(vovworld)- ປ່າສະຫງວນແຫ່ງຊາດ ຟອງຍາ-ແກ໋ບາງ ຂຶ້ນກັບ ບັນດາເມືອງ ກວ໋າງນີງ, ໂບແຈກ, ຕວຽນຮ່ວາ ແລະ ມີງຮ່ວາ ແຂວງ ກວ໋າງບີ່ງ. ປ່າສະຫງວນແຫ່ງຊາດ ຟອງຍາ-ແກ໋ບາງ ແມ່ນເຂດທີ່ມີຫລາຍຄຸນຄ່າກ່ຽວກັບປະຫວັດສາດ, ທໍລະນີສາດ, ພູມີສັນຖານ, ບັນດາທິວທັດທຳມະຊາດທີ່ໃຫຍ່ໂຕມະໂຫຖານ ແລະ ເລິກລັບມະຫັດສະຈັນຢູ່ທີ່ນີ້ໂດຍທຳມະຊາດດົນບັນດານໃຫ້. ເຂດຟອງຍາ-ແກ໋ບາງ ໄດ້ຮັບການຮັບຮອງຈາກອົງການສຶກສາ, ວິທະຍາສາດ ແລະ ວັດທະນະທຳ ສປຊ UNESCO ແມ່ນມໍລະດົກທຳມະຊາດຂອງໂລກຕາມມາດຖານທໍລະນີສາດປີ 2013. ຟອງຍາ-ແກ໋ບາງ ກໍຖືກສະເຫນີຕໍ່ອົງການ UNESCO ຮັບຮອງວ່າເປັນມໍລະດົກທຳມະຊາດໂລກ ຄັ້ງທີ 2 ດ້ວຍມາດຖານຊີວະນາໆພັນ.
ລະບົບຖ້ຳຢູ່ ຟອງຍາ - ແກ໋ບາງ
ພາບ:http://disanthegioi.info
|
ປ່າສະຫງວນແຫ່ງຊາດ ຟອງຍາ - ແກ໋ບາງ ມີເນື້ອທີ່ປະມານ 200.000 ເຮັກຕາດ້ວຍລະບົບຖ້ຳໃຫຍ່, ນ້ອຍ ແລະ ບັນດາແມ່ນ້ຳໃຕ້ດິນມີຄວາມຍາວປະມານ 300 ກິໂລແມັດ, ເຮັດໃຫ້ ຟອງຍາ - ແກ໋ບາງ ມີຄຸນຄ່າທີ່ພົ້ນເດັ່ນໃນທົ່ວໂລກກ່ຽວກັບທໍລະນີສາດທີ່ມີມາກ່ອນນີ້ກວ່າ 400 ລ້ານປີ.
ທຳມະຊາດໄດ້ດົນບັນດານໃຫ້ ຟອງຍາ - ແກ໋ບາງ ຊັບພະຍາກອນທຳມະຊາດພູຫິນປູນທີ່ໃຫຍ່ໂຕ, ສ້າງເປັນລະບົບຖ້ຳທີ່ເປັນເອກະລັກສະເພາະພິເສດທີ່ຫາຍາກຢູ່ໃນໂລກ. ດ້ວຍຖ້ຳນ້ອຍໃຫຍ່ກວ່າ 300 ແຫ່ງ, ຟອງຍາ - ແກ໋ບາງ ຖືກຂະຫນານນາມວ່າແມ່ນລາຊະອານາຈັກຖ້ຳ. ນອກຈາກຈຸດທີ່ເປັນເອກະລັກສະເພາະກ່ຽວກັບຄວາມເລິກລັບຂອງຖ້ຳແລ້ວ, ມາແຫ່ງນີ້ ນັກທ່ອງທ່ຽວຍັງໄດ້ຮັບຊົມຫິນນົມຜາທີ່ມີຮູບຊົງ ແລະ ສີສັນຫລາກຫລາຍ ສ້າງຄວາມປະທັບໃຈໃຫ້ແກ່ຜູ້ຊົມ. ຕາມບັນດານັກຜະຈົນໄພ ຂອງລາຊະອານາຈັກ ອັງກິດແລ້ວ, ຟອງຍາ - ແກ໋ບາງ ແມ່ນຖ້ຳແຫ່ງຫນຶ່ງດຽວຢູ່ ຫວຽດນາມ ບັນລຸ 7 ມາດຖານຄື: ຖ້ຳມີແມ່ນ້ຳໃຕ້ດິນສວຍງາມກວ່າໝູ່; ປະຕູຖ້ຳສູງ ແລະ ກວ້າງ; ຫາດຊາຍ, ຫິນໃຕ້ດິນສວຍງາມ; ຫນອງນ້ຳໃຕ້ດິນງາມ; ຖ້ຳບົກກວ້າງ ແລະ ສວຍງາມ, ລະບົບຫິນນົມຜາມະຫັດສະຈັນແລະ ໃຫຍ່ໂຕມະໂຫຖານ, ຖ້ຳນ້ຳຍາວກວ່າໝູ່. ມີບົດຂຽນຫລາຍບົດ ແລະ ຮູບພາບຫລາຍແຜ່ນກ່ຽວກັບຖ້ຳ ຟອງຍາ - ແກ໋ບາງໄດ້ຮັບການລົງພິມ ແລະແນະນຳຢູ່ ມະຫາວິທະຍາໄລໃຫຍ່ 14 ແຫ່ງຂອງເອີລົບ. ນອກນັ້ນ, ຖ້ຳ ຟອງຍາ - ແກ໋ບາງຍັງມີຫລາຍຄົນຮູ້ຈັກເຖິງແມ່ນສິ່ງມະຫັດສະຈັນອັນດັບຫນຶ່ງ. ນາງ ໂດທິທູຮົ່ງ, ນັກທ່ອງທ່ຽວມາຈາກຮ່າໂນ້ຍ ເລົ່າສູ່ຟັງກ່ຽວກັບການຢ້ຽມຢາມຖ້ຳ ຟອງຍາ - ແກ໋ບາງ ວ່າ:
“ພວກຂ້າພະເຈົ້າໄປຢ້ຽມຢາມ ຟອງຍາ - ແກ໋ບາງໃນລະດູຮ້ອນ, ເວລານັ້ນ ອາກາດຢູ່ພາກກາງຮ້ອນເອົ້າທີ່ສຸດ. ແຕ່ເມື່ອເຂົ້າເຂດ ຟອງຍາ - ແກ໋ບາງ ອາກາດພັດເຢັນສະບາຍ. ແມ່ນ້ຳຊອນ ມີນ້ຳຂຽວສະອາດ ສາມາດເຫັນພື້ນແມ່ນ້ຳໄດ້. ຢູ່ທີ່ນີ້ທັງມີແມ່ນ້ຳ ທັງມີພູຜາປ່າໄມ້ ຍັງຄົງຮັກສາຄວາມງາມແບບທຳມະຊາດໄດ້, ອັນໄດ້ເຮັດໃຫ້ທິວທັດທຳມະຊາດຢູ່ທີ່ນີ້ ສວຍງາມທີ່ສຸດ. ຂ້າພະເຈົ້າຮູ້ສຶກສະຫວາດສະເຫວີຍເມື່ອມາຢ້ຽມຢາມ ຟອງຍາ - ແກ໋ບາງ.“
ພາບ:http://disanthegioi.info
|
ໂດຍໄດ້ຮັບການຂະຫນານນາມວ່າ “ລາຊະວັງໃຕ້ດິນ”, ຖ້ຳ ທຽນເດືອງ ແມ່ນຫນຶ່ງໃນບັນດາສິ່ງມະຫັດສະຈັນທີ່ໃຫຍ່ໂຕມະໂຫຖານອັນດັບຫນຶ່ງຂອງໂລກ, ນີ້ແມ່ນສະຖານທີ່ຂາດບໍ່ໄດ້ໃນລາຍການຄົ້ນຫາ ຟອງຍາ - ແກ໋ບາງ. ທ່ານ Martin Holroyd ຜູ້ຊ່ຽວຊານຖ້ຳ ມາຈາກອັງກິດ ໄດ້ເວົ້າວ່າ: ຖ້າມີການຈັດອັນດັບພິເສດ ຂ້າພະເຈົ້າຈະຈັດຖ້ຳທຽນເດືອງເຂົ້າອັນດັບນັ້ນ, ເພາະຖ່ຳແຫ່ງນີ້ແມ່ນສິ່ງທີ່ສວຍງາມພິເສດໂດຍທຳມະຊາດດົນບັນດານໃຫ້ເຂດດິນທີ່ມີອາກາດຮ້າຍແຮງກວ່າໝູ່. ມາແຫ່ງນີ້, ນັກທ່ອງທ່ຽວບໍ່ພຽງແຕ່ໄດ້ຮັບຊົມບັນດາສິ່ງມະຫັດສະຈັນໂດຍທຳມະຊາດດົນບັນດານໃຫ້ເທົ່ານັ້ນ ຫາກຍັງວາດນຶກເຖິງບັນດາຮູບຮ່າງທີ່ແປກປະຫລາດຂອງຫິນນົມຜາອີກດ້ວຍ. ອ້າຍ ເຈີນແອງກວນ, ຢູ່ ຮ່າໂນ້ຍ ມາຢ້ຽມຢາມ ຟອງຍາ - ແກ໋ບາງ ແບ່ງປັນວ່າ:
“ມາຢ້ຽມຊົມຖ້ຳ ທຽນເດືອງ ຂ້າພະເຈົ້າຮູ້ສຶກຄືພວມໄປພະຈົນໄພຢູ່ໃຕ້ດິນ. ບໍ່ມີຄຳສັບໃດທີ່ສາມາດພັນລະນາໄດ້ໝົດ ຄວາມງາມແບບມະຫັດສະຈັນຂອງຖ້ຳແຫ່ງນີ້. ບັນດາຫິນນົມຜາທີ່ມີຮູບຊົງແຕກຕ່າງກັນ ຄືດັ່ງມະນຸດໄດ້ສ້າງຂຶ້ນ.ເທື່ອຫນ້າ ຂ້າພະເຈົ້າຈະກັບຄືນ ຟອງຍາ - ແກ໋ບາງ ເພື່ອໄປຢ້ຽມຊົມຖ້ຳແຫ່ງອື່ນໆອີກ.”
ພິເສດ, ປີ 2009 ພາຍຫຼັງໄປຄົ້ນຫາຖ້ຳເຊີນດ່ອງ, ຄະນະນັກວິທະຍາສາດຂອງສະຫະສະມາຄົມຖ້ຳ າຊະອານາຈັກອັງກິດໃຫ້ເຫັນວ່າ: ຖ້ຳກວ້າງ 200 ມ, ສູງກວ່າ 150 ມ, ມີຄວາມຍາວຢ່າງຫນ້ອຍສຸດປະມານ 6,5 ກມ. ດ້ວຍຂະຫນາດດັ່ງກ່າວ ຖ້ຳເຊີນດ່ອງ ໄດ້ລື່ນກາຍຖ້ຳ Deer ຢູ່ປ່າສະຫງວນແຫ່ງຊາດ Gunung Mulu ຂອງມາເລເຊຍ, ກາຍເປັນຖ້ຳທຳມະຊາດໃຫຍ່ກວ່າໝູ່ຢູ່ໃນໂລກ. ສຳລັບບັນດາຜູ້ທີ່ມັກຄົ້ນຫາ, ຜະຈົນໄພແລ້ວ, ຖ້ຳເຊີນດອ່ງແມ່ນສະຖານທີ່ຈັບອົກຈັບໃຈເພື່ອໄປຢ້ຽມຢາມ. ອ້າຍ Pike Malcoml, ຊາວອັງກິດໃຫ້ຮູ້ວ່າ:
“ຂ້າພະເຈົ້າຢາກເຂົ້າຮ່ວມລາຍການທ່ອງທ່ຽວຄົ້ນຫາຖ້ຳ ເຊີນດ່ອງ. ເພາະໄດ້ຍິນວ່າ ຖ້ຳແຫ່ງນີ້ພິເສດກວ່າຖ້ຳ ຟອງຍາ. ຂ້າພະເຈົ້າມັກຄວາມງາມແບບທຳມະຊາດຢູ່ທີ່ນີ້.”
ຄຽງຂ້າງລະບົບຖ້ຳທີ່ເປັນເອກະລັກສະເພາະ, ປ່າສະຫງວນແຫ່ງຊາດ ຟອງຍາ ແກ໋ບາງ ຍັງກຳມະສິດລະບົບຊີວະພາບປ່າດົງດີບຢູ່ເທິງພູຫິນປູນໃຫຍ່ກວ່າໝູ່ຢູ່ຫວຽດນາມ, ແມ່ນຫນຶ່ງໃນບັນດາເຂດປ່າທີ່ມີລັກສະນະພິເສດອັນດັບຫນຶ່ງຂອງທົ່ວປະເທດ. ຟອງຍາ ແກ໋ບາງ ແມ່ນແຫ່ງທີ່ດຶງດູດບັນດານັກວິທະຍາສາດມາຄົ້ນຄ້ວາ ເພາະວ່າ ຢູ່ທີ່ນີ້ ບໍ່ພຽງແຕ່ແມ່ນເຂດຊີວະນາໆພັນເທົ່ານັ້ນ ຫາກຍັງແມ່ນສູນທີ່ມີສັດສາວາສິ່ງຫລາຍຊະນີດອີກດ້ວຍ, ມີພືດເກືອບ 420 ຊະນິດ ແລະ ສັດພິເສດ 30 ປະເພດ, ໃນນັ້ນ ພືດ116 ຊະນີດ ແລະ ສັດ166 ປະເພດຖືກຈັດເຂົ້າປື້ມແດງຂອງຫວຽດນາມ ແລະ ໂລກ. ຟອງຍາ ແກ໋ບາງ ຖືກຈັດເຂົ້າບັນຊີລາຍຊື່ບັນດາເຂດອະນຸລັກຮັກສາຊີວະນາໆພັນສຳຄັນໃນແຜນການອະນຸລັກຮັກສາຊີວະນາໆພັນແຫ່ງຊາດ ແລະ ໄດ້ຮັບການຕີລາຄາຈາກອົງການສາກົນວ່າ ແມ່ນຫນຶ່ງໃນຈຳນວນເຂດຊີວະນາໆພັນ 200 ແຫ່ງຂອງໂລກ.
ດ້ວຍລະບົບຊີວະນາໆພັນທີ່ອຸດົມສົມບູນ, ຫລາຍຮູບຫລາຍແບບພ້ອມກັບທິວທັດທຳມະຊາດທີ່ສວຍງາມ, ບັນດາປູຊະນີຍະສະຖານປະຫວັດສາດ ແລະ ຄຸນຄ່າວັດທະນະທຳທີ່ເປັນເອກະລັກສະເພາະໄດ້ເຮັດໃຫ້ ຟອງຍາ ແກ໋ບາງ ກາຍເປັນສະຖານທີ່ທ່ອງທ່ຽວທ່ີສ້າງຄວາມດຶງດູດນັກທ່ອງທ່ຽວພາຍໃນ ແລະ ຕ່າງປະເທດມາຢ້ຽມຢາມ ນັບໝື່ນຄົນ.