ທ່ານ ຈັ້ນທະລາວ ວໍລະບຸດ, ອີແມວ RAX_EM@hotmail.com ໄດ້ໃຫ້ຂໍສັງເກດກ່ຽວກັບບົດ “ສິງກາໂປ - ນະຄອນສະອາດ, ຂຽວ ແລະ ສວຍງາມ” ໃນເວັບໄຊຂອງລາຍການ, ໃນນັ້ນ, ທ່ານຢາກຮູ້ຕື່ມກ່ຽວກັບລະບົບເງິນຕາ ແລະ ທຸງຊາດຂອງ ສິງກາໂປ.
ສັນຍາລັກຂອງປະເທດ ສິງກາໂປ ສວຍງາມ
ທ່ານ ຈັ້ນທະລາວ ວໍລະບຸດ ທີ່ເຄົາລົບ, ໂດຍຕອບສະໜອງຄວາມຕ້ອງການຂອງທ່ານພວກເຮົາໄດ້ຊອກຮູ້ ແລະ ຂໍເພີ່ມບາງຂໍ້ມູນກ່ຽວກັບເງິນຕາ ແລະ ທຸງຊາດຂອງ ສິງກາໂປທີ່ສວຍງາມດັ່ງຕໍ່ໄປນີ້:
ທຸງຊາດ ສິງກາໂປ ໄດ້ຮັບການຮັບຮອງເອົາເປັນຄັ້ງທຳອິດເມື່ອປີ 1959. ທຸງຊາດປະກອບດ້ວຍມີຮູບ 4 ລ່ຽມ 2 ຮູບສະເໝີກັນເປັນສີຂາວ ແລະ ສີແດງ. ໃນລ່ຽມເບືຶ້ອງຊ້າຍມີຮູບກາຊິກວົງເດືອນສີຂາວ ແລະ ດາວ 5 ດວງສີຂາວເຊັນກັນ. ສີແດງເປັນສັນຍາລັກມະຫາສະໝຸດທັງ 4 ລ້ວນແຕ່ເປັນອ້າຍນ້ອງ ແລະ ຄວາມສະເໝີພາບຂອງທຸກໆຄົນ, ສີຂາວເປັນສັນຍາລັກໃຫ້ຄວາມບໍລິສຸດ ແລະ ຄຸນນະທາດທີ່ດີງາມ, ຮູບກາຊິກວົງເດືອນ ເປັນສັນຍາລັກໃຫ້ປະເທດທີ່ໜຸ່ມແໜ້ນນີ້ພັດທະນາຢ່າງບໍ່ຢຸດຢັ້ງ ແລະ ນັບມື້ນັບໄດ້ຮັບການປ່ຽນໃໝ່, ສ່ວນດາວ 5 ດວງເປັນສັນຍາລັກໃຫ້ແນວຄິດສ້າງສາປະຊາທິປະໄຕ, ສັນຕິພາບ, ຄວາມກ້າວໜ້າ, ຄວາມເປັນທຳ ແລະ ຄວາມສະເໝີພາບຂອງປະເທດນີ້.
ກ່ຽວກັບສະກຸນເງິນຂອງ ສິງກາໂປ ແມ່ນ ໂດລາ ສິງກາໂປ (SGD). ປະຈຸບັນ, ອັດຕາແລກປ່ຽນລະຫວ່າງ SGD ແລະ USD ແມ່ນ: 1 SGD ເທົ່າກັບ 0,8 USD. ປີ 2011, ລາຍຮັບສະເລ່ຍໃສ່ຫົວຄົນຂອງຊາວສິງກາໂປ (ໄລ່ຕາມຍອດຜະລິດຕະພັນພາຍໃນ GDP) ແມ່ນ 58.797 USD. ຍືນອັນດັບ 1 ໃນອາຊີ.
ສ່ວນໃນ ອີແມວຝາກມາລາຍການ, ເພື່ອນ ຈັນທະພອນ, ນັກສຶກສາມະຫາວິທະຍາໄລ ແຫ່ງຊາດ ລາວ ຢາກຮູ້ຕື່ມອີກກ່ຽວກັບສະຖານທີ່ທ່ອງທ່ຽວບາງແຫ່ງຂອງແຂວງ ກວາງນິນ, ຍ້ອນວ່າ: ໄລຍະເວລາໃກ້ໆນີ້ ຄອບຄົວຂອງເພື່ອນຈະໄປທ່ອງທ່ຽວແຂວງ ກວາງນິນ.
ອ່າວ ຮ້າລອງ
ເພື່ອນ ຈັນທະພອນທີ່ຮັກເພງ, ເມື່ອເວົ້າເຖິງແຂວງ ກວາງນິນ ແມ່ນຕ້ອງເວົ້າເຖິງ ອ່າວ ຮ້າລອງທີ່ລືຊື່, ເຊິ່ງໄດ້ຮັບການຮັບຮອງຈາກ UNESCO ວ່າເປັນສິ່ງມະຫັດສະຈັນທຳມະຊາດຂອງໂລກເຖິງ 2 ຄັ້ງ ດ້ວຍເກາະໃຫຍ່ນ້ອຍເກືອບ 2000 ແຫ່ງ. ເມື່ອມາຢ້ຽມຢາມອ່າວ ຮ້າລອງ, ເພື່ອນຈະມີໂອກາດຢ້ຽມຊົມຖ້ຳສວຍງາມຫຼາຍແຫ່ງຢູ່ທີ່ນີ້ຄື: ຖ້ຳ ທຽນກູງ, ເດົ່າໂງ໋, ສືງສົດ, ຈິງໜື...
ນອກນັ້ນ, ເພື່ອນກໍ່ສາມາດໄປອາບນ້ຳທະເລ ບ໋າຍໄຈ໋, ເຊິ່ງແມ່ນຫາດຊາຍທະເລທີ່ກ້ວາງໃຫຍ່ ແລະ ສວຍງາມຢູ່ໃກ້ກັບອ່າວ ຮ້າລອງ, ດ້ວຍຄວາມຍາວກ່ວາ 500ມ, ກ້ວາງ 100ມ. ແຕ່ລະມື້, ໃນຍາມອະລຸນໃໝ່ ຫຼື ໃນຍາມສາຍັນ ມີນັກທ່ອງທ່ຽວນັບພັນຄົນໄດ້ລົງອາບນ້ຳຢູ່ທີ່ນີ້, ອັນໄດ້ສ້າງຄວາມຟົດຟື້ນຍິ່ງຂຶ້ນ.
ພາຍຫຼັງໄດ້ອາບນ້ຳທະເລແລ້ວ, ເພື່ອນກໍ່ສາມາດຂຶ້ນພູ ອຽນຕື້, ເຊິ່ງແມ່ນພູສູງສຸດໃນສາຍພູ ດົງຈ່ຽວ ທາງຕາເວັນອອກສ່ຽງເໜືອຂອງ ຫວຽດນາມ. ນີ້ແມ່ນແຫ່ງທີ່ມີທັດສະນີຍະພາບທຳມະຊາດທີ່ສວຍງາມ ແລະ ປະຈຸບັນຍັງຮັກສາປູຊະນີຍະສະຖານປະຫວັດສາດຫຼາຍແຫ່ງເຊິ່ງໄດ້ຮັບການຂະໜານນາມວ່າ: “ແມ່ນດິນແດນແຫ່ງກຳເນີດພຸດທະສາສະໜາ ຫວຽດນາມ”.
ຍັງມີສະຖານທີ່ແຫ່ງໜຶ່ງທີ່ເພື່ອນຄວນມາຢາມນັ້ນແມ່ນເກາະ ຕວນເຈົາ, ທີ່ຕັ້ງຢູ່ທາງໃນຕາເວັນຕົກສຽງໃຕ້ຂອງນະຄອນ ຮ້າລອງ. ເກາະມີເນື້ອທີ່ດິນປະມານ 400 ເຮັກຕາ, ເຊິ່ງທຳມະຊາດໄດ້ດົນບັນດານໃຫ້ມີທັດສະນີຍະພາບທີ່ງາມດັ່ງໃນຝັນ. ນອກນັ້ນ, ເກາະ ໂກໂຕ ກໍ່ສ້າງຄວາມດູດດື່ມໃຫ້ແຂກທ່ອງທ່ຽວດ້ວຍບັນດາຫາດຊາຍທະເລທີ່ສວຍງາມແບບທຳມະຊາດຂີ້ຊາຍສີຂາວ ແລະ ນ້ຳທະເລຂຽວສະອາດ. ນອກນັ້ນ, ແຂກທ່ອງທ່ຽວກໍ່ສາມາດເຂົ້າຢ້ຽມຊົມປ່າທຳມະຊາດ, ທ່າກຳປັ່ນ, ໝູ່ບ້ານປະມົງ ...
ໃນການທ່ອງທ່ຽວ ກວາງນິນ ຄັ້ງນີ້, ເພື່ອນຢ່າລື່ມໄປຕະຫຼາດ ຮ້າລອງ ຊື້ຜະລິດຕະພັນພິເສດຂອງ ຮ້າລອງເພື່ອເປັນຂອງຕອ້ນໃຫ້ຍາດຕິພີ່ນ້ອງ.
ລາຍການຟ້ອນວີ ຂອງຊາວ ຫວຽດນາມ ອາໄສຢູ່ໄທ
ໃນອາທິດ, ທ່ານ ຫງວຽນວັນແຕ້ວ, ຊາວ ຫວຽດນາມ ອາໃສຢູ່ ໄທກໍ່ສົ່ງອີແມວ ມາຍັງລາຍການ ໃນນັ້ນ, ໄດ້ຝາກຊຸດຮູບຖ່າຍກ່ຽວກັບງານບຸນຍິງບັ້ງໄຟດອກຂອງເມືອງ ພັງຄົນ, ແຂວງ ຊາຄອນນະຄອນ, ປະເທດໄທ. ໃນຮູບຖ່າຍມີບັນດາສາວໄທເຊື້ອຊາດ ຫວຽດນາມ ໃນຊຸດເສື້ອຍາວປະຈຳຊາດ ຫວຽດນາມ ດ້ວຍສີສັນຫຼາກຫຼາຍພວມຟ້ອນວີ, ເຊິ່ງແມ່ນວາດຟ້ອນທີ່ເປັນມູນເຊື້ອຂອງ ຫວຽດນາມ ບົນຖະໜົນຫົນທາງ, ດ້ວຍໃບໜ້າຍີ້ມແຍ້ມແຈ່ມໃສ. ການເຄື່ອນໄຫວວັດທະນະທຳນີ້ຖືກຈັດຕັ້ງຂຶ້ນເປັນປະຈຳໃນເດືອນ 5 ຢູ່ເມືອງ ພັງຄົນ ແຂວງ ຊາຄອນນະຄອນ.ທ່ານ ຫງວຽນວັນແຕ້ວໃຫ້ຮູ້ຕື່ມອີກວ່າ: ດ້ວຍລາຍການຟ້ອນວີ ຊາວ ຫວຽດນາມ ຢູ່ ແຂວງ ຊາຄອນນະຄອນ ໄດ້ຮັບລາງວັນທີ 3.
ທ່ານແຕ້ວທີ່ເຄົາລົບ, ພວກເຮົາກໍ່ດີໃຈທີ່ສຸດເມື່ອໄດ້ຮັບຂ່າວດັ່ງກ່າວ, ຂໍສະແດງຄວາມຊົມເຊີຍ ແລະ ຫວັງວ່າປີໜ້າຄະນະຊາວ ຫວຽດນາມ ອາໄສຢູ່ແຂວງ ຊາຄອນນະຄອນຈະໄດ້ຮັບຜົນງານສູງກ່ວາອີກ.
ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 00844.38256631, ອີແມວ: Laovov@.yahoo.com. ພວກເຮົາຍິນດີຕ້ອນຮັບ ແລະ ພ້ອມແລ້ວຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.