ພວກເຮົາຍິນດີທີ່ໄດ້ພົບກັບທ່ານຜູ້ຟັງໃນລາຍການຕອບຈົດໝາຍຂອງທ່ານຜູ້ຟັງໃນມື້ນີ້. ປີ 2012 ທີ່ຜ່ານມາ ແມ່ນປີພິເສດສຳລັບບັນນາທິການລາຍການພາກພາສາລາວ ຍ້ອນວ່າຈຳນວນຈົດໝາຍທີ່ທ່ານຜູ້ຟັງຝາກມາໃຫ້ພວກເຮົາແມ່ນກ່ວາ 300 ສະບັບ, ເພີ່ມຂຶ້ນເກືອບ 100 ສະບັບເມື່ອທຽບໃສ່ປີ 2011. ນີ້ແມ່ນແຫຼ່ງລະດົມກຳລັງໃຈອັນໃຫຍ່ຫຼວງ ເພື່ອຊ່ວຍໃຫ້ພວກເຮົາມີກຳລັງໜູນຕື່ມອີກເພື່ອຈັດບັນດາລາຍການກະຈາຍສຽງມີຄຸນນະພາບກ່ວາ. ໃນຈົດໝາຍຝາກມາລາຍການໃນປີຜ່ານມາ, ຜູ້ຟັງຫຼາຍທ່ານໄດ້ປະກອບຄວາມເຫັນກ່ຽວກັບຂ່າວບົດຂອງລາຍການ, ຕັ້ງຄຳຖາມຊອກຮູ້ກ່ຽວກັບປະເທດຊາດ ແລະ ຊາວຫວຽດນາມ... ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍທີ່ພົ້ນເດັ່ນບາງສະບັບຂອງທ່ານຜູ້ຟັງທີ່ຝາກມາລາຍການໃນປີ 2012. ເຊີນທ່ານຕິດຕາມຮັບຟັງ.
ພາບປະກອບ
ຜູ້ຟັງທຳອິດ, ທີ່ພວກເຮົາຢາກເວົ້າເຖິງ, ນັ້ນແມ່ນທ່ານ ເພັດສະຫວັນ ສີຊານົນ, ຫົວໜ້າຫ້ອງການອະນຸສອນສະຖານປະທານ ໄກສອນ ພົມວິຫານ ແຂວງ ອັດຕະປື. ນີ້ແມ່ນຜູ້ຟັງທ່ີສະໜິດສະໜົມ ເຊິ່ງພວກເຮົາຖືວ່າ ແມ່ນເພື່ອນມິດພິເສດຂອງລາຍການ. ອາທິດໃດທ່ານ ເພັດສະຫວັນ ກໍ່ໄດ້ສົ່ງຂໍ້ຄວາມ ຫຼື ໂທລະສັບມາຫາລາຍການ. ບາງເທື່ອ, ທ່ານໂທມາຢື້ຢາມຖາມຂ່າວບັນນາທິການ, ບາງເທື່ອທ່ານໄດ້ເວົ້າຄວາມຮູ້ສຶກເມື່ອໄດ້ຮັບຟັງຂ່າວ, ບົດຂອງລາຍການ ຫຼືແຈ້ງໃຫ້ຮູ້ກ່ຽວກັບສັນຍານຄື້ນວິທະຍຸກະຈາຍສຽງຢູ່ແຂວງ ອັດຕະປື.
ທ່ານ ສຸບິນ ພິມມະສອນ, ລັດວິສາຫະກິດນ້ຳມັນເຊື້ອໄຟລາວ ແຂວງ ຈຳປາສັກ ຍາມໃດກໍ່ແມ່ນເພື່ອນຜູ້ໃກ້ສິດຕິດແທດກັບລາຍການ. ທ່ານ ສຸບິນ ໃຫ້ຮູ້ວ່າ: ມື້ໃດທ່ານກໍ່ໄດ້ຮັບຟັງລາຍການພາກພາສາລາວ, ຂອງວິທະຍຸກະຈາຍສຽງຫວຽດນາມ ແລະ ນອກຈາກແຈ້ງກ່ຽວກັບສັນຍານຄື້ນຂອງວິທະຍຸກະຈາຍສຽງຫວຽດນາມ ເວລາຟັງບໍ່ແຈ້ງໃຫ້ພວກເຮົາໄດ້ຮັບຊາບແລ້ວ, ທ່ານຍັງແຈ້ງສະພາບການຢູ່ໃນແຂວງກໍຄືໂທມາຢື້ຢາມຖາມຂ່າວສຸຂະພາບຂອງບັນນາທິການ ແລະ ພະນັກງານວິທະຍຸກະຈຽງສຽງຫວຽດນາມ. ໂດຍອີງໃສ່ການແຈ້ງຂ່າວຂອງທ່ານສຸບິນ ພວກເຮົາໄດ້ແກ້ໄຂຄວາມຕິດຂັດດ້ານເຕັກນິກຢ່າງທັນການ ເພື່ອນຳບັນດາລາຍການກະຈາຍສຽງມ່ວນ ແລະ ດຶງດູດມາໃຫ້ທ່ານຜູ້ຟັງ.
ທ່ານຜູ້ຟັງທີ່ເຄົາລົບ! ພວກເຮົາມີຄວາມປິຕີຊົມຊື່ນຫຼາຍ ເພາະວ່າ, ໃນຊຸມເດືອນມໍ່ໆມານີ້ ລາຍການໄດ້ຮັບຈົດໝາຍ, ອີແມວ, ໂທລະສັບ ຢ່າງລຽນຕິດຈາກທ່ານຜູ້ຟັງເຊິ່ງແມ່ນຊາວຫວຽດນາມ ອາໄສຢູ່ ໄທ, ນັ້ນແມ່ນທ່ານ ຫງວຽນວັນແຕ້ວ (Nguyen Van Teo ) ອາຍຸ 60 ປີ. ທ່ານໃຫ້ຮູ້ວ່າ: ຄອບຄົວຂອງທ່ານນິຍົມຮັບຟັງວິທະຍຸນັບແຕ່ດົນນານມາແລ້ວ, ແຕ່ປະຈຸບັນ ທ່ານຈຶ່ງຂຽນຈົດໝາຍ ແລະ ຕິດຕໍ່ກັບລາຍການ. ໃນຈົດໝາຍສະບັບໜຶ່ງທີ່ຝາກມາລາຍການ, ທ່ານໄດ້ຖືລາຍການຄືເພື່ອນມິດທີ່ສະນິດສະໜົມ, ແບ່ງປັນຄວາມທຸກຄວາມສຸກ. ທ່ານໄດ້ເລົ່າໃຫ້ພວກເຮົາຟັງກ່ຽວກັບຊີວິດການເປັນຢູ່ຂອງຄອບຄົວຕົນ, ກໍ່ຄືບັນດາການເຄື່ອນໄຫວຂອງປະຊາຄົມຊາວ ຫວຽດນາມ ອາໄສຢູ່ ໄທ. ໃນໂທລະສັບມາຫາລາຍການຫວ່າງແລ້ວນີ້ ທ່ານໃຫ້ຮູ້ວ່າ: ປະຊາຄົມຊາວ ຫວຽດນາມ ຢູ່ເມືອງ ພັງຄົນ, ແຂວງ ສະກົນນະຄອນ ຈະຈັດຕັ້ງການຕ້ອນຮັບ ປີໃໝ່ປະຈຳຊາດໃນວັນທີ 3/2 ກົງກັບວັນສ້າງຕັ້ງພັກກອມມູນິດຫວຽດນາມ ເພື່ອທັງຊົມເຊີຍ ພັກ, ທັງຕ້ອນຮັບລະດູບານໃໝ່. ຜ່ານຈົດໝາຍຂອງທ່ານ ພວກເຮົາກໍ່ຮູ້ໄດ້ຊີວິດການເປັນຢູ່ຂອງຊາວຫວຽດນາມ ຢູ່ໄທ ໄດ້ສ່ວນໃດສ່ວນໜຶ່ງ, ເຖິງວ່າໄດ້ຫ່າງຈາກບ້ານເກີດເມືອງນອນ ແຕ່ຍາມໃດກໍ່ອວາຍໜ້າເມືອຫາປະເທດຊາດ.
ພາບປະກອບ
ໃນປີ 2012, ແວັບໄຊຂອງພະແນກພາສາຕ່າງປະເທດ vovworld.vn ໄດ້ຮັບການເປີດສະຫຼອງ, ອັນໄດ້ສ້າງເງື່ອນໄຂອຳນວຍຄວາມສະດວກໃຫ້ແກ່ທ່ານຜູ້ຟັງ ເມື່ອຕິດຕາມຮັບຟັງບັນດາລາຍການຂອງວິທະຍຸກະຈາຍສຽງຫວຽດນາມ. ພາຍຫຼັງເຂົ້າເຄືອຂ່າຍ ອິນເຕີເນັດຢ່າງເປັນທາງການໃນເດືອນ 1/2012, ແວບໄຊ vovworld.vn ຂອງພວກເຮົາໄດ້ດຶງດູດທ່ານຜູ້ຟັງເປັນຈຳນວນຫຼວງຫຼາຍ. ເມື່ອຕີລາຄາກ່ຽວກັບລາຍການພາກພາສາລາວ ວິທະຍຸກະຈາງສຽງຫວຽດນາມ, ທ່ານອຸດອນ ສອນສຸລິນ, ຫາກໍ່ຮຽນຈົບປະລິຍາໂທ ຢູ່ມະຫາວິທະຍາໄລວັດທະນະທຳ ຮ່າໂນ້ຍ ໃຫ້ຂໍ້ສັງເກດວ່າ:
ເທບ ພາສາລາວ
ສ່ວນທ່ານ ເພັດສະຫວັນ ສີຊານົນ ໃຫ້ຂໍສັງເກດວ່າ: “ຂ້າພະເຈົ້າແມ່ນຜູ້ຮັບຟັງລາຍການເປັນປະຈຳ ແລະ ມາຮອດປະຈຸບັນ, ຂ້າພະເຈົ້າໄດ້ອ່ານຂ່າວ, ບົດ ແລະ ຮັບຟັງລາຍການຜ່ານທາງ ອິນເຕີເນັດເປັນປະຈຳ. ຂ້າພະເຈົ້າຂໍຂອບໃຈ ແລະ ຊົມເຊີຍທາງວິທະຍຸກະຈາຍສຽງຫວຽດນາມ ໄດ້ເປີດສະຫຼອງແວັບໄຊທີ່ມີປະໂຫຍດສຳລັບຊາວ ລາວ, ເພື່ອຊ່ວຍໃຫ້ພວກຂ້າພະເຈົ້າຮູ້ຈັກຂໍ້ມູນຂ່າວກ່ຽວກັບຫວຽດນາມ ກໍ່ຄືຂອງ ໂລກ. ຫວັງວ່າ ໃນໄລຍະຈະມາເຖິງ, ລາຍການຈະມີການພັດທະນາກ່ວາອີກ”
ມີຜູ້ຟັງຫຼາຍທ່ານ ໄດ້ສົ່ງຈົດໝາຍ, ອີແມວ, ປະກອບຄຳເຫັນໃນແວບໄຊຂອງລາຍການຄື: ທ່ານ ສຸກັນຍາ ອິນທະວົງ, ອິນປັນ ພິມທິສານ, ສຸວັນ ສຸກພະຈັນ, ນິນດັກເຊ໋ວ (Ninh Dac Seu)... ແຕ່ເປັນໜ້າເສຍດາຍ, ເວລາຖືກຈຳກັດດັ່ງນັ້ນ ພວກເຮົາບໍ່ສາມາດສະເໜີຄຳເຫັນກໍ່ຄື ອາລົມຈິດຂອງທ່ານຜູ້ຟັງທີ່ສະຫງວນໃຫ້ແກ່ລາຍການໄດ້, ແຕ່ຫວັງວ່າ ທ່ານຜູ້ຟັງຍັງຄົງສືບຕໍ່ຕິດຕາມຮັບຟັງ ແລະ ປະກອບຄຳເຫັນໃຫ້ແກ່ລາຍການພວກເຮົາ ແລະ ທ່ານສາມາດຝາກຈົດໝາຍໂດຍທາງໄປສະນີໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົມບາຈ້ຽວ - ຮ່າໂນ້ຍ ຫຼືໂທມາໂດຍກົງຕາມເບີໂທ: 00844.38256631, ຫຼືອີແມວ: Laovov@yahoo.com. ພວກເຮົາຍິນດີຕ້ອນຮັບ ແລະ ຈະຕອບຄຳຖາມຂອງທ່ານທຸກປະການ.