(vovworld)-ສະພາບຄວາມເຄັ່ງຕຶງຢູ່ທະເລຕາເວັນອອກນັບແຕ່ຕົ້ນເດືອນ 5/2014 ພາຍຫລັງຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ, ມີການກະທຳເກາະຜິດ ໄດ້ເຮັດໃຫ້ສະພາບການມີການຜັນແປຢ່າງສັບສົນ. ຂະແຫນງທ່ອງທ່ຽວແມ່ນຂະແຫນງເສດຖະກິດສະດຸ້ງໄວ, ສະນັ້ນ ສະພາບການດັ່ງກ່າວໄດ້ສົ່ງຜົນກະທົບໂດຍກົງ ແລະ ກໍ່ຄວາມເສຍຫາຍຢ່າງຫນັກຫນ່ວງສຳລັບຂະແຫນງທ່ອງທ່ຽວ . ຕໍ່ຫນ້າສະພາບການນີ້, ມີບໍລິສັດທ່ອງທ່ຽວຫລາຍແຫ່ງ ໄດ້ສ້າງຫລາຍລາຍການທ່ອງທ່ຽວໃຫມ່ ມີລາຄາບຸລິມະສິດ. ພ້ອມກັນນັ້ນ , ບັນດາບໍລິສັດທ່ອງທ່ຽວກໍເພີ່ມທະວີຄຸນນະພາບບໍລິການ ສ້າງຄວາມດູດດື່ມນັກທ່ອງທ່ຽວ ດ້ວຍສະຖານທີ່ທ່ອງທ່ຽວປອດໄພ, ສະຫນິດສະຫນົມກັບນັກທ່ອງທ່ຽວ.
ນັກທ່ອງທ່ຽວຕ່າງປະເທດມາຢ້ຽມຢາມຫວຽດນາມ
ພາບ:baocongthuong.com
|
ກົມໃຫຍ່ທ່ອງທ່ຽວຫວຽດນາມ ໃຫ້ຮູ້ວ່າ: ໃນ 5 ເດືອນຜ່ານມາ, ຈຳນວນນັກທ່ອງທ່ຽວສາກົນມາຢ້ຽມຢາມຫວຽດນາມ ເພີ່ມຂຶ້ນ 26%. ສະເພາະເດືອນ 5/2014, ເພີ່ມຂຶ້ນ ກວ່າ 20% ເມື່ອທຽບໃສ່ໄລຍະດຽວກັນຂອງປີກາຍ, ແຕ່ຫລຸດລົງເກືອບ 10% ເມື່ອທຽບໃສ່ເດືອນ 4/2014. ໃນນັ້ນ ຈຳນວນນັກທ່ອງທ່ຽວຫລຸດລົງຫລາຍກວ່າໝູ່ແມ່ນນັກທ່ອງທ່ຽວມາຈາກຈີນ, ມີຫລາຍລາຍການທ່ອງທ່ຽວຖືກຍົກເລີກ ຍ້ອນນັກທ່ອງທ່ຽວບໍ່ເຕັມ.
ຕໍ່ຫນ້າສະພາບການດັ່ງກ່າວ, ບັນດາວິສາຫະກິດທ່ອງທ່ຽວໄດ້ຫັນທິດສູ່ການຂຸດຄົ້ນບັນດາຕະຫລາດທີ່ມີຄວາມສາມາດບົ່ມຊ້ອນ, ມີລະດັບລາຍຈ່າຍສູງຄື:ລັດເຊຍ, ຍີ່ປຸ່ນ, ສເກົາຫລີ, ເອີລົບຕາເວັນຕົກ, ອິນເດຍ ເພື່ອແກ້ໄຂສະພາບການຈຳນວນນັກທ່ອງທ່ຽວມາຈາກຈີນ ຫລຸດລົງ. ທ່ານ ລືວດືກເກ, ຜູ້ອຳນວຍການບໍລິສັດທ່ອງທ່ຽວ Hanoitourist ຊື່ງແມ່ນຫນຶ່ງໃນຈຳນວນບໍລິສັດທ່ອງທ່ຽວຕ້ອນຮັບນັກທ່ອງທ່ຽວມາຈາກຈີນຫລາຍກວ່າໝູ່ໃຫ້ຮູ້ວ່າ:
“ເມື່ອສະພາບການເກີດຂຶ້ນ, ບໍລິສັດພວກຂ້າພະເຈົ້າຕ້ອງຫັນທິດ, ເພີ່ມທະວີການສຳພັດກັບຕະຫລາດທີ່ພວມເຮັດ. ລາຍການທ່ອງທ່ຽວເຖິງ ຍີ່ປຸ່ນ ແລະ ມາເລເຊຍ, ໄຕ້ຫວັນ ພວກຂ້າພະເຈົ້າກໍຫລຸດລາຄາລົງເພື່ອດຶງດູດນັກທ່ອງທ່ຽວບັນດາປະເທດດັ່ງກ່າວມາຢ້ຽມຢາມຫວຽດນາມແທນໃຫ້ນັກທ່ອງທ່ຽວຈີນ.”
ສ່ວນທ່ານ ຫງວຽນກົງຮວານ, ຮອງຜູ້ອຳນວຍການໃຫຍ່ບໍລິສັດຫຸ້ນສ່ວນການຄ້າ Redtours ຖືວ່າ: ຄວນຍູ້ແຮງການໂຄສະນາເຖິງນັກທ່ອງທ່ຽວຈີນ ແລະ ບັນດາປະເທດ, ເຂດແຄ້ວນທີ່ມີວົງຄະນາຍາດນຳໃຊ້ພາສາຈີນຄື: ສິງກະໂປ, ໄຕ້ຫວັນ, ຮົ່ງກົງ.. ເພື່ອໃຫ້ເຂົາເຈົ້າເຂົ້າໃຈແຈ້ງວ່າ: ຕະຫລາດທ່ອງທ່ຽວຫວຽດນາມ ຍັງເປັນປົກກະຕິຢູ່ ແລະ ແມ່ນຈຸດນັດພົບທີ່ປອດໄພ, ສະຫນິດສະຫນົມ ແລະ ຍາມໃດກໍຕ້ອນຮັບເຂົາເຈົ້າ.
“ຕໍ່ຫນ້າສະພາບການປະຈຸບັນ, ຄວນໂຄສະນາກ່ຽວກັບການທ່ອງທ່ຽວທະເລ, ໝູ່ເກາະ, ບ້ານເກີດເມືອງນອນ ເພື່ອປຸກລຸກນ້ຳໃຈຮັກຊາດ, ຄວາມຕ້ອງການໄປທ່ອງທ່ຽວຂອງປະຊາຊົນ. ສຳລັບລາຍການທ່ອງທ່ຽວຢູ່ຈີນ, ປີນີ້ ຈຳນວນນັກທ່ອງທ່ຽວກໍຫລຸດລົງ, ແຕ່ແທນໃຫ້ນັ້ນ ບັນດາລາຍການທ່ອງທ່ຽວເຖິງ ສເກົາຫລີ, ຍີ່ປຸ່ນ ໄດ້ເພີ່ມຂຶ້ນສູງ. ພິເສດ ລາຍການທ່ອງທ່ຽວຍີ່ປຸ່ນ ພວມຫລຸດລາຄາລົງ, ດ້ວຍລາຄາແມ່ນ 25.000.000 ດົ່ງ/ຄົນ ໄດ້ດຶງດູດນັກທ່ອງທ່ຽວຫລາຍຄົນ ພິເສດແມ່ນ ນັກທ່ອງທ່ຽວທີ່ມີແຜນການໄປທ່ອງທ່ຽວຈີນ ແຕ່ຖືກໂຈະໄວ້.”
ບໍ່ພຽງແຕ່ບັນດາບໍລິສັດທ່ອງທ່ຽວທີຄວາມມານະພະຍາຍາມຮັກສາພາບພົດຫວຽດນາມຈຸດນັດພົບທີ່ດູດດື່ມ, ປອດໄພ ແລະສະຫນິດສະຫນົມເທົ່ານັ້ນ ຫາກບັນດາທ້ອງຖິ່ນມີທ່າແຮງດ້ານການທ່ອງທ່ຽວກໍໄດ້ວາງຫລາຍມາດຕະການຢ່າງວ່ອງໄວເພື່ອດຶງດູດນັກທ່ອງທ່ຽວອີກດ້ວຍ. ແຂວງ ແຄງຮ່ວາ ແມ່ນຫນຶ່ງໃນບັນດາສູນທ່ອງທ່ຽວໃຫຍ່ຂອງຫວຽດນາມ, ເມື່ອທຽບໃສ່ຈຳນວນນັກທ່ອງທ່ຽວສາກົນມາຈາກຫລາຍປະເທດອື່ນ, ນັກທ່ອງທ່ຽວເວົ້າພາສາຈີນ ກວມພຽງປະມານ 1,9% ເທົ່ານັ້ນ. ເລື່ອງຈຳນວນນັກທ່ອງທ່ຽວຈີນ ຍົກເລີກ ລາຍການທ່ອງທ່ຽວ ບໍ່ສົ່ງຜົນສະທ້ອນປານໃດເຖິງຂະແຫນງທ່ອງທ່ຽວແຄງຮ່ວາ. ນອກນັ້ນ, ບັນດາຕະຫລາດນັກທ່ອງທ່ຽວພາຍໃນປະເທດ ແລະ ນັກທ່ອງທ່ຽວມາຈາກລັດເຊຍ ຍັງຄົງຮັກສາເປັນປົກກະຕິໄວ້. ທ່ານ ຫງວຽນວັນຕວນ, ຫົວຫນ້າກົມໃຫຍ່ກົມທ່ອງທ່ຽວຫວຽດນາມ ຕີລາຄາວ່າ: ແຄງຮ່ວາ ໄດ້ຫັນຕະຫລາດນັກທ່ອງທ່ຽວສາກົນເປັນຫລາຍຮູບຫລາຍແບບ ແລະ ສິ່ງດັ່ງກ່າວໄດ້ຈຳກັດບັນດາການກະທົບຢ່າງຫຍໍ້ທໍ້ຕໍ່ຂະແຫນງທ່ອງທ່ຽວ. ຍາຈາງ - ແຄງຮ່ວາ ບໍ່ພຽງແຕ່ແມ່ນຈຸດນັດພົບຂອງນັກທ່ອງທ່ຽວເວົ້າພາສາຈີນ ເທົ່ານັ້ນ ຫາກນັບທັງນັກທ່ອງທ່ຽວທີ່ມາຈາກ ເອີລົບ, ອາເມລິກາເຫນືອ, ອາຊີໃຕ້, ອາຊີຕາເວັນອອກສ່ຽງໃຕ້, ອາຊີຕາເວັນອອກສ່ຽງເຫນືອ ແລະ ພິເສດ ແມ່ນນັກທ່ອງທ່ຽວມາຈາກສະຫະພັນລັດເຊຍ. ສິ່ງດັ່ງກ່າວຈະຊ່ວຍໃຫ້ຂະແຫນງທ່ອງທ່ຽວ ແຄງຮວ່າ ພັດທະນາເປັນປົກກະຕິ ແລະ ສືບຕໍ່ເຕີບໂຕໃນໄລຍະຈະມາເຖິງ. ທ່ານ ຫງວຽນວັນຕວນໃຫ້ຮູ້ວ່າ: ໃນພາຍພາກຫນ້າ ບໍ່ສະເພາະແຂວງ ແຄງຮ່ວາເທົ່ານັ້ນ ຫາກຂະແຫນງທ່ອງທ່ຽວເປັນເຈົ້າການ ວາງອອກຫລາຍມາດຕະການຄື: ໂຄສະນາສະພາບການຢູ່ຫວຽດນາມແມ່ນສະຖຽນລະພາບ, ຮັກສາການເຄື່ອນໄຫວຂະແຫນງທ່ອງທ່ຽວໃນທົ່ວປະເທດເປັນປົກກະຕິ. ພ້ອມທັງ ມີບັນດາມາດຕະການຮັບປະກັນຄວາມສະຫງົບປອດໄພໃຫ້ແກ່ນັກທ່ອງທ່ຽວ.
“ພວກຂ້າພະເຈົ້າມີບັນດາການເຄື່ອນໄຫວເປີດກວ້າງຕະຫລາດ ເພື່ອຕາບຈູນໃຫ້ສະພາບຈຳນວນນັກທ່ອງທ່ຽວຈີນມາຢ້ຽມຢາມຫວຽດນາມ ຫລຸດລົງ ແລະ ບັນດາຕະຫລາດບຸລິມະສິດ ເລືອກເຟັ້ນ ນັ້ນແມ່ນຍີ່ປຸ່ນ, ສເກົາຫລີ, ລັດເຊຍ ແລະ ອາຊຽນ, ກຸ່ມ ເອີລົບ ຕາເວັນຕົກ, ອາເມລິກາເຫນືອ, ອົດສະຕາລີ ແລະ ກຸ່ມບັນດາຕະຫລາດມີຄວາມສາມາດບົ່ມຊ້ອນຄື: ຕາເວັນອອກກາງ, ອິນເດຍ, ອີນໂດເນເຊຍ.ພວກຂ້າພະເຈົ້າໝັ້ນໝາຍຮັບປະກັນຄວາມສະຫງົບປອດໄພໃຫ້ແກ່ນັກທ່ອງທ່ຽວ.”
ໂດຍປະຕິບັດການຊີ້ນຳຂອງທ່ານຮອງນາຍົກລັດຖະມົນຕີ ຫວູດືກດາມ, ຫົວຫນ້າຄະນະຊີ້ນຳແຫ່ງລັດກ່ຽວກັບການທ່ອງທ່ຽວ, ຫວ່າງແລ້ວນີ້ ກົມໃຫຍ່ທ່ອງທ່ຽວຫວຽດນາມ ໄດ້ວາງອອກໂຄງການດຳເນີນງານລະອຽດ ເພື່ອກະຕຸກຊຸກຍູ້ຄວາມຕ້ອງການທ່ອງທ່ຽວພາຍໃນປະເທດ ດ້ວຍສານທີ່ວ່າ: ຊາວຫວຽດນາມໄປທ່ອງທ່ຽວຢູ່ຫວຽດນາມ”. ພ້ອມທັງ ຕັ້ງຫນ້າຜັນຂະຫຍາຍບັນດາການເຄື່ອນໄຫວໂຄສະນາ, ສົ່ງເສິມການທ່ອງທ່ຽວຢູ່ຕ່າງປະເທດ,ສ້າງພາບພົດຫວຽດນາມແມ່ນສະຖານທີ່ທ່ອງທ່ຽວປອດໄພ, ສະຫນິດສະຫນົມ ແລະ ຮັກແພງແຂກ, ສູ້ຊົນປີ 2014 ບັນລຸຄາດໝາຍດຶງດູດນັກທ່ອງທ່ຽວສາກົນ 8,3 ລ້ານຄົນ ແລະ ນັກທ່ອງທ່ຽວພາຍໃນປະເທດ 35 ລ້ານຄົນ.