ພິທີຕິ້ງດ່ຽນ (ໄຖນາ)ຢູ່ ດ້ອຍເຊີນ
(ພາບອິນເຕີແນດ)
ງານບຸນຕິ້ງດ່ຽນ ຖືກດຳເນີນໃນວັນທີ 7 ເດືອນຈຽງຂອງທຸກປີ. ຕາມເອກະສານປະຫວັດສາດຂອງຫວຽດນາມ ແລ້ວ, ເມື່ອປີກຸນ (987) ເຈົ້າຊີວິດ ເລດ້າຍແຮ່ງ ໄດ້ກັບມາຕີນພູດ້ອຍ ເພື່ອຈັດພິທີຕິ້ງດ່ຽນ (ໄຖນາ) ທຳອິດໃນປະຫວັດສາດຂອງຫວຽດນາມ, ອັນໄດ້ໄຂໜ້າປະຫວັດສາດໃໝ່ໃຫ້ແກ່ພື້ນຖານອະລິຍະທຳກະສີກຳເຂົ້ານາທາມ ແລະ ເປີດສາກຮີດຄອງອັນດີງາມ ເພື່ອໃຫ້ສະໄໝຕໍ່ໆໄປປະຕິບັດຕາມ. ຕົ້ນປີ, ເຈົ້າຊີວິດຈັດພິທີບູຊາພາວະນາຂໍໃຫ້ດິນຟ້າອາກາດເອື້ອອຳນວຍຄວາມສະດວກ ເພື່ອໃຫ້ການປູກຝັງໄດ້ຮັບຜົນດີ ແລະ ເຈົ້າຊີວິດເອງໄດ້ລົງໄຮ່ໄຖນາ ເພື່ອເປີດສາກລະດູການໃໝ່. ຜ່ານປະຫວັດສາດມາເປັນເວລານັບພັນປີ, ງານບຸນຕິ້ງດ່ຽນ ໄດ້ກາຍເປັນຮີດຄອງອັນດີງາມ ທີ່ພາໃຫ້ບັນດາສະໄໝ ຫຼີ, ເຈິ່ນ, ເລ, ຫງວຽນ ປະຕິບັດຕາມ ດ້ວຍຄວາມນັບຖື.
ຈຸດພົ້ນເດັ່ນຂອງງານບຸນນັ້ນແມ່ນ ໄດ້ວາດພາບຮູບພາບເຈົ້າຊີວິດ ເລດ້າຍແຮ່ງ ເປັນຜູ້ທຳອິດລົງໄຖນາໃນຍາມລະດູບານໃໝ່. ເຊິ່ງສະແດງໃຫ້ເຫັນການຮ່ວມທຸກຮ່ວມສຸກ, ເຫັນອົກເຫັນໃຈ ແລະ ແບ່ງປັນຄວາມຫຍຸ້ງຍາກກັບປະຊາຊົນ, ສົ່ງເສີມປະຊາຊົນອອກແຮງງານ ເພື່ອສ້າງຄວາມອິ່ມໜຳສຳລານ, ປະເທດຊາດມີຄວາມຜາສຸກ… ຍ້ອນເຫດນັ້ນ, ເມື່ອວາດພາບຮູບພາບນີ້, ຄະນະຈັດຕັ້ງງານບຸນກໍ່ຕ້ອງຊອກຫາຜູ້ທີ່ເໝາະສົມເພື່ອສວມເປັນເຈົ້າຊີວິດ. ທ່ານ ເຈິ່ນດິ່ງຕ໋ຽນ, ຫົວໜ້າຫ້ອງວັດທະນະທຳຖະແຫຼງຂ່າວ, ເມືອງຢູຍຕຽນ, ແຂວງຮ່ານາມ, ໃຫ້ຮູ້ວ່າ:
“ສຳລັບຜູ້ທີ່ສວມເປັນເຈົ້າຊີວິດ, ພວກຂ້າພະເຈົ້າຕ້ອງເລືອກເຟັ້ນຜູ້ທີ່ມີຮູບຊົງເຄັ່ງຂຶມ, ອ່ອນໂຍນ, ມີທ່າທີ, ແບບແຜນດຳລົງຊີວິດຄ້າຍຄືກັນກັບເຈົ້າຊີວິດ ແລະ ຕ້ອງມີຄຸນງາມຄວາມດີໃນການປະກອບສ່ວນ, ຮັກສາສາຍພົວພັນອັນດີງາມກັບປະຊາຊົນໃນບ້ານ, ໃນຕາແສງ, ທັງແມ່ນຜູ້ຜະລິດເກັ່ງອີກ”.
ພໍ່ຕູ້ຜູ້ໜຶ່ງຢູ່ດ້ອຍເຊີນສວມເປັນເຈົ້າຊີວິດ ເລດ້າຍແຮ່ງ ແລະເລີ່ມຕົ້ນພິທີຕິ້ງດ່ຽນ
(ພາບອິນເຕີແນດ)
ປະຈຸບັນ, ງານບຸນຕິ້ງດ່ຽນຍັງມີຄວາມໝາຍອັນໃຫຍ່ຫຼວງກວ່າ, ບໍ່ພຽງແຕ່ວາດພາບໃຫ້ເຫັນຮູບພາບປະເທດຊາດມີຄວາມສັນຕິສຸກ, ການປູກຝັງໄດ້ຮັບຜົນດີເທົ່ານັ້ນ, ຫາກຍັງເຊີດຊູຊາວກະສີກອນ, ຖືອາຊີບກະສີກຳເປັນສຳຄັນ, ເອົາໃຈໃສ່ເຖິງການພັດທະນາກະສີກຳ, ພິເສດແມ່ນການກໍ່ສ້າງຊົນນະບົດໃໝ່. ທ່ານ ເຈິ່ນຊວນໂລກ, ເລຂາຄະນະພັກແຂວງຮ່ານາມ, ໃຫ້ຮູ້ວ່າ, ແຂວງຮ່ານາມ ໄດ້ເລືອກເຟັ້ນຕາແສງດ້ອຍເຊີນ ເປັນຕາແສງປະຕິບັດທົດລອງໃນການກໍ່ສ້າງຮູບແບບຊົນນະບົດໃໝ່.ຜ່ານ 3 ປີ ແຫ່ງການປະຕິບັດໂຄງການກໍ່ສ້າງຊົນນະບົດໃໝ່, ໃນເບື້ອງຕົ້ນພຽງແຕ່ບັນລຸໄດ້ 6/19 ມາດຖານລະດັບຊາດ ກ່ຽວກັບຊົນນະບົດໃໝ່ເທົ່ານັ້ນ, ມາຮອດປະຈຸບັນ, ດ້ອຍເຊີນ ສາມາດບັນລຸໄດ້ 12/19 ມາດຖານ, ສ່ວນ 7 ມາດຖານທີ່ຍັງເຫຼືອບັນລຸໄດ້ພຽງ 50% ເທົ່ານັ້ນ. ໂສມໜ້າຊົນນະບົດໃໝ່ຂອງຕາແສງພວມເຕີບໂຕເທື່ອລະກ້າວ. ລະບົບໄຟຟ້າ, ທາງຄົມມະນາຄົມຊົນນະບົດ, ໂຮງຮຽນ, ສຸກສາລາ ໄດ້ຮັບການກໍ່ສ້າງໃໝ່. ໃນຊຸມປີມໍ່ໆມານີ້, ງານບຸນ ຕິ້ງດ່ຽນ ໄດ້ຊຸກຍູ້ໃຫ້ປະຊາຊົນໃນຕາແສງ ດ້ອຍເຊີນ ເວົ້າສະເພາະ ແລະ ປະຊາຊົນແຂວງ ຮ່ານາມ ເວົ້າລວມ ຕັ້ງໜ້າເຂົ້າຮ່ວມການກໍ່ສ້າງຊົນນະບົດໃໝ່. ທ່ານ ເຈິ່ນຊວນໂລກ, ໃຫ້ຮູ້ວ່າ:
“ງານບຸນຕິ້ງດ່ຽນ ດ້ອຍເຊີນ ໄດ້ກາຍເປັນວັດທະນະທຳທີ່ພົ້ນເດັ່ນໃນຕົ້ນປີ ແລະ ໄດ້ຝັງເລິກໃນຈິດໃຈຂອງຊາວຮ່ານາມແຕ່ລະຄົນ. ງານບຸນວັດທະນະທຳທັງມີຄວາມໝາຍປະຫວັດສາດ ແລະ ທັນສະໄໝ. ໃນຫຼາຍປີຜ່ານມາ, ດ້ວຍບັນຍາກາດອັນຟົດຟື້ນຕົ້ນລະດູບານໃໝ່ຂອງງານບຸນນີ້, ປະຊາຊົນ ຮ່ານາມໄດ້ທຳການປູກຝັງ, ນຳໃຊ້ວິທະຍາສາດເຕັກນິກ ພັດທະນາກະສີກຳຢ່າງຮອບດ້ານ, ນັບທັງການປູກຝັງ ແລະ ລ້ຽງສັດ. ພິເສດໂຄງການກໍ່ສ້າງຊົນນະບົດໃໝ່ໄດ້ກາຍເປັນຂະບວນການທີ່ກວ້າງຂວາງ, ດຶງດູດທຸກກຳລັງຮ່ວມແຮງຮ່ວມໃຈເຂົ້າຮ່ວມ“
ປະທານປະເທດເຈືອງເຕິ໋ນຊາງເປີດສາກການໄຮ່ນາໃນລະດູບານໃໝ່
(ພາບອິນເຕີແນດ)
ງານບຸນ ຕິ້ງດ່ຽນ ໃນປະຈຸບັນ ບໍ່ພຽງແຕ່ສືບທອດມູນເຊື້ອອັນດີງາມຂອງລຸ້ນກ່ອນເທົ່ານັ້ນ, ຫາກຍັງສຶກສາໃຫ້ລຸ້ນລູກ, ລຸ້ນຫຼານ ສືບທອດລຸ້ນກ່ອນກໍ່ສ້າງບ້ານເກີດເມືອງນອນ, ປະເທດຊາດໃຫ້ນັບມື້ນັບຮັ່ງມີ ແລະ ສວຍງາມຍິ່ງຂຶ້ນ. ຮູບພາບຜູ້ອາຍຸສູງໃນບ້ານສວມເປັນເຈົ້າຊີວິດທຳການໄຖນາໃນຕົ້ນ ລະດູບານໃໝ່ ໄດ້ເປັນການໝັ້ນໝາຍວ່າ ການປູກຝັງຈະໄດ້ຮັບຜົນດີ ແລະ ປະຊາຊົນຈະມີຊີວິດອິ່ມໜຳສຳລານ ແລະ ມີຄວາມຜາສຸກ…
ພ້ອມກັບບັນຍາກາດລະດູບານໃໝ່, ງານບຸນ ຕິ້ງດ່ຽນ ໄດ້ນຳມາເຊິ່ງຈິດໃຈໃໝ່, ບັນຍາກາດແຮງງານທີ່ຫ້າວຫັນໃໝ່ ເພື່ອໃຫ້ປະຊາຊົນ ຮ່ານາມ ພ້ອມກັບປະຊາຊົນທົ່ວປະເທດ ຮ່ວມແຮງຮ່ວມໃຈກໍ່ສ້າງບ້ານເກີດເມືອງນອນ, ສ້າງປະເທດຊາດໃຫ້ນັບມື້ນັບຮັ່ງມີ ແລະ ສວຍງາມກວ່າ, ປະຕິບັດສຳເລັດຂະບວນການກໍ່ສ້າງຊົນນະບົດໃໝ່.