ປີ 1995, ຫວຽດນາມ ກາຍເປັນສະມາຊິກຂອງສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ຢ່າງເປັນທາງການ. ຫຼັງຈາກນັ້ນ 2 ປີ, ລາວ ກໍເປັນສະມາຊິກຂອງອົງການນີ້ຢ່າງເປັນທາງການເຊັ່ນດຽວກັນ (ປີ 1997). ເຖິງວ່າ ຫວຽດນາມ ແລະ ລາວ ເຂົ້າເປັນສະມາຊິກ ອາຊຽນ ຕາມຫຼັງກໍຕາມ ແຕ່ສອງປະເທດໄດ້ສົມທົບ, ສະໜັບສະໜູນເຊິ່ງກັນແລະກັນ ແລະ ຕັ້ງໜ້າປະກອບສ່ວນເຂົ້າໃນວິວັດທະນາການພັດທະນາລວມຂອງພາກພື້ນ ກໍຄືການສ້າງປະຊາຄົມອາຊຽນແຫ່ງ ສັນຕິພາບ, ວັດທະນາຖາວອນ. ເມື່ອແບ່ງປັນກັບນັກຂ່າວວິທະຍຸກະຈາຍສຽງ ຫວຽດນາມ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງ ອາຊຽນ ຄົບຮອບ 55 ປີ (ວັນທີ 8 ສິງຫາ 1967 – 08 ສິງຫາ 2022, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ລາວ ສະເຫຼີມໄຊ ກົມມະສິດ ໃຫ້ຮູ້ວ່າ ພາຍໃຕ້ຊາຍຄາລວມ ອາຊຽນ, ຫວຽດນາມ ແລະ ລາວ ພ້ອມກັບບັນດາປະເທດສະມາຊິກ ອາຊຽນ ໄດ້ມີສຽງເວົ້າລວມ, ຮ່ວມມືກັນສ້າງສັນຕິພາບ, ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນແລະກັນ, ປັບປຸງຄວາມໄວ້ເນື້ອເຊື່ອໃຈ ແລະ ຍົກສູງທີ່ຕັ້ງບົດບາດຂອງພາກພື້ນ ບົນເວທີສາກົນ.

ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ລາວ ສະເຫຼີມໄຊ ກົມມະສິດ

“ສອງປະເທດພວກເຮົາກໍໄດ້ປະຕິບັດພັນທະ, ໜ້າທີ່ຢ່າງຫ້າວຫັນ, ປະກອບສ່ວນເຂົ້າໃນນະໂຍບາຍ, ວິໄສທັດຂອງ ອາຊຽນ ຕັ້ງແຕ່ຕົ້ນມາ. ໂດຍສະເພາະມາຮອດປັດຈຸບັນ, ຫວຽດນາມ ແລະ ລາວກໍໄດ້ເປັນປະທານ ອາຊຽນ, ຄື ຫວຽດນາມ ແມ່ນ 3 ຄັ້ງແລ້ວ, ແລະ ລາວ ກໍ 2 ຄັ້ງແລ້ວ, ປີ 2024 ນີ້ກໍເປັນຄັ້ງທີ 3. ໃນອາຍຸການເປັນປະທານ ອາຊຽນ, ຫວຽດນາມ ແລະ ລາວ ລ້ວນແຕ່ເນັ້ນບົດບາດເປັນຜູ້ນຳຂອງ ອາຊຽນ, ສະແດງໃຫ້ເຫັນຢ່າງຈະແຈ້ງບົດບາດຂອງ ຫວຽດນາມ ແລະ ບົດບາດຂອງ ລາວ ໃນອາຊຽນ ເຊິ່ງນີ້ກໍເປັນການປະກອບສ່ວນເຮັດໃຫ້ບົດບາດຂອງ ອາຊຽນໂດຍລວມພົ້ນເດັ່ນຂຶ້ນເຊັ່ນດຽວກັນ. ສະນັ້ນ, ນີ້ແມ່ນໝາກຜົນການຮ່ວມມືຂອງພວກເຮົາ, ຄວາມໃກ້ຊິດ, ການປຶກສາຫາລື, ແລກປ່ຽນຄໍາຄິດຄຳເຫັນລະດັບວິຊາການ, ລະດັບການນຳຂອງສອງປະເທດຂອງພວກເຮົາໃນຖານະເປັນສະມາຊິກ ອາຊຽນ. ເອກະສານຕ່າງໆທີ່ໄດ້ຮັບຮອງເອົາ, ຂໍ້ລິເລີ່ມອັນໃໝ່ທີ່ຈະນຳມາຜົນປະໂຫຍດໃຫ້ແກ່ບັນດາເທດສະມາຊິກ ອາຊຽນ ກໍມີຫຼາຍອັນ. ອັນນີ້ ຂ້າພະເຈົ້າຈຶ່ງສາມາດເວົ້າໄດ້ວ່າ ການພົວພັນຢ່າງສະໜິດແໜ້ນຂອງສອງປະເທດພວກເຮົາໄດ້ປະກອບສ່ວນສຳຄັນເຂົ້າໃນຂະບວນການສ້າງປະຊາຄົມ ອາຊຽນ.”

ບໍ່ພຽງແຕ່ແມ່ນສະມາຊິກທີ່ຕັ້ງໜ້າຂອງ ອາຊຽນ, ຫວຽດນາມ ແລະ ລາວ ຍັງແມ່ນສະມາຊິກທີ່ມີຄວາມຮັບຜິດຊອບຂອງເວທີປາໄສຫຼາຍຝ່າຍຄື ສປຊ ແລະ ບັນດາອົງການຈັດຕັ້ງສາກົນ. ຕໍ່ໜ້າສະພາບພູມີການເມືອງທີ່ສັບສົນ ພ້ອມກັບສິ່ງທ້າທາຍຫຼາຍຢ່າງ ທີ່ໄດ້ສົ່ງຜົນກະທົບໂດຍກົງຕໍ່ຜົນປະໂຫຍດ ແລະ ການພັດທະນາຂອງສອງປະເທດ ກໍຄື ທົ່ວໂລກ. ເພື່ອຮັບປະກັນໄດ້ສິດຜົນປະໂຫຍດຂອງສອງຊາດ, ຍິ່ງກວ່າເວລາໃດໝົດ, ຫວຽດນາມ ແລະ ລາວ ຍິ່ງເພີ່ມທະວີການປຶກສາຫາລື, ພົບປະແລກປ່ຽນ, ເອກະພາບທັດສະນະ, ຮຽງບ່າຮຽງໄຫຼ່ ພ້ອມກັນປົກປ້ອງສິດຜົນປະໂຫຍດຂອງສອງຊາດບົນເວທີສາກົນ. ນີ້ກໍແມ່ນການແບ່ງປັນຂອງທ່ານເອກອັກຄະລັດຖະທູດຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ ແສງເພັດ ຮຸ່ງບຸນຍວງ ກ່ຽວກັບທິດທາງການຮ່ວມມືຂອງສອງຝ່າຍຢູ່ເວທີປາໄສຫຼາຍຝ່າຍໃນໄລຍະຈະມາເຖິງ.

“ໃນຕໍ່ໜ້າ, ຂ້າພະເຈົ້າຄິດວ່າ ຍິ່ງກວ່າເວລາໃດໝົດ ທີ່ສອງປະເທດພວກເຮົາຕ້ອງປະສານສົມທົບເຊິ່ງກັນ ແລະ ກັນ ບໍ່ວ່າຢູ່ອົງການ ສປຊ ແລະ ບັນດາອົງການເຄື່ອຂ່າຍຂອງອົງການ ສປຊ ຫຼືວ່າ ຂະບວນການບໍ່ຮ່ວມກຸ່ມ, ຝລັ່ງ ໂກໂຟນີ ແລະ ອື່ນໆ. ຈາກນັ້ນແມ່ນບັນດາອົງການຍ່ອຍ ເປັນຕົ້ນແມ່ນ AFTA, GMS, ACMECS… ເພາະວ່າໃນແຕ່ລະອົງການນັ້ນ, ເນື້ອໃນທີ່ບັນດາປະເທດສະມາຊິກຍົກອອກມາແມ່ນມີຫຼາຍອັນເປັນບັນຫາລະອຽດອ່ອນ ທີ່ແຕະຕ້ອງເຖິງຜົນປະໂຫຍດຂອງພວກເຮົາ. ສະນັ້ນ, ເພື່ອສາມາດປົກປັກຮັກສາໄດ້ຜົນປະໂຫຍດຂອງສອງປະເທດພວກເຮົາ, ພວກເຮົາມີຄວາມຈຳເປັນຕ້ອງປຶກສາຫາລື, ແລກປ່ຽນຄຳຄິດຄຳເຫັນນຳກັນເພື່ອພ້ອມກັນ, ຄຽງຂ້າງກັນປົກປັກຮັກສາຜົນປະໂຫຍດຂອງພວກເຮົາບົນເວທີສາກົນ”.

ພັກປະຊາຊົນປະຕິວັດ ລາວ ແລະ ພັກຄອມມູນິດ ຫວຽດນາມ ລ້ວນແຕ່ໄດ້ກຳເນີດມາຈາກພັກຄອມມູນິດອິນດູຈີນ, ມີທັດສະນະອັນດຽວກັນ ແລະ ມີພາລະກຳປະຕິວັດອັນດຽວກັນ. ສອງປະເທດຍາມໃດກໍຖືການຮ່ວມມືໃນພາກພື້ນ ແລະ ສາກົນແມ່ນສ່ວນໜຶ່ງທີ່ສຳຄັນໃນວຽກງານພົວພັນຕ່າງປະເທດ, ແມ່ນໜຶ່ງໃນບັນດາບຸລິມະສິດແຖວໜ້າຂອງແຕ່ລະປະເທດ. ເຖິງວ່າການສະແດງທັດສະນະຕໍ່ບັນຫາໃດໜຶ່ງທີ່ເກີດຂຶ້ນໃນພາກພື້ນ ແລະ ສາກົນ ແມ່ນອີງໃສ່ເງື່ອນໄຂສະພາບຄວາມເປັນຈິງ ແລະ ຜົນປະໂຫຍດຂອງແຕ່ລະປະເທດ, ແຕ່ວ່າສອງປະເທດກໍໄດ້ຈັດການພົບປະແລກປ່ຽນເປັນປະຈຳເພື່ອເອກະພາບທັດສະນະຕໍ່ທຸກບັນຫາ.

“ພວກເຮົາເປັນເພື່ອນມິດສະຫາຍ, ເປັນອ້າຍນ້ອງຮ່ວມອຸທອນດຽວກັນດັ່ງການນຳ ແລະ ຜູ້ອາວຸໂສຂອງພວກເຮົາໄດ້ຢ້ຳມາຕະຫຼອດ, ພວກເຮົາຄວນມີທັດສະນະອັນດຽວກັນໃນບັນຫາພາກພື້ນ ແລະ ສາກົນ. ສະນັ້ນ, ສອງກະຊວງການຕ່າງປະເທດໄດ້ປະສານກັນ, ປຶກສາຫາລືກັນຕະຫຼອດ ບັນຫາໃດຈະເກີດຂຶ້ນຢູ່ໃນລະດັບພາກພື້ນ ແລະ ສາກົນ ພວກເຮົາກໍໄດ້ປຶກສາຫາລືນຳກັນວ່າ ຄວນວາງທັດສະນະແນວໃດ ອີງໃສ່ເງື່ອນໄຂ, ອີງໃສ່ຈຸດຢືນ, ໂຕນີ້ແມ່ນສຳຄັນທີ່ສຸດທີ່ກະຊວງການຕ່າງປະເທດໄດ້ປະສານສົມທົບ ແລ້ວສະເໜີຕໍ່ການນຳສູງສຸດຂອງພວກເຮົາ ເພື່ອພິຈາລະນາ ແລະ ຕົກລົງຈັດຕັ້ງປະຕິບັດເປັນເອກະພາບກັນ”.

ບໍ່ພຽງແຕ່ໃນການຕໍ່ສູ້ເທົ່ານັ້ນ, ຫາກນ້ຳໃຈອຸ້ມຊູຊ່ວຍເຫຼືອເຊິ່ງກັນແລະກັນ, ການຮ່ວມມື ແລະ ໄມຕີຈິດມິດຕະພາບ ຍັງໄດ້ສະແດງອອກຜ່ານທຸກຂົງເຂດຂອງຊີວິດການເມືອງ, ສັງຄົມ, ພົ້ນເດັ່ນແມ່ນໃນວຽກງານພົວພັນຕ່າງປະເທດ. ສິ່ງດັ່ງກ່າວຍິ່ງສະແດງໃຫ້ເຫັນສາຍພົວພັນໄມຕີຈິດມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ ແລະ ລາວ ພິເສດຄືແນວໃດ.  ສາຍພົວພັນທີ່ຫາຍາກໃນໂລກນີ້ ບໍ່ພຽງແຕ່ແມ່ນສາຍພົວພັນທີ່ເປັນແບບຢ່າງເທົ່ານັ້ນ ຫາກຍັງນຳມາເຊິ່ງຜົນປະໂຫຍດຢ່າງແທ້ຈິງ, ປະກອບສ່ວນເຂົ້າໃນສັນຕິພາບ ແລະ ການພັດທະນາແບບຍືນຍົງຂອງທົ່ວໂລກອີກດ້ວຍ./.