ວັນທີ 18/7, ທ່ານນາຍົກລັດຖະມົນຕີ ສ.ສະໂລວາເກຍ Robert Fico ໄດ້ເລີ່ມຕົ້ນບັນດາການເຄື່ອນໄຫວໃນຂອບເຂດການຢ້ຽມຢາມຫວຽດນາມຢ່າງເປັນທາງການຕາມຄຳເຊີນຂອງທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ. ນີ້ແມ່ນການຢ້ຽມຢາມຫວຽດນາມຄັ້ງທີ 2 ຂອງທ່ານນາຍົກລັດຖະມົນຕີ ສ.ສະໂລວາເກຍ Robert Fico ແລະ ໄດ້ຮັບການດຳເນີນພາຍຫຼັງທີ່ທ່ານໄດ້ຮັບການເລືອກຕັ້ງຄືນໃໝ່ເມື່ອເດືອນ 3. ການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີ ສ.ສະໂລວາເກຍ Robert Fico ແມ່ນເພື່ອແນໃສ່ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ການຮ່ວມມືຫຼາຍດ້ານລະຫວ່າງ 2 ປະເທດ, ພ້ອມກັນນັ້ນ ກໍເປັນການຍູ້ແຮງການຮ່ວມມືໃນຂົງເຂດຕ່າງໆ, ພິເສດແມ່ນເສດຖະກິດ-ການຄ້າ, ການລົງທຶນ, ການສຶກສາ ແລະ ກໍ່ສ້າງ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ ທ່ານ ນາຍົກລັດຖະມົນຕີ ສ.ສະໂລວາເກຍ Robert Fico |
ປະຈຸບັນ, ສະໂລວາເກຍແມ່ນສະມາຊິກຂອງສະຫະພາບເອີລົບ EU, ອົງການ NATO ແລະ ອົງການຮ່ວມມື ແລະ ພັດທະນາເສດຖະກິດ OECD . ນັບແຕ່ວັນທີ 1/7/2016 ສະໂລວາເກຍໄດ້ຮັບໜ້າທີ່ເປັນປະທານໝູນວຽນຂອງສະພາ EU .
ຫວຽດນາມ ແລະ ສະໂລວາເກຍໄດ້ຖະແຫຼງສືບທອດບັນດາສາຍພົວພັນລະຫວ່າງຫວຽດນາມ ແລະ ເຊັກໂກເມື່ອກ່ອນນີ້ ແລະ ຖືເອົາວັນທີ 2/2/1950 ແມ່ນວັນສ້າງຕັ້ງການພົວພັນທາງການທູດລະຫວ່າງ 2 ປະເທດ. ປີ 2015, ຫວຽດນາມ ແລະ ສະໂລວາເກຍໄດ້ພ້ອມກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງ 65 ປີແຫ່ງວັນສ້າງການພົວພັນທາງການທູດ.
ການພົວພັນທີ່ເດປັນມູນເຊື້ອອັນດີງາມ
ແຕ່ປີ 1993 ມາຮອດປະຈຸບັນ, ການພົວພັນລະຫວ່າງຫວຽດນາມ ແລະ ສະໂລວາເກຍໄດ້ພັດທະນາຢ່າງຕັ້ງໜ້າ. 2 ຝ່າຍໄດ້ລົງນາມໃນເອກະສານຫຼາຍສະບັບເພື່ອສ້າງກອບກົດໝາຍໃຫ້ແກ່ການຮ່ວມມືໃນໄລຍະໃໝ່. ມາຮອດປະຈຸບັນ, 2 ປະເທດໄດ້ເຊັນສັນຍາແມ່ 15 ສະບັບກ່ຽວກັບຫຼາຍຂົງເຂດຄືໜູນຊ່ວຍດ້ານຍຸຕິທຳ, ສ້າງວິຊາຊີບໃຫ້ແກ່ພົນລະເມືອງຫວຽດນາມ, ສາທາລະນະສຸກ, ການບິນ, ວັດທະນະທຳ, ເສດຖະກິດ.
ວົງເງິນການຄ້າ 2 ຝ່າຍລະຫວ່າງ 2 ປະເທດໃນຊຸມປີມໍ່ໆມານີ້ໄດ້ເພີ່ມຂຶ້ນເປັນປົກກະຕິ. ປະຈຸບັນ, ສະໂລວາເກຍແມ່ນນັກລົງທຶນລາຍໃຫຍ່ກ່ວາໝູ່ຂອງພາກພື້ນເອີລົບຕາເວັນອອກກາງທີ່ລົງທຶນຢູ່ຫວຽດນາມດ້ວຍ 5 ໂຄງການທີ່ມີຍອດທຶນຈົດທະບຽນກວ່າ 230 ລ້ານ USD , ຢືນອັນດັບທີ 35 ໃນຍອດຈຳນວນ 105 ປະເທດ ແລະ ເຂດແຄ້ວນທີ່ມີການເຄື່ອນໄຫວລົງທຶນຢູ່ຫວຽດນາມ. ບັນດາໂຄງການຂອງ ສະໂລວາເກຍ ຕັ້ນຕໍແມ່ນສຸມໃສ່ຂົງເຂດການກໍ່ສ້າງຊຶ່ງໄດ້ຮັບການຜັນຂະຫຍາຍຢູ່ຮ່າໂນ້ຍ, ນະຄອນໂຮ່ຈິມິນ, ແຂວງຮ່ວາບິນ. ໃນຂະນະນັ້ນ, ກຸ່ມບໍລິສັດ FPT ຂອງຫວຽດນາມກໍໄດ້ໂຮມເຂົ້າບໍລິສັດເຕັກໂນໂລຢີ RWEIT ສະໂລວາເກຍປີ 2014.
ການຮ່ວມມືທາງດ້ານການສຶກສາ ແລະ ກໍ່ສ້າງໄດ້ຮັບຖືວ່າ ແມ່ນຈຸດທີ່ພົ້ນເດັ່ນໃນການພົວພັນລະຫວ່າງ 2 ປະເທດ. 2 ຝ່າຍໄດ້ເຊັນສັນຍາກ່ຽວກັບການບຳລຸງສ້າງວິຊາຊີບໃຫ້ແກ່ພົນລະເມືອງຫວຽດນາມ. ປະຈຸບັນ 2 ຝ່າຍພວມຊຸກຍູ້ການເຊັນຂໍ້ຕົກລົງຮ່ວມມື ທາງດ້ານການສຶກສາ ແລະ ກໍ່ສ້າງໄລຍະ 2015-2019. ໃນຂອບເຂດການຢ້ຽມຢາມ ສະໂລວາເກຍ ຂອງອະດີດປະທານປະເທດຫວຽດນາມ ຫງວຽນມິນຈຽດເມື່ອທ້າຍປີ 2009, ສະໂລວາເກຍໄດ້ນຳຫວຽດນາມເຂົ້າບັນຊີລາຍຊື່ບັນດາປະເທດບຸລິມະສິດຮັບການໜູນຊ່ວຍທຶນ ODA ຊຶ່ງເລີ່ມແຕ່ປີ 2010 ເປັນຕົ້ນໄປ.
ໃນຂົງເຂດວັດທະນະທຳ, ການທ່ອງທ່ຽວ, ເດືອນ 5/2015, 2 ຝ່າຍໄດ້ເຊັນ “ຂໍ້ຕົກລົງຮ່ວມມືທາງດ້ານວັດທະນະທຳໄລຍະ 2015 – 2019; ຈັດຕັ້ງບັນດາການເຄື່ອນໄຫວສະເຫຼີມສະຫຼອງ 65 ປີແຫ່ງວັນສ້າງການພົວພັນທາງການທູດ ”
ແງ່ຫວັງແຫ່ງການຮ່ວມມື
ສະໂລວາເກຍໄດ້ກຳນົດຫວຽດນາມແມ່ນຄູ່ຮ່ວມມືທີ່ສຳຄັນກວ່າໝູ່ໃນພາກພື້ນອາຊີຕາເວັນອອກສ່ຽງໃຕ້ ກໍຄືອາຊີຕາເວັນອອກ. ປະຈຸບັນ, ສະໂລວາເກຍແມ່ນສະມາຊິກຂອງ EU, ໃນຂະນະນັ້ນ, ຫວຽດນາມກໍແມ່ນສະມາຊິກທີ່ຕັ້ງໜ້າຂອງອາຊຽນ. ດ້ວຍນະໂຍບາຍເປີດປະຕູ ແລະ ກົນໄກເສດຖະກິດທີ່ມີໄຫວພິບ, ຫວຽດນາມສາມາດແບກຫາບໜ້າທີ່ ບົດບາດແມ່ນຂົວຕໍ່ ແລະ ສະຖານທີ່ທີ່ດີເພື່ອໃຫ້ສິນຄ້າຂອງ ສະໂລວາເກຍບໍ່ພຽງແຕ່ແຊກຊຶມເຂົ້າຕະຫຼາດຫວຽດນາມເທົ່ານັ້ນ, ຫາກຍັງເຂົ້າຕະຫຼາດບັນດາປະເທດອາຊຽນອີກດ້ວຍ. ກົງກັນຂ້າມ, ສະໂລວາເກຍກໍແມ່ນຄູ່ຮ່ວມມືທີ່ສຳຄັນ, ແມ່ນປະຕູເພື່ອໃຫ້ສິນຄ້າຫວຽດນາມແຊກຊຶມເຂົ້າ EU ແລະ ເອີລົບ.
ປະຈຸບັນ, ບັນດາວິສາຫະກິດ ສະໂລວາເກຍ ມີຄວາມເອົາໃຈໃສ່ຫຼາຍກ່ວາເຖິງຕະຫຼາດຫວຽດນາມ ແລະ ຢາກຮ່ວມມືກັບຫວຽດນາມໃນຫຼາຍຂົງເຂດເຊັ່ນ: ພະລັງງານ, ພື້ນຖານໂຄງລ່າງ, ເຕັກໂນໂລຢີຂໍ້ມູນຂ່າວສານ, ພະລັງງານນິວເຄຼຍ. ເພາະສະນັ້ນ, ຕິດຕາມທ່ານນາຍົກລັດຖະມົນຕີ ສ.ສະໂລວາເກຍ Robert Fico ມາເຄື່ອນໄຫວຢ້ຽມຢາມຫວຽດນາມຄັ້ງນີ້ ຍັງມີວິສາຫະກິດປະມານ 20 ແຫ່ງທີ່ເຄື່ອນໄຫວໃນຂົງເຂດຜະລິດນ້ຳມັນ, ພະລັງງານ, ເຄື່ອງປາຂອງດົງ, ເຕັກໂນໂລຢີຂໍ້ມູນຂ່າວສານ, ການນຳໃຊ້ເຄື່ອງຄອມພິວເຕີ, ການເງິນ, ທະນາຄານ, ການບໍລິການໂທລະຄົມ, ໂທລະພາບ ແລະ ການຂົນສົ່ງ. ເພື່ອສ້າງເງື່ອນໄຂສະດວກໃຫ້ແກ່ການຮ່ວມມືເສດຖະກິດ, ໃນຂອບເຂດການຢ້ຽມຢາມຂອງຄະນະຄັ້ງນີ້, ເວທີປາໄສວິສາຫະກິດຫວຽດນາມ- ສະໂລວາເກຍໄດ້ຖືກຈັດຂຶ້ນ.
ຫວຽດນາມ ແລະ ສະໂລວາເກຍມີຫຼາຍກາລະໂອກາດເພື່ອພັດທະນາການພົວພັນຮ່ວມມື 2 ຝ່າຍນັບທັງລວງກ້ວາງ ແລະ ລວງເລິກ. ບັນດາເອກະສານໄດ້ຮັບການລົງນາມ ແລະ ບັນດາເນື້ອໃນທີ່ໄດ້ນຳມາປຶກສາຫາລືໃນການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີ ສ.ສະໂລວາເກຍ Robert Fico ຄັ້ງນີ້ ຈະສ້າງແຜນການຮ່ວມມືລະອຽດ, ສ້າງທ່ວງທ່າໃຫ້ແກ່ການພັດທະນາໃໝ່ໃນສາຍພົວພັນລະຫວ່າງ 2 ປະເທດ.