ັບນດາລາຍການສິລະປະຈະຖືກສະແດງໃນພິທີໄຂ Festival ເຫ້ວ 2014
|
ໃນຊຸມມື້ນີ້, ເຂດດິນກຸ່ງເກົ່າ ເຫ້ວພວມຟົດຟື້ນມວນຊື່ນໄປດ້ວຍບັນດາ ງານບຸນ, ບັນດາການເຄື່ອນໄຫວສະແດງສິລະປະໃນຂອບເຂດງານ Festival ເຫ້ວ 2014. ປີນີ້ແມ່ນປີທີ 8 ຊຶ່ງແຂວງເທືອ່ທຽນເຫ້ວໄດ້ຈັດງານບຸນຕາມຮູບແບບ Festival ຂອງບັນດານະຄອນທີ່ມີຊື່ສຽງໃນໂລກ. Festival ເຫ້ວ ຄັ້ງຕ່າງໆຖືກຈັດຂຶ້ນນັ້ນ, ໄດ້ກາຍເປັນງານບຸນທີ່ເປັນເອກະລັກສະເພາະຕິດພັນກັບມູນເຊື້ອ ແລະ ປະຫວັດສາດວັດທະນະທຳເຫ້ວ, ອັນໄດ້ນຳເອົາພາບພົດກໍຄືວັດທະນະທຳຂອງເຫ້ວເວົ້າສະເພາະ ແລະ ຂອງຫວຽດນາມເວົ້າລວມໄປແນະນຳໃຫ້ທົ່ວໂລກຮັບຊາບ. Festival ເຫ້ວ ພວມຄ່ອຍໆກາຍເປັນເຄື່ອງໝາຍການຄ້າທາງດ້ານວັດທະນະທຳຂອງຫວຽດນາມ.
ດ້ວຍຫົວຂໍ້“ ມໍລະດົກວັດທະນະທຳກັບການເຊື່ອມໂຍງເຂົ້າກັບສາກົນ ແລະ ພັດທະນາ”, Festival ເຫ້ວ 2014 ໄດ້ເຕົ້າໂຮມບັນດາລາຍການສິລະປະທີ່ເປັນເອກະລັກສະເພາະໃຫ້ແກ່ບັນດາເຂດວັດທະນະທຳ ແລະ ບັນດານະຄອນທີ່ເປັນກຸ່ງເກົ່າຂອງຫວຽດນາມ. ເມື່ອທຽບໃສ່ 7 ຄັ້ງກອ່ນ, Festival ເຫ້ວ 2014 ມີການປ່ຽນແປງໃໝ່ຫຼາຍຢ່າງ. ສິ່ງນີ້ໄດ້ຮັບການສະແດງໃນພິທີໄຂງານ Festival ເຫ້ວ 2014 ໃນຕອນຄ່ຳວັນທີ 12/4 ຊຶ່ງແມ່ນລາຍການມີການປະສົມປະສານລະຫວ່າງສິລະປະພື້ນເມືອງຫວຽດນາມກັບສິລະປະຍຸກປະຈຸບັນຂອງໂລກ.
ໂດຍແມ່ນເຫດການລະດັບຊາດ ແລະ ມີລັກສະນະສາກົນ, Festival ເຫ້ວ 2014 ໄດ້ຕິດພັນກັບບັນດາເຫດການປະຫວັດສາດວັດທະນະທຳຂອງເຫ້ວ, ບັນດາເຫດການວັດທະນະທຳ, ການເມືອງແຫ່ງຊາດ, ພ້ອມທັງປະສານສົມທົບກັບບັນດາການເຄື່ອນໄຫວວັດທະນະທຳ, ທ່ອງທ່ຽວ, ສິລະປະ ແລະ ງານບຸນມີຂອບຂະໜາດໃຫຍ່, ສືບຕໍ່ຢັ້ງຢືນເຄື່ອງໝາຍການຄ້າ Festival ເຫ້ວ ດ້ວຍບັນດາຈຸດທີ່ເປັນເອກະລັກສະເພາະຊຶ່ງໄດ້ຮັບການຕີລາຄາສູງຈາກເພື່ອມິດສາກົນຜ່ານງານ Festival ເຫ້ວ ຄັ້ງຕ່າງໆ. Festival ເຫ້ວ 2014 ແມ່ນແຫ່ງເຕົ້າໂຮມທາງດ້ານວັດທະນະທຳຫວຽດນາມກໍຄືຫຼາຍປະເທດໃນໂລກ. Festival ເຫ້ວ 2014 ໄດ້ດຶງດູດການເຂົ້າຮ່ວມຂອງນັກສິລະປີນ 700 ຄົນຂອງບັນດານັກສິລະປະກອນທີ່ມາຈາກ 37 ປະເທດໃນໂລກ ພ້ອມກັບນັກສິລະປີນຢູ່ພາຍໃນປະເທດກ່ວາ 1000 ຄົນອີກດ້ວຍ. ທ່ານ ໂງຮ່ວາ ຮອງປະທານຜູ້ປະຈຳການຄະນະກຳມະການປະຊາຊົນແຂວງ ເທືອ່ທຽນເຫ້ວ ຫົວໜ້າຄະນະຈັດຕັ້ງງານ Festival ເຫ້ວ 2014 ໃຫ້ຮູ້ວ່າ :
“ໃນຂອບເຂດ Festival ເຫ້ວ ຄັ້ງທີ 8 ຈະມີເຫດການສາກົນທີ່ສຳຄັນທີ່ສຸດ, ນັ້ນແມ່ນກອງປະຊຸມລັດຖະມົນຕີຮັບຜິດຊອບດ້ານວັດທະນະທຳສິລະປະຂອງບັນດາປະເທດອາຊຽນດ້ວຍຫຼັກຕຳລາ 10+3. ພວກຂ້າພະເຈົ້າມີພາກພູມໃຈເປັນຢ່າງຍິ່ງເມື່ອ Festival ເຫ້ວ ຄັ້ງທີ 8 ໄດ້ຮັບການເລືອກເຟັ້ນຈາກກະຊວງການຕ່າງປະເທດແຫ່ງສ.ສ ຫວຽດນາມ ເປັນລາຍການພົບປະແລກປ່ຽນວັດທະນະທຳສິລະປະຂອງບັນດາປະເທດອາຊີຕາເວັນອອກ ແລະ ອາເມລິກາລາຕິງ”
ພ້ອມກັນນັ້ນ, Festival ເຫ້ວ 2014 ສືບຕໍ່ວາດພາບເຖິງຫຼາຍງານບຸນພະລາດຊະວັງທີ່ ເປັນເອກະລັກສະເພາະ, ບັນດາການເຄື່ອນໄຫວວັດທະນະທຳວົງຄະນະຍາດທີ່ອຸດົມສົມບູນ, ຫຼາຍຮູບຫຼາຍສີໄດ້ຖືກຈັດຂຶ້ນຢ່າງລຽນຕິດໃນ 9 ວັນ ແລະ ຄືນ. ບັນດາງານວາງສະແດງ, ການປ່ອຍວາວເຫ້ວ, ການຂຽນຕົວໜັງສື, ການເຄື່ອນໄຫວສິລະປະສິລະປະຈັດວາງ, ສິລະປະດົນຕີ-ວິຈິດສິນຕາມທ້ອງຖະໜົນ, ງານຕະຫຼາດນັດການຄ້າສາກົນ, ການເຄື່ອນໄຫວກິລາກາຍຍະກຳ....ໄດ້ຖືກຈັດຂຶ້ນຢູ່ຕາມຖະໜົນໃຫຍ່ສາຍຕ່າງໆໃນນະຄອນ. ລັກສະນະວົງຄະນະຍາດ ແລະ ລັກສະນະວັດທະນະທຳມະນຸດໄດ້ຮັບຖືວ່າແມ່ນຈຸດລວມຂອງ Festival ເຫ້ວ ປີນີ້. ທ່ານ ໂງຮ່ວາ ຮອງປະທານຜູ້ປະຈຳການຄະນະກຳມະການປະຊາຊົນແຂວງ ເທືອ່ທຽນເຫ້ວ ຫົວໜ້າຄະນະຈັດຕັ້ງງານ Festival ເຫ້ວ 2014 ໃຫ້ຮູ້ຕື່ມອີກວ່າ :
“ການເຄື່ອນໄຫວ Festival ເຫ້ວ ຄັ້ງທີ 8 ສືບຕໍ່ໄດ້ຮັບການເປີດກ້ວາງບໍ່ພຽງແຕ່ໃນຂອບເຂດນະຄອນເຫ້ວເທົ່ານັ້ນ, ຫາກຍັງເປີດກ້ວາງອອກສູ່ເຂດຊົນນະບົດ, ເຂດພູດອຍ, ເຂດແຄມທະເລ, ໄປຮັບໃຊ້ຄົນເຈັບຢູ່ຕາມໂຮງໝໍ, ໄປຮັບໃຊ້ກຳມະກອນຢູ່ຕາມເຂດອຸດສາຫະກຳ. ດ້ວຍຈິດໃຈທີ່ວ່າ ຊາວເຫ້ວ ແລະ ແຂກທ່ອງທ່ຽວແມ່ນເຈົ້າຂອງ, ເຈົ້າພາບຈັດງານບຸນ”
ຜ່ານການຈັດຕັ້ງ Festival ເຫ້ວ 7 ຄັ້ງນັ້ນ, ການເຂົ້າຮ່ວມຂອງຊາວເຫ້ວໄດ້ເປັນການກະຕຸ້ນ, ດຶງດູດບັນດາຫົວໜ່ວຍ, ວິສາຫະກິດ, ບັນດາລູກຮັກຫຼານແພງຂອງເຫ້ວທີ່ຢູ່ຫ່າງໄກຈາກບ້ານເກີດເມືອງນອນ ໄດ້ຕັ້ງໜ້າສະໜັບສະໜູນ ແລະ ເຂົ້າຮ່ວມບັນດາການເຄື່ອນໄຫວຂອງ Festival . ທ່ານ ຫງວຽນວັນແທງ ຮອງຜູ້ອຳນວຍການສູນ Festival ເຫ້ວ ໃຫ້ຮູ້ວ່າ :
“Festival ເຫ້ວ ໄດ້ສ້າງເຄື່ອງໝາຍການຄ້າຢູ່ພາຍໃນປະເທດກໍຄືສາກົນກ່ຽວກັບບັນດາການເຄື່ອນໄຫວວັດທະນະທຳສິລະປະ ແລະ ງານບຸນ. ຜ່ານການຈັດຕັ້ງ 7 ຄັ້ງ, Festival ເຫ້ວ ນັບມື້ນັບປະສົບຜົນສຳເລັດກວ່າເກົ່າ, ໃນນັ້ນ ອາດເວົ້າໄດ້ວ່າ ການຫັນມາເປັນວຽກງານຂອງສັງຄົມເພື່ອຮັບໃຊ້ Festival ໄດ້ກາຍເປັນວຽກງານທີ່ສຳຄັນທີ່ສຸດ ແລະ Festival ເຫ້ວ ກໍໄດ້ຮັບການໜູນຊ່ວຍຈາກບັນດາວິສາຫະກິດຢູ່ພາຍໃນປະເທດຢ່າງຫຼວງຫຼາຍ ”
ຄືດັ່ງຄຳຢືນຢັນຂອງທ່ານ ຝ້າມກາວຟອງ ເລຂາທິການໃຫຍ່ຄະນະກຳມະການແຫ່ງຊາດ UNESCO ຫວຽດນາມທີ່ວ່າ : Festival ເຫ້ວ 2014 ແມ່ນກາລະໂອກາດເພື່ອໃຫ້ຫວຽດນາມໂຄສະນາພາບພົດກ່ຽວກັບຊາດຫວຽດນາມນັບພັນປີແຫ່ງອະລິຍະທຳ ພ້ອມທັງສົ່ງສານເຖິງເພື່ອນມິດທົ່ວໂລກຮັບຊາບກ່ຽວກັບຫວຽດນາມຊຶ່ງແມ່ນປະເທດຮັກຫອມສັນຕິພາບ, ປ່ຽນແປງໃໝ່ ແລະ ເຊື່ອມໂຍງ ເຂົ້າກັບສາກົນຢ່າງຮອບດ້ານ .