ທ່ານປະທານປະເທດ ຫງວຽນຊວັນຟຸກ ໃຫ້ການຕ້ອນຮັບການເຂົ້າຢ້ຽມຂ່ຳນັບຂອງ ທ່ານລັດຖະມົນຕີກະຊວງການຕ່າງປະເທດ ແລະ ພັດທະນາອັງກິດ Dominic Raab (ພາບ: VGP)

ຕອນບ່າຍວັນທີ 22 ມີຖຸນາ, ຢູ່ຮ່າໂນ້ຍ, ທ່ານປະທານປະເທດ ຫງວຽນຊວັນຟຸກ ໄດ້ໃຫ້ການຕ້ອນຮັບການເຂົ້າຢ້ຽມຂ່ຳນັບຂອງ ທ່ານລັດຖະມົນຕີກະຊວງການຕ່າງປະເທດ ແລະ ພັດທະນາອັງກິດ Dominic Raab ເນື່ອງໃນໂອກາດມາຢ້ຽມຢາມຫວຽດນາມ ແລະ ເຂົ້າຮ່ວມການສົນທະນາປຶກສາຫາລື ກ່ຽວກັບນະໂຍບາຍຂັ້ນສູງ ອາຊີ - ເອີລົບ (ASEM). ທີ່ການຕ້ອນຮັບທ່ານ ປະທານປະເທດ ຫງວຽນຊວັນຟຸກ ເນັ້ນໜັກວ່າ ສອງຝ່າຍຄວນສືບຕໍ່ຊຸກຍູ້ທ່າພັດທະນາຢ່າງຕັ້ງໜ້າຂອງການພົວພັນສອງຝ່າຍ, ນຳບັນດາເນື້ອໃນການຮ່ວມມື ຂອງ ການພົວພັນຄູ່ຮ່ວມມືຍຸດທະສາດ ຫວຽດນາມ - ອັງກິດ ເຂົ້າສູ່ລວງເລິກ ມີປະສິດທິຜົນ ແລະ ແທດຈິງ. ທ່ານເນັ້ນໜັກວ່າ ສອງຝ່າຍຄວນສົມທົບປະຕິບັດສັນຍາການຄ້າເສລີ ຫວຽດນາມ - ອັງກິດ ຢ່າງມີປະສິດທິຜົນ ແນໃສ່ສ້າງບາດກ້າວບຸກທະລຸກ່ຽວກັບການແລກປ່ຽນການຄ້າ ແລະ ການຮ່ວມມືລົງທຶນ; ທ່ານຢືນຢັນວ່າ ຫວຽດນາມ ຈະສ້າງທຸກເງື່ອນໄຂສະດວກ ເພື່ອໃຫ້ວິສາຫະກິດອັງກິດເຂົ້າມາລົງທຶນໃນບັນດາຂົງເຂດທີ່ມີທ່າແຮງບົ່ມຊ້ອນ.

ສ່ວນທ່ານລັດຖະມົນຕີ Dominic Raab ເນັ້ນໜັກວ່າ ອັງກິດຖືເປັນສຳຄັນການພັດທະນາການພົວພັນກັບ ຫວຽດນາມ ໃນສະພາບການປະເທດອັງກິດພາຍຫຼັງ Brexit ດັດປັບນະໂຍບາຍມຸ່ງໄປສູ່ພາກພື້ນ ມາຫາສະໝຸດອິນເດຍ - ປາຊີຟິກ. ທ່ານໄດ້ແຈ້ງໃຫ້ທ່ານປະທານ ຫງວຽນຊວັນຟຸກ ຮັບຊາບວ່າ: ກອງທຶນ ການເງິນ ອັງກິດ ໄດ້ສະໜອງເງິນ 4 ຕື້ USD ເພື່ອຊ່ວຍໜູນບັນດາວິສາຫະກິດອັງກິດ ເພີ່ມທະວີການລົງທຶນຢູ່ ຫວຽດນາມ. ທ່ານ ຢືນຢັ່ນເຖິງຄວາມສຳຄັນຂອງການຮັບປະກັນສິດເສລີໃນການເດີນເຮືອ, ການບິນ ຄວາມໝັ້ນຄົງ ແລະ ສັນຕິພາບຢູ່ທະເລຕາເວັນອອກ ແລະ ເນັ້ນໜັກເຖິງການເຄົາລົບກົດໝາຍສາກົນໃນນັ້ນມີ ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ ປີ 1982.

ກອ່ນໜ້ານັ້ນ, ທ່ານລັດຖະມົນຕີກະຊວງການຕ່າງປະເທດ ແລະ ພັດທະນາ ອັງກິດ Dominic Raab ໄດ້ມີການພົບປະກັບທ່ານລັດຖະມົນຕີກະຊວງຕຳຫຼວດຫວຽດນາມ ໂຕເລິມ.