ໂຮງລະຄອນແຈວຮ່າໂນ້ຍຢູ່ເຮືອນເລກທີ່ 15 ຖະໜົນ ຫງວຽນດິງຈ້ຽວ -ຮ່າໂນ້ຍ
|
ກຸງ ທັງລອງເມື່ອກ່ອນນີ້ ແລະ ນະຄອນຫຼວງຮ່າໂນ້ຍໃນປະຈຸບັນ ແມ່ນ ແຫ່ງເກັບຮັກສາບັນດາປະເພດສິລະປະວັດທະນະທຳທີ່ເປັນມູນເຊື້ອ, ໃນນັ້ນ, ພົ້ນເດັ່ນຂຶ້ນແມ່ນ ສິລະປະຂັບແຈວ. ຢູ່ຮ່າໂນ້ຍມີໂຮງລະຄອນແຈວຮ່າໂນ້ຍ, ແຕ່ດົນນານມານີ້ ຍັງສາມາດຮັກສາບົດບາດສຳຄັນ, ບໍ່ພຽງແຕ່ປະກອບສ່ວນເຂົ້າໃນການອະນຸລັກຮັກສາເທົ່ານັ້ນ, ຫາກຍັງແມ່ນແຫ່ງກໍ່ສ້າງ ແລະ ພັດທະນາຄວາມເກັ່ງກ້າສາມາດທາງດ້ານ ສິລະປະຂັບແຈວທີ່ມີມາແຕ່ດົນນານ.
ໂຮງລະຄອນແຈວຮ່າໂນ້ຍ ໄດ້ຮັບການສ້າງຕັ້ງຂຶ້ນກ່ອນນີ້ 60 ປີບົນພື້ນຖານການຄວບເຂົ້າກັນລະຫວ່າງ ກອງສິລະປະຂັບແຈວ Doan Lac Viet ກັບກອງສິລະປະຂັບແຈວເລກ 2 ສັງກັດກົມໃຫຍ່ການເມືອງກອງທັບປະຊາຊົນຫວຽດນາມ. ນັບແຕ່ຊຸມວັນທຳອິດເມື່ອໄດ້ຮັບການສ້າງຕັ້ງຂຶ້ນ, ໂຮງລະຄອນແຈວຮ່າໂນ້ຍ ສາມາດເຕົ້າໂຮມນັກສິລະປິນຫຼາຍຄົນທີ່ມີຊື່ສຽງໃນທົ່ວປະເທດ ແລະ ໄດ້ປະດິດຄິດແຕ່ງບົດລະຄອນແຈວທີ່ດີເດັ່ນຫຼາຍເລື່ອງຄື : “ ກວານເອີມທິກິ້ງ ”, “ ລິວບີງເຢືອງເລ້ ”, “ ຕືທຶກ ”, ໃນໄລຍະຕໍ່ໄປກໍມີບົດລະຄອນແຈວ “ ເຕີມກ້າມ ”, “ ນາງຊີຕາ ” ....
ລາຍການສະແດງລະຄອນແຈວກ່ຽວກັບເລື່ອງ“ ນາງຊີຕາ ”
|
ນັບແຕ່ເມື່ອໄດ້ຮັບການສ້າງຕັ້ງ, ພ້ອມກັບການແຕ່ງບົດລະຄອນແຈວຈາກເລື່ອງນິທານເກົ່ານັ້ນ, ໂຮງລະຄອນແຈວຮ່າໂນ້ຍຍັງໄດ້ແຕ່ງບັນດາບົດລະຄອນແຈວດ້ວຍບັນດາຕົວລະຄອນໃໝ່ ຊຶ່ງມີການປ່ຽນໃໝ່ວິທີສ້າງບົດລະຄອນ ແລະ ຫັນມາໃຊ້ສັບພາສາແບບທັນສະໄໝ, ດັ່ງນັ້ນໄດ້ຮັບຄວາມນິຍົມຊົມຊອບຈາກຜູ້ຊົມຢ່າງຫຼວງຫຼາຍ. ມາຮອດປະຈຸບັນໃນຈຳນວນ ໂຮງລະຄອນແຈວ16 ຫົວໜ່ວຍໃນທົ່ວປະເທດນັ້ນ, ໂຮງລະຄອນແຈວຮ່າໂນ້ຍຍັງຄົງ ສາມາດດຶງດູດຜູ້ມາຊົມຫຼາຍກ່ວາໝູ່ ແລະ ໄດ້ຮັບການຕີລາຄາວ່າ ແມ່ນປະສົບຜົນສຳເລັດດີທີ່ສຸດໃນການເສີມຂະຫຍາຍສິລະປະຂັບແຈວບົນເວທີໃນຊີວິດຍຸກທັນສະໄໝ. ນັກສິລະປິນດີເດັ່ນ Thuy Mui ຜູ້ອຳນວນການໂຮງລະຄອນແຈວຮ່າໂນ້ຍໃຫ້ຮູ້ວ່າ :
“ ພວກຂ້າພະເຈົ້າຍົກສູງຄຸນນະພາບການສະແດງລະຄອນແຈວ ດ້ວຍການຍົກສູງການລົງທຶນປະກອບພາຫະນະອຸປະກອນ, ຍົກສູງຄວາມງາມໃນການຮັບໃຊ້ຜູ້ຊົມຕາມໃຈ. ຈາກແນວຄວາມຄິດເຊັ່ນນັ້ນ, ພວກຂ້າພະເຈົ້າໄດ້ສຸມໃສ່ລົງທຶນ, ເພື່ອເຮັດແນວໃດໃຫ້ເວທີສະແດງທັນສະໄໝກ່ວາ, ມ່ວນກວ່າ, ສາມາດດຶງດູດໃຈຜູ້ຊົມຫຼາຍກວ່າ ພ້ອມກັນນັ້ນ ເຂົາເຈົ້າຈະສະຫງວນຄວາມຮັກໃຫ້ແກ່ບົດລະຄອນແຈວຢ່າງເລິກເຊິ່ງກ່ວາ ”
ມີວິທີການໜຶ່ງທີ່ມີຫົວຄິດປະດິດສ້າງຂອງໂຮງລະຄອນແຈວຮ່າໂນ້ຍ, ນັ້ນແມ່ນດຳເນີນການຈັດລາຍການສະແດງສິລະປະຂັບແຈວດ້ວຍຂອບຂະໜາດນ້ອຍ ເພື່ອນຳສິລະປະຂັບແຈວສາມາດໃກ້ຊິດສະໜິດສະໜົມກັບຜູ້ຊົມກ່ວາເກົ່າ, ເປັນຕົ້ນແມ່ນແຂກທ່ອງທ່ຽວຊາວຕ່າງປະເທດ. ໃນທຸກວັນນີ້, ເມື່ອແຂກທ່ອງທ່ຽວມາຢາມນະຄອນຫຼວງຮ່າໂນ້ຍນັ້ນ, ຖ້າຫາກຢາກຮັບຊົມການສະແດງສິລະປະຂັບແຈວ, ແມ່ນພຽງແຕ່ໄປຍັງໂຮງລະຄອນແຈວຮ່າໂນ້ຍຢູ່ເຮືອນເລກທີ່ 15 ຖະໜົນ ຫງວຽນດິງຈ້ຽວ ຫຼືອາດຈະຮັບຊົມການສະແດງສິລະປະຂັບແຈວໃນໂອກາດທ້າຍອາທິດຢູ່ວິຫານ ງອກເຊີນ ໜອງຮ່ວານກ໋ຽມ ຮ່າໂນ້ຍ. ຜ່ານການສະແດງເປັນເວລາ ກ່ວາ 1 ຊົ່ວໂມງ, ດ້ວຍສຽງຂັບລຳທຳເພງ, ວາດຟ້ອນນັ້ນ, ບັນດານັກສິລະປິນຈະຊ່ວຍຜູ້ຊົມກັບຄືນສູ່ກັບບັນດາເລືອ່ງລາວພື້ນເມືອງແຕ່ປາງກີ້ປາງກ່ອນ.
ມີຄວາມມານະພະຍາຍາມຢ່າງໃຫຍ່ຫຼວງອີກອັນໜຶ່ງຂອງໂຮງລະຄອນແຈວຮ່າໂນ້ຍໃນການອະນຸລັກຮັກສາ ແລະ ເສີມຂະຫຍາຍສິລະປະຂັບແຈວ, ນັ້ນແມ່ນນຳສິລະປະຂັບແຈວເຂົ້າສູ່ບັນດາໂຮງຮຽນ. ບໍ່ພຽງແຕ່ຮຽບຮຽງຄັດບາງຕອນໃນບົດລະຄອນແຈວ ເພື່ອນຳເຂົ້າຫຼັກສູດການສອນເທົ່ານັ້ນ, ໂຮງລະຄອນແຈວຮ່າໂນ້ຍຍັງເປັນເຈົ້າການຕິດຕໍ່ພົວພັນກັບໂຮງຮຽນຕ່າງໆເພືອ່ໄປສະແດງ, ທັງນີ້ກໍເປັນຊ່ວຍລຸ່ນໜຸ່ມສາມາດເຂົ້າໃຈ ຕື່ມອີກ ກ່ຽວກັບຄຸນຄ່າທາງດ້ານສິລະປະຂັບແຈວຂອງປູຍ່າຕາຍາຍປະໄວ້ໃຫ້. ນັກສິລະປິນດີເດັ່ນ Quoc Anh ຮອງຜູ້ອຳນວນການໂຮງລະຄອນແຈວຮ່າໂນ້ຍໃຫ້ຮູ້ວ່າ :
“ ນອກຈາກການກໍ່ສ້າງບັນດາດາລາສະແດງສິລະປະລະຄອນແຈວເພື່ອດຶງດູດຜູ້ຊົມນັ້ນ, ມີແນວຄວາມຄິດທີ່ສຳຄັນຂອງ ໂຮງລະຄອນແຈວພວກຂ້າພະເຈົ້າ, ນັ້ນແມ່ນນຳສິລະປະຂັບແຈວເຂົ້າສູ່ບັນດາໂຮງຮຽນ. ສຳລັບບັນດາລາຍການສະແດງສິລະປະຂັບແຈວຮັບໃຊ້ນັກຮຽນຢູ່ໂຮງຮຽນຕ່າງໆນັ້ນ, ບາງຄັ້ງພວກຂ້າພະເຈົ້າຕ້ອງໃຊ້ເງິນຖົມຕື່ມອີກ. ແຕ່ການສະແດງສິລະປະຂັບແຈວຮັບໃຊ້ນັກຮຽນນັ້ນ , ແນ່ນອນວ່າ ອີກ 5 – 10 ປີທີ່ຈະມາເຖິງ, ບັນດາຜູ້ຊົມຈາກໂຮງຮຽນເຫຼົ່ານັ້ນຈະມາຫາໂຮງລະຄອນແຈວ ພວກຂ້າພະເຈົ້າ ບໍ່ແມ່ນໜ້ອຍ ”
ໂດຍຖືກຕັ້ງຢູ່ເຂດດິນພັນປີແຫ່ງອະລິຍະທຳ ທັງແມ່ນສູນກາງວັດທະນະທຳໃຫຍ່ຂອງທົ່ວທັງປະເທດນັ້ນ, ບັນດາການປະກອບສ່ວນຂອງ ໂຮງລະຄອນແຈວຮ່າໂນ້ຍໃນ 60 ປີ ທ່ີຜ່ານມາບໍ່ພຽງແຕ່ປະກອບສ່ວນເຂົ້າໃນການອະນຸລັກຮັກສາສິລະປະຂັບແຈວທີ່ມີມາແຕ່ດົນນານເທົ່ານັ້ນ, ຫາກຍັງເຮັດໃຫ້ ສິລະປະຂັບແຈວທີ່ເຂັ້ມຂົ້ນໄປດ້ວຍສີສັນຊາດເພີ່ມຄວາມອຸດົມສົມບູນຂຶ້ນຕື່ມ, ພ້ອມທັງສ້າງສີສັນເອກະລັກສະເພາະໃຫ້ແກ່ສິລະປະຂັບແຈວຂອງຮ່າໂນ້ຍອີກດ້ວຍ.