ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງ ຫວຽດນາມ (VOV5) ໄດ້ຮັບຈົດໝາຍ, ອີເມວ 446 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 34 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 21 ສະບັບຈາກທ່ານຜູ້ຟັງລາວ.

(ພາບປະກອບ)

        ເພື່ອນ ສຸລິວົງ ຢູ່ແຂວງ ຫຼວງພະບາງ, ໄດ້ສົ່ງອີເມວມາຫາລາຍການ, ດ້ວຍເນື້ອໃນທີ່ວ່າ: “ຂ້າພະເຈົ້າຂໍສະເໜີລາຍການໜຶ່ງທີ່ມີຊື່ວ່າ “ຫວຽດນາມ ຜ່ານມູມມອງຂອງທ່ານຜູ້ຟັງ”. ລາຍການນີ້ຈະສ້າງໂອກາດເພື່ອໃຫ້ຜູ້ຟັງ/ຜູ້ອ່ານສາກົນ ແບ່ງປັນຄວາມປະທັບໃຈ ແລະ ແນວຄິດຂອງເຂົາເຈົ້າກ່ຽວກັບ ຫວຽດນາມ, ອາດຈະແມ່ນການປະພຶດດ້ານການທ່ອງທ່ຽວ, ການເຄື່ອນໄຫວຄົ້ນຫາອາການການກິນ, ຫຼື ການຮຽນພາສາ ຫວຽດ. ຂ້າພະເຈົ້າເຊື່ອໝັ້ນວ່າ, ລາຍການຄືດັ່ງກ່າວຈະສົ່ງເສີມຄວາມຕິດພັນ ແລະ ການພົວພັນແລກປ່ຽນວັດທະນະທຳລະຫວ່າງຜູ້ຟັງ/ຜູ້ອ່ານໃນທົ່ວໂລກ ແລະ VOV ໃຫ້ຫຼາຍຂຶ້ນ”.

        ເພື່ອນ ທິດາ ກິດຈະເລີນ, ຢູ່ແຂວງ ຫົວພັນ ໄດ້ໂທລະສັບມາຫາລາຍການ, ແບ່ງປັນວ່າ: “ຂ້າພະເຈົ້າມັກຮັກການຄົ້ນຫາບັນດາພື້ນຖານວັດທະນະທຳ, ວິທະຍາສາດ ແລະ ບັນດາເລື່ອງລາວທີ່ໜ້າປະທັບໃຈໃນທົ່ວໂລກ. ໂດຍແມ່ນຜູ້ຟັງຂອງ VOV ນັບແຕ່ປີ 1993 ແລະ ຜ່ານຄື້ນກະຈາຍສຽງຂອງ VOV, ຂ້າພະເຈົ້າໄດ້ຮູ້ຈັກບັນດາຈັງຫວະທຳນອງບົດເພງມ່ວນໆຂອງດົນຕີ ຫວຽດນາມ, ບັນດາເລື່ອງລາວປະຫວັດສາດທີ່ເຕັມໄປດ້ວຍສີສັນ ແລະ ບັນດາບ້າດກ້າວທີ່ໜ້າຈັບໃຈໃນບັນດາໂຄງການວິທະຍາສາດ, ເຕັກໂນໂລຊີຂອງ ຫວຽດນາມ”.

        ສ່ວນເພື່ອນ Sokunthearith, ຢູ່ ພະນົມເປັນ, ປະເທດ ກຳປູເຈຍ, ໄດ້ສົ່ງຄຳອວຍພອນມາວ່າ: “ໃນປະຫວັດສາດ 100 ປີແຫ່ງວັນສື່ມວນຊົນ ຫວຽດນາມ, VOV ໄດ້ຢືນຢັນເຄື່ອງໝາຍຂອງຕົນໃນວິວັດການ 80 ປີທີ່ໄດ້ຄົງຕົວ ແລະ ພັດທະນາ. ຂ້າພະເຈົ້າຂໍອວຍພອນໃຫ້ VOV ສືບຕໍ່ບັນລຸໄດ້ຜົນງານທີ່ໃຫຍ່ຫຼວງຫຼາຍຢ່າງກວ່າໃນໄລຍະ 50 ປີ, 100 ປີຈະມາເຖິງ”.

ທີ່ການເຮັດວຽກລະຫວ່າງທ່ານລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ຫງວຽນກິນເຊີນ  ແລະ ທ່ານນາງ ຄຳເພົາ ເອີນທະວັນ, ເອກອັກຄະລັດຖະທູດ ສປປ.ລາວ ປະຈຳ ຫວຽດນາມ (ພາບ: daibieunhandan.vn)

    ເພື່ອນ ຈັນແສງ ພິມມະວົງ ໄດ້ຂຽນໃນ fanpage Lao VOV5 ດ້ວຍເນື້ອໃນທີ່ວ່າ: ຂ້າພະເຈົ້າໄດ້ຮັບຂ່າວກ່ຽວກັບເລື່ອງ ຫວຽດນາມ ຈະນຳພາສາ ລາວ ເຂົ້າໃນຫຼັກສູດການສອນໃຫ້ແກ່ນັກຮຽນ ພ້ອມກັບບັນດາພາສາອື່ນໃນໂລກ. ຂ້າພະເຈົ້າຢາກຊອກຮູ້ກ່ຽວກັບການເຄື່ອນໄຫວດັ່ງກ່າວ.

    ເພື່ອນ ຈັນແສງ ພິມມະສອນ ທີ່ຮັກແພງ, ພາສາ ລາວ ຈະກາຍເປັນ 1 ໃນຈຳນວນ 8 ພາສາຕ່າງປະເທດທີ່ໄດ້ສິດສອນໃນໂຮງຮຽນມັດທະຍົມ, ກ່ອນອື່ນໝົດແມ່ນຈະທົດລອງຢູ່ເຂດຊາຍແດນ. ຂໍ້ມູນດັ່ງກ່າວ ໂດຍທ່ານລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ຫງວຽນກິນເຊີນ ແບ່ງປັນທີ່ການຕ້ອນຮັບທ່ານນາງ ຄຳເພົາ ເອີນທະວັນ, ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປ.ລາວ ປະຈຳ ຫວຽດນາມ, ໃນວັນທີ 02 ມິຖຸນາ ຜ່ານມາ.

    ຢູ່ທີ່ນີ້, ທ່ານລັດຖະມົນຕີ ຫງວຽນກິມເຊີນ ເນັ້ນໜັກວ່າ, ຫວຽດນາມ ແລະ ລາວ ມີສາຍພົວພັນມິດຕະພາບຮ່ວມມືແບບພິເສດ, ໃນນັ້ນ, ການສຶກສາແມ່ນພາກສ່ວນສຳຄັນຂອງການຮ່ວມມື 2 ຝ່າຍ. ທາງກະຊວງພວມກະກຽມບັນດາເງື່ອນໄຂທີ່ຈຳເປັນ ເພື່ອນຳພາສາ ລາວ ກາຍເປັນ 1 ໃນຈຳນວນ 8 ພາສາຕ່າງປະເທດ ທີ່ໄດ້ສິດສອນຢູ່ໃນໂຮງຮຽນ, ພ້ອມກັບບັນດາພາສາ ຄື: ອັງກິດ, ລັດເຊຍ, ຝລັ່ງ, ຈີນ, ເຢຍລະມັນ, ຍີ່ປຸ່ນ, ເກົາຫຼີ (ບັນດາໂຮງຮຽນເລືອກເອົາ 1 ພາສາ). ໃນເບື້ອງຕົ້ນ, ພາສາ ລາວ ຈະໄດ້ສິດສອນທົດລອງໃຫ້ແກ່ນັກຮຽນເຂດຊາຍແດນ, ຈະເປີດກວ້າງເມື່ອມີຄູອາຈານພຽງພໍ. ທ່ານປາດຖະໜາວ່າ ຝ່າຍ ລາວ ຈະສືບຕໍ່ໜູນຊ່ວຍ, ໂດຍສະເພາະແມ່ນປື້ມແບບຮຽນ, ບຳລຸງສ້າງຄູອາຈານ, ຜັນຂະຫຍາຍແຜນຮ່າງ “ນຳເນື້ອໃນບັນດາຜະລິດຕະພັນຂອງກິດຈະກຳປະຫວັດສາດສາຍພົວພັນແບບພິເສດລະຫວ່າງ 2 ປະເທດເຂົ້າມາສິດສອນຢູ່ບັນດາໂຮງຮຽນ”. ທາງກະຊວງກໍ່ສະເໜີໃຫ້ກະຊວງສຶກສາ ແລະ ກິລາ ລາວ ພິຈາລະນາ ນຳພາສາ ຫວຽດ ໃຫ້ກາຍເປັນວິຊາເລືອກໃນການເສັງຈົບມັດທະຍົມຕອນປາຍຢູ່ ລາວ, ນຳຊຸດປື້ມຕຳລາພາສາ ຫວຽດ ໂດຍ ຫວຽດນາມ ຮຽບຮຽງເຂົ້າຫຼັກສູດສິດສອນຢູ່ໂຮງຮຽນເມື່ອມີຄວາມຕ້ອງການ.

   ເພື່ອນ ໄຊສົມພອນ, ຢູ່ຫຼວງພະບາງ, ຢາກຊອກຮູ້ກ່ຽວກັບຜົນດີເມື່ອ ຫວຽດນາມ ດຳເນີນການປະຕິຮູບໂຮມແຂວງ.

        ເພື່ອນ ໄຊສົມພອນ ທີ່ຮັກແພງ, ເລື່ອງໂຮມບັນດາແຂວງບໍ່ພຽງແຕ່ແມ່ນການປະຕິຮູບບໍລິຫານພຽງຢ່າງດຽວ, ຫາກຍັງແມ່ນໄມ້ງັດຢ່າງເຂັ້ມແຂງ ເພື່ອສ້າງບັນດາຫົວໜ່ວຍບໍລິຫານທີ່ມີຂອບຂະໜາດໃຫຍ່ຢ່າງພຽງພໍເພື່ອພັດທະນາ ແລະ ເຊື່ອມຕໍ່.

(ພາບ: VGP)

    ຕາມໜັງສືພິມເອເລັກໂຕນິກລັດຖະບານ ແລ້ວ, ກ່ອນອື່ນໝົດ, ນັ້ນແມ່ນເງື່ອນໄຂທີ່ຈຳເປັນ ເພື່ອສ້າງບັນດາຂົ້ວເຕີບໂຕໃໝ່ໃນແຜນທີ່ ພັດທະນາເຂດ. ບັນດາທ້ອງຖິ່ນໃໝ່ຈະສ້າງເຂດພັດທະນາ ເຊື່ອມຕໍ່ກັນລະຫວ່າງໃຈກາງ ເຂດຕົວເມືອງ, ເຂດແຄມທະເລ, ເຂດທົ່ງພຽງ ແລະ ເຂດພູດອຍ, ຈາກນັ້ນ ຈະເຊື່ອມຕໍ່ລະບົບມູນຄ່າການຜະລິດ - logistics - ການໃຊ້ສອຍ - ການສົ່ງອອກຢ່າງຄົບຊຸດ. ທີ 2 ແມ່ນ, ເລື່ອງຫຼຸດ 63 ແຂວງລົງເຫຼືອພຽງ 34 ແຂວງ ຈະສ້າງໂຄງປະກອບກົງຈັກບໍລິຫານ ຢ່າງຮອບດ້ານ, ຊ່ວຍຫຼຸດຜ່ອນຂັ້ນຕອນການປະສານງານ ແລະ ປະຢັດລາຍຈ່າຍໃນການເຄື່ອນໄຫວ ຫຼາຍພໍສົມຄວນ. ທີ 3 ແມ່ນ, ບັນດາແຂວງມີຂອບຂະໜາດໃຫຍ່ກວ່າ ຈະມີກຳລັງການຈັດຕັ້ງວາງແຜນ ຢ່າງມີແບບມີແຜນກວ່າ, ຜັນຂະຫຍາຍນະໂຍບາຍເສດຖະກິດ ໃຫ້ມີປະສິດທິຜົນ ແລະ ເພີ່ມກຳລັງແກ່ງແຍ້ງ ໃນການດຶງດູດການລົງທຶນ. ທີ 4 ແມ່ນ, ການໂຮມເຂົ້າກັນຈະສ້າງເງື່ອນໄຂ ເພື່ອນຳໃຊ້ງົບປະມານຢ່າງມີປະສິດທິຜົນ ແລະ ເພີ່ມສະມັດຕະພາບ ການລົງທຶນສາທາລະນະ. ທີ 5 ແມ່ນ, ບັນດາແຂວງໃຫຍ່ ຈະມີທ່າແຮງລື່ນກາຍໃນການຈັດພື້ນທີ່ພັດທະນາເຂດ ແລະ ປະສານງານລະຫວ່າງແຂວງ. ສຸດທ້າຍ, ການໂຮມແຂວງຍັງແມ່ນເຄື່ອງມືຢ່າງມີປະສິດທິຜົນ ເພື່ອຊຸກຍູ້ການພັດທະນາຢ່າງດຸ່ນດ່ຽງລະຫວ່າງບັນດາເຂດ.

        ກ່ຽວກັບການເສັງເພື່ອນຮູ້ຫຍັງແດ່ກ່ຽວກັບ ຫວຽດນາມ: ໃນອາທິດຜ່ານມາ, ລາຍການພາສາ ອິນໂດເນເຊຍ ໄດ້ຮັບບົດສົ່ງເຂົ້າມາຮ່ວມການເສັງຈາກທ່ານຜູ້ຟັງຫຼາຍທ່ານໃນ Borneo Listeners Club Indonesia ແລະ ພະແນກສື່ສານ, ສະຖາບັນສື່ສານ, ກະຈາຍສຽງ ແລະ ໂທລະພາບ. ພ້ອມກັນນັ້ນ, ບັນດາລາຍການ, ຄື: ລັດເຊຍ, ກຳປູເຈຍ, ອັງກິດ, ແອັດສະປາຍ ກໍ່ໄດ້ຮັບບົດສົ່ງເຂົ້າຮ່ວມການເສັງຈາກທ່ານຜູ້ຟັງຕື່ມອີກ. ມາຮອດປະຈຸບັນ, ສະເພາະລາຍການພາກພາສາ ລາວ ໄດ້ຮັບບົດສົ່ງເຂົ້າຮ່ວມການເສັງທັງໝົດ 15 ບົດ.