ວັນທີ 10/8/2016, ກະຊວງການຕ່າງປະເທດອາເມລິກາ ໄດ້ປະກາດບົດລາຍງານກ່ຽວກັບເສລີພາບທາງສາສະໜາສາກົນປີ 2015 ດ້ວຍຂໍ້ສັງເກດ ຫຼາຍຢ່າງກ່ຽວກັບຫຼາຍບັນຫາທີ່ຂຶ້ນກັບວຽກງານພາຍໃນຂອງປະເທດອື່ນ. ໃນພາກຕີລາຄາກ່ຽວກັບຫວຽດນາມນັ້ນ, ເຖິງວ່າ ໄດ້ມີການສັງເກດຢ່າງຕັ້ງໜ້າກ່ຽວກັບເລື່ອງຫວຽດນາມຮັບປະກັນສິດເສລີພາບທາງດ້ານການເຫຼື້ອມໃສ ສາສະໜາກໍຕາມ, ໃນບົດລາຍງານ ກໍຍັງມີເນື້ອໃນຫຼາຍປະການທີ່ສະແດງໃຫ້ເຫັນຈີນຕະນາການແບບຂາດເຈດຕະນາດີກ່ຽວກັບ ເສລີພາບທາງດ້ານສາສະໜາຢູ່ຫວຽດນາມອີກດ້ວຍ.
ຫວຽດນາມໄດ້ເປັນເຈົ້າພາບຈັດວັນບຸນວິສາຂະບູຊາສາກົນ 2014 |
ໃນບົດລາຍງານ, ກະຊວງການຕ່າງປະເທດອາເມລິກາ ໄດ້ຍອມຮັບຮູ້ບັນດາຄວາມມານະພະຍາຍາມຂອງລັດຖະບານຫວຽດນາມໃນການຮັບປະກັນບັນດາສິດເສລີພາບທາງດ້ານການເຫຼື້ອມໃສ ສາສະໜາ ກໍຄືປະກາດຮ່າງກົດໝາຍວ່າດ້ວຍການເຫຼື້ອມໃສ ສາສະໜາເພື່ອຮັບເອົາການປະກອບຄຳເຫັນຂອງປະຊາຊົນ. ບົດລາຍງານກໍໄດ້ຮັບຮູ້ຄຳເຫັນເກືອຍທັງໝົດຂອງບັນດາຜູ້ນຳອົງການສາສະໜາຕ່າງໆຢູ່ຫວຽດນາມໂດຍຖືວ່າ ເສລີພາບທາງດ້ານສາສະໜາພວມໄດ້ຮັບການເປີດກ້ວາງຢູ່ຫວຽດນາມ ຊຶ່ງນັບມື້ນັບມີຫຼາຍອົງການສາສະໜາໄດ້ຮັບການຮັບຮູ້ຈາກລັດຖະບານ. ແຕ່, ກະຊວງການຕ່າງປະເທດອາເມລິກາ ກໍຍັງຄົງສືບຕໍ່ຕູ່ຫາຫວຽດນາມໃຊ້ຄວາມຮຸນແຮງ, ຈັບກຸມຄຸມຂັງ, ດຳເນີນຄະດີ, ຈຳກັດການໄປມາ, ປະຕິເສດການຈົດທະບຽນຫຼືອອກໜັງສືອະນຸຍາດໃຫ້ບາງກຸ່ມສາສະໜາ; ກີດຂວາງການເຄື່ອນໄຫວຂອງບາງກຸ່ມສາສະໜາໃນຂົງເຂດສາທາລະນະສຸກ, ການສຶກສາ… ກະຊວງການຕ່າງປະເທດອາເມລິກາຍັງຖືວ່າ ບັນດາຂໍ້ກຳນົດກ່ຽວກັບການຄຸ້ມຄອງສາສະໜາຢູ່ຫວຽດນາມ ໄດ້ຈຳກັດ ເສລີພາບທາງດ້ານສາສະໜາ ແລະ ບັນດາເຈົ້າໜ້າທີ່ຫວຽດນາມສືບຕໍ່ກີດຂວາງການເຄື່ອນໄຫວຂອງບັນດາກຸ່ມສາສະໜາທີ່ບໍ່ຈົດທະບຽນ.
ຫຼັກຖານຢັ້ງຢືນຢ່າງມີຊີວິດຊີວາກ່ຽວກັບເສລີພາບທາງດ້ານສາສະໜາຢູ່ຫວຽດນາມ.
ຄວາມຈິງໃນຊີວິດທາງສາສະໜາທີ່ມີຊີວິດຊີວາ ແລະ ລັກສະນະເຄົາລົບກົດໝາຍໃນການປົກປ້ອງບັນດາສິດທິມະນຸດຢູ່ຫວຽດນາມ ແມ່ນການປະຕິເສດຢ່າງຮຸນແຮງທີ່ສຸດຕໍ່ບັນດາຖ້ອຍທຳນອງທີ່ຂາດເຈດຕະນາດີຂອງກະຊວງການຕ່າງປະເທດອາເມລິກາກ່ຽວກັບສະພາບການສາສະໜາຢູ່ຫວຽດນາມ. ທາງດ້ານນະໂຍບາຍ, ຫວຽດນາມໄດ້ຮຽບຮຽງຮ່າງກົດໝາຍວ່າດ້ວຍການເຫຼື້ອມໃສ, ສາສະໜາເພື່ອທົດແທນລັດຖະບັນຍັດວ່າການເຫຼື້ອມໃສ, ສາສະໜາ, ເພີ່ມເຕີມໃສ່ຮ່າງກົດໝາຍ ບັນດາເນື້ອໃນພື້ນຖານ, ສອດຄ່ອງກັບພຶດຕິກຳການດຳເນີນຊີວິດທາງສາສະໜາຢູ່ຫວຽດນາມ. ເມື່ອທຽບໃສ່ເອກະສານນິຕິກຳກ່ອນນີ້, ຮ່າງກົດໝາຍສະບັບນີ້ ໄດ້ສະແດງໃຫ້ເຫັນຄວາມເປີດອົກເປີດໃຈ, ການເອື້ອອຳນວຍຄວາມສະດວກຂອງລັດຫວຽດນາມໃນວິທີການປະພຶດກັບສາສະໜາຕ່າງໆ. ການສ້າງກົດໝາຍວ່າດ້ວຍການເຫຼື້ອມໃສ ສາສະໜາແມ່ນການເພີ່ມທະວີເສລີພາບທາງດ້ານການເຫຼື້ອມໃສ, ສາສະໜາ, ສ້າງກອບກົດໝາຍທີ່ດີກ່ວາໃຫ້ແກ່ໃຫ້ແກ່ການເຄື່ອນໄຫວເຫຼື້ອມໃສ ສາສະໜາຢູ່ຫວຽດນາມ. ໃນວິວັດການຮຽບຮຽງ, ຮ່າງກົດໝາຍວ່າດ້ວຍການເຫຼື້ອມໃສ, ສາສະໜາຍັງຖືກນຳມາຮັບເອົາການປະກອບຄຳເຫັນຂອງປະຊາຊົນເພື່ອສື້າງໃຫ້ສົມບູນແບບ ກ່ອນທີ່ຍື່ນສະເໜີສະພາແຫ່ງຊາດຮັບຮອງເອົາໃນໄລຍະທີ່ຈະມາເຖິງ.
ເສລີພາບທາງດ້ານການເຫຼື້ອມໃສ, ສາສະໜາຢູ່ຫວຽດນາມ ແຕ່ດົນນານມາແລ້ວ, ໄດ້ຮັບການຮັບປະກັນດ້ວຍວຽກງານທີ່ແທດຈິງ. ສິດເສລີພາບໃນການດຳເນີນບັນດາພິທີກຳທາງສາສະໜາ, ເຂົ້າຮ່ວມບັນດາການເຄື່ອນໄຫວທາງສາສະໜາຂອງບັນດາຜູ້ເຊື່ອຖືສາສະໜາ ໄດ້ຮັບເຄົາລົບ ແລະ ຮັບປະກັນ. ບັນດາການເຄື່ອນໄຫວດຳເນີນງານບຸນປະຈຳປີຂອງສາສະໜາຕ່າງໆເຊັ່ນ: ວັນບຸນຄຼິດສມາດຂອງຊາວຄຼິດ, ວັນບຸນວິສາຂະບູຊາຂອງຊາວພຸດ ແລະ ບັນດາງານບຸນຂອງສາສະໜາອື່ນໆກໍໄດ້ຖືກຈັດຂຶ້ນຢ່າງສົມກຽດຊຶ່ງມີການເຂົ້າຮ່ວມຂອງສາສະນິກກະຊົນນັບແສນໆຄົນ.
ການເຄື່ອນໄຫວດຳເນີນຊີວິດເຫຼື້ອມໃສ, ສາສະໜາ ບໍ່ພຽງແຕ່ໄດ້ຮັບຖືວ່າ ແມ່ນຄວາມຕ້ອງການດ້ານຈິດວິນຍານຂອງບັນດາຜູ້ເຊື່ອຖືສາສະໜາຊຶ່ງໄດ້ຮັບການປົກປ້ອງຈາກກົດໝາຍ, ນະໂຍບາຍຂອງລັດເທົ່ານັ້ນ, ຫາກຍັງໄດ້ຮັບຖືວ່າ ແມ່ນຄວາມຕ້ອງການໃນການດຳເນີນຊີວິດວັດທະນະທຳຂອງປະຊາຊົນທຸກຊັ້ນວັນນະອີກດ້ວຍ.
ຕີລາຄາຢ່າງຖືກຕ້ອງກ່ຽວກັບສະພາບການສາສະໜາເພື່ອພັດທະນາການພົວພັນຫວຽດນາມ-ອາເມລິກາ
ຫວຽດນາມແມ່ນປະເທດທີ່ມີຫຼາຍຊົນເຜົ່າ ແລະ ສາສະໜາ. ຍາກທີ່ຈະຫາໄດ້ປະເທດໃດໃນໂລກທີ່ມີຄວາມກົມກ່ຽວລະຫວ່າງບັນດາສາສະໜາໃຫຍ່ໃນຈິດໃຈຂອງຊາດຄືຫວຽດນາມ. ປະຈຸບັນ, ລັດຫວຽດນາມໄດ້ຮັບຮອງ 39 ອົງການທີ່ຂຶ້ນກັບ 14 ສາສະໜາ, ດ້ວຍສາສະນິກກະຊົນປະມານ 24,3 ລ້ານຄົນ ກວມເອົາ 27% ຈຳນວນປະຊາກອນ, ມີຜູ້ມີຍົດສັກຕຳແໜ່ງທາງສາສະໜາລວມ 53.000 ອົງ. ໂບດ, ຫໍໂຮງບູຊາ 27.900 ແຫ່ງ. ບັນດາອົງການສາສະໜາກໍແມ່ນພາກສ່ວນທີ່ສຳຄັນປະກອບສ່ວນນຳແຜນນະໂຍບາຍຂອງພັກ, ນະໂຍບາຍ ກົດໝາຍຂອງລັດເຂົ້າສູ່ຊີວິດຕົວຈິງ. ບັນດາສາສະໜາໄດ້ຕັ້ງໜ້າຕອບສະໜອງການເຂົ້າຮ່ວມສ້າງອຳນາດການປົກຄອງຂັ້ນຕ່າງໆ, ຜູ້ມີຍົດສັກຕຳແໜ່ງທາງສາສະໜາທີ່ມີອິດທິພົນຫຼາຍອົງໄດ້ຮັບເລືອກຕັ້ງເຂົ້າເປັນສະມາຊິກສະພາແຫ່ງ, ສະມາຊິກສະພາປະຊາຊົນຂັ້ນຕ່າງໆ, ແນວໂຮມປະເທດຊາດ…ສິ່ງນີ້ໄດ້ເປັນການຢັ້ງຢືນຢ່າງຈະແຈ້ງ ກ່ຽວກັບນະໂຍບາຍການເຫຼື້ອມໃສ ສາສະໜາຢ່າງຖືກຕ້ອງ, ສະເໝີຕົ້ນສະເໝີປາຍຂອງພັກ ແລະ ລັດຫວຽດນາມ ຊຶ່ງໄດ້ຮັບການຕອບສະໜອງຈາກປະຊາຊົນຜູ້ເຊື່ອຖື ແລະ ບໍ່ເຊື່ອຖືສາສະໜາ.
ກໍເຊັ່ນດຽວກັນກັບທຸກໆປະເທດໃນໂລກ, ຫວຽດນາມມີສິດລົງໂທດບັນດາສ່ວນບຸກຄົນ ແລະ ອົງການຕ່າງໆທີ່ລະເມີດກົດໝາຍ, ສວຍໃຊ້ບັນຫາສິດເສລີທາງສາສະໜາ, ການເຫຼື້ອມໃສເພື່ອມ້າງເພທຳລາຍລັດຫວຽດນາມ ກໍຄືກິດຈະການສ້າງສາ ແລະ ປົກປັກຮັກສາປະເທດຊາດ. ສິ່ງນີ້ສອດຄ່ອງກັບກົດໝາຍສາກົນ ແລະ ກົດໝາຍຫວຽດນາມ.
ການຕີລາຄາຢ່າງຖືກຕ້ອງກ່ຽວກັບຊີວິດການເຫຼື້ອມໃສ, ສາສະໜາຂອງປະຊາຊົນ ແລະ ບັນດາຄວາມມານະພະຍາຍາມຂອງລັດຫວຽດນາມໃນການຮັບປະກັນໃຫ້ປະຊາຊົນມີສິດເສລີພາບທາງດ້ານການເຫຼື້ອມໃສ, ສາສະໜາຄືຄວາມຈິງໃນປະຈຸບັນ ແມ່ນວຽກງານທີ່ຈຳເປັນສຳລັບກະຊວງການຕ່າງປະເທດອາເມລິກາ, ແນໃສ່ປັບປຸງ ແລະ ພັດທະນາສາຍພົວພັນຫວຽດນາມ - ອາເມລິກາທີ່ພວມນັບມື້ນັບດີງາມ.