ຍາມເດືອນ 3 , ຢູ່ດ້ຽນບຽນແມ່ນຍາມທີ່ເຕັມໄປດ້ວຍດອກບານຂາວພວມ ບານສະພັ່ງ. ແລະ ດອກບານໄດ້ຮັບຖືວ່າແມ່ນສັນຍາລັກດ້ານວັດທະນະທຳ, ຈິດວິນຍານຂອງເຂດດິນ ແລະ ຊາວແຂວງດ້ຽນບຽນ. ດ້ຽນບຽນ ແມ່ນສະຖານທີ່ຕິດພັນກັບໄຊຊະນະດ້ຽນບຽນຝູ ທີ່ລືຊາຜາກົດ ແລະ ປະຈຸບັນພວມກາຍເປັນສະຖານທີ່ທ່ອງທ່ຽວປະຫວັດສາດ, ວັດທະນະທຳທີ່ດຶງດູດໃຈແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ ແລະ “ ງານບຸນດອກບານເອ້ຄວາມງາມ” ແມ່ນການເຄື່ອນໄຫວຄັ້ງທຳອິດເນື່ອງໃນໂອກາດສະເຫຼີມສະຫຼອງ 60 ປີແຫ່ງວັນ ໄຊຊະນະ ດ້ຽນບຽນຝູ, ຖືກຈັດຂຶ້ນກົງກັບຈຸດເວລາເປີດບັ້ນຮົບດ້ຽນບຽນຝູກ່ອນນີ້ ຄືວັນທີ 13/3.
ນາງສາວເຜົ່າຜູ້ໄທເພີ່ມຄວາມສະເໜ່ດ້ວຍຊຸດອາພອນປະຈຳເຜົ່າ ແລະ ດອກບານຖືກເໜັບເທິງຫົວ (ພາບ : baodienbien)
|
ໃນຊຸມມື້ນີ້, ບັນຍາກາດຢູ່ດ້ຽນບຽນຍິ່ງຟົດຟື້ນ ແລະ ເພີ່ມຄວາມສວຍງາມດ້ວຍດອກບານຂາວພວມ ບານສະພັ່ງຢູ່ແຄມທາງສາຍຕ່າງໆ ມັນປຽບເໝືອນຂອງຂວັນໂດຍທຳມະຊາດບັນດານໃຫ້ເຂດດິນແຫ່ງປະຫວັດສາດນີ້. ຄືດັ່ງຄຳໝາຍໝັ້ນ, ເມື່ອຮອດໂອກາດນີ້, ປະຊາຊົນເຂດທົງພຽງພັດພາກັນກັບເມືອດ້ຽນບຽນເພື່ອເຊື່ອມຕົວເຂົ້າກັບບັນຍາກາດຄຶກຄື້ນມ່ວນຊື່ນດ້ວຍສຽງແຄນ, ສຽງຂັບຮ້ອງຂອງຊາວທ້ອງຖິ່ນໃນງານບຸນດອກບານ ຊຶ່ງແມ່ນເຫດການນອນໃນຂອບເຂດສັບປະດາວັດທະນະທຳທ່ອງທ່ຽວດ້ຽນບຽນ 2014 .
ໂດຍເຊື່ອມຕົວເຂົ້າກັບຂະບວນຄົນເຂົ້າຮ່ວມງານບຸນ, ນາງຫຼໍ່ທິຟອງພ້ອມກັບເພື່ອນ 2-3 ຄົນພວມແຕ່ງຕົວໃຫ້ສວຍງາມດ້ວຍຊຸດອາພອນປະຈຳເຜົ່າ ແລະ ຊ່ວຍກັນເໜັບດອກບານໃສ່ຜົມ. ນາງຫຼໍ່ທິຟອງ ໃຫ້ຮູ້ວ່າ :
“ເໜັບດອກບານໃສ່ຜົມ ກໍເພື່ອເຮັດໃຫ້ພວກນາງສາວເຜົ່າຜູ້ໄທເພີ່ມຄວາມສະເໜ່ຫຼາຍຂຶ້ນ. ໂດຍທົ່ວໄປແລ້ວ, ໃນຊຸມມື້ງານບຸນຫຼືຍາມບຸນເຕັດ, ພວກນ້ອງມັກ ເໜັບດອກບານໃສ່ຜົມ. ສຳລັບພວກນ້ອງແລ້ວ, ນີ້ແມ່ນວັນພິເສດເພາະວ່າ ແມ່ນໂອກາດສະເຫຼີມສະຫຼອງ 60 ປີແຫ່ງວັນໄຊຊະນະດ້ຽນບຽນຝູ ”
ມາຢ້ຽມຢາມດ້ຽນບຽນໃນຍາມຈັດງານບຸນ, ແຂກທີ່ມາຈາກສາລະທິດ ຍັງມີໂອກາດໄດ້ເຊື່ອມຕົວເຂົ້າກັບສຽງຂັບກ້ຽວຂອງຊາວເຜົ່າມົ້ງ, ວາດຟ້ອນແຊຂອງພວກນາງສາວເຜົ່າຜູ້ໄທ, ພ້ອມທັງໄດ້ໂຮ່ຮ້ອງລະດົມກຳລັງໃຈໃຫ້ແກ່ພວກອ້າຍບາວຊາວເຜົ່າມົ້ງ, ເຜົ່າຮ່າຍີ ຊຶ່ງພວມແຂ່ງຂັນດຶງເຊືອກ, ໂຍນໝາກຄອນ....
ທ້າວສົມຕຸ້ຍ, ນັກສຶກສາລາວ ພວມຮ່ຳຮຽນຢູ່ດ້ຽນບຽນໃຫ້ຮູ້ວ່າ :
“ ນ້ອງດີໃຈທີ່ສຸດເມື່ອໄດ້ມາຮຽນຢູ່ຫວຽດນາມ, ນ້ອງໄດ້ເຂົ້າຮ່ວມການເຄື່ອນໄຫວກິລາ. ໃນສັບປະດາວັດທະນະທຳທ່ອງທ່ຽວດ້ຽນບຽນ, ນ້ອງເຫັນວ່າ ບັນດາເຜົ່າໃນແຂວງດ້ຽນບຽນມີນ້ຳໃຈສາມັກຄີ, ນ້ອງມີໂອກາດໄດ້ແລກປ່ຽນກັບເຜົ່າຕ່າງໆຄື ເຜົ່າມົ້ງ, ຂະມຸ, ຢ້າວ...ນ້ອງຍັງຕ້ອງຊອກຮູ້ຫຼາຍກ່ວາອີກກ່ຽວກັບວັດທະນະທຳ, ຮີດຄອງປະເພນີຂອງບັນດາເຜົ່າຢູ່ຫວຽດນາມ ”
ນ້ອງສາວເຜົ່າມົ້ງແກວ່ງໝາກປາວ |
ແກວ່ງໝາກປາວ ຊຶ່ງແມ່ນການລະຫຼິ້ນທີ່ເປັນເອກະລັກສະເພາະຂອງຊາວເຜົ່າມົ້ງ ທີ່ສາມາດດຶງດູດຜູ້ມາຊົມເປັນຈຳນວນຫຼວງຫຼາຍ. ນາງ ເຫຼົ່າທິຢິ້ງ ຊາວເຜົ່າມົ້ງ ຢູ່ເມືອງຕວນຢ້າວ ໃຫ້ຮູ້ວ່າ :
“ ພວກນ້ອງໄດ້ກະກຽມໃຫ້ການແຂ່ງຂັນແກວ່ງໝາກປາວ ນັບແຕ່ເວລາກ່ອນທີ່ຈະຮອດບຸນເຕັດ. ພວກນ້ອງກະກຽມຊຸດອາພອນ, ຕ້ອງຫຍິບໝາກປາວໃຫ້ງາມ. ນ້ອງເຫັນວ່າ ງານບຸນນີ້ຖືກຈັດຂຶ້ນ ແມ່ນເພື່ອໃຫ້ເມືອງອື່ນໆມາພົບປະແລກປ່ຽນເພື່ອຊອກຮູ້ກ່ຽວກັບສີສັນວັດທະນະທຳ. ມານີ້ກໍເພື່ອຊ່ວຍໃຫ້ຕົນເອງ ຮັກສາ ສີສັນຂອງຕົນໄວ້ໄດ້”
ງານບຸນດອກບານ ຍັງແມ່ນໂອກາດເພື່ອໃຫ້ບັນດາເຜົ່າອ້າຍນ້ອງໃນແຂວງດ້ຽນບຽນສະແດງສີມືໃນການປຸ່ງແຕ່ງອາຫານເຍື່ອງຕ່າງໆ.ໃນນັ້ນ, ພົ້ນເດັ່ນຂຶ້ນແມ່ນບັນດາເຍື່ອງອາຫານພື້ນເມືອງຂອງຊາວເຜົ່າຜູ້ໄທຄື : ປິ້ງປາ, ຊິ້ນຄວາຍແຫ້ງ, ເຂົ້າໜຽວ...ພິເສດແມ່ນເຍື່ອງອາຫານ ຕຳດອກບານ ຂອງພວກນາງສາວເຜົ່າຜູ້ໄທຢູ່ບ້ານໜອງຈືດ ນະຄອນດຽ້ນບຽນ ອັນໄດ້ເຮັດໃຫ້ຫຼາຍຄົນມີຄວາມປະຫຼາດໃຈ. ນາງຫຼໍ່ທິມິງ ຊາວເຜົ່າຜູ້ໄທເວົ້າວ່າ :
“ ດອກບານແລ້ວ, ກິນຈະແຊບກ່ວາເວລາຍັງເປັນໜໍ່ເພາະມີລົດຝາດ. ເຮົາສາມາດກິນທັງກີບ, ກ້າ ແລະ ທັງດອກໄດ້ໝົດ. ເຍື່ອງອາຫານນີ້ແມ່ນແຊບຫຼາຍ. ເມື່ອເຮັດ ຕຳດອກບານ ແມ່ນຕ້ອງໃສ່ໝາກເຜັດ, ເກືອ, ແປ້ງນົວ ແລະ ຜັກຫອມຕື່ມອີກ ”
ຮອດຍາມຄຳຄືນ, ທົ່ວສະໜາມຫຼວງທີ່ນະຄອນດ້ຽນບຽນພັດຄຶກຄື້ນມ່ວນຊື່ນດ້ວຍສຽງດົນຕີ, ສຽງຂັບຮ້ອງດັ່ງກ້ອງກັງວານໄປທົ່ວເຂດ. ພວກນາງສາວເຜົ່າຜູ້ໄທໄດ້ເລີ່ມເມົາມົວກັບວາດຟ້ອນແຊອັນເປັນປະເພນີ. ຮອບຟ້ອນແຊກໍຍິ່ງກ້ວາງ ອອກ, ອັນໄດ້ເປັນການຮັດແໜ້ນຕື່ມລະຫວ່າງປະຊາຊົນເຂດທົງພຽງກັບເຂດພູດອຍ. ແລະ ຮອດຍາມເລີກລາຈາກ ດ້ຽນບຽນ, ແຂກທັງຫຼາຍກໍຄິດຮອດຄິດເຖິງດ້ຽນບຽນທີ່ລືຊາຜາກົດໃນທົ່ວໂລກກ່ອນນີ້ 60 ປີ ແລະ ດຽ້ນບຽນທີ່ເຕັມໄປດ້ວຍພະລັງຊີວິດ ແລະ ສວຍສົດງົດງາມດ້ວຍສີສັນຂອງດອກບານ .