(vovworld) – ວັນທີ 6/9, ຢູ່ສຳນັກງານສູນກາງພັກ, ທີ່ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບກະສັດ ມາເລເຊຍ Apdul Halim Muadzam Shad ທີ່ພວມຢ້ຽມຢາມທາງລັດຖະກິດ ຫວຽດນາມ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຊົມເຊີຍການຢ້ຽມຢາມທາງລັດຖະກິດເຖິງ ຫວຽດນາມ ຂອງກະສັດ Apdul Halim Muadzam Shad ແລະ ພະມະເຫສີ ເນື່ອງໃນໂອກາດ 2 ປະເທດພວມຜັນຂະຫຍາຍການເຄື່ອນໄຫວຕ່າງໆເພື່ອສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດ. ທ່ານເລຂາທິການໃຫຍ່ ສະແດງຄວາມເພິງພໍໃຈກ່ຽວກັບການພັດທະນາການພົວພັນລະຫວ່າງ 2 ປະເທດໃນໄລຍະຜ່ານມາ ແລະ ເຊື່ອໝັ້ນວ່າການຢ້ຽມຢາມຂອງກະສັດຄັ້ງນີ້ ຈະປະກອບສ່ວນຊຸກຍູ້ການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງ 2 ປະເທດ. ທ່ານເລຂາທິການໃຫຍ່ ສະເໜີໃຫ້ 2 ຝ່າຍສືບຕໍ່ແລກປ່ຽນຄະນະຜູ້ແທນຂັ້ນສູງ, ເພີ່ມທະວີການຮ່ວມມືໃນບັນດາຂົງເຂດຄື: ການຄ້າ, ການລົງທຶນ, ການສຶກສາ, ວັດທະນະທຳ... ໃຫ້ດີກ່ວາອີກ, ພ້ອມທັງຢັ້ງຢືນນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ແມ່ນຖືເປັນສຳຄັນການເພີ່ມທະວີ, ເປີດກ້ວາງການພົວພັນມິດຕະພາບ ແລະ ການຮ່ວມມືຫຼາຍດ້ານກັບບັນດາປະເທດໃນພາກພື້ນ, ໃນນັ້ນມີ ມາເລເຊຍ, ນັບທັງພື້ນຖານ 2 ຝ່າຍ ກໍ່ຄືໃນຂອບເຂດ ອາຊຽນ ແລະ ບັນດາເວທີປາໄສຮ່ວມມືຫຼາຍຝ່າຍເພື່ອຜົນປະໂຫຍດຂອງ ປະຊາຊົນ 2 ປະເທດ, ເພື່ອສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ແລະ ໃນໂລກ.