(vovworld)- ກູ່ລາວຈ່າມມີອາກາດເຢັນສະບາຍຕະຫຼອດປີ, ລະບົບພືດສາຊາດໄມ້ອຸດົມສົມບູນ. ມາຢ້ຽມຢາມກູ່ລາວຈ່າມ, ນັກທ່ອງທ່ຽວຈະໄດ້ອາບນ້ຳທະເລທີ່ຂຽວສະອາດ ແລະ ຊົມປະກາລັງທີ່ມີສີຫຼາກຫຼາຍ. ໃນລາຍການຄົ້ນຫາຫວຽດນາມມື້ນີ້, ເຊີນເພື່ອນມາຢາມກູ່ລາວຈ່າມ ໃນມື້ໜຶ່ງຜ່ານບົດຂຽນຂອງນັກຂ່າວລານແອງ.
ເກາະກູ່ລາວຈ່າມ
(ພາບ:ອິນເຕີແນດ)
ກູ່ລາວຈ່າມ ແມ່ນເກາະກຸ່ມໜຶ່ງ ຢູ່ຕາແສງເຕິນຮຽບ, ເທດສະບານ ໂຮ້ຍອານ, ແຂວງກວາງນາມ. ກູ່ລາວຈ່າມ ຫ່າງຈາກເທດສະບານໂຮ້ຍອານໄປທາງທິດຕາເວັນອອກເກືອບ 20 ກມ, ແມ່ນກຸ່ມເກາະລວມມີ 8 ໜ່ວຍຄື: ເກາະລາວ, ເກາະຢ່າຍ, ເກາະໂມ່, ເກາະໂຄແມ່, ເກາະໂຄກອນ, ເກາະລ໋າ, ເກາະຕາຍ, ເກາະອົງ, ເກາະຈົ່ງ, ແມ່ນສະຖານທີ່ທ່ອງທ່ຽວແຫ່ງໜຶ່ງທີ່ຂາດບໍ່ໄດ້ໃນລາຍການຄົ້ນຫາກວາງນາມ ຂອງນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.
ເກາະກູ່ລາວຈ່າມ
(ພາບ:ອິນເຕີແນດ)
ພາຫະນະຂົນສົ່ງແຂກໄປຢາມກູ່ລາວຈ່າມ ແມ່ນເຮືອຫຼືກາໂນ, ຖ້າເພື່ອນມີເວລາຫຼາຍສາມາດຂີ່ເຮືອໂດຍສານໄປພ້ອມກັບປະຊາຊົນກໍ່ໄດ້. ຕາມທຳມະດາ, ນັກທ່ອງທ່ຽວມັກໄປກູ່ລາວຈ່າມ ຕາມລາຍການຕ່າງໆຂອງບໍລິສັດທ່ອງທ່ຽວ. ຖ້າຫາກໄປທ່ອງທ່ຽວໃນເວລາພຽງໜຶ່ງມື້ເທົ່ານັ້ນ, ທ່ານຄວນຂີ່ກາໂນຄວາມໄວສູງພາຍໃນ 30 ນາທີກໍ່ຈະໄປຮ້ອດເກາະທີ່ສວຍງາມ. ອ້າຍຫງວຽນແທ່ງຈູງ, ຜູ້ນຳທ່ຽວບໍລິສັດທ່ອງທ່ຽວກູ່ລາວຈ່າມ, ໃຫ້ຮູ້ວ່າ:
“ກູ່ລາວຈ່າມ ຍັງຄົງຮັກສາຄວາມງາມແບບທຳມະຊາດໄວ້.ແລະ ເປັນເຂດສະສົມ biosphere ຂອງໂລກ, ດັ່ງນັ້ນການລາດຕະເວນຮັກສາສິ່ງແວດລ້ອມທຳມະຊາດມີຄວາມສຳຄັນທີ່ສຸດ, ປະຊາຊົນຢູ່ທີ່ນີ້ຕ່າງກໍ່ມີສະຕິໃນການຮັກສາສິ່ງແວດລ້ອມໃຫ້ສະອາດ, ປອດໂປ່ງ, ສົມເປັນສະຖານທີ່ທ່ອງທ່ຽວ, ເປັນບ່ອນພັກຜ່ອນບຳລຸງສຸຂະພາບດີທີ່ສຸດ ”.
ເກາະກູ່ລາວຈ່າມ
(ພາບ:ອິນເຕີແນດ)
ມາທ່ອງທ່ຽວກູ່ລາວຈ່າມ, ນັກທ່ອງທ່ຽວມັກດຳນ້ຳທະເລເພື່ອຊົມຫີນປະກາລັງທີ່ສຸດ. ເຂດທ່ອງທ່ຽວນີ້ຍາມໃດກໍ່ໄດ້ຮັບການຕິດຕາມກວດກາຢ່າງໃກ້ຊິດຈາກພາລະກອນກູ້ໄພກູ້ຊີບ. ອ້າຍ ຈູງ ໃຫ້ຮູ້ວ່າ:
“ຫີນປະກາລັງຢູ່ທີນີ້, ແມ່ນມີຫຼາຍປະເພດ, ສ່ວນຫຼາຍແມ່ນຫີນປະກາລັງຮູບຕົ້ນມັງກອນ, ໃນນັ້ນຫີນປະກາລັງຊອນໂມຍ ຖືກຈັດເຂົ້າບັນຊີລາຍຊື່ຈຳພວກພືດ ແລະ ສັດອັນລ້ຳຄ່າຈຳເປັນຕ້ອງໄດ້ຮັບການອະນຸລັກຮັກສາເປັນພິເສດໃນປື້ມປົກແດງ. ເມື່ອດຳນ້ຳນັກທ່ອງທ່ຽວຍັງເຫັນປາ, ຫອຍທີ່ແປກປະຫຼາດ ແລະ ສວຍງາມຫຼາຍປະເພດອີກດ້ວຍ .”
ເກາະກູ່ລາວຈ່າມ
(ພາບ:ອິນເຕີແນດ) ເມື່ອໄດ້ສຳຜັດກັບປະກາລັງທີ່ອ່ອນນວນ ແລະ ໄດ້ຊົມຝູງປາທີ່ມີສີຫຼາກຫຼາຍຕຶງຕັງລອຍນ້ຳ. ເອື້ອຍ Coro, ນັກທ່ອງທ່ຽວຊາວແອດສປາຍ ໄດ້ເວົ້າດ້ວຍຄວາມພາກພູມໃຈວ່າ:
“ທຳມະຊາດຢູ່ທີ່ນີ້ສວຍງາມ ແລະ ຈັບອົບອົກຈັບໃຈຫຼາຍ. ເມື່ອດຳນ້ຳພວກຂ້າພະເຈົ້າໄດ້ເຫັນປະກາລັງ ແລະ ປາທີ່ແປກປະຫຼາດຫຼາຍປະເພດ. ຂ້າພະເຈົ້າດີໃຈທີ່ສຸດເມື່ອເຂົ້າຮ່ວມລາຍການທ່ອງທ່ຽວທີ່ຈັບອົກຈັບໃຈນີ້ພ້ອມກັບເພື່ອນມິດ”.
ເກາະກູ່ລາວຈ່າມ
(ພາບ:ອິນເຕີແນດ) ຢູ່ກູ່ລາວຈ່າມ ຍັງມີຫາດຊາຍທະເລທີ່ຮົກເຮື້ອວ່າງເປົ່າ ແລະ ດູດດື່ມຫຼາຍແຫ່ງ, ແຕ່ພົ້ນເດັ່ນກວ່າໝູ່ແມ່ນຫາດອົງ, ຫາດຈົ່ງ. ນີ້ແມ່ນຫາດຊາຍທະເລສອງແຫ່ງທີ່ມີການບໍລິການຢ່າງຄົບຖ້ວນ, ດ້ວຍຫາດຊາຍສີຂາວ, ຮາບພຽງ, ກວ້າງຂວາງ ແລະ ຍາວຢຽດ. ທ່ານ ເຈິ່ນມິງຕ໋ວນ, ພາລະກອນຄຸ້ມຄອງກູ່ລາວຈ່າມ, ໃຫ້ຮູ້ວ່າ:
“ຫາດອົງ ແລະ ຫາດຈົ່ງມີຄວາມແຕກຕ່າງກັນຫຼາຍ, ຫາດອົງແມ່ນໃກ້ກວ່າຫາດຈົ່ງ, ແຕ່ຫາດຈົ່ງພັດງາມກວ່າ, ບ່ອນກິນຢູ່ກໍ່ສະດວກກວ່າ. ນັກທ່ອງທ່ຽວມາແຫ່ງນີ້ສ່ວນຫຼາຍແມ່ນເພື່ອພັກຜ່ອນ ແລະ ດຳນ້ຳຊົມຫີນປະກາລັງ. ຍ້ອນກູ່ລາວຈ່າມ ໄດ້ຮັບການຮັບຮອງຈາກ UNESCO ວ່າແມ່ນເຂດສະສົມ biosphere ຂອງໂລກ, ດັ່ງນັ້ນນັກທ່ອງທ່ຽວມາແຫ່ງນີ້ເພື່ອຊອກຮູ້ກ່ຽວກັບການດຳລົງຊີວິດຂອງຊາວກູ່ລາວຈ່າມ ເວົ້າລວມ ແລະ ທຳມະຊາດທີ່ຮົກເຮື້ອວ່າງເປົ່າຢູ່ເຂດນີ້ອີກດ້ວຍ”.
ເກາະກູ່ລາວຈ່າມ
(ພາບ:ອິນເຕີແນດ) ມີແຕ່ຢ້ຽມຢາມໃນເວລາພຽງມື້ໜຶ່ງເທົ່ານັ້ນ, ແຕ່ເມື່ອກັບຄືນເຂດດິນຕໍ່ແຜ່ນ, ນັກທ່ອງທ່ຽວຕ່າງຮູ້ສຶກສະຫວາດສະເຫວີຍ, ສຳລັບເຂົາເຈົ້າແລ້ວກູ່ລາວຈ່າມ ປຽບເໝືອນເກາະແຫ່ງທີ່ຊ້ອນແຝງຫຼາຍສິ່ງທີ່ຈັບອົກຈັບໃຈ ກ່ຽວກັບຄວາມງາມຂອງທະເລເກາະ, ແມ່ນສະຖານທີ່ພົ້ນເດັ່ນໃນການທ່ອງທ່ຽວຫວຽດນາມ.