(vovworld) – ຕອນບ່າຍວັນທີ 5/6, ທີ່ສຳນັກງານກະຊວງປ້ອງກັນປະເທດ, ພົນໂທ ຫງວຽນຈີ໋ວິ້ງ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ໄດ້ຕ້ອນຮັບຄະນະຜູ້ແທນກົມນະໂຍບາຍປ້ອງກັນຄວາມສະຫງົບສາກົນ, ກະຊວງປ້ອງກັນປະເທດ ການາດາ, ໂດຍພົນເຮືອຕີ Gilles Couturier, ຫົວໜ້າກົມນະໂຍບາຍປ້ອງກັນຄວາມສະຫງົບສາກົນ, ກະຊວງປ້ອງກັນປະເທດ ການາດາ ເປັນຫົວໜ້າຄະນະ, ພວມຢ້ຽມຢາມ ແລະ ເຮັດວຽກຢູ່ ຫວຽດນາມ.
ພົນໂທ ຫງວຽນຈີ໋ວິ້ງ ຖືວ່າການຢ້ຽມຢາມ ຫວຽດນາມ ຂອງຄະນະຜູ້ແທນ ການາດາ ຄັ້ງນີ້ຈະປະກອບສ່ວນຊຸກຍູ້ການຮ່ວມມືລະຫວ່າງສອງປະເທດໃນບັນດາຂົງເຂດ, ໃນນັ້ນມີຂົງເຂດປ້ອງກັນຊາດ. ພົນໂທ ຫງວຽນຈີ໋ວິ້ງ ສະເໜີໃຫ້ກະຊວງປ້ອງກັນປະເທດສອງຝ່າຍຜັນຂະຫຍາຍ, ຊຸກຍູ້ການຮ່ວມມືກ່ຽວກັບການຝຶກອົບຮົມ, ບຳລຸງສ້າງພາສາ ອັງກິດ, ແລກປ່ຽນບົດຮຽນກ່ຽວກັບຄວາມປອດໄພທາງການບິນ, ວຽກງານຊອກຫາກູ້ໄພກູ້ຊີບ ແລະ ກ້າວໄປເຖີງການຮ່ວມມືໃນຂົງເຂດອຸດສາຫະກຳປ້ອງກັນຊາດ.
ພົນເຮືອຕີ Gilles Couturier ໃຫ້ຮູ້ວ່າ ການາດາ ຫາກໍ່ອອກຖະແຫຼງການສະໜັບສະໜູນຫຼັກໝັ້ນ - ທັດສະນະຂອງ ອາຊຽນ ກ່ຽວກັບບັນຫາທະເລຕາເວັນອອກ, ສະໜັບສະໜູນບັນດາວິທີແກ້ໄຂຂອງ ຫວຽດນາມ ແນໃສ່ແກ້ໄຂຄວາມຂັດແຍ້ງກັນດ້ວຍສັນຕິວິທີ, ບົນພື້ນຖານກົດໝາຍສາກົນຕໍ່ໜ້າເລື່ອງ ຈີນຕັ້ງຮ້ານເຈາະນ້ຳມັນ ໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ.