ໂດຍແມ່ນໜຶ່ງໃນບັນດາປະເທດທີ່ຕ້ອງຮັບຜົນກະທົບຢ່າງໃຫຍ່ຫຼວງຈາກການປ່ຽນແປງຂອງດິນຟ້າອາກາດດ້ວຍບັນດາປະກົດການອາກາດທີ່ບໍ່ດີ, ເປັນຕົ້ນແມ່ນໃນຂົງເຂດກະສີກຳ. ຫຼາຍໂຄງການ, ມາດຕະການແກ້ໄຂໄດ້ຖືກຜັນຂະຫຍາຍໃນຂົງເຂດນີ້ ແນໃສ່ດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດ.
ບັນດາວາລະປະຊຸມປຶກສາຫາລືກ່ຽວກັບມາດຕະການດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດ |
ກະສີກຳແມ່ນຈຸດສຸມຂອງພື້ນຖານເສດຖະກິດຫວຽດນາມ, ປະກອບສ່ວນກວ່າ 18% GDP. ກະສີກຳນຳໃຊ້ເຖິງເກືອບເຄິ່ງໜຶ່ງກຳລັງແຮງງານຂອງທົ່ວປະເທດດ້ວຍຮູບແບບທົ່ວໄປແມ່ນການຜະລິດແບບຄອບຄົວທີ່ມີຂອບຂະໜາດນ້ອຍ. ຜົນກະທົບຈາກ ການປ່ຽນແປງຂອງດິນຟ້າອາກາດແມ່ນແຕກຕ່າງກັນລະຫວ່າງບັນດາເຂດດິນຟ້າອາກາດຂອງຫວຽດນາມ ແຕ່ກໍລ້ວນແຕ່ກໍ່ຜົນເສຍຫາຍຢ່າງໜັກໜ່ວງຕໍ່ການຜະລິດກະສີກຳ, ປ່າໄມ້ ແລະ ການປະມົງ.
ໃນສະພາວະດັ່ງກ່າວ, ການຊອກຫາວິທີດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດ ກໍແມ່ນຈຸດສຸມໃນການຮັບມືກັບການປ່ຽນແປງຂອງດິນຟ້າອາກາດ. ໃນຂົງເຂດກະສີກຳ, ການດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດ ແມ່ນໄດ້ຮັບຄວາມເປັນເຈົ້າການຜັນຂະຫຍາຍຢູ່ຫຼາຍຂັ້ນ, ຫຼາຍຂົງເຂດ.
ເປັນເຈົ້າການດັດປັບໃຫ້ແທດເໝາະໃນຫຼາຍຂົງເຂດ
ຕາມການພະຍາກອນອາກາດແລ້ວ, ຄາດວ່າ ນ້ຳທະເລຂຶ້ນສູງ 100 ຊັງຕີແມັດ ອາດຈະພາໃຫ້ແຂວງເຫົ້າຢາງ ແລະ ກຽນຢາງຖືກນ້ຳຖ້ວມໃນເນື້ອທີ່ທຳມະຊາດ 77%. ໃນຂະນະນັ້ນ, ບັນດາແຂວງ: ທ້າຍບີງ, ນາມດິ້ງ, ຊອກຈັງ, ບາກລຽວ, ກາເມົາ ຖືກນ້ຳຖ້ວມ ສະເລ່ຍ 50%. ຄິດໄລ່ໃນທົ່ວເຂດ, ເຂດທົ່ງພຽງແມ່ນ້ຳແດງຖືກນ້ຳຖ້ວມ 16,8% ເນື້ອທີ່ ແລະ ເຂດທົ່ງພຽງແມ່ນ້ຳຂອງ ທາງພາກໃຕ້ຫວຽດນາມ ຖືກນ້ຳຖ້ວມເກືອບ 40% ເນື້ອທີ່. ທ່ານຮອງລັດຖະມົນຕີກະຊວງກະສີກຳ ແລະ ພັດທະນາຊົນນະບົດຫວຽດນາມ ເລກ໋ວກແຢງ ໃຫ້ຮູ້ວ່າ ສຳລັບຂະແໜງປູກຝັງ, ຕ້ອງສຸມໃສ່ ເພີ່ມທະວີການນຳໃຊ້ວິທະຍາສາດ, ເຕັກໂນໂລຢີ, ການລົງທຶນ ແລະ ປົວແປງພື້ນຖານໂຄງລ່າງ, ເປັນຕົ້ນແມ່ນໂຄງລ່າງການຜະລິດ ແລະ ການປຸງແຕ່ງຜະລິດຕະພັນກະເສດ ແລະ ປ່ຽນໃໝ່ນະໂຍບາຍ. ນອກຈາກນັ້ນ, ກໍຄວນເອົາໃຈໃສ່ເປີດກ້ວາງເນື້ອທີ່, ການປູກຝັງແບບກະເສດສຸມ, ເພີ່ມສະມັດຕະພາບ, ຄຸນນະພາບ ແລະ ຄວາມປອດໄພດ້ານສະບຽງອາຫານສຳລັບບັນດາຕົ້ນໄມ້ໃຫ້ໝາກທີ່ມີຕະຫຼາດຈຳໜ່າຍເປັນຢ່າງດີ. ໂດຍມີທັດສະນະເຊັ່ນດຽວກັນ, ທ່ານ ໂຮ່ຊວນຮຸ່ງ ປະທານ ສະມາຄົມໃຫຍ່ກະສີກຳຫວຽດນາມ ຖືວ່າ :
“ ສຳຄັນທີ່ສຸດໃນປະຈຸບັນ, ແມ່ນຕ້ອງພິຈາລະນາໂຄງປະກອບຜົນລະປູກຄືນໃໝ່. ພວກເຮົາຕ້ອງດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດ. ຖ້າຫາກພວກເຮົາພະຍາກອນອາກາດໄດ້ໂດຍໄວນັ້ນ, ກໍສາມາດຫັນປ່ຽນໂຄງປະກອບ, ຈັດຕັ້ງການຜະລິດຄືນໃໝ່ໃຫ້ຊາວກະສີກອນ. ທ່າໄດ້ປຽບຂອງກະສີກຳເພື່ອເຕີບໂຕໃນປະຈຸບັນ ແມ່ນຂົງເຂດລ້ຽງສັດ, ສິນໃນນ້ຳ, ຖັດມາ ແມ່ນແນວປູກພິເສດ, ຜັກ ແລະ ໝາກໄມ້, ພ້ອມກັນນັ້ນ ກໍເລັ່ງໃສ່ພັດທະນາເສດຖະກິດປ້າໄມ້ ”
ໃນບັນດາມາດຕະການແກ້ໄຂດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດຄື ຕ້ານໄພແຫ້ງແລ້ງ, ນ້ຳທະເລຊຶມຍາວນານນັ້ນ, ກໍຄວນຄິດໄລ່ເຖິງການວາງແຜນກຳນົດລະບົບຊົນລະປະທານໃຫ້ຄົບຊຸດຕາມເຂດເພື່ອຮັກສາບົດບາດດັດປັບແຫຼ່ງນ້ຳ, ສະກັດກັ້ນສະພາບນ້ຳທະເລຊຶມ, ຮັກສາແຫຼ່ງນ້ຳຈືດ. ທ່ານ ຫງວຽນວັນເຕີມ ຫົວໜ້າພະແນກກະສີກຳ ແລະ ພັດທະນາຊົນນະບົດແຂວງກຽນຢາງ ມີຄຳເຫັນດັ່ງນີ້ :
“ ໃນຍາວນານ, ກໍຄວນເອົາໃຈໃສ່ຫຼາຍກ່ວາເຖິງແຫຼ່ງທຶນເພື່ອກໍ່ສ້າງລະບົບຊົນລະປະທານ, ເຮັດແນວໃດເພື່ອແທດເໝາະກັບຈຸດພິເສດສະເພາະຂອງການຜະລິດໃນແຕ່ລະເຂດ. ທີ 2 ແມ່ນລະບົບຖະແຫຼງຂ່າວ ແມ່ນຕ້ອງຕອບສະໜອງຄວາມຕ້ອງການຢ່າງທັນການ, ກ່າວເຕືອນແຫຼ່ງນ້ຳຢູ່ບາງແຫ່ງຕໍ່ໜ້າສະພາບນ້ຳທະເລຊຶມໄວ ”
ເພີ່ມທະວີການດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດຢູ່ຂັ້ນທ້ອງຖິ່ນ
ການດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດກໍໄດ້ຮັບການຜັນຂະຫຍາຍຕາມເງື່ອນໄຂພິເສດສະເພາະຂອງແຕ່ລະທ້ອງຖິ່ນ. ແຂວງ ແຄ້ງຮ່ວາເລັ່ງໃສ່ໃຫ້ບຸລິມະສິດບາງຂົງເຂດຄື ພື້ນຖານໂຄງລ່າງຜະລິດກະສີກຳ, ການຜະລິດເກືອ, ລ້ຽງປູກສິນໃນນ້ຳ. ທ່ານ ຫງວຽນແຄ້ງຮວານ ຫົວໜ້າຫ້ອງການຄະນະຊີ້ນຳການປ້ອງກັນ ແລະ ຕ້ານໄພທຳມະຊາດ ແລະ ຊອກຫາກູ້ໄພກູ້ຊີບແຂວງເບັນແຈ ໃຫ້ຮູ້ວ່າ ທາງທ້ອງຖິ່ນໄດ້ຕັ້ງໜ້າໂຄສະນາກ່ຽວກັບຜົນກະທົບຈາກການປ່ຽນແປງຂອງດິນຟ້າອາກາດເພື່ອໃຫ້ປະຊາຊົນມີສະຕິຄວາມຮັບຮູ້ກ່ຽວກັບໜ້າທີ່ປັກປັກຮັກສາປ່າ, ແຫຼ່ງນ້ຳ. ທ່ານ ຫງວຽນແຄ້ງຮວານ ກ່າວວ່າ :
“ ບັນຫາຮັກສາແຫຼ່ງນ້ຳຈືດ ຮັບໃຊ້ຊີວິດປະຈຳວັນ ແລະ ການຜະລິດແມ່ນສຳຄັນທີ່ສຸດ. ພວກຂ້າພະເຈົ້າສຸມໃສ່ໂຄສະນາທາງພາຫະນະສື່ມວນຊົນເພື່ອຮັບໃຊ້ປະຊາຊົນ. ຜ່ານນັ້ນ ຄວາມຮັບຮູ້ຂອງປະຊາຊົນກໍຄ່ອຍໆຖືກຍົກສູງຂຶ້ນ. ຊາວທ້ອງຖິ່ນໄດ້ເປັນເຈົ້າການສະສົມແຫຼ່ງນ້ຳຈືດ, ແກ້ໄຂຜົນຮ້າຍຂອງໄພທຳມະຊາດ ”
ເພື່ອ ດັດປັບໃຫ້ແທດເໝາະກັບສະພາບການປ່ຽນແປງຂອງດິນຟ້າອາກາດໃນຂົງເຂດກະສີກຳ, ຫວຽດນາມກໍໄດ້ເປັນເຈົ້າການເພີ່ມທະວີການຮ່ວມມືສາກົນກັບອົງການ ສ.ປ.ຊ ເພື່ອຜັນຂະຫຍາຍຂໍ້ລິເລີ່ມນຳກະສີກຳເຂົ້າໃນແຜນການ ດັດປັບໃຫ້ແທດເໝາະລະດັບຊາດ. ແຜນການທີ່ແກ່ຍາວ 3 ປີນີ້ ຈະຊ່ວຍຊອກຫານະໂຍບາຍພັດທະນາທີ່ຍັງບໍ່ທັນສອດຄ່ອງ ເພື່ອຍົກອອກວິທີການແກ້ໄຂ.
ຜົນກະທົບທີ່ບໍ່ດີຈາກ ການປ່ຽນແປງຂອງດິນຟ້າອາກາດໃນຂົງເຂດກະສີກຳ ແມ່ນໄພອັນຕະລາຍ, ສົ່ງຜົນສະທ້ອນເຖິງເປົ້າໝາຍລົບລ້າງຄວາມອຶດຫິວຫຼຸດຜ່ອນຄວາມທຸກຍາກ ແລະ ການພັດທະນາແບບຍືນຍົງຂອງປະເທດຊາດ. ເລື່ອງຫວຽດນາມມານະພະຍາຍາມເພີ່ມທະວີຄວາມສາມາດດັດປັບໃຫ້ແທດເໝາະ, ເພີ່ມທະວີຄວາມສາມາດຮັບມືກັບ ການປ່ຽນແປງຂອງດິນຟ້າອາກາດ, ເປັນຕົ້ຍແມ່ນໃນ ຂົງເຂດກະສີກຳແມ່ນເພື່ອຫຼຸດຜ່ອນຜົນກະທົບທີ່ບໍ່ດີຈາກການປ່ຽນແປງຂອງດິນຟ້າອາກາດລົງໃນລະດັບຕ່ຳສຸດ .