(vovworld)- ວັນທີ 5/10,ຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ ສສ ຫວຽດນາມ, ປະທານປະເທດ ສສ ຫວຽດນາມ, ລັດຖະບານ ຫວຽດນາມ, ຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ຄະນະພັກການທະຫານສູນກາງ ໄດ້ອອກແຈ້ງການພິເສດໃຫ້ຮູ້ວ່າ: ພົນເອກ ຫວໍ້ງວຽນຢາບ ໄດ້ເຖິງແກ່ມໍລະນະກຳ. ພົນເອກ ຫວໍ້ງວຽນຢາບ ເກີດວັນທີ 25/8/1911 ຢູ່ຕາແສງ ໂລກຖູຍ ເມືອງ ເລ້ຖູຍ ແຂວງ ກວ໋າງບີ່ງ, ອະດີດກຳມະການກົມການເມືອງ, ອະດີດເລຂາຄະນະພັກການທະຫານສູນກາງ, ອະດີດຮອງນາຍົກລັດຖະມົນຕີ ຜູ້ປະຈຳການລັດຖະບານ, ອະດີດລັດຖະມົນຕີກະຊວງປ້ອງກັນປະເທດ, ຜູ້ບັນຊາການທະຫານສູງສຸດກອງທັບປະຊາຊົນຫວຽດນາມ, ສະມາຊິກສະພາແຫ່ງຊາດແຕ່ຊຸດທີ 1 - ຊຸດທີ 7.
ພົນເອກ ຫວໍ້ງວຽນຢາບ-ຜູ້ບັນຊາການທະຫານສູງສຸດຂອງກອງທັບປຊຊຫວຽດນາມ
(ພາບ: ອິນເຕີແນດ)
ຍ້ອນອາຍຸສູງ, ສຸຂະພາບອ່ອນເພຍ, ເຖິງວ່າ ພັກ, ລັດ, ຄະນະພັກການທະຫານສູນກາງ, ກະຊວງປ້ອງກັນປະເທດຫວຽດນາມ ແລະ ໝູ່ຄະນະ ສາດສະດາຈານ, ທ່ານໝໍ, ພາລະກອນການແພດຢູ່ພາຍໃນ ແລະ ນອກກອງທັບພ້ອມກັບຄອບຄົວສຸດຈິດສຸດໃຈເບິ່ງແຍງ ປິ່ນປົວໃຫ້ເພີ່ນ, ແຕ່ພົນເອກໄດ້ເຖິງແກ່ມໍລະນະກຳໃນເວລາ 18ໂມງ 9 ນາທີ ຂອງວັນທີ 4/10/2013 ຢູ່ ໂຮງໝໍສູນກາງກອງທັບ 108 ລວມອາຍຸ 103 ປີ.
ແຈ້ງການໄດ້ຊີ້ແຈ້ງວ່າ: ໃນຕະຫລອດຊີວິດກວ່າ 80 ປີ ແຫ່ງການເຄື່ອນໄຫວປະຕິວັດຢ່າງລຽນຕິດ, ພົນເອກ ໄດ້ມີຜົນງານຍິ່ງໃຫຍ່ທີ່ມີຕໍ່ພາລະກິດປະຕິວັດຂອງພັກ ແລະ ຂອງຊາດ. ໂດຍແມ່ນລູກສິດດີເດັ່ນ ແລະ ໃກ້ຊິດຂອງທ່ານປະທານໂຮ່ຈິມີນ, ແມ່ນພົນເອກຜູ້ທຳອິດ ແລະ ແມ່ນຜູ້ບັນຊາການທະຫານສູງສຸດຂອງກອງທັບປະຊາຊົນຫວຽດນາມ, ພົນເອກຫວໍ້ງວຽນຢາບໄດ້ຮັບຄວາມຮັກແພງ, ເຄົາລົບນັບຖືຈາກປະຊາຊົນ, ຄວາມນິຍົມເຄົາລົບຈາກ ເພື່ອນມິດສາກົນ ແມ່ນຄວາມເອກອ້າງທະນົງໃຈຂອງພະນັກງານ, ນັບຮົບທົ່ວກອງທັບລຸ້ນຕ່າງໆ. ພົນເອກ ຫວໍ້ງວຽນຢາບ ໄດ້ຮັບຫລຽນໄຊດາວເຫລືອງ, ຫລຽນໄຊໂຮ່ຈິມີນ, ຫລຽນກາ ອາຍຸພັກ 70 ປີ ແລະ ຫລຽນໄຊອັນສູງສົ່ງອື່ນຫລາຍຫລຽນຂອງຫວຽດນາມ ແລະ ສາກົນ.
ພົນເອກຫວໍ້ງວຽນຢາບ ໄດ້ເຖິງແກ່ມໍລະນະກຳແມ່ນຄວາມສູນເສຍອັນໃຫ່ຍຫຼວງສຳລັບພັກ, ລັດ, ປຊຊ ແລະ ກອງທັບຫວຽດນາມ.
ເພື່ອສະແດງຄວາມໂສກເສົ້າເສຍດາຍ ແລະ ຄວາມຮູ້ບຸນຄຸນຕໍ່ທ່ານພົນເອກຫວໍ້ງວຽນຢາບ, ຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ ສສ ຫວຽດນາມ, ປະທານປະເທດ ສສ ຫວຽດນາມ, ລັດຖະບານປະເທດ ສສ ຫວຽດນາມ, ຄະນະກຳມະການແນວໂຮມປະເທດຊາດຫວຽດນາມ ແລະ ອົງຄະນະພັກກອງທັບສູນກາງ ໄດ້ຕົກລົງຈັດງານສົບ ທ່ານພົນເອກຫວໍ້ງວຽນຢາບ ດ້ວຍພິທີລະດັບຊາດ.
ຄະນະຮັບຜິດຊອບພິທີງານສົບ ທ່ານພົນເອກຫວໍ້ງວຽນຢາບ ລວມມີສະມາຊິກ 30 ທ່ານ, ໃນນັ້ນ, ທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງເປັນຫົວໜ້າຄະນະ.
ພິທີງານສົບທ່ານພົນເອກຫວໍ້ງວຽນຢາບ ຖືກຈັດຕັ້ງຂຶ້ນຢູ່ຫໍຈັດງານສົບແຫ່ງຊາດ ເລກທີ 5 ຖະໜົນເຈິນແທງຕົງ ຮ່າໂນ້ຍ ແຕ່ 7 ໂມງ 30 ນາທີ ວັນທີ 12/10/2013. ພິທີໄວ້ອາໄລທ່ານພົນເອກຫວໍ້ງວຽນຢາບຈະຖືກຈັດຂຶ້ນ ຢ່າງສົມກຽດແຕ່ 7 ໂມງ 30 ນາທີຂອງວັນທີ 13/10/2013.
ໃນເວລາຈັດພິທີງານສົບແລະ ພິທີໄວ້ອາໄລທ່ານພົນເອກຫວໍ້ງວຽນຢາບ ຢູ່ຮ່າໂນ້ຍ ກໍ່ຈະຈັດພິທີງານສົບແລະ ພິທີໄວ້ອາໄລທ່ານພົນເອກຫວໍ້ງວຽນຢາບ ຢູ່ສຳນັກງານຄະນະກຳມະການ ປຊຊ ແຂວງກວາງບິງ ແລະ ຫໍປະຊຸມເອກະພາບນະຄອນໂຮ່ຈິມິນ.
ຕາມຄວາມມຸ້ງຫວັງຂອງທ່ານອະດີດພົນເອກຫວໍ້ງວຽນຢາບ ແລະ ຄອບຄົວຂອງເພິ່ນ, ພິທີປົ່ງສົບ ທ່ານພົນເອກຫວໍ້ງວຽນຢາບ ຈະຖືກຈັດຂຶ້ນໃນວັນທີ 13/10/2013 ຢູ່ແຂວງກວາງບິງ-ບ້ານເກີດເມືອງນອນຂອງທ່ານພົນເອກຫວໍ້ງວຽນຢາບ.
ໃນສອງວັນຈັດພິທີງານສົບທ່ານພົນເອກຫວໍ້ງວຽນຢາບ (ຄືວັນທີ 12-13/102013), ບັນດາສຳນັກງານ, ເຂດສາທາລະນະຈະຊັກທຸງຊາດລົງເຄິ່ງເສົາ ແລະ ຢຸດຕິບັດດາການເຄື່ອນໄຫວລະຫຼີ້ນບັງເທິງ./.