ທ່ານນາຍົກລັດຖະມົນຕີ ຫງວຽນຊວນຟຸກ ແລະ ການນຳບັນດາກະຊວງ
ເຮັດວຽກກັບການນຳຫຼັກແຫຼ່ງແຂວງ ເບ໋ນແຈ (vovworld) - ຕອນເຊົ້າວັນທີ 18/6, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ການນຳບັນດາກະຊວງເຮັດວຽກກັບການນຳຫຼັກແຫຼ່ງແຂວງ ເບ໋ນແຈ ກ່ຽວກັບສະພາບການເສດຖະກິດສັງຄົມໃນເຄິ່ງຕົ້ນປີ 2016. ພິເສດແມ່ນວຽກງານແກ້ໄຂໄພແຫ້ງແລ້ງ, ນຳ້ທະເລຊືມເຂົ້າ. ທີ່ການປະຊຸມ, ການນຳແຂວງ ເບ໋ນແຈ ໄດ້ສະເໜີທ່ານນາຍົກລັດຖະມົນຕີ ໜູນຊ່ວຍລົງທຶນເຂົ້າບາງໂຄງການຕ້ານໄພແຫ້ງແລ້ງ ແລະ ນຳ້ທະເລຊືມເຂົ້າ.
ທີ່ການເຮັດວຽກ, ພ້ອມກັບການຮັບເອົາບັນດາຂໍ້ສະເໜີຂອງການນຳແຂວງ ເບ່ນແຈແລ້ວ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີທາງແຂວງເອົາໃຈໃສ່ເຖິງວຽກງານວາງແຜນກຳນົດ, ພິເສດແມ່ນວາງແຜນກຳນົດກ່ຽວກັບແຫຼ່ງຊັບພະຍາກອນນຳ້ ເພື່ອຮັບມືກັບການປ່ຽນແປງຂອງດິນຟ້າອາກາດ. ພ້ອມກັນນັ້ນແມ່ນການສ້າງໂຄງປະກອບເສດຖະກິດ ຕິດພັນກັບການລົງທຶນກໍ່ສ້າງພື້ນຖານໂຄງລ່າງ.
“ຕ້ອງມີມາດຕະການເພື່ອຮັບມືກັບການປ່ຽນແປງຂອງດິນຟ້າອາກາດ. ໂດຍລະອຽດແມ່ນຕ້ອງໝູນໃຊ້ວິທະຍາສາດ, ເຕັກໂນໂລຢີ, ແນວພັນປູກ, ສັດລ້ຽງ. ຂົນຂວາຍປະຊາຊົນປ່ຽນເວລາ,ຄວາມຊິນເຄີຍໃນການປູກຝັງ. ປຸກລະດົມຂະບວນການມະຫາຊົນ ເພື່ອໃຫ້ປະຊາຊົນຮັບຮູ້ໄດ້ສະພາບການປ່ຽນແປງຂອງດິນຟ້າອາກາດ ເພື່ອມີມາດຕະການຢ່າງລະອຽດ. ບໍ່ແມ່ນວ່າເຮັດຕາມຄວາມຊິນເຄີຍແບບເກົ່າ. ໃນການພັດທະນາຕ້ອງແບ່ງທຶນໃຫ້ບັນດາກິດຈະກຳ, ເປັນຕົ້ນແມ່ນບັນດາໂຄງການຮັບມືກັບການປ່ຽນແປງຂອງດິນຟ້າອາກາດ“.
ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ຊີ້ນຳໃຫ້ແຂວງ ເບ໋ນແຈຄວນຍູ້ແຮງການຫັນປ່ຽນໂຄງປະກອບຜົນລະປູກໄປສູ່ຂົງເຂດອຸດສາຫະກຳຜະລິດປຸງແຕ່ງ ແລະ ການບໍລິການ.