(vovworld)- ຫວຽດນາມ ຈາກປະເທດຜະລິດກະສິກຳຫລ້າຫລັງ, ອຶດຫິວທຸກຍາກ ແລະ ຜ່ານຜ່າໄລຍະສົງຄາມ ມາເປັນເວລາເກືອບ 30 ປີ, ໄດ້ກາຍເປັນປະເທດຂະຫຍັນຂັນເຄື່ອນ, ພັດທະນາ, ບັນລຸໄດ້ຜົນງານສຳຄັນຫລາຍຢ່າງໃນທຸກຂົງເຂດ, ໃນນັ້ນ ພິເສດແມ່ນ ດ້ານເສດຖະກິດ ແລະ ວັດທະນະທຳ ສັງຄົມ. ເລື່ອງລາວມະຫັດສະຈັນນີ້ໄດ້ເລີ່ມຕົ້ນແຕ່ປີ 1986 ດ້ວຍຊື່ເອີ້ນວ່າ “ປ່ຽນແປງໃຫມ່”. ເພື່ອເຮັດໃຫ້ຜູ້ຊົມຫວນຄືນເຖິງປະຫວັດສາດ ແລະ ມີຄວາມຮູ້ສຶກກ່ຽວກັບບັນຍາກາດປ່ຽນແປງໃຫມ່ພ້ອມກັບບັນດາຄຸນຄ່າຂອງກິດຈະການປ່ຽນແປງໃຫມ່, ຫໍພິພິດທະພັນປະຫວັດສາດໄດ້ວາງສະແດງຫົວເລື່ອງ “ປ່ຽນແປງໃຫມ່ - ເສັ້ນທາງແຫ່ງຄວາມໄຝ່ຝັນ”.
ໃນບໍລິເວນງານວາງສະແດງທີ່ມີເນື້ອທີ່ 200 ຕາແມັດ, ບັນດາເອກະສານ, ວັດຖຸພັນ, ສຽງເວົ້າ, ເລື່ອງລາວຂອງບັນດານັກການເມືອງ, ນັກຄົ້ນຄ້ວາ ແລະ ປະຊາຊົນ, ຊື່ງແມ່ນຜູ້ມີຈິດໃຈປ່ຽນແປງໃຫມ່ໄດ້ຮັບການວາດພາບເຖິງເພື່ອແນໃສ່ປະກອບສ່ວນປຸກລຸກ ຈິດໃຈທີ່ມີຫົວຄິດປະດິດສ້າງ, ປ່ຽນແປງໃຫມ່ໃນປະຊາຊົນຫວຽດນາມ ແຕ່ລະຄົນ ເພື່ອໃຫ້ອະນາຄົດອັນດີງາມກວ່າ. ງານວາງສະແດງ “ປ່ຽນແປງໃຫມ່ - ເສັ້ນທາງແຫ່ງຄວາມໄຝ່ຝັນ” ພວມໄດ້ຮັບການແນະນຳຢູ່ຫໍພິພິທະພັນປະຫວັດສາດແຫ່ງຊາດ ບໍ່ພຽງແຕ່ນຳມາໃຫ້ສາທາລະນະຊົນບັນດາຄຸນຄ່າຂອງໄລຍະ 30 ປີແຫ່ງການປ່ຽນແປງໃຫມ່ຂອງປະເທດຊາດເທົ່ານັ້ນ ຫາກຍັງສະແດງໃຫ້ເຫັນການປ່ຽນແປງໃຫມ່ໃນວິທີການເຮັດ ແລະ ຄວາມນຶກຄິດຂອງພະນັກງານພາລະກອນຢູ່ຫໍພິພິດທະພັນອີກດ້ວຍ. ຕາມທ່ານນາງ ຟ້າມທິມາຍຖູຍ, ຫົວຫນ້າພະແນກສຶກສາ ແລະ ມະຫາຊົນ ສັງກັດ ຫໍພິພິທະພັນ ປະຫວັດສາດແຫ່ງຊາດ ແລ້ວ, ແນວຄວາມຄິດເພື່ອປະຕິບັດງານວາງສະແດງແມ່ນມີມາແຕ່ປີ 2015. ຫລັງຈາກນັ້ນ, ໂດຍໄດ້ຮັບການໃຫ້ຄຳປຶກສາຈາກ ສາດສະດາຈານ Graeme – Were, ຄູສອນມະຫາວິທະຍາໄລ Queensland ປະເທດ ອົດສະຕາລີ . ງານວາງສະແດງຄັ້ງນີ້ ເພື່ອແນໃສ່ສະແດງໃຫ້ເຫັນທັດສະນະຂອງບັນດານັກການເມືອງ, ນັກຄົ້ນຄ້ວາ ແລະ ປະຊາຊົນຜ່ານບັນດາເອກະສານ, ວັດຖຸພັນ, ຄວາມຊົງຈຳຂອງເຂົາເຈົ້າໄດ້ຊ່ວຍໃຫ້ສາທາລະນະຊົນ ມີຄວາມເຂົ້າໃຈສ່ວນໃດສ່ວນຫນຶ່ງຂອງໄລຍະ 30 ປີແຫ່ງການປ່ຽນແປງໃຫມ່ຂອງປະເທດຊາດ.
“ງານວາງສະແດງບໍ່ສາມາດສະແດງໃຫ້ເຫັນຜົນງານ 30 ປີແຫ່ງການປ່ຽນແປງໃຫມ່ຂອງປະເທດຊາດຢ່າງຄົບຖ້ວນໄດ້ ຍ້ອນວ່ານັ້ນແມ່ນບັນຫາໃຫຍ່ຊື່ງຫ້ອງວາງສະແດງທີ່ມີເນື້ອທີ່ພຽງ 200 ຕາແມັດນີ້ ບໍ່ສາມາດປະຕິບັດໄດ້. ຈຸດປະສົງແມ່ນມຸ້ງໄປເຖິງຜູ້ທີ່ມີອາຍຸແຕ່ 40 ປີ, ຂຶ້ນໄປຊື່ງແມ່ນຜູ້ທີ່ເຄີຍຜ່ານໄລຍະເກື້ອກູນ ໄດ້ເຫັນປະຈັກຕາໄລຍະປະເທດຊາດຫັນປ່ຽນຈາກໄລຍະເກື້ອກູນມາເປັນໄລຍະປ່ຽນແປງໃຫມ່. ງານວາງສະແດງກໍຢາກແນະນຳໃຫ້ບັນດາເພື່ອນຫນຸ່ມ ຊື່ງແມ່ນຜູ້ທີ່ໄດ້ກຳເນີດໃນໄລຍະປ່ຽນແປງໃຫມ່.”
logo ຂອງງານວາງສະແດງ
|
“ການປ່ຽນແປງໃຫມ່ເພື່ອກ້າວຂຶ້ນ” ແມ່ນຫນຶ່ງໃນ 2 ເນື້ອໃນຕົ້ນຕໍຂອງງານວາງສະແດງ. ທ່ານເລຂາທິການໃຫຍ່ ຫງວຽນວັນລີງ ໄດ້ເວົ້າວ່າ: “ຈົ່ງກອບກູ້ເອົາຕົນ ກ່ອນທີ່ຟ້າແຖນຊ່ວຍກູ້ກອບເອົາຊີວິດຂອງເຮົາ”. ງານວາງສະແດງໄດ້ແນະນຳຮູບພາບທ່ານເລຂາທິການໃຫຍ່ ຫງວຽນວັນລີງ ລົງໄປຢ້ຽມຢາມທົ່ງນາພ້ອມກັບຊາວກະສິກຳເປັນການສະແດງໃຫ້ເຫັນບັນຍາກາດປ່ຽນແປງໃຫມ່ໃນໄລຍະນັ້ນ ແມ່ນຮີບດ່ວນ ແລະ ຕັ້ງຫນ້າຄືແນວໃດ. ເບິ່ງຄືວ່າ ປະຊາຊົນ ແລະ ການນຳ ພວມພ້ອມກັນລົງມືປະຕິບັດກິດຈະການປ່ຽນແປງໃຫມ່ຢ່າງບໍ່ຢຸດບໍ່ເຊົາ ແລະ ບໍ່ມີຊ່ອງຫວ່າງ. ຫໍພິພິທະພັນໄດ້ຍົກອອກບັນດາຄຳສັບທີ່ວ່າ “ປ່ຽນແປງໃຫມ່, ເຊື່ອມໂຍງ, ເຕີບໂຕ ແລະ ກຳລັງແຮງ” ເພື່ອໃຫ້ຜູ້ຊົມວາດພາບໄດ້ງ່າຍກ່ວາກ່ຽວກັບການປ່ຽນແປງໃຫມ່. ປ່ຽນແປງໃຫມ່ ໄດ້ສ້າງກາລະໂອກາດພັດທະນາໃຫ້ແກ່ຫວຽດນາມ. ໃນການເຊື່ອມໂຍງ, ປ່ຽນແປງໃຫມ່ໄດ້ເຮັດໃຫ້ສັງຄົມ, ຊາວຫວຽດນາມ ມີຄວາມຂະຫຍັນຂັນເຄື່ອນກວ່າ ພ້ອມທັງເປີດກາລະໂອກາດຫລາຍຢ່າງເພື່ອພັດທະນາ, ການເຕີບໂຕໃຫ້ແກ່ປະເທດຊາດ. ທ່ານນາງ ມາຍຖູຍ ໃຫ້ຮູ້ວ່າ:
“ການປ່ຽນແປງໃຫມ່ບໍ່ພຽງແຕ່ເຮັດໃຫ້ໂສມຫນ້າຂອງປະເທດຊາດມີການປ່ຽນແປງເທົ່ານັ້ນ ຫາກຍັງເປັນການຍົກສູງຄຸນນະພາບການດຳລົງຊີວິດຂອງປະຊາຊົນຫວຽດນາມ ຈາກການບໍລິການສາທາລະນະສຸກ, ການສຶກສາ, ຊີວິດທາງດ້ານຈິດໃຈແລະ ວັດທະນະທຳ ອີກດ້ວຍ. ນັ້ນແມ່ນກຳລັງແຮງເພື່ອໃຫ້ຫວຽດນາມ ສືບຕໍ່ກ້າວຂຶ້ນຕາມເສັ້ນທາງປະຊາຊົນຮັ່ງມີ, ປະເທດຊາດເຂັ້ມແຂງ, ຍຸຕິທຳ, ປະຊາທິປະໄຕ ແລະ ສີວິໄລ.”
ບັນດາວັດຖຸພັນໃນງານວາງສະແດງລ້ວນແຕ່ໄດ້ຮັບການສະສົມ ແລະ ເກັບຮັກສາໄວ້ຢູ່ຫໍພິທະພັນໃນຫລາຍປີຜ່ານມາ, ສ່ວນຫລາຍແມ່ນບັນດາວັດຖຸພັນໂດຍປະຊາຊົນມອບໃຫ້. ສະນັ້ນ ຄຸນຄ່າງານວາງສະແດງໄດ້ເຮັດໃຫ້ຜູ້ຊົມມີຄວາມຮູ້ສຶກສະຫນິດສະຫນົມທີ່ສຸດ. ເຂົາເຈົ້າເອງໄດ້ຮັບຊົມໂດຍກົງ ແລະ ໄດ້ຮັບຟັງທັດສະນະທີ່ແຕກຕ່າງກັນຂອງປະຊາຊົນທຸກຊັ້ນວັນນະ. ເອື້ອຍ ຫງວຽນທິດີ້ງ, ພະນັກງານຫໍພິພິທະພັນໃຫ້ຮູ້ວ່າ:
“ເມື່ອເຂົ້າຮ່ວມພ້ອມກັບຫນ່ວຍງານຮັບຜິດຊອບເນື້ອໃນ ຂ້າພະເຈົ້າມີຄວາມເຂົ້າໃຈຫລາຍບັນຫາຕື່ມອີກ. ເມື່ອໄປສຳພາດບັນດານັກການເມືອງ, ປະຊາຊົນ ລ້ວນແຕ່ໄດ້ຮັບຄຳແບ່ງປັນ ແລະ ຄວາມຮູ້ສຶກຈາກພວກເພີ່ນກ່ຽວກັບໄລຍະນັ້ນ ເຮັດໃຫ້ຕົນເອງຍິ່ງມີຄວາມເຂົ້າໃຈຫລາຍຢ່າງກ່ຽວກັບໄລຍະປ່ຽນແປງໃຫມ່. ຍາມໃດຂ້າພະເຈົ້າ ກໍຮູ້ຄຸນງາມຄວາມດີຂອງບັນດາຜູ້ຊອກຫາເສັ້ນທາງກ້າວຂຶ້ນຂອງປະເທດຊາດ. ຍ້ອນມີບັນດາຜູ້ກ້າຄິດກ້າທຳຄືແນວນັ້ນ ຈຶ່ງມີບັນດາບາດກ້າວບຸກທະລຸ ເພື່ອໃຫ້ ພວກເຮົາມີຊີວິດຢູ່ຄືໃນປະຈຸບັນນີ້ຍ້ອນ, ມີຄຸນງາມຄວາມດີອັນໃຫຍ່ຫລວງຂອງບັນດາຜູ້ຄົນເຫລົ່ານັ້ນ.”
ພິເສດ ໃນງານວາງສະແດງໄດ້ສະຫງວນເຂດຫນຶ່ງເພື່ອໃຫ້ສາທາລະນະຊົນສາມາດ ແບ່ງປັນບັນດາຄວາມຊົງຈຳກ່ຽວກັບໄລຍະປ່ຽນແປງໃຫມ່ ດ້ວຍຄຳຖາມ “ປ່ຽນແປງໃຫມ່ໄດ້ເຮັດໃຫ້ຊີວິດຂອງພວກເພື່ອນມີການປ່ຽນແປງຄືແນວໃດ”. ນີ້ແມ່ນການເຊື່ອມຕໍ່ລະຫວ່າງຫໍພິພິທະພັນ ແລະ ສາທາລະນະຊົນ, ແມ່ນໂອກາດເພື່ອໃຫ້ບັນດາພະນັກງານຢູ່ຫໍພິພິທະພັນໄດ້ຮັບຟັງທັດສະນະຂອງສາທາລະນະຊົນ. ງານວາງສະແດງ “ປ່ຽນແປງໃຫມ່ - ວິວັດທະນາການຂອງບັນດາຄວາມໄຝ່ຝັນ” ປາດຖະຫນາຢາກຊ່ວຍໃຫ້ສາທາລະນະຊົນ ມີຄວາມເຂົ້າໃຈກ່ຽວກັບໄລຍະປະຫວັດສາດສຳຄັນຂອງປະເທດຊາດກ່ວາ. ນີ້ພຽງແຕ່ແມ່ນເປີດສາກການວາງສະແດງ “ປ່ຽນແປງໃຫມ່ - ວິວັດທະນາການຂອງບັນດາຄວາມໄຝ່ຝັນ”. ງານວາງສະແດງຈະແກ່ຍາວໄປຈົນໝົດປີ 2016 ເພື່ອສືບຕໍ່ຮຽກຮ້ອງປະຊາຊົນປະກອບວັດຖຸພັນ, ເອກະສານ ເພື່ອກ້າວໄປເຖິງການຈັດຕັ້ງງານວາງສະແດງຢູ່ຫໍພິພິທະພັນປະຫວັດສາດແຫ່ງຊາດ, ຊື່ງແມ່ນຮາກຖານຢູ່ສວນສາທາລະນະ ສັນຕິພາບ ດ້ວຍຂອບຂະຫນາດໃຫຍ່ກວ່າ, ມີວັດຖຸພັນຫລາຍກວ່າ ແລະ ມີເລື່ອງລາວທີ່ມີຄວາມໝາຍຫຼາຍເລື່ອງກວ່າ.