ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: VGP)

ຕອນບ່າຍວັນທີ 2 ທັນວາ, ຢູ່ແຂວງບ້າເຣ້ຍ - ຫວູງເຕົາ, ທ່ານນາຍົກລັດຖະມົນຕີ ຟ້າມມິງຈິງ ປະທານສະພາປະສານງານເຂດທາງທິດຕາເວັນອອກພາກໃຕ້ (ສະພາເຂດ), ເປັນປະທານກອງປະຊຸມຄັ້ງທີ 5 ຂອງ ສະພາເຂດ, ດ້ວຍຫົວຂໍ້ “ການເຕີບໂຕເສດຖະກິດຢູ່ລະດັບ 2 ຕົວເລກຂອງເຂດທາງທິດຕາເວັນອອກພາກໃຕ້ ປີ 2025: ສິ່ງທ້າທາຍ, ກາລະໂອກາດ ແລະ ວິທີການແກ້ໄຂ”.

ຢູ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ຢັ້ງຢືນວ່າ ເຂດທາງທິດຕາເວັນອອກພາກໃຕ້ແມ່ນໜຶ່ງໃນບັນດາເຂດຈຸດສຸມ, ປະກອບສ່ວນສຳຄັນເຂົ້າການພັດທະນາລວມຂອງທົ່ວປະເທດ. ດັ່ງນັ້ນ, ທ່ານນາຍົກລັດຖະມົນຕີ ຮຽກຮ້ອງໃຫ້ການນຳບັນດາກະຊວງ, ຂະແໜງການ, ທ້ອງຖິ່ນໃນເຂດສຸມໃສ່ປຶກສາຫາລື, ຕີລາຄາໝາກຜົນ, ກຳນົດຢ່າງຈະແຈ້ງບັນດາໜ້າທີ່, ສະເໜີຄຳເຫັນບັນດາວິທີການປະຕິບັດບັນດາໜ້າທີ່, ພິເສດແມ່ນມາດຕະການປະຕິບັດໜ້າທີ່ເຕີບໂຕ GDP ຢູ່ລະດັບ 2 ຕົວເລກໃຫ້ເປັນຢ່າງດີ, ຢ່າງໜ້ອຍສຸດແມ່ນ 8%ໃນຊຸມປີຕໍ່ໄປ. ທ່ານນາຍົກລັດຖະມົນຕີສະເໜີບັນດາຜູ້ແທນ ປຶກສາຫາລື, ສະເໜີວິທີການແກ້ໄຂບັນດາບັນຫາລະອຽດ, ຄື: ກໍສ້າງທ່າກຳປັ່ນສົ່ງຕໍ່ສາກົນ ເກິ່ນເຢີ, ສູນການເງິນສາກົນ ຢູ່ນະຄອນໂຮ່ຈີມິນ, ເສັ້ນທາງຄວາມໄວສູງ ນະຄອນ ໂຮ່ຈີມິນ - ມົນບາຍເຊື່ອມຕໍ່ກັບຊາຍແດນກຳປູເຈຍ, ທ່າອາກາດສະຍານກົນດາວ, ໂຄງການຕ້ານນ້ຳຖ້ວມພາຍໃນນະຄອນໂຮ່ຈີມິນ…