(vovworld) - ວັນທີ 6/9, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ນຳໜ້າຄະນະຜູ້ແທນຂັ້ນສູງ ຫວຽດນາມ ເຂົ້າຮ່ວມກອງປະຊຸມຂັ້ນສູງ ອາຊຽນ ຄັ້ງທີ 28-29 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ ເຊິ່ງຈັດຕັ້ງຢູ່ນະຄອນຫຼວງ ວຽງຈັນ, ປະເທດ ລາວໃນລະຫວ່າງວັນທີ 6-8/9/2016. ທີ່ກອງປະຊຸມຄັ້ງນີ້, ຫວຽດນາມ ສືບຕໍ່ເສີມຂະຫຍາຍບົດບາດຄວາມຮັບຜິດຊອບ, ປັບປຸງ ແລະ ເພີ່ມທະວີຄວາມສາມັກຄີ, ເປັນເອກະພາບໃນ ອາຊຽນ, ຕັ້ງໜ້າຜັນຂະຫຍາຍວິໄສທັດ ອາຊຽນ 2025.
.jpg)
ນາຍົກລັດຖະມົນຕີ ລາວ ທອງລຸນ ສີສຸລິດ ກ່າວຄຳເຫັນທີ່ ກອງປະຊຸມຂັ້ນສູງ ອາຊຽນ
(ພາບ: (EPA/ TTXVN)
|
ກອງປະຊຸມຂັ້ນສູງ ອາຊຽນ ຄັ້ງທີ 28-29 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ ເຊິ່ງມີການເຂົ້າຮ່ວມຂອງການນຳ 10 ປະເທດ ອາຊຽນ, ຈີນ, ຍີ່ປຸ່ນ, ສເກົາຫຼີ, ອາເມລິກາ, ລັດເຊຍ, ອິນເດຍ, ອົດສະຕາລີ, ນີວຊີແລນ ແລະ ທ່ານເລຂາທິການໃຫຍ່ສະຫະປະຊາຊາດ. ດ້ວຍຫົວຂໍ້ວ່າ “ນຳວິໄສທັດກາຍເປັນພຶດຕິກຳຕົວຈິງເພື່ອປະຊາຄົມອາຊຽນທີ່ຂະຫຍັນຂັນເຄື່ອນ“, ບັນດາກອງປະຊຸມຂັ້ນສູງຄັ້ງນີ້ແມ່ນໂອກາດສູງສຸດໃນປີ ເພື່ອໃຫ້ການນຳບັນດາປະເທດ ອາຊຽນ ແລະ ບັນດາຄູ່ຮ່ວມມືແລກປ່ຽນຄວາມເຫັນ ພາຍຫຼັງທີ່ປະຊາຄົມ ອາຊຽນ ໄດ້ຮັບການສ້າງຕັ້ງເມື່ອວັນທີ 31/12/2015. ທີ່ກອງປະຊຸມ, ການນຳປະເທດຕ່າງໆສຸມໃສ່ປຶກສາຫາລືທິດທາງ, ມາດຕະການເພີ່ມທະວີການຮ່ວມສຳພັນ ອາຊຽນ, ປັບປຸງຄວາມສາມັກຄີ, ເປັນເອກະພາບ ແລະ ບົດບາດໃຈກາງຂອງອາຊຽນ, ຍູ້ແຮງການຮ່ວມມືລະຫວ່າງ ອາຊຽນ ແລະ ບັນດາຄູ່ຮ່ວມມື, ທັງແລກປ່ຽນຄວາມເຫັນກ່ຽວກັບບັນດາບັນຫາພາກພື້ນ ແລະ ສາກົນ.
ຄວາມຕັ້ງໜ້າໃນການຜັນຂະຫຍາຍວິໄສທັດ ອາຊຽນ
ເລື່ອງສ້າງຕັ້ງປະຊາຄົມ ອາຊຽນ ໃນວັນທີ 31/12/2015 ໄດ້ເປັນປະຫວັດສາດ, ເປັນຂີດໝາຍສຳຄັນໃນວິວັດແຫ່ງການຮ່ວມສຳພັນຢູ່ພາກພື້ນ. ມາຮອດປະຈຸບັນ, ອາຊຽນໄດ້ບັນລຸຄວາມຄືບໜ້າທີ່ຕັ້ງໜ້າຫຼາຍຢ່າງໃນການຜັນຂະຫຍາຍວິໄສທັດ ອາຊຽນ 2015 ແລະ ບັນດາແຜນການສັງລວມໃນ 3 ເສົາຄຳ້ປະຊາຄົມ. ທ່ານຮອງລັດຖະມົນຕີການຕ່າງປະເທດ ເລຮ່ວາຍຈູງ, ຢືນຢັນວ່າ:
“ຜົນງານພົ້ນເດັ່ນທີ່ສຸດຂອງ ອາຊຽນ ນັບແຕ່ປະຊາຄົມ ອາຊຽນ ໄດ້ຮັບການສ້າງຕັ້ງ, ນັ້ນແມ່ນຜັນຂະຫຍາຍບັນດາແຜນການທີ່ໄດ້ວາງອອກ, ຕົວຢ່າງຄືໃນຂົງເຂດສັນຕິພາບ ແລະ ຄວາມໝັ້ນຄົງ, ດ້ວຍການເຄື່ອນໄຫວປະມານ 200-300 ຢ່າງໃນແຜນການແມ່ນໄດ້ຮັບການປະຕິບັດ. ໃນຂົງເຂດເສດຖະກິດ, ອາຊຽນ ກໍ່ໄດ້ຊຸກຍູ້ການເຄື່ອນໄຫວຕ່າງໆ, ໂດຍສະເພາະແມ່ນການຮ່ວມສຳພັນກັບບັນດາຄູ່ຮ່ວມມືພາຍນອກ ແລະ ປະຕິບັດຂໍ້ຕົກລົງໃນຂອບເຂດປະຊາຄົມເສດຖະກິດ ອາຊຽນ. ນອກນັ້ນປະຊາຄົມ ອາຊຽນຍັງສືບຕໍ່ດຶງດູດຄວາມເອົາໃຈໃສ່ ແລະ ການສະໜັບສະໜູນຂອງປະຊາຄົມສາກົນ. ປະຈຸບັນ, ທົ່ວໂລກແຕ່ຮູ້ຈັກເຖິງການສ້າງຕັ້ງປະຊາຄົມ ອາຊຽນ, ກໍ່ຄືອິດທິພົນຊື່ສຽງຂອງ ອາຊຽນ ໃນເວທີສາກົນ
ປີ 2016, ການພົວພັນຮ່ວມມືຂອງ ອາຊຽນ ກັບບັນດາຄູ່ຮ່ວມມືຄູ່ເຈລະຈາ ສືບຕໍ່ໄດ້ຮັບການຍູ້ແຮງ ແລະ ບັນລຸໄດ້ບັນດາໝາກຜົນລະອຽດຜ່ານການຜັນຂະຫຍາຍ ໂຄງການເຄື່ອນໄຫວໄລຍະ 2016 – 2020 ຢ່າງມີປະສິດທິຜົນ. ມາຮອດປະຈຸບັນ, ໄດ້ມີ 86 ຄູ່ຮ່ວມມືໄດ້ແຕ່ງຕັ້ງເອກອັກຄະລັດຖະທູດປະຈຳ ອາຊຽນ ແລະ 50 ຄະນະກຳມະການ ອາຊຽນ ປະຈຳບັນດາປະເທດໃນໂລກ. ໄລຍະມໍ່ໆມານີ້, ອາຊຽນ ໄດ້ຮັບຮູ້ຂ້ໍສະເໜີເຂົ້າຮ່ວມສົນທິສັນຍາສະໜິດສະໜົມ ແລະ ການຮ່ວມມື (TAC) ຂອງ ຈີເລ, ອີຣານ, ອີຢິບ ແລະ ມາຣົກ, ມອບກົດລະບຽບຄູ່ຮ່ວມມືຕາມຂົງເຂດໃຫ້ແກ່ສະວິດ, ຄູ່ຮ່ວມມືພັດທະນາ ໃຫ້ແກ່ ເຢຍລະມັນ ແລະ ພວມສືບຕໍ່ພິຈາລະນາຂໍ້ສະເໜີອື່ນໆຫຼາຍສະບັບ. ປະຈຸບັນ, ມີຫຼາຍຄູ່ຮ່ວມມືພວມປາດຖະໜາຢາກເປີດກ້ວາງ, ເຮັດໃຫ້ການພົວພັນຄູ່ຮ່ວມມືກັບ ອາຊຽນ ເລິກເຊິ່ງກ່ວາ ແລະ ຫຼາຍປະເທດນອກພາກພື້ນໄດ້ສະແດງຄວາມຫວັງສ້າງຕັ້ງການພົວພັນກັບ ອາຊຽນ ສິ່ງດັ່ງກ່າວສະແດງໃຫ້ເຫັນວ່າ ອາຊຽນ ໄດ້ຢັ້ງຢືນບົດບາດ, ທີ່ຕັ້ງ ບື່ນຕົວຂຶ້ນລະດັບສູງກ່ວາພາກພື້ນ.
ເພີ່ມທະວີຄວາມສາມັກຄີໃນອາຊຽນ
ໃນວິວັດທະນາແຫ່ງການສ້າງຕັ້ງ ແລະ ພັດທະນາ, ອາຊຽນ ມີຄວາມສະດວກຫຼາຍຢ່າງຍ້ອນສະພາບແວດລ້ອມສັນຕິພາບ ແລະ ມີສະຖຽນລະພາບໃນພາກພື້ນ. ເຖິງຢ່າງໃດກໍ່ຕາມໃນໄລຍະຈະມາເຖິງ, ອາຊຽນ ກໍ່ປະເຊີນໜ້າກັບສິ່ງທ້າທາຍດ້ານຄວາມໝັ້ນຄົງຫຼາຍຢ່າງ, ໃນນັ້ນມີບັນດາຄວາມເຄັ່ງຕຶງຢູ່ ທະເລຕາເວັນອອກ. ຕໍ່ໜ້າບັນດາຄວາມເຫັນວິຕົກວັງວົນວ່າ: ອາຊຽນ ພວມຖືກແບ່ງແຍກຍ້ອນບັນດາສິ່ງທ້າທາຍນີ້, ທ່ານເອກອັກຄະລັດຖະທູດ ຫວຽດນາມ ປະຈຳ ອາເມລິກາ ຟ້າມກວາງວີງ, ຖືວ່າ:
“ສິ່ງທີ່ສຳຄັນທີ່ສຸດຂອງ ອາຊຽນ ນັ້ນແມ່ນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ. ນອກຈານກນັ້ນ, ອາຊຽນ ໄດ້ສ້າງຂອບເຂດ, ເວທີປາໄສຕິດພັນກັບບັນດາຄູ່ຮ່ວມມືໃຫຍ່ກ່ວາ. ອາຊຽນ ໄດ້ສ້າງບັນດາມາດຕະຖານການປະພຶດຢູ່ພາກພື້ນ. ຂ້າພະເຈົ້າຖືວ່າ, ທັງ 3 ດ້ານນັ້ນ ອາຊຽນ ພວມຜັນຂະຫຍາຍດີທີ່ສຸດ. ຖ້າບໍ່ມີ ອາຊຽນ ບໍ່ແມ່ນວ່າມີການພົວພັນລະຫວ່າງບັນດາປະເທດໃຫຍ່, ການພົວພັນລະຫວ່າງບັນດາປະເທດໃຫຍ່ ກັບບັນດາປະເທດນ້ອຍ ຍາມໃດກໍ່ເພື່ອຜົນປະໂຫຍດລວມຂອງພາກພື້ນນີ້. ກໍ່ຄືໃນໄລຍະທາງແຫ່ງການພັດທະນາຂອງ ອາຊຽນ, ບາງເທື່ອຈະມີການປ່ຽນແປງແຕ່ເມື່ອສັງເກດ 3 ດ້ານໃຫຍ່ນັ້ນພັດເຫັນໄດ້ຢ່າງຈະແຈ້ງວ່າ ອາຊຽນ ພວມຮັກສາບົດບາດສຳຄັນທີ່ສຸດສຳລັບພາກພື້ນ, ສະແດງໃຫ້ເຫັນບົດບາດໃຈກາງຂອງ ອາຊຽນ.”
ໂດຍມີທັດສະນະດຽວກັນ, ທ່ານເອກອັກຄະລັດຖະທູດ ຫວຽດນາມ ປະຈຳ ມາເລເຊຍ ຟ້າມກາວຟອງ ກໍ່ຢັ້ງຢືນວ່າ:
“ອາຊຽນ ແມ່ນຊາຍຄາລວມ ແລະ ທຸກໆປະເທດ ອາຊຽນ ຕ້ອງປະກອບສ່ວນເຂົ້າໃນຊາຍຄາລວມນັ້ນ. ປະຊາຄົມ ອາຊຽນ ແມ່ນຂອງທຸກໆປະເທດ ອາຊຽນ ຫາກບໍ່ແມ່ນຂອງສະເພາະປະເທດໃດ ດັ່ງນັ້ນປະຊາຄົມ ອາຊຽນ ນີ້ຕ້ອງມີການຮ່ວມມືລວມ, ຊຸກຍູ້ລວມເພື່ອກໍ່ສ້າງປະຊາຄົມນີ້. ແລະ ນີ້ແມ່ນຜົນປະໂຫຍດລວມຂອງທຸກໆປະເທດໃນພາກພື້ນ”
ຫວຽດນາມສືບຕໍ່ເສີມຂະຫຍາຍບົດບາດແມ່ນສະມາຊິກຕັ້ງໜ້າ, ມີຄວາມຮັບຜິດຊອບ
ຈາກແງ່ມູມແຫ່ງຊາດ, ຍາມໃດ ຫວຽດນາມ ກໍ່ມານະພະຍາຍາມປະກອບສ່ວນເຂົ້າໃນຜົນສຳເລັດລວມຂອງ ອາຊຽນ, ກຽມພ້ອມຮັບທຸກໆໜ້າທີ່ສຳຄັນ, ສ້າງຂີດໝາຍພາບພົດເປັນສະມາຊິກທີ່ມີອິດທິພົນຊື່ສຽງ, ເປັນເຈົ້າການ, ຂະຫຍັນຂັນເຄື່ອນ ແລະ ມີຄວາມຮັບຜິດຊອບລວມໃນປະຊາຄົມ ອາຊຽນ. ເພື່ອປະຕິບັດວິໄສທັດ ອາຊຽນ 2025, ຫວຽດນາມ ພວມສືບຕໍ່ຜັນຂະຫຍາຍນຳ້ໃຈຮັບຜິດຊອບນັ້ນກ່ວາອີກ, ສູ້ຊົນພ້ອມກັບບັນດາປະເທດສະມາຊິກ ກໍ່ສ້າງປະຊາຄົມ ອາຊຽນ ໃຫ້ໝັ້ນຄົງເຂັ້ມແຂງ, ສາມັກຄີ ແລະ ເອກະລາດ. ເຂົ້າຮ່ວມບັນດາກອງປະຊຸມສຸດຍອດ ອາຊຽນ ຄັ້ງນີ້ເພື່ອແນໃສ່ປະກອບສ່ວນຊຸກຍູ້ ອາຊຽນ ກ້າວເຂົ້າສູ່ໄລຍະຮ່ວມສຳພັນສູງກ່ວາດ້ວຍທີ່ຕັ້ງໃໝ່, ຄວາມຕັດສິນໃຈໃໝ່ ແລະ ມີຄວາມເຊື່ອໝັ້ນກ່ວາ.