(vovworld)-ຫນຶ່ງໃນບັນດາເນື້ອໃນຊື່ງໄດ້ນຳມາປຶກສາຫາລືທີ່ກອງປະຊຸມຄັ້ງທີ 10 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ທີ່ດຳເນີນໄປຢູ່ ຮ່າໂນ້ຍ ນັ້ນແມ່ນຮ່າງແຜນກຳນົດ ແລະ ຄຸ້ມຄອງສື່ມວນຊົນຮອດປີ 2025. ກ່ຽວກັບບັນຫານີ້, ບັນນາທິການວິທະຍຸກະຈາຍສຽງຫວຽດນາມມີບົດຂຽນທີ່ພາດຫົວຂໍ້ວ່າ: “ສ້າງພື້ນຖານສື່ມວນຊົນເໝາະສົມກັບ ການພັດທະນາຕົວຈິງຂອງຫວຽດນາມ.”
ພາບປະກອບ:internet
|
ໃນບົດປາໄສໄຂກອງປະຊຸມຄັ້ງທີ 10 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11, ທ່ານເລຂາທິການໃຫຍ່ ຫງວຽນຟູຈ້ອງ ໃຫ້ຮູ້ວ່າ: ກອງປະຊຸມສູນກາງພັກຄັ້ງນີ້ ເອົາໃຈໃສ່ເຖິງການປະກອບຄຳເຫັນໃສ່ແຕ່ລະບັນຫາ, ເປັນຕົ້ນແມ່ນການຍົກສູງຄຸນນະພາບ, ໂຮມອົງການສື່ມວນຊົນເຂົ້າກັນ, ດັດປັບອົງການຄຸ້ມຄອງ ແລະ ເພີ່ມທະວີວຽກງານຄຸ້ມຄອງສື່ມວນຊົນໃນສະພາບການໃຫມ່. ສິ່ງດັ່ງກ່າວແມ່ນເລີ່ມຈາກຄວາມໝາຍ, ຄວາມສຳຄັນພິເສດຂອງສື່ມວນຊົນປະຕິວັດໃນພາລະກິດສ້າງສາ ແລະ ປົກປັກຮັກສາປະເທດຫວຽດນາມ ໃນໄລຍະໃຫມ່.
ສື່ມວນຊົນຫວຽດນາມມີການພັດທະນາຢ່າງແຮງ
ຕາມຕົວເລກສະຖິຕິທີ່ກອງປະຊຸມສື່ມວນຊົນທົ່ວປະເທດດຳເນີນໄປຫວ່າງແລ້ວນີ້, ປະຈຸບັນ ທົ່ວປະເທດ ມີ 845 ອົງການຫນັງສືພິມ ແລະ ວາລະສານ, ມີສຳນັກຂ່າວສານແຫ່ງຊາດ 1 ແຫ່ງ, ສື່ເອເລັກໂຕນິກ 98 ແຫ່ງ, ວິທະຍຸກະຈາຍສຽງ ແລະ ໂທລະພາບ 67 ແຫ່ງ. ໄລ່ສະເພາະປີ 2014, ມີຕື່ມອີກ 7 ອົງການຫນັງສືພິມ, 6 ອົງການສື່ເອເລັກໂຕນິກ ໄດ້ຮັບການສ້າງຕັ້ງຂຶ້ນ. ນອກນັ້ນ, ຍັງມີຊ່ອງໂທລະພາບປ່ຽນແປ່ງ ເນື້ອໃນການເຄື່ອນໄຫວ ຕື່ມອີກ 2 ແຫ່ງ. ກ່ຽວກັບສິ່ງດັ່ງກ່າວ, ທ່ານຮອງສາດສະດາຈານ, ດຣ ຫງວຽນວັນຢືງ, ຫົວຫນ້າພະແນກສື່ມວນຊົນ, ສະຖາບັນສື່ມວນຊົນ ແລະ ໂຄສະນາ ຖືວ່າ: ຂົງເຂດສື່ມວນຊົນ ມີສັນຍານໄປຝືນກັບໂລກ.
“ໄປຝືນກັບໂລກຢູ່ບ່ອນວ່າ ໃນຂະນະທີ່ງສື່ສິ່ງພິມປະສົບກັບຄວາມຫຍຸ້ງຍາກ, ມີຫລາຍອົງການສື່ສິ່ງພິມໃນໂລກຖືກຍຸບເລີກ, ໂຮມເຂົ້າກັນ, ສ່ວນອົງການ ສື່ສິ່ງພິມຂອງຫວຽດນາມ ປີໃດກໍເພີ່ມຂຶ້ນ. ການສ້າງຕັ້ງຂອງອົງການສື່ສິ່ງພິມ ນັ້ນ ບາງເທື່ອບໍ່ເລີ່ມຈາກຄວາມຕ້ອງການຕົວຈິງ.”
ຍົກສູງຄຸນນະພາບ, ໂຮມອົງການສື່ມວນຊົນຈຳນວນຫນຶ່ງເຂົ້າກັນ
ເມື່ອຕີລາຄາກ່ຽວກັບສະພາບຕົວຈິງຂອງສື່ມວນຊົນຫວຽດນາມ ປະຈຸບັນ, ທ່ານ ຫງວຽນບັກຊອນ, ລັດຖະມົນຕີວ່າການກະຊວງຖະແຫລງຂ່າວ ແລະ ສື່ສານ ຫວຽດນາມ ຖືວ່າ: ໃນໄລຍະຜ່ານມາ ມີອົງການສື່ມວນຊົນຫລາຍແຫ່ງ ຂະຫຍັນຂັນເຄື່ອນ, ປ່ຽນໃຫມ່, ຕັ້ງຫນ້າ, ຮັບມືກັບກົນໄກຕະຫລາດຕາມການກຳນົດທິດສັງຄົມນິຍົມ. ການເຄື່ອນໄຫວຂອງສື່ມວນຊົນ, ສື່ອອນລາຍສັງຄົມໄດ້ນຳມາຂໍ້ມູນຂ່າວສານດີຫລາຍຢ່າງໃຫ້ແກ່ປະຊາຊົນ. ເຖິງຢ່າງໃດກໍຕາມ, ການເຄື່ອນໄຫວຂອງບັນດາອົງການສື່ມວນຊົນຍັງສະແດງໃຫ້ເຫັນການຟຸມເຟືອຍກ່ຽວກັບແຫລ່ງຊັບພະຍາກອນມະນຸດ, ຂາດສີສັນສະເພາະ. ພ້ອມກັນນັ້ນ, ການພັດທະນາຢ່າງແຮງກ່ຽວກັບຈຳນວນອົງການສື່ມວນຊົນຄືແນວນັ້ນ ຍາກທີ່ຫລີກລ້ຽງການແກ້ງແຍ້ງກ່ຽວກັບຂໍ້ມູນຂ່າວສານ, ພາໄປເຖິງມີບັນດາຂໍ້ມູນຂ່າວສານບໍ່ທັນໄດ້ຮັບການກວດກາ, ຜິດກັບຄວາມຈິງ, ບໍ່ຖືກກັບການກຳນົດທິດ, ການສຶກສາຂອງສື່ມວນຊົນຫວຽດນາມ. ສະນັ້ນ ການວາງແຜນກຳນົດສື່ມວນຊົນປະຈຸບັນ ແມ່ນຈຳເປັນທີ່ສຸດ. ໃນຄໍລຳ “ປະຊາຊົນຖາມ, ລັດຖະມົນຕີຕອບ” ອອກອາກາດທາງໂທລະພາບເມື່ອເດືອນ 6/2014, ທ່ານ ຫງວຽນບັກຊອນ, ລັດຖະມົນຕີວ່າການກະຊວງຖະແຫລງຂ່າວ ແລະ ສື່ສານ ຢືນຢັນວ່າ:
“ການວາງແຜນກຳນົດສື່ມວນຊົນບໍ່ພຽງແຕ່ເພື່ອພິຈາລະນາຫລຸດຜ່ອນຈຳນວນສື່ມວນຊົນລົງເທົ່ານັ້ນ ຫາກສຳຄັນກວ່າ ແມ່ນພວກເຮົາຕ້ອງສ້າງກອບກົດໝາຍ, ບັນດານະໂຍບາຍເພື່ອສ້າງສື່ມວນຊົນໃຫ້ເໝາະສົມກ່ຽວກັບດ້ານຈຳນວນ, ພິເສດ ຍົກສູງຄຸນນະພາບ. ນີ້ກໍແມ່ນເງື່ອນໄຂເພື່ອໃຫ້ພວກເຮົາປະຕິບັດພັນທະ, ສິດຜົນປະໂຫຍດຂອງພົນລະເມືອງໃນການປະຕິບັດສິດເສລີໃນການປາກເວົ້າ, ສິດເສລີສື່ມວນຊົນຊື່ງໄດ້ລະບຸໄວ້ໃນລັດຖະທຳມະນູນປີ 2013 ໃຫ້ດີກວ່າ.”
ມຸ່ງໄປເຖິງພື້ນຖານສື່ມວນຊົນເໝາະສົມກັບສະພາບຕົວຈິງຢູ່ຫວຽດນາມ
ໂດຍກຳນົດຢ່າງຈະແຈ້ງຄວາມສຳຄັນຂອງສື່ມວນຊົນໃນສະພາວະເຊື່ອມໂຍງ ແລະ ຄວາມຕ້ອງການຂໍ້ມູນຂ່າວສານຢ່າງກະໂດດຂັ້ນຄືປະຈຸບັນ ສະນັ້ນ ທີ່ກອງປະຊຸມຄັ້ງທີ 10 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ໄດ້ພິຈາລະນາ, ປຶກສາຫາລືຮ່າງແຜນກຳນົດພັດທະນາ ແລະ ຄຸ້ມຄອງສື່ມວນຊົນຮອດປີ 2025 ເພື່ອແກ້ໄຂບັນດາບັນຫາຍັງຄົງຄ້າງ, ກຳນົດທິດສ້າງພື້ນຖານສື່ມວນຊົນມີຄຸນນະພາບ, ເຄື່ອນໄຫວຢ່າງມີປະສິດທິຜົນກວ່າ. ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ:
“ເມື່ອພິຈາລະນາແຜນຮ່າງ, ຂ້າພະເຈົ້າສະເຫນີຄວນສຸມໃສ່ປຶກສາຫາລືເຮັດແຈ້ງ, ສ້າງຄວາມເປັນເອກະພາບສູງກ່ຽວກັບຄວາມຈຳເປັນຕ້ອງສ້າງ, ປະກາດໃຊ້ ແລະ ຜັນຂະຫຍາຍການປະຕິບັດແຜນກຳນົດພັດທະນາ ແລະ ຄຸ້ມຄອງສື່ມວນຊົນຮອດປີ 2025. ຕີລາຄາໝາກຜົນ, ຜົນງານທີ່ບັນລຸໄດ້ ແລະ ບັນດາຂໍ້ຈຳກັດ, ອ່ອນດ້ອຍ, ຂໍ້ຄົງຄ້າງ, ບັນດາບັນຫາຮ້ອນເຮັ່ງຢ່າງຖືກຕ້ອງ, ຄວນສືບຕໍ່ປ່ຽນໃຫມ່, ແກ້ໄຂໃນການຈັດຕັ້ງ, ເຄື່ອນໄຫວ, ພັດທະນາ ແລະ ຄຸ້ມຄອງຂອງລະບົບສື່ມວນຊົນຫວຽດນາມ ປະຈຸບັນ ລວມທັງ ສື່ສິ່ງພິມ, ກະຈາຍສຽງ, ໂທລະພາບ ແລະ ສື່ເອເລັກໂຕນິກ. ຄວນເອົາໃຈໃສ່ຢ່າງຮອບດ້ານເຖິງຈຳນວນ, ຄຸນນະພາບ, ເນື້ອໃນ, ຮູບການ, ຊັບພະຍາກອນມະນຸດ, ການເງິນ, ວິທີການເຄື່ອນໄຫວເສດຖະກິດຂອງບັນດາອົງການສື່ມວນຊົນ ແລະ ການຊີ້ນຳນຳພາ, ການຄຸ້ມຄອງຂອງບັນດາອົງການ, ຄະນະ, ກະຊວງ, ຂະແຫນງການກ່ຽວຂ້ອງ. ຕ້ອງຄາດຄະເນຕາມທ່າອ່ຽງຈະມາເຖິງ ຈາກນັ້ນ ກຳນົດຢ່າງຖືກຕ້ອງບັນດາທັດສະນະ, ຈຸດໝາຍ, ການກຳນົດທິດວາງແຜນກຳນົດ ແລະ ບັນດາຫນ້າທີ່, ມາດຕະການຮັບປະກັນການປະຕິບັດແຜນກຳນົດຢ່າງມີໄຊ.”
ແຜນຮ່າງວາງແຜນກຳນົດ ແລະ ພັດທະນາສື່ມວນຊົນຮອດປີ 2025 ແລະ ມະຕິກອງປະຊຸມຄັ້ງທີ 10 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ຈະແມ່ນທິດທາງພື້ນຖານ ແລະ ແທດຈິງ ເພື່ອໃຫ້ສື່ມວນຊົນຫວຽດນາມ ສືບຕໍ່ພັດທະນາເໝາະສົມກັບສະພາບຕົວຈິງຂອງຫວຽດນາມ.