(vovworld) - ໃນວັນທີ 10/8, ຢູ່ນະຄອນໂຮ່ຈີມິນ, ຄະນະພັກນະຄອນ, ຄະນະກຳມະການປະຊາຊົນແຂວງບ່າເຣ້ຍ-ຫວຸງເຕົ່າ ຈັດຕັ້ງກອງປະຊຸມສົ່ງເສີມການລົງທຶນ ເຂົ້າໃນທ້ອງຖິ່ນດ້ວຍຫົວຂໍ້ “ຮ່ວມເດີນທາງກັບນັກລົງທຶນ”. ກ່າວຄວາມເຫັນ ທີ່ກອງປະຊຸມ, ທ່ານ ຮອງນາຍົກລັດຖະມົນຕີຫວຽດນາມ ຈິ້ງດິ່ງຢຸງ ສະເໜີ ແຂວງບ່າເຣ້ຍ-ຫວຸງເຕົ່າ ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດຢ່າງແຮງ, ເພີ່ມທະວີດຶງດູດການລົງທຶນ. ໃນນັ້ນ ຈຸດສຸມແມ່ນປັບປຸງບັນດາກົນໄກ, ນະໂຍບາຍບຸລິມະສິດ, ໜູນຊ່ວຍການລົງທຶນ ໃນແຂວງ, ສ້າງເງື່ອນໄຂຄວາມສະດວກໃຫ້ບັນດານັກລົງທຶນ, ແກ້ໄຂຄວາມຫຍຸ້ງຍາກ, ຂໍ້ຄົງຄ້າງໃນວິວັດການລົງທຶນ ແລະ ການຜະລິດດຳເນີນທຸລະກິດ ຢ່າງທັນການ. ແຂວງກໍ່ຈຳເປັນຕ້ອງມີບັນດາມາດຕະການດູດດື່ມ ເພື່ອດຶງດູດແຫຼ່ງຊັບພະຍາກອນມະນຸດຈາກບັນດາແຂວງ, ນະຄອນ ໃກ້ຄຽງ; ພິເສດ ເອົາໃຈໃສ່ພັດທະນາທີ່ຢູ່ສັງຄົມ, ພື້ນຖານໂຄງລ່າງທີ່ຈຳເປັນໃຫ້ກຳມະກອນ, ຜູ້ອອກແຮງງານ ຢູ່ບັນດາເຂດ, ກຸ່ມອຸດສາຫະກຳ, ຕິດພັນການພັດທະນາອຸດສາຫະກຳ ກັບການພັດທະນາຕົວເມືອງ. ທີ່ກອງປະຊຸມ, ບັນດາຜູ້ແທນກໍ່ຖືວ່າ: ໃນໄລຍະຈະມາເຖິງ ແຂວງບ່າເຣ້ຍ-ຫວຸງເຕົ່າ ຈຳເປັນຕ້ອງມີບັນດານະໂຍບາຍບຸກທະລຸ ເພື່ອພັດທະນາ ໃຫ້ກາຍເປັນແຂວງທີ່ເຂັ້ມແຂງທາງດ້ານອຸດສາຫະກຳ, ທ່າກຳປັ່ນ, ບໍລິການພາລາທິການທ່າກຳປັ່ນ ແລະ ການທ່ອງທ່ຽວ. ລະອຽດຄື, ຈຳເປັນຕ້ອງເພີ່ມທະວີກົນໄກການຮ່ວມສຳພັນ, ສົມທົບກັບບັນດາແຂວງ, ນະຄອນ ໃນເຂດເສດຖະກິດຈຸດສຸມພາກໃຕ້ ເພື່ອພັດທະນາເສດຖະກິດ, ນຳເຂດໃຫ້ກາຍເປັນແຂວງນຳໜ້າຂອງທົ່ວປະເທດ ໃນການພັດທະນາເສດຖະກິດ ແລະ ສ້າງກຳລັງໜູນ, ເພື່ອພັດທະນາເສດຖະກິດ ໃນທົ່ວປະເທດ.