(vovworld)- ວັນທີ 5/8, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບີງມີງ ນຳຫນ້າຄະນະຜູ້ແທນຫວຽດນາມ ໄປເຂົ້າຮ່ວມ ກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 47 (AMM-47) ແລະ ບັນດາກອງປະຊຸມກ່ຽວຂ້ອງຢູ່ Napitaw ປະເທດ ມຽນມາ. ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ AMM-47 ແລະ ບັນດາກອງປະຊຸມກ່ຽວຂ້ອງ ເພື່ອປັບປຸງຄວາມສາມັກຄີ, ການຮ່ວມມື ອາຊຽນ, ເພີ່ມທະວີບົດບາດເປັນເຈົ້າການ, ມີຄວາມຮັບຜິດຊອບ ຂອງອາຊຽນ ສຳລັບສັນຕິພາບ, ຄວາມໝັ້ນຄົງໃນພາກພື້ນ; ຮັກສາບົດບາດເປັນເຈົ້າການຂອງອາຊຽນໃນສະພາບການໃຫມ່; ຊຸກຍູ້ການພົວພັນຮ່ວມມືກັບບັນດາຄູ່ຮ່ວມມື ພ້ອມກັນປະກອບສ່ວນໃຫ້ແກ່ສັນຕິພາບ, ຄວາມໝັ້ນຄົງ ແລະ ການພັດທະນາໃນພາກພື້ນ, ພ້ອມທັງປະກອບສ່ວນຍົກສູງບົດບາດ ແລະ ທີ່ຕັ້ງຂອງຫວຽດນາມກວ່າອີກ. ບົດຂຽນຂອງນັກຂ່າວ ແອງຮ່ວຽນ “ເພື່ອ ອາຊຽນຫນຶ່ງ ສວມບົດບາດໃຫຍ່ກວ່າໃນເວທີສາກົນ”
ລັດຖະມົນຕີການຕ່າງປະເທດບັນດາປະເທດສະມາຊີກອາຊຽນ
ເຂົ້າຮ່ວມກອງປະຊຸມ AMM 46
|
ບັນດາກອງປະຊຸມຄັ້ງນີ້ ແມ່ນບັນດາກອງປະຊຸມຂັ້ນລັດຖະມົນຕີ ປະຈຳປີທີ່ສຳຄັນຂອງພາກພື້ນ, ໂດຍມີການເຂົ້າຮ່ວມຂອງລັດຖະມົນຕີການຕ່າງປະເທດ, ຫົວຫນ້າຄະນະຜູ້ແທນຂອງ 27 ປະເທດ ແລະ ບັນດາອົງການຈັດຕັ້ງ. ຈຸດສຸມຂອງບັນດາກອງປະຊຸມຄັ້ງນີ້ ແມ່ນສຸມໃສ່ສຳຫລວດກວດຄືນສະພາບການຮ່ວມມື ອາຊຽນ, ລະຫວ່າງອາຊຽນ ກັບບັນດາຄູ່ຮ່ວມມືໃນໄລຍະຜ່ານມາ, ປຶກສາຫາລືທິດທາງຊຸກຍູ້ບັນດາການພົວພັນຮ່ວມມືນີ້ໃນໄລຍະຈະມາເຖິງ; ແລກປ່ຽນກ່ຽວກັບບາງບັນຫາສາກົນ, ພາກພື້ນຕ່າງຝ່າຍຕ່າງມີຄວາມສົນໃຈ, ເປັນຕົ້ນແມ່ນບັນດາບັນຫາກ່ຽວຂ້ອງເຖິງສັນຕິພາບ, ຄວາມໝັ້ນຄົງຂອງພາກພື້ນ.
ຄວາມປາດຖະຫນາລວມກ່ຽວກັບສະພາບແວດລ້ອມສັນຕິພາບ, ສະຖຽນລະພາບ
ຕໍ່ຫນ້າການຜັນແປຢ່າງສັບສົນໃນໂລກ, ໃນພາກພື້ນ, ຈາກບັນດາສະຖານທີ່ເກີດການປະທະກັນຕະຫລອດຮອດບັນດາຄວາມສ່ຽງການປ່ຽນແປງຂອງດິນຟ້າອາກາດ ຫລືຜົນສະທ້ອນຈາກວິກິດການເສດຖະກິດ, ການເງິນ… ພິເສດແມ່ນບັນດາຄວາມຜັນແປເຄັ່ງຕຶງໃນໄລຍະມໍ່ໆມານີ້ຢູ່ທະເລຕາເວັນອອກ, ບັນດາປະເທດສະມາຊິກ ອາຊຽນ ລ້ວນແຕ່ເຂົ້າໃຈ ແລະ ປາດຖະຫນາເຖິງສະພາບແວດລ້ອມແຫ່ງສັນຕິພາບ, ສະຖຽນລະພາບ ເພື່ອພ້ອມກັນພັດທະນາ. ເພາະສະນັ້ນ, ຈິດໃຈລວມຂອງບັນດາກອງປະຊຸມຄັ້ງນີ້ ແມ່ນ ອາຊຽນ ສືບຕໍ່ບັນດາຄວາມມານະພະຍາຍາມຮ່ວມມືເພ່ືອສັນຕິພາບ, ຄວາມໝັ້ນຄົງ ແລະ ພັດທະນາລວມຢູ່ພາກພື້ນ. ທ່ານຮອງລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມກວາງວີງ ໃຫ້ຮູ້ວ່າ:
“ຈະຍູ້ແຮງຄວາມມານະພະຍາຍາມທາບທາມຄຳເຫັນໃສ່ປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໄປຄຽງຄູ່ກັບການສືບຕໍ່ ປະຕິບັດບັນດາຂໍ້ກຳນົດໃນຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC). ດ້ວຍເລື່ອງດຳເນີນການເຈລະຈາ ແລະ ກຳນົດທິດຢ່າງຈະແຈ້ງຂອງ ອາຊຽນ ແນ່ນ່ອນວ່າ ຈີນຕ້ອງສືບຕໍ່ແລກປ່ຽນຢ່າງເປັນທາງການ ແລະ ເຂັ້ມງວດກ່ຽວກັບ COC”
ຢ່າງແທດຈິງ ແລະ ປະສິດທິຜົນແຫ່ງການພົວພັນລະຫວ່າງ ອາຊຽນ ແລະ ບັນດາຄູ່ຮ່ວມມື
ຫວນຄືນ 1 ປີຜ່ານມາ, ນັບແຕ່ເມື່ອກອງປະຊຸມການຕ່າງປະເທດ ອາຊຽນ ຄັ້ງທີ 46 ຈັດຂຶ້ນຢູ່ ບຣູໄນ, ບໍ່ພຽງແຕ່ຍູ້ແຮງການຮ່ວມມືພາຍໃນກຸຸ່ມເທົ່ານັ້ນ ຫາກການພົວພັນຂອງ ອາຊຽນ ກັບຄູ່ເຈລະຈາແຕ່ລະຝ່າຍ ສືບຕໍ່ພັດທະນາຢ່າງຕັ້ງຫນ້າ ແລະ ແທດຈິງ.
ສຳລັບຈີນ, ການພົວພັນສອງຝ່າຍໄດ້ຮັບການເປີດກວ້າງໄປສູ່ຂົງເຂດໃຫມ່ຈຳນວນຫນຶ່ງ ແລະ ເຮັດໃຫ້ເລິກເຊິ່ງກວ່າ ຜ່ານການສ້າງກົນໄກໃຫມ່ຈຳນວນຫນຶ່ງ ແຜນການດຳເນີນງານ ອາຊຽນ - ຈີນ ໄລຍະ 2011-2015 ໄດ້ຮັບການຜັນຂະຫຍາຍຢ່າງຕັ້ງຫນ້າ. ສຳລັບ ຍີ່ປຸ່ນ, ຄຽງຄູ່ການຊຸກຍູ້ປະຕິບັດບັນດາຂໍ້ຕົກລົງ, ຄຳໝັ້ນສັນຍາທີ່ໄດ້ລົງນາມ, ປີ 2014, ຍີ່ປຸ່ນ ສືບຕໍ່ເພີ່ມທະວີການຮ່ວມມືກ່ຽວກັບການ
ໝູນໃຊ້ເຕັກໂນໂລຊີດາວທຽມໃນການຄຸ້ມຄອງທຳມະຊາດ, ການຕ່າງປະເທດ, ສາທາລະນະສຸກທົ່ວໂລກ, ການເຕີບໂຕຂຽວຕ້ານການປ່ຽນແປງຂອງດິນຟ້າອາກາດ ແລະ ການຄຸ້ມຄອງຕົວເມືອງ. 33 ໂຄງການຮ່ວມມື ໂດຍ ຍີ່ປຸ່ນ ສະເຫນີ ຈຸດສຸມໃນຫລາຍຂົງເຂດ ແລະ ຄຳໝັ້ນສັນຍາຫນູນຊ່ວຍ ODA ລວມມູນຄ່າ 500 ຕື້ ເຢັນ ເພື່ອບັນດາປະເທດແມ່ນຳ້ຂອງ ພັດທະນາພື້ນຖານໂຄງລ່າງໃນ 3 ປີຂ້າງຫນ້າ ພວມໄດ້ຮັບການຜັນຂະຫຍາຍຢ່າງມີປະສິດທິຜົນ. ສຳລັບ ອິນເດຍ, ສອງຝ່າຍ ມານະພະຍາຍາມຊຸກຍູ້ບັນດາໂຄງການເຊື່ອມຈອດ ອິນເດຍ - ອາຊຽນ ນັບທັງທາງບົກ, ທາງອາກາດ, ການເດີນທະເລ, ດີຈີຕອນ. ສຳລັບ ສເກົາຫລີ, ອາຊຽນ ແລະ ສເກົາຫລີ ພວມຫັນຈຸດໝາຍຍົກສູງວົງເງິນການຄ້າສອງສົ້ນຂຶ້ນເຖິງ 150 ຕື້ USD ໃນປີ 2015 ໃຫ້ປະກົດຜົນເປັນຈິງ.
ສຳລັບ ອາເມລິກາ, ສອງຝ່າຍສືບຕໍ່ຊຸກຍູ້ການພົວພັນຄູ່ເຈລະຈາຂຶ້ນສູ່ລະດັບຍຸດທະສາດ; ອາເມລິກາ ຢືນຢັນນະໂຍບາຍເພີ່ມທະວີການຮ່ວມສຳພັນກັບພາກພື້ນ, ຄຳໝັ້ນສັນຍາຊຸກຍູ້ການຮ່ວມມືກັບ ອາຊຽນ ກ່ຽວກັບທຸກດ້ານການເມືອງ, ຄວາມໝັ້ນຄົງ, ເສດຖະກິດ ແລະ ພົບປະແລກປ່ຽນປະຊາຊົນ, ຫນູນຊ່ວຍ ອາຊຽນ ສ້າງປະຊາຄົມອາຊຽນໃຫ້ສຳເລັດໃນປີ 2015. ອາເມລິກາ ຖື ອາຊຽນ ແມ່ນສູນກາງໂຄງປະກອບພາກພື້ນ ອາຊີ-ປາຊີຟີກ ແລະ ສູນກາງຂອງຍຸດທະສາດສ້າງຄວາມດຸ່ນດ່ຽງຄືນໃຫມ່ ຊື່ງອາເມລິກາມຸ່ງໄປເຖິງ. ຄວາມສຳຄັນຂອງການຮ່ວມມື ອາເມລິກາ - ອາຊຽນ, ເປັນຕົ້ນແມ່ນຂົງເຂດປ້ອງກັນຊາດ ໂດຍທ່ານລັດຖະມົນຕີກະຊວງປ້ອງກັນປະເທດ ອາເມລິກາ Chuck Hagel ຢືນຢັນທີ່ກອງປະຊຸມລັດຖະມົນຕີກະຊວງປ້ອງກັນປະເທດ ລະຫວ່າງ ອາເມລິກາ ແລະ 10 ປະເທດສະມາຊິກ ອາຊຽນ ຈັດຕັ້ງຂຶ້ນໃນເດືອນ 4/2014.
“ອາດຈະຢືນຢັນສາຍພົວພັນມິດຕະພາບລະຫວ່າງບັນດາປະເທດ ອາຊຽນ ແລະ ອາເມລິກາ ແມ່ນກາລະໂອກາດນັບມື້ນັບເພີ່ມຂຶ້ນ ເພື່ອໃຫ້ພວກເຮົາສືບຕໍ່ຮ່ວມງານນຳກັນເພື່ອແກ້ໄຂບັນດາອາດຊະຍາກຳແບບໃຫມ່ .ໃນທົ່ວພາກພື້ນອາຊີ ປາຊີຟີກ. ການຮ່ວມປ້ອງກັນຊາດ ອາຊຽນ - ອາເມລິກາຄັ້ງນີ້ ເປັນຂີດໝາຍສຳຄັນສະແດງໃຫ້ເຫັນສາຍພົວພັນລະຫວ່າງ ອາເມລິກາ ກັບບັນດາປະເທດ ອາຊຽນ ນັບມື້ນັບເພີ່ມຂຶ້ນ ແລະເປັນຂີດໝາຍຫນຶ່ງອີກກ່ຽວກັບບົດບາດສຳຄັນຂອງອາຊຽນ ຊື່ງອາເມລິກາຖືເປັນສຳຄັນ.”
ເພື່ອ ອາຊຽນຫນຶ່ງ ສວມບົດບາດໃຫຍ່ກວ່າໃນເວທີສາກົນ
ສືບຕໍ່ທິດນຳ “ເປັນເຈົ້າການ, ຕັ້ງຫນ້າ ແລະ ມີຄວາມຮັບຜິດຊອບ”, ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ເຂົ້າຮ່ວມກອງປະຊຸມຄັ້ງນີ້ ຈະປະກອບສ່ວນສຳຄັນ, ເພີ່ມທະວີຄວາມສາມັກຄີ ອາຊຽນ ກໍຄືສະເຫນີບັນດາຈຸດສຸມບຸລິມະສິດຂອງ ອາຊຽນ ແລະ ພາກພື້ນ. ຕາມໂຄສົກກະຊວງການຕ່າງປະເທດຫວຽດນາມ ເລຫາຍບີງ ແລ້້ວ, ຊຸກຍູ້ນຳ້ໃຈສາມັກຄີໃນ ອາຊຽນ, ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ ເພື່ອພັດທະນາ ກໍແມ່ນຄາດໝາຍຂອງຫວຽດນາມ ທີ່ບັນດາກອງປະຊຸມຄັ້ງນີ້.
“ຄະນະຜູ້ແທນຫວຽດນາມ ເຂົ້າຮ່ວມບັນດາກອງປະຊຸມຄັ້ງນີ້ ຈະມີບັນດາການປະກອບສ່ວນຢ່າງແທດຈິງ ແລະ ມີບັນດາຂໍ້ລິເລີ່ມເຂົ້າໃນການປັບປຸງບົດບາດສາມັກຄີຂອງ ອາຊຽນ, ກໍຄືການພົວພັນລະຫວ່າງ ອາຊຽນ ກັບບັນດາຄູ່ຮ່ວມມື, ປະກອບສ່ວນຮັກສາສັນຕິພາບ, ຄວາມໝັ້ນຄົງ ແລະ ຄວາມປອດໄພ ຢູ່ ພາກພື້ນ. ຫວຽດນາມ ຊົມເຊີຍທຸກຂໍ້ລິເລີ່ມກໍຄືທຸກຄວາມມານະພະຍາຍາມມີລັກສະນະສ້າງສັນ ແລະ ປະກອບສ່ວນຢ່າງຕັ້ງຫນ້າເຂົ້າໃນຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມປອດໄພໃນການເດີນທະເລຢູ່ພາກພື້ນ.”
ໃນພາຍພາກຫນ້າອາຊຽນ ແມ່ນຈຸດໝາຍ“ປະຊາຄົມຫນຶ່ງ, ຊາຕະກຳຫນຶ່ງ” ສິ່ງດັ່ງກ່າວຮຽກຮ້ອງອາຊຽນ ຕ້ອງເຂັ້ມແຂງໃນ 3 ເສົາຄ້ຳ ນັ້ນແມ່ນ: ການເມືອງ ຄວາມໝັ້ນຄົງ, ເສດຖະກິດ ແລະ ວັດທະນະທຳສັງຄົມ. ພ້ອມກັບບັນດາປະເທດໃນສະຫະສະມາຄົມ, ຫວຽດນາມ ພວມມານະພະຍາຍາມເພີ່ມທະວີການເຊື່ອມຈອດ ແລະ ຮັດແຄບຊ່ອງຫວ່າງແຫ່ງການພັດທະນາ, ຮັກສາບົດບາດໃຈກາງຂອງ ອາຊຽນ, ເພື່ອສ້າງປະຊາຄົມເຂັ້ມແຂງ, ຮ່ວມສຳພັນຢ່າງແຫນ້ນແຟ້ນ ແລະ ພັດທະນາແບບຍືນຍົງໃນປີ 2015 ແລະ ຊຸມປີຕໍ່ໄປ.