແມ່ນການຢ້ຽມຢາມ ຍີ່ປຸ່ນ ເປັນຄັ້ງທຳອິດຂອງປະທານສະພາແຫ່ງຊາດ ຫວຽດນາມ, ພາຍຫຼັງເວລາ 12 ປີ ນັບແຕ່ປີ 2012, ແລະ ພາຍຫຼັງ 2 ປະເທດຍົກລະດັບການພົວພັນຂຶ້ນເປັນ “ຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະ ຄວາມວັດທະນາຖາວອນຢູ່ ອາຊີ ແລະ ໃນໂລກ” ຄົບຄອບ 1 ປີ (27 ພະຈິກ 2023).

ການພົວພັນຍາມໃດກໍ່ໄດ້ກຳນົດລະດັບຄວາມໄວ້ເນື້ອເຊື່ອໃຈດ້ານການເມືອງສູງ

        ໃນໄລຍະກວ່າ 50 ປີຜ່ານມາ ນັບແຕ່ເມື່ອ 2 ປະເທດສ້າງຕັ້ງການພົວພັນທາງການທູດປີ 1973, ການພົວພັນຂອງ 2 ປະເທດໄດ້ມີຫຼາຍບາດກ້າວພັດທະນາຢ່າງແຮງ, ກະໂດດຂັ້ນ ແລະ ຮອບດ້ານ, ຈາກການສ້າງຂອບເຂດການພົວພັນຈາກຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ, ສະຖຽນລະພາບຍາວນານ (ປີ 2002) ຂຶ້ນເປັນຄູ່ຮ່ວມມືຍຸດທະສາດຮອບດ້ານ ເພື່ອສັນຕິພາບ ແລະ ຄວາມວັດທະນາຖາວອນຢູ່ ອາຊີ ແລະ ໃນໂລກ (ປີ 2023).

ທ່ານສະມາຊິກສະພາຕ່ຳ ຍີ່ປຸ່ນ Aoyagi Yoichiro (ພາບ: quochoi.vn)

        ການພົວພັນ ຫວຽດນາມ - ຍີ່ປຸ່ນ ມີຫຼາຍຜົນປະໂຫຍດລວມ, ບັນລຸຄວາມເຫັນດີເຫັນພ້ອມສູງ ແລະ ການສະໜັບສະໜູນຈາກລັດຖະບານ ແລະ ບັນດາພັກການເມືອງໃຫຍ່ຂອງ ຍີ່ປຸ່ນ. ທ່ານສະມາຊິກສະພາຕ່ຳ ຍີ່ປຸ່ນ Aoyagi Yoichiro, ຖືວ່າ:

        “ອາດຢັ້ງຢືນໄດ້ວ່າ, ນີ້ແມ່ນການພົວພັນບໍ່ພຽງແຕ່ຢຸດຢູ່ການຮ່ວມມືດ້ານເສດຖະກິດເທົ່ານັ້ນ, ຫາກລວມທັງດ້ານການເມືອງ, ຄວາມໝັ້ນຄົງ - ການປ້ອງກັນຊາດ, ການທູດ, ວັດທະນະທຳ… ມີຄວາມໝາຍນັບທັງດ້ານສັນຍາລັກ. ເມື່ອມີໂອກາດແລກປ່ຽນກັບຝ່າຍ ຫວຽດນາມ, ຂ້າພະເຈົ້າໄດ້ເນັ້ນໜັກເປັນຫຼາຍຄັ້ງວ່າ ຕ້ອງເພີ່ມທະວີການພົວພັນລະຫວ່າງ 2 ປະເທດໃນຫຼາຍລະດັບ, ຊ້ຳໄປຊ້ຳມາຢ່າງຕໍ່ເນື່ອງ”.

        ພິເສດ, ການຮ່ວມມືລະຫວ່າງ 2 ອົງການນິຕິບັນຍັດຂອງ 2 ປະເທດໄດ້ສວມບົດບາດສຳຄັນໃນການພົວພັນລວມ ຫວຽດນາມ - ຍີ່ປຸ່ນ. 2 ຝ່າຍໄດ້ດຳເນີນການແລກປ່ຽນ, ພົບປະຂັ້ນສູງ ແລະ ທຸກຂັ້ນ, ປະກອບສ່ວນຢ່າງແທດຈິງເຂົ້າໃນການຜັນຂະຫຍາຍ ແລະ ຊຸກຍູ້ບັນດາຂໍ້ຕົກລົງຂອງ 2 ປະເທດ, ສ້າງການແຜ່ຂະຫຍາຍ ແລະ ໜູນຊ່ວຍການເຄື່ອນໄຫວຂອງລັດຖະບານ, ຍູ້ແຮງການທູດປະຊາຊົນ, ຮັບປະກັນປະສິດທິຜົນບັນດາລາຍການ, ໂຄງການຮ່ວມມືລະຫວ່າງ ຫວຽດນາມ ແລະ ຍີ່ປຸ່ນ.

ທ່ານເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຟ້າມກວາງຮ້ຽວ (ພາບ: TTXVN)

        ນອກນັ້ນ, ສະພາແຫ່ງຊາດ ຫວຽດນາມ ແລະ ລັດຖະສະພາ ຍີ່ປຸ່ນ ຍັງຊຸກຍູ້ການພົບປະແລກປ່ຽນສະມາຊິກລັດຖະສະພາໃນຂອບເຂດກອງປະຊຸມສະມາຊິກລັດຖະສະພາມິດຕະພາບ ແລະ ສະມາຊິກລັດຖະສະພາໜຸ່ມ, ສະມາຊິກລັດຖະສະພາ/ສະພາແຫ່ງຊາດຍິງ ດ້ວຍຫຼາຍຮູບແບບທີ່ອຸດົມສົມບູນ, ຫຼາຍຮູບຫຼາຍແບບ. ກຸ່ມສະມາຊິກລັດຖະສະພາມິດຕະພາບ ຫວຽດນາມ - ຍີ່ປຸ່ນ ພ້ອມກັບສະຫະພັນລັດຖະສະພາ ຍີ່ປຸ່ນ - ຫວຽດນາມ ຍາມໃດກໍ່ສວມບົດບາດເປັນຂົວເຊື່ອມຕໍ່ຕັ້ງໜ້າ, ຊຸກຍູ້ການພົວພັນຮ່ວມມືລະຫວ່າງ 2 ປະເທດໃນຫຼາຍຂົງເຂດ. ທ່ານເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຟ້າມກວາງຮ້ຽວ, ຖືວ່າ:

        “ສະພາແຫ່ງຊາດ ຫວຽດນາມ ແລະ ລັດຖະສະພາ ຍີ່ປຸ່ນ ເພີ່ມທະວີບັນດາກົນໄກຮ່ວມມືແລກປ່ຽນບົດຮຽນໃນວຽກງານນິຕິບັນຍັດ, ໂດຍສະເພາະແມ່ນໃນການສ້າງລະບອບລະບຽບການ ສ້າງເງື່ອນໄຂໃຫ້ແກ່ເສດຖະກິດ - ສັງຄົມຂອງປະເທດພັດທະນາຢ່າງແຮງ. ໂດຍສະເພາະແມ່ນໃນສະພາບການ ຫວຽດນາມ ກ້າວເຂົ້າສູ່ທົດສະວັດໃໝ່ - ທົດສະຫວັດແຫ່ງການບຸກບືນຂອງຊາດ. ໂດຍແມ່ນປະເທດມີຫຼາຍປະສົບການໃນວຽກງານສ້າງກົດໝາຍ ແລະ ບຳລຸງສ້າງຜູ້ຊ່ຽວຊານດ້ານນິຕິກຳ, ຍີ່ປຸ່ນ ສາມາດໜູນຊ່ວຍ ຫວຽດນາມ ໃນວຽກງານຍົກສູງກຳລັງການສ້າງກົດໝາຍຢ່າງມີປະສິດທິຜົນ”.

ທ່ານນາງຮອງປະທານກຳມາທິການການຕ່າງປະເທດຂອງສະພາແຫ່ງຊາດ ເລທູຮ່າ (ພາບ: TTXVN)

ຫັນເນື້ອໃນການພົວພັນຄູ່ຮ່ວມມືຍຸດທະສາດຮອບດ້ານໃຫ້ເປັນລະອຽດກວ່າ

        ບົນພື້ນຖານການພົວພັນອັນດີງາມ, ການຢ້ຽມຢາມ ຍີ່ປຸ່ນ ຢ່າງເປັນທາງການຂອງທ່ານປະທານສະພາແຫ່ງຊາດ ເຈິ່ນແທັງເໝີ້ນ ມີຄວາມໝາຍສຳຄັນພິເສດ, ຫັນບັນດາເນື້ອໃນໃໝ່ໃນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຍີ່ປຸ່ນ - ຫວຽດນາມ ໃຫ້ເປັນລະອຽດກວ່າ. ທ່ານນາງຮອງປະທານກຳມາທິການການຕ່າງປະເທດຂອງສະພາແຫ່ງຊາດ ຫວຽດນາມ ເລທູຮ່າ, ໃຫ້ຮູ້ວ່າ:

        “ໃນການຢ້ຽມຢາມຄັ້ງນີ້, ທ່ານປະທານສະພາແຫ່ງຊາດ ຫວຽດນາມ ແລະ ທ່ານປະທານສະພາສູງ ຍີ່ປຸ່ນ ຈະລົງນາມໃນຂໍ້ຕົກລົງຮ່ວມມືລະຫວ່າງ 2 ອົງການນິຕິບັນຍັດ. ຂ້າພະເຈົ້າຖືວ່າ, ນີ້ແມ່ນປະຖົມປັດໄຈສຳຄັນທີ່ສຸດເພື່ອປະກອບສ່ວນເພີ່ມທະວີປະສິດທິຜົນການເຄື່ອນໄຫວຮ່ວມມືລະຫວ່າງ 2 ອົງການນິຕິບັນຍັດ, ສ້າງເງື່ອນໄຂສະດວກເພື່ອໃຫ້ 2 ຝ່າຍຜັນຂະຫຍາຍບັນດາການເຄື່ອນໄຫວຮ່ວມມື 2 ຝ່າຍ, ກໍ່ຄືຢູ່ບັນດາເວທີປາໄສຫຼາຍຝ່າຍ, ປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ເພື່ອສັນຕິພາບ ແລະ ຄວາມວັດທະນາຖາວອນຢູ່ ອາຊີ ແລະ ໃນໂລກ, ສອດຄ່ອງກັບຜົນປະໂຫຍດຂອງປະຊາຊົນ 2 ປະເທດ”.

        ການຢ້ຽມຢາມ ຍີ່ປຸ່ນ ຂອງທ່ານປະທານສະພາແຫ່ງຊາດ ເຈິ່ນແທັງເໝີ້ນ ໃນຄັ້ງນີ້ ແມ່ນເພື່ອແນໃສ່ຊຸກຍູ້ການຜັນຂະຫຍາຍນບັນດາຂໍ້ຕົກລົງລະຫວ່າງ 2 ປະເທດ, ສ້າງກຳລັງໜູນໃໝ່ໃຫ້ແກ່ທ່ວງທ່າພັດທະນາຢ່າງແຮງຂອງ 2 ປະເທດໃນໄລຍະຈະມາເຖິງ.