ພວກເຮົາມີຄວາມພາກພູມໃຈທີ່ສຸດທີ່ໄດ້ກັບມາພົບກັບທ່ານຜູ້ຟັງຜູ້ອ່ານຂອງວິທະຍຸກະຈາຍສຽງຫວຽດນາມ ພາກພາສາລາວ. ໃນລາຍການມື້ນີ້, ພວກເຮົາຂໍແນະນຳບາງຄຳເຫັນຂອງທ່ານຜູ້ຟັງຜູ້ອ່ານທີ່ໄດ້ຝາກມາລາຍການຂອງພວກເຮົາໃນອາທິດຜ່ານມາ.
ໃນອາທິດຜ່ານມາ, ພວກເຮົາໄດ້ຮັບບັນດາຈົດໝາຍ ແລະ ໂທລະສັບອວຍພອນຈາກບັນດາທ່ານໃນໂອກາດບຸນປີໃໝ່ປະຈຳຊາດຫວຽດນາມ ປີມະເສງ 2013. ບັນດາທ່ານໄດ້ຝາກມາຍັງລາຍການຄຳອວຍພອນອັນປະເສີດທີ່ສຸດ ແລະ ປາດຖະໜາວ່າ ລາຍການຈະນັບມື້ນັບດຶງດູດຜູ້ຟັງທັງຫຼາຍ. ຕາງໜ້າໃຫ້ຜູ້ຈັດທຳລາຍການ, ພວກເຮົາຂໍຂອບອົກຂອບໃຈ ແລະ ຄຳອວຍພອນໄຊອັນປະເສີດທີ່ສຸດໃນໂອກາດປີໃໝ່ມາຍັງທ່ານເພັດສະຫວັນ ສີຊານົນ-ແຂວງອດຕະປື, ທ່ານສຸບັນ ທິບພະຈັນ-ແຂວງໄຊຍະບູລີ, ເພື່ອນສຸດທະສອນ ເຄືອບຄຳວອນ-ສະຫະພັນກຳມະບານນະຄອນຫຼວງວຽງຈັນ, ຜົວເມຍອ້າຍຂາວມະນີ ແລະ ເອື້ອຍຄຳຫຼ້າ-ກະຊວງປ້ອງກັນປະເທດລາວ... ແລະ ບັນດາທ່ານຜູ້ຟັງຜູ້ອ່ານຂອງລາຍການພາກພາສາລາວ ວິທະຍຸກະຈາຍສຽງຫວຽດນາມ. ຂໍໃຫ້ທ່ານຈົ່ງປະສົບແຕ່ຄວາມສຸກ ແລະ ຄວາມສົມຫວັງຕະຫຼອດປີ ແລະ ຫວັງວ່າພວກທ່ານຈະແມ່ນເພື່ອນຜູ້ສະໜິດສະຫນົມຂອງລາຍການຕະຫຼອດໄປ.
(ພາບປະກອບ:gdt.gov.vn)
ເພື່ອນຫວູຮົງລວານ (Vũ Hồng Loan) ນັກສຶກສາມະຫາວິທະຍາໄລສຸພານຸວົງ-ແຂວງຫຼວງພະບາງ ແມ່ນຜູ້ຟັງປະຈຳຂອງລາຍການ, ເມື່ອໂທລະສັບມາລາຍການ, ເພື່ອນໃຫ້ຮູ້ວ່າ: ເພື່ອນມັກບັນດາລາຍການຄື: “ຊາຍຄາອາຊຽນ“; “ຊົນນະບົດໃໝ່“ “ຊີວິດສັງຄົມ“…ທີ່ສຸດ:
“ຂ້າພະເຈົ້າມັກຟັງລາຍການພາກພາສາລາວ-ວິທະຍຸກະຈາຍສຽງຫວຽດນາມ ທີ່ສຸດ. ສຳລັບນັກສຶກສາພວມຮ່ຳຮຽນຢູ່ລາວ ຄືຂ້າພະເຈົ້າ, ລາຍການມີປະໂຫຍດຫຼາຍ, ໄດ້ຊ່ວຍໃຫ້ຂ້າພະເຈົ້າຮ່ຳຮຽນດ້ານພາສາຕື່ມອີກ ແລະ ການຮຽນຈະດີຂຶ້ນ. ນອກຈາກນັ້ນແລ້ວ, ຂ້າພະເຈົ້າກໍ່ໄດ້ຮັບຟັງບັນດາຂ່າວຄາວໃໝ່ຈາກຫວຽດນາມ ອີກດ້ວຍ“
ໃນອາທິດທີ່ຜ່ານມາ, ເພື່ອນສົມສຸກ ຢູ່ແຂວງບໍລິຄຳໄຊ ໄດ້ຝາກຈົດໝາຍມາຍັງລາຍການເພື່ອຖາມວ່າ: ຄົນຫວຽດນາມ ເຄີຍສະສົມສະແຕມຫຼືບໍ່? ສະແຕມທຳອິດຂອງຫວຽດນາມ ໄດ້ຈຳໜ່າຍໃນປີໃດ? ສະແຕມຊຸດໃດຂອງຫວຽດນາມ ມີລາຄາສູງກ່ວາໝູ່?
ເພື່ອນສົມສຸກ ແລະ ທ່ານຜູ້ຟັງຜູ້ອ່ານທີ່ເຄົາລົບ!
ຢູ່ຫວຽດນາມ ມີຜູ້ນິຍົມ ແລະ ສະສົມສະແຕມຫຼາຍຄົນ ແຕ່ບໍ່ແມ່ນຜູ້ໃດກໍ່ຮູ້ວ່າ ສະແຕມທຳອິດໄດ້ປະກົດຂຶ້ນຢູ່ຫວຽດນາມ ນັບແຕ່ປີ 1863, ໃນໄລຍະເວລາທີ່ຊາວຝະລັ່ງ ໄດ້ເປີດໂຮງໄປສະນີໄຊງ່ອນ ແລະ ໃຫ້ນຳໃຊ້ບັນດາການບໍລິການໄປສະນີ, ນັບແຕ່ນັ້ນເປັນຕົ້ນໄປ, ສະແຕມໄດ້ຮັບການນຳໃຊ້ຢ່າງກ້ວາງຂວາງ. ປະຈຸບັນ, ຊຸດສະແຕມລວມ 4 ແບບກ່ຽວກັບນັກວິລະຊົນຍິງ ໝາກທິເບືອຍ (Mạc Thị Bưởi) ແມ່ນຊຸດສະແຕມທີ່ມີລາຄາສູງກ່ວາໝູ່ຢູ່ຫວຽດນາມ.
ຊຸດສະແຕມທີ່ມີລາຄາສູງກ່ວາໝູ່ຢູ່ຫວຽດນາມ
(ພາບ:vietstamp.net)
ໃນອາທິດ, ພວກເຮົາຍັງໄດ້ຮັບອີແມວຈາກເພື່ອນຮົງຫງອກ, ສູນນັກສຶກສາສາກົນຢູ່ຮ່າໂນ້ຍ ແລະ ເພື່ອນມິງຢາງ, ພະນັກງານສະຖານບັນຄົ້ນຄ້ວາອາຊີຕາເວັນອອກສ່ຽງໃຕ້-ສະຖານບັນວິທະຍາສາດສັງຄົມຫວຽດນາມ. ພວກເພື່ອນລ້ວນແຕ່ແມ່ນອະດີດນັກສຶກສາມະຫາວິທະຍາໄລແຫ່ງຊາດລາວ ແລະ ຢາກຮັບຟັງບັນດາບົດເພງລາວ ໂດຍສະເພາະແມ່ນບັນດາບົດເພງສະຕິງພວມໄດ້ຮັບຄວາມນິຍົມຊອບຢູ່ລາວ ປະຈຸບັນ. ພວກເຮົາຍິນດີຕອບສະໜອງຕາມຄຳຂໍຂອງພວກເພື່ອນ ແລະ ເຊີນພວກເພື່ອນຮັບຟັງໃນລາຍການເພງຕາມຄຳຂໍ ຊື່ງອອກອາກາດໃນວັນອາທິດ ແລະ ວັນຈັນທຸກໆອາທິດ!
ທີ່ກ່າວມາແມ່ນການຕອບຄຳຖາມຂອງພວກເຮົາ ກ່ຽວກັບບາງບັນຫາທີ່ທ່ານສົນໃຈ. ຖ້າທ່ານຜູ້ໃດມີຄຳຖາມ ກະລູນາຝາກຈົດໝາຍມາຫາລາຍການຂອງພວກເຮົາຕາມທີ່ຢູ່: ວິທະຍຸກະຈາຍສຽງຫວຽດນາມ ພາກພາສາລາວ, ເຮືອນເລກທີ 45 ຖະໜົນບ່າຈຽວຮ່າໂນ້ຍ- ເບີໂທ: 04.38256631-ຫລືສົ່ງຈົດໝາຍທາງອີແມວ:Laovov@.yahoo.com. ຂໍຂອບໃຈ!