ເຖິງວ່າ 40 ໄດ້ລ່ວງເລີຍໄປແລ້ວກໍ່ຕາມແຕ່ຫຼາຍຄົນຍັງຄົງຈື່ຈຳຊຸມວັນທ້າຍເດືອນ 12/1972, ຂະນະທີ່ເຮືອບິນ B52 ຂອງອາເມລິກາ ໄດ້ຖີ້ມລະເບີດລົງຮ່າໂນ້ຍ. ຂີດໝາຍຂອງຊຸມວັນເວລາໃນບັ້ນຮົບ “ຮ່າໂນ້ຍ-ດ້ຽນບຽນຝູທາງອາກາດພວມຖືກເກັບຮັກສາຢູ່ຫໍພິພິຕະພັນກອງທັບປ້ອງກັນອາກາດຮ່າໂນ້ຍ ແມ່ນການພິສູດໃຫ້ເຫັນໄຊຊະນະທີ່ສະຫງ່າອົງອາດກໍ່ຄືຄວາມເສຍຫາຍຊື່ງຊາວຮ່າໂນ້ຍໄດ້ຜ່ານຜ່າໃນບັ້ນຮົບ 12 ວັນ ແລະ ຄືນທີ່ດຸເດືອດນັ້ນ
ທີ່ງານວາງສະແດງ
(ພາບ:ອິນເຕີແນັດ)
ສິ່ງພົ້ນເດັ່ນໃນເຂດວາງສະແດງຂອງຫໍພິພິຕະພັນກອງທັບປ້ອງກັນອາກາດຮ່າໂນ້ຍ ໃນຊຸມວັນນີ້ແມ່ນບັນດາວັດຖຸພັນທີ່ວາດພາບໃຫ້ເຫັນການຕໍ່ສູ້ໃນ 12 ວັນ ແລະ ຄືນທ້າຍເດືອນ 12/1972 ຂອງບັນດານັກຮົບນະຄອນຫຼວງ, ສ້າງເປັນໄຊຊະນະ “ຮ່າໂນ້ຍ-ດ້ຽນບຽນຝູທາງອາກາດ“. ທ່ານພັນເອກ Nguyen Huu Dac ຜູ້ອຳນວຍການຫໍພິພິຕະພັນກອງທັບປ້ອງກັນອາກາດໃຫ້ຮູ້ວ່າ:
“ພວກຂ້າພະເຈົ້າໄດ້ວາງສະແດງບັນດາວັດຖຸພັນ, ເອກະສານ, ຮູບພາບກ່ຽວກັບເຫດການ 12 ວັນ ແລະ ຄືນປີ 1972, ຊຶ່ງແມ່ນຈຸດສຸດຍອດແຫ່ງການຕໍ່ສູ້ປົດປ່ອຍຊາດບັງຄັບໃຫ້ອາເມລິກາ ຕ້ອງເຊັນສັນຍາປາຣີ ຕາມເງື່ອນໄຂຂອງຫວຽດນາມ. ນັ້ນແມ່ນບັນດາວັດຖຸພັນແຕ່ສະໄໝທະຫານປ້ອງກັນອາກາດທຳການສູ້ຮົບຕ້ານເຮືອບິນ B52 ຢູ່ສະໜາມຮົບວິງລິງໃນຊຸມປີ 1966, 1967 ຈົນຮອດວັນທີ 14/1/1973”
(ພາບ: thethao.tuoitre.vn)
ບັນດາຮູບພາບນຳມາວາງສະແດງທີ່ຫໍພິພິຕະພັນໄດ້ວາດພາບໃຫ້ເຫັນຊຸມວັນ ແລະ ຄືນທ້າຍເດືອນ 12/1972, ຮ່າໂນ້ຍ ຖືກລະເບີດທຳລາຍຢ່າງດຸເດືອດ. ຮູບພາບຄີວລົດໄຟ Hang Co ຖືກລະເບີດທຳລາຍ, ກຳລັງປ້ອງກັນຕົວໂຮງໝໍ Bach Mai ເຂົ້າຮ່ວມການກູ້ຊ່ວຍທ່ານໝໍ ແລະ ຄົນເຈັບພາຍຫຼັງຖືກລະເບີດຈາກເຮືອບິນ ຊື່ງສະແດງໃຫ້ເຫັນວ່າຮ່າໂນ້ຍ ມີຄວາມອົງອາດກ້າຫານໃນສົງຄາມ. ນອກຈາກນັ້ນແລ້ວ, ຫໍພິພິຕະພັນກອງທັບປ້ອງກັນອາກາດຍັງວາງສະແດງບັນດາວັດຖຸພັນທີ່ມີຄ່າ ພິສູດໃຫ້ເຫັນວ່າ ກອງທັບ ແລະ ປະຊາຊົນພາກເໜືອຫວຽດນາມ, ພິເສດແມ່ນກອງທັບ ແລະ ປະຊາຊົນນະຄອນຫຼວງ ໄດ້ຕີເອົາຊະນະການບຸກໂຈມຕີຂອງກອງທັບອາກາດອາເມລິກາ ຢູ່ພາກເໜືອ ແລະ ນະຄອນຫຼວງຮ່າໂນ້ຍ. ທ່ານພັນເອກ Nguyen Huu Dac ຜູ້ອຳນວຍການຫໍພິພິຕະພັນກອງທັບປ້ອງກັນອາກາດໃຫ້ຮູ້ຕື່ມອີກວ່າ:
“ມີຫຼາຍວັດຖຸພັນມີຄ່າທີ່ສຸດ, ນັບແຕ່ເຮືອບິນ Mic 21 ລຳທີ່ໄດ້ຍິງເຮືອບິນ B-52 ຕົກ, ປືນໃຫ່ຍປ້ອງກັນອາກາດ ແລະ ລູດສອນໄຟທີ່ຍິງເຮືອບິນຕົກໃນ 12 ວັນ ແລະ ຄືນຂອງເດືອນ 12/1972“
ອະດີດຕະການກ່ຽວກັບສົງຄາມ, ລູກລະເບີດ…ເຖິງວ່າໄດ້ກໍ່ຄວາມເສຍຫາຍ ແລະ ການສູນເສຍຫຼາຍຢ່າງກໍ່ຕາມ ແຕ່ສິ່ງທີ່ມີຄວາມໝາຍກ່ວານັ້ນແມ່ນຄວາມເອກອ້າງທະນົງໃຈ, ຄວາມອົງອາດກ້າຫານບື່ນຕົວຂຶ້ນຂອງຊາວຫວຽດນາມ ລຸ້ນຕ່າງໆ. ເພື່ອນ Tran Duy Anh ນັກສຶກສາມະຫາວິທະຍາໄລວິທະຍາສາດ-ສັງຄົມ ແລະ ມະນຸດຊາດໄດ້ແບ່ງປັນຄວາມຮູ້ສຶກວ່າ:
“ມື້ນີ້ໄດ້ມາຢ້ຽມຫໍພິພິຕະພັນກອງທັບປ້ອງກັນອາກາດ, ຂ້າພະເຈົ້າໄດ້ເຫັນບັນດາວັດຖຸພັນກ່ຽວກັບເຫດການ 12 ວັນ ແລະ ຄືນທີ່ທຳການຕໍ່ສູ້ໃນທ້າຍປີ 1972. ຜ່ານນັ້ນ, ເຮົາຈະເຫັນໄດ້ຄວາມເຕີບໃຫ່ຍເຂັ້ມແຂງ, ລັກສະນະທັນສະໄໝຂອງກອງທັບຫວຽດນາມ ໃນຊຸມປີ 1972, ເຫັນໄດ້ນ້ຳໃຈສາມັກຄີລະຫວ່າງທະຫານ ແລະ ປະຊາຊົນທົ່ວປະເທດ“.
ອະດີດຕະການກ່ຽວກັບການຕໍ່ສູ້ໃນ 12 ວັນ ແລະ ຄືນຂອງກອງທັບ ແລະ ປະຊາຊົນນະຄອນຫຼວງຮ່າໂນ້ຍ ນັບມື້ນັບຫ່າງເຫີນໄປແຕ່ບັນດາວັດຖຸພັນທີ່ນຳມາວາງສະແດງໃນຫໍພິພິຕະພັນໄດ້ຊ່ວຍໃຫ້ຜູ້ຊົມມີສະຕິຄວາມຮັບຮູ້ຢ່າງເລິກເຊິ່ງກ່ຽວກັບຂອບຂະໜາດອັນຍິ່ງໃຫ່ຍຂອງໄຊຊະນະ “ຮ່າໂນ້ຍ-ດ້ຽນບຽນຝູທາງອາກາດ“. ໄຊຊະນະດັ່ງກ່າວຍາມໃດກໍ່ຈະແມ່ນສັນຍາລັກແຫ່ງເຈດຈຳນົງອົງອາດກ້າຫານ, ນ້ຳໃຈສາມັກຄີຂອງກອງທັບ ແລະ ປະຊາຊົນຮ່າໂນ້ຍ ກໍ່ຄືຄຸນນະທາດ, ພູມປັນຍາ ແລະ ສິລະປະຍຸດການທະຫານຫວຽດນາມ.