(vovworld)- ໂດຍຫ່າງຈາກໃຈກາງ ເມືອງ ຫລວງພະບາງ ໄປທາງທິດໃຕ້ ປະມານ 29 ກິໂລແມັດ, ນ້ຳຕົກຕາດ ກວາງຊີ ແມ່ນສະຖານທີ່ທ່ອງທ່ຽວດູດດື່ມທີ່ຂາດບໍ່ໄດ້ເມື່ອນັກທ່ອງທ່ຽວໄປຢ້ຽມຢາມ ຫລວງພະບາງ ເວົ້າສະເພາະ ແລະ ປະເທດລາວທີ່ສວຍງາມເວົ້າລວມ. ເຂດນ້ຳຕົກຕາດ ກວາງຊີ ກວ້າງກວ່າ 2 ເຮັກຕາ, ຕັ້ງຢູ່ເຂດປ່າດົງດີບທີ່ຕຶບຫນາ ດ້ວຍລະບົບພືດທີ່ອຸດົມສົມບູນພ້ອມກັບອາກາດປອດໂປ່ງ ອັນໄດ້ດຶງດູດນັກທ່ອງທ່ຽວມາຢ້ຽມຢາມນ້ຳຕົກຕາດກວາງຊີ ເປັນຈຳນວນຫລວງຫລາຍ.ໃນລາຍການຊາຍຄາອາຊຽນ ເຊີນທ່ານຄົ້ນຫານ້ຳຕົກຕາດ ກວາງຊີ ພ້ອມກັບຄອບຄົວອ້າຍມີງ, ນັກທ່ອງທ່ຽວຫວຽດນາມຜ່ານບົດຂຽນຂອງນັກຂ່າວ ຢ້ຽວຮົ່ງ.
ນັກທ່ອງທ່ຽວມາຢ້ຽມຢາມນ້ຳຕົກຕາດກວາງຊີນັບມື້ນັບຫລາຍ
|
ອ້າຍ ດວ່ານວັນມີງ ອະດີດນັກສຶກສາມະຫາວິທະຍາໄລແຫ່ງຊາດ ລາວ ແລະ ປະຈຸບັນພວມດຳເນີນທຸລະກິດ ຢູ່ປະເທດລ້ານຊ້າງ ສະນັ້ນ ເມື່ອໄປເຮັດວຽກຢູ່ບັນດາແຂວງ, ນະຄອນ ຂອງລາວ, ອ້າຍເຄີຍຍາດເວລາໄປຢ້ຽມຢາມບັນດາສະຖານທີ່ທ່ອງທ່ຽວທີ່ສວຍງາມຫລາຍແຫ່ງ. ຫວ່າງແລ້ວນີ້, ເມື່ອມີໂອກາດໄປເຮັດວຽກກັບຄູ່ຮ່ວມມືຢູ່ເມືອງຫລວງພະບາງ, ອ້າຍໄດ້ພາ ແມ່ ແລະ ເອື້ອຍ ໄປຢ້ຽມຢາມເມືອງຫລວງພ້ອມ ແລະ ສະຖານທີ່ທ່ອງທ່ຽວທຳອິດທີ່ຄອບຄົວອ້າຍມີງ ແວ່ຢາມ ນັ້ນແມ່ນ ນ້ຳຕົກຕາດກວາງຊີ.
“ຄອບຄົວຂ້າພະເຈົ້າຂີ່ຍົນຈາກຮ່າໂນ້ຍເຖິງຫລວງພະບາງໂດຍກົງ ດ້ວຍລາຄາປີ້ຍົນປະມານ 160 USD ແລະ ໃຊ້ເວລາປະມານ 1 ຊົ່ວໂມງ. ເມື່ອມາຮອດໂຮງແຮມແລ້ວ, ພວກຂ້າພະເຈົ້າເຊົ່າ ລົດຈັກ 2 ຄັນເພື່ອໄປຢ້ຽມຢາມ ນ້ຳຕົກຕາດກວາງຊີ. ຖ້າພວກເພື່ອນໄປພ້ອມກັບຄອບຄົວມີຫລາຍຄົນ ຄວນເຊົ່າລົດ ຕຸກຕຸກ ແມ່ນສະດວກກວ່າ.”
ຍ້ອນໄດ້ຮ່ຳຮຽນ ແລະ ເຮັດວຽກຢູ່ລາວເປັນເວລາຫລາຍປີ, ສະນັ້ນ ອ້າຍ ມີງເວົ້າພາສາລາວ ໄດ້ດີສົມຄວນ ແລະ ມີຄວາມຄຸ້ນເຄີຍເສັ້ນທາງໄປມາ. ສະນັ້ນ ອ້າຍໄດ້ເລືອກເອົາວິທີເຊົ່າລົດຈັກເພື່ອໄປຢ້ຽມຢາມນ້ຳຕົກຕາດ. ຈາກໃຈກາງເມືອງຫລວງພະບາງໄປຮອດນ້ຳຕົກຕາດກວາງຊີ ພຽງເສຍເວລາ 50 ນາທີ . ເມື່ອເຂົ້າຊົມ ນ້ຳຕົກຕາດກວາງຊີ ນັກທ່ອງທ່ຽວຕ້ອງຊື້ປີ້ ດ້ວຍລາຄາ 20.000 ກີບ/ຄົນ (ປະມານ 2,4 USD). ເມື່ອຢືນຢູ່ນອກປະຕູເຂົ້າເຂດທ່ອງທ່ຽວນີ້ ທ່ານກໍສາມາດໄດ້ຍິນສຽງດັ່ງຂອງນ້ຳຕົກຕາກ.
ນ້ຳຕົກຕາດກວາງຊີ
|
ເມື່ອຍ່າງຜ່ານປະຕູເຂົ້າເຂດນ້ຳຕົກຕາດ ທ່ານຈະຮູ້ສຶກອາກາດຢູ່ທີ່ນີ້ແມ່ນປອດໂປ່ງເຢັນສະບາຍທີ່ສຸດ. ລຽບຕາມ ທາງນ້ອຍ ທີ່ປົກຄຸມໄປດ້ວຍຮົ່ມໄມ້ໃຫຍ່ທີ່ຂຽວອຸ່ມທຸ່ມຂອງປ່າດົງດີບ ແລະ ຂັ້ນໄດດ້ວຍໄມ້. ຄອບຄົວອ້າຍມີງໄດ້ໄປຮອດເຂດນ້ຳຕົກຕາດຕົ້ນຕໍທີ່ຫ່າງຈາກປະຕູເຂົ້າ ປະມານ 400 ແມັດ, ນີ້ແມ່ນເຂດທີ່ກວ້າງໃຫຍ່ ດ້ວຍເນື້ອທີເກືອບ 2 ເຮັກຕາ. ນ້ຳຕົກຕາດຈາກຄວາມສູງກວ່າ 60 ແມັດ ທົບໃສ່ເນີນພູສ້າງເປັນຟອດນ້ຳກ່ອນທີ່ຈະຕົກລົງຫນອງນ້ຳທີ່ມີລວງກວ້າງເກືອບ 100 ແມັດ. ສ້າງເປັນຮູບພາບ ສວຍງາມຄືດັ່ງແຜ່ນແພຂາວຜືນຫນຶ່ງທາມກາງສີຂຽວອຸ່ມທຸ່ມຂອງປ່າໄມ້. ສິ່ງດັ່ງກ່າວໄດ້ດຶງດູດນັກທ່ອງທ່ຽວມາຢ້ຽມຢາມນ້ຳຕົກຕາດກວາງຊີນັບມື້ນັບຫລາຍ, ພິເສດແມ່ນນັກທ່ອງທ່ຽວຕ່າງປະເທດ.
ດ້ວຍທິວທັດທຳມະຊາດທີ່ສວຍສົດງົດງາມຢູ່ນ້ຳຕົກຕາດແຫ່ງນີ້, ແມ່ ແລະ ເອື້ອຍຂອງອ້າຍມີງ ພາກັນຖ່າຍຮູບເປັນທີ່ລະນຶກ. ສ່ວນອ້າຍມີງ ທັງສູບອາກາດທີ່ປອດໂປ່ງ ທັງຕັ້ງໃຈຮັບຟັງຜູ້ນຳທ່ຽວແນະນຳກ່ຽວກັບນຳ້ຕົກຕາດແຫ່ງນີ້.
ສຽງຜູ້ນຳທ່ຽວ
ຖ້າຫາກມີເງື່ອນໄຂ, ນັກທ່ອງທ່ຽວສາມາດສະເໜີຜູ້ນຳທ່ຽວພາໄປຄົ້ນຫາລະບົບສັດພືດທີ່ອຸດົມສົມບູນຢູ່ທີ່ນີ້. ດ້ວຍສັດກວ່າ 100 ປະເພດ, ໃນນັ້ນ ມີເສືອ, ໝີ ແມ່ນ ສັດປະເພດທີ່ຫາຍາກ. ນອກນັ້ນ ຢູ່ທີ່ນີ້ຍັງມີດອກກ້ວຍໄມ້ທີ່ຫາຍາກເກືອບ 30 ຊະນິດ. ນັກທ່ອງທ່ຽວອາດຈະເຂົ້າເຂດອະນຸລັກຮັກສາໝີ ໃນເຂດນ້ຳຕົກຕາດ ຫລື ເຂົ້າຮ່ວມການລະຫລິ້ນໃຕ້ນ້ຳກໍ່ໄດ້. ຄອບຄົວອ້າຍມີງໄດ້ຊອກຫາບ່ອນທີ່ມີທັດສະນີຍະພາບສວຍງາມທີ່ສຸດຢູ່ທີ່ນີ້ເພື່ອຢ້ຽມຊົມ. ອ້າຍມີງ ເວົ້າວ່າ:
“ ຕາມຂ້າພະເຈົ້າແລ້ວ ທິວທັດທຳມະຊາດຢູ່ທີ່ນີ້ແມ່ນງາມຫລາຍ, ພິເສດແມ່ນຮູບພາບ ນ້ຳຫ້ວຍໄຫລໃຕ້ຮົ່ມໄມ້ທ່ີຂຽວອຸ່ມທູ່ມ, ອັນໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວທີ່ສຸດ. ນອກຈາກບັນດາຫນອງໃຫຍ່ແລ້ວ, ນັກທ່ອງທ່ຽວຍັງສາມາດລະຫລິ້ນຢູ່ເຂດນຳ້ຕົກຕາດນ້ອຍໆກໍ່ໄດ້. ທິວທັດທຳມະຊາດທີ່ສວຍງາມ ແລະ ອາກາດທີ່ປອດໂປ່ງຢູ່ທີ່ນີ້ແມ່ນຍາກທີ່ຈະຫາໄດ້ຢູ່ບ່ອນອື່ນ. ສິ່ງດັ່ງກ່າວໄດ້ດຶງດູດນັກທ່ອງທ່ຽວມາຢ້ຽມຢາມນັບມື້ນັບຫລາຍ.”
ຮອດຍາມສາຍັນ, ໃນຂະນະທີ່ຍັງມີນັກທ່ອງທ່ຽວຫຼາຍຄົນນັ່ງພັກຜ່ອນຢ່ອນອາລົມຢູ່ຕາມຕັ່ງຫີນຕັ້ງອ້ອມຫນອງນັ້ນ. ຄອບຄົວອ້າຍມີງ ກໍ່ອຳລານຳ້ຕົກຕາດ ກວາງຊີ ກັບຄືນໃຈກາງເມືອງຫລວງພະບາງ ດ້ວຍຄຳໝັ້ນໝາຍຈະກັບມາຢ້ຽມຢາມແຫ່ງນີ້ຄືນໃໝ່ໃນໂອກາດໃກ້ໆນີ້.