ພາຍຫຼັງທີ່ທ່ານພົນເອກ ວໍ້ງວຽນຢາບ ເຖິງແກ່ມໍລະນະກຳມາເປັນເວລາ 2 ປີ (4/10/2013-4/10/2015) , ນັກຂ່າວ, ນັກຖ່າຍຮູບ ເຈີນຮົ່ງ, ອະດີດນັກຂ່າວກອງທັບປະຊາຊົນຫວຽດນາມ ໄດ້ສະເໜີຕໍ່ຜູ້ອ່ານປຶ້ມພາບ : “ ຂ້າພະເຈົ້າຖ່າຍຮູບພົນເອກ ວໍ້ງວຽນຢາບ ” ໂດຍສຳນັກພິມຫຼາວດົ້ງ ພິມຈຳໜ່າຍ. ນີ້ແມ່ນບັນດາເລື່ອງລາວທີ່ເລົ່າດ້ວຍຮູບພາບກ່ຽວກັບຊີວິດປະຈຳວັນຂອງທ່ານພົນເອກ ວໍ້ງວຽນຢາບ ໂດຍນັກຖ່າຍຮູບເຈີນຮົ່ງຝາກຝັງຜ່ານປຶ້ມພາບປະກອບດ້ວຍ 129 ໜ້າທີ່ເປັນໜ້າຕື້ນຕັນໃຈ ແລະ ແທ້ຈິງ.
ຮູບທ່ານພົນເອກ ວໍ້ງວຽນຢາບ ນັ່ງຕັ້ງສະມາທິ
(ພາບ: ເຈີນຮົ່ງ)
|
ທ່ານພົນເອກ ວໍ້ງວຽນຢາບ ແມ່ນນັກການທະຫານທີ່ປິຊາສາມາດ, ແມ່ນນາຍພົນແຫ່ງເທບນິຍາຍ, ແມ່ນອ້າຍກົກຂອງກອງທັບປະຊາຊົນຫວຽດນາມ. ໃນປຶ້ມອ່ານ “ ຍາດເອົາໄຊຊະນະດ້ວຍທຸກສິ່ງທຸກຢ່າງ ”, ນັກຄົ້ນຄ້ວາປະຫວັດສາດທີ່ມີຊື່ສຽງຊາວອາເມລິກາ Cecil Currey ໃຫ້ຂໍ້ສັງເກດວ່າ : “ວໍ້ງວຽນຢາບສາມາດທຽບເທົ່າກັບຜູ້ບັນຊາການທະຫານທີ່ເກັ່ງກ້າສາມາດທີ່ສຸດໃນຕະຫຼອດ 2000 ປີທີ່ຜ່ານມາ, ທັງແມ່ນບຸກຄົນທີ່ຍິ່ງໃຫຍ່ຂອງທຸກສະໄໝ”. ຍ້ອນຄວາມຍິ່ງໃຫຍ່ ແລະ ມີຊື່ສຽງຂອງທ່ານພົນເອກ ວໍ້ງວຽນຢາບ, ນັກກະວີ ເຈີນດັງຄວາ, ຮອງປະທານຜູ້ປະຈຳການສະມາຄົມນັກປະພັນວັນນະຄະດີຫວຽດນາມ, ຜູ້ຂຽນຄຳນຳໄດ້ຖືວ່າ ນີ້ແມ່ນປຶ້ມພາບພິເສດ ເພາະການຖ່າຍເອົາຮູບພົນເອກ ວໍ້ງວຽນຢາບ ກໍງ່າຍ, ແຕ່ພັດຍາກທີ່ສຸດ. ນັກກະວີ ເຈີນດັງຄວາ, ຮອງປະທານຜູ້ປະຈຳການສະມາຄົມນັກປະພັນວັນນະຄະດີຫວຽດນາມເວົ້າວ່າ :
“ ງ່າຍແມ່ນຍ້ອນທ່ານແມ່ນນາຍພົນຜູ້ມີຊື່ສຽງ. ທ່ານເອງກໍແມ່ນບຸກຄົນທີ່ມີຄຸນຄ່າແລ້ວ, ພຽງແຕ່ສາມາດຖ່າຍເອົາຮູບຂອງທ່ານ ກໍໄດ້ປະສົບຜົນສຳເລັດແລ້ວ. ແຕ່ການຖ່າຍເອົາຮູບຂອງພົນເອກ ວໍ້ງວຽນຢາບ ກໍຍາກຫຼາຍ ເພາະໃນດວງໃຈຂອງຊາວຫວຽດນາມແຕ່ລະຄົນກໍລ້ວນແຕ່ມີພົນເອກ ວໍ້ງວຽນຢາບ, ປະຊາຊົນມີຄວາມເຄົາລົບນັບຖືທ່ານ ແລະ ໄດ້ຖ່າຍເອງດ້ວຍວິທີພິເສດສະເພາະຂອງຕົນກ່ຽວກັບຮູບຂອງທ່ານ. ບາງເທື່ອ ເຂົາເຈົ້າອີງໃສ່ຮູບພາບທີ່ຝັງເລິກໃນດວງໃຈຂອງພວກເຂົາ ເພື່ອໃຊ້ເປັນໄມ້ວັດເພື່ອວັດແທກສຳລັບບັນດາຜະລິດຕະພັນສິລະປະກຳ, ບັນດາຮູບຖ່າຍກ່ຽວກັບທ່ານ. ນີ້ແມ່ນສິ່ງທີ່ຍາກທີ່ສຸດ ”
ເຈີນຮົ່ງ ແມ່ນນັກຂ່າວໜັງສືພິມກວນໂດ້ຍເຍີນເຢີນ ສຽງຂອງກອງທັບປະຊາຊົນຫວຽດນາມ. ທ່ານໄດ້ຮັບບຸລິມະສິດພິເສດຈາກພົນເອກ ວໍ້ງວຽນຢາບ ທີ່ນັກຂ່າວຄົນອື່ນບໍ່ມີ, ນັ້ນແມ່ນນັກຂ່າວເຈີນຮົ່ງ ໄດ້ຮັບອະນຸຍາດເຂົ້າຖ່າຍຮູບພົນເອກ ວໍ້ງວຽນຢາບໃນທຸກໆເວລາ. ໃນປຶ້ມພາບ : “ ຂ້າພະເຈົ້າຖ່າຍຮູບພົນເອກ ວໍ້ງວຽນຢາບ ”, ນັກຖ່າຍຮູບເຈີນຮົ່ງ ໄດ້ເລືອກເອົາບັນດາຮູບຖ່າຍທີ່ພົ້ນເດັ່ນກ່ຽວກັບພົນເອກ ວໍ້ງວຽນຢາບ ຊຶ່ງທ່ານໄດ້ໂຊກດີມີໂອກາດຖ່າຍຮູບພົນເອກດ້ວຍຫຼາຍແງ່ມຸມ. ຜ່ານປຶ້ມພາບປະກອບດ້ວຍ 129 ໜ້າ, ນັກຖ່າຍຮູບເຈີນຮົ່ງໄດ້ແນະນຳຕໍ່ຜູ້ອ່ານກ່ຽວກັບແຕ່ລະຫົວເລື່ອງທີ່ຕິດພັນກັບຊີວິດປະຈຳວັນ, ການເຄື່ອນໄຫວຢ້ຽມຢາມຂອງພົນເອກ ວໍ້ງວຽນຢາບ. ບັນດາຮູບຖ່າຍໃນປື້ມພາບຫົວນີ້, ລ້ວນແຕ່ປະກາດເປັນເທື່ອທຳອິດ. ຜູ້ອ່ານສາມາດເຫັນໄດ້ເຖິງບັນດາຮູບຖ່າຍກ່ຽວກັບຊີວິດປະຈຳວັນທີ່ລຽບງ່າຍ ແຕ່ພັດເປັນສານທີ່ມີຄວາມໝາຍເລິກເຊິ່ງ. ຮູບຖ່າຍທ່ານພົນເອກ ວໍ້ງວຽນຢາບ ນັ່ງຂ້າງຮູບປັ້ນທ່ານປະທານໂຮ່ຈິມິນ ກໍໄດ້ສະແດງໃຫ້ເຫັນຄວາມໃນໃຈຂອງພົນເອກ. ເພື່ອຖ່າຍເອົາໄດ້ຮູບແຜ່ນນີ້, ນັກຖ່າຍຮູບເຈີນຮົ່ງ ເລົ່າຄືນສູ່ຟັງວ່າ :
“ ໃນມື້ໜຶ່ງ, ຮອດໂມງເລີກການ, ທຸກໆຄົນຕ່າງກໍພາກັນເມືອໝົດ, ຍັງເຫຼືອພຽງຂ້າພະເຈົ້າເມືອຕາມຫຼັງເທົ່ານັ້ນ, ເມື່ອເຫັນພົນເອກ ວໍ້ງວຽນຢາບຍ່າງອອກຈາກຫ້ອງການ, ຕາມຄວາມຮູ້ສຶກແລ້ວ, ຂ້າພະເຈົ້າສັງເກດເຫັນໃບໜ້າສີຕາຂອງທ່ານຄືພວມເປັນຫ່ວງເປັນໄຍກັບວຽກງານໃດໜຶ່ງ. ແລະ ເມື່ອພົນເອກຍ່າງມາຂ້າງຮູບປັ້ນທ່ານປະທານໂຮ່ຈິມິນ, ຂ້າພະເຈົ້າສັງເກດເຫັນວ່າ ພົນເອກພວມມີຄວາມໃນໃຈແທ້. ຂ້າພະເຈົ້າໄດ້ຖ່າຍເອົາ 4 ຮູບ. ຮອດຮູບທີ 5, ພົນເອກ ກໍໄດ້ຫຼັ່ງນ້ຳຕາ. ເວລານັ້ນ ຂ້າພະເຈົ້າກໍບໍ່ສາມາດຖ່າຍຮູບໄດ້ຕື່ມອີກ. ນັ້ນແມ່ນຄວາມຮ່ວມຄິດ ”
ສຳລັບການຖ່າຍຮູບພົນເອກ ວໍ້ງວຽນຢາບນັ້ນ, ກໍມີນັກຖ່າຍຮູບທັງຢູ່ພາຍໃນ ແລະ ຕ່າງປະເທດຫຼາຍຄົນໄດ້ຖ່າຍເອົາຮູບທ່ານພົນເອກໄດ້ຫຼາຍແຜ່ນ, ແຕ່ກໍ່ບໍ່ມີຮູບຖ່າຍແຜ່ນໃດສາມາດທຽບເທົ່າກັບຮູບຖ່າຍຂອງເຈີນຮົ່ງ ເພາະທ່ານຖ່າຍເອົາຮູບທ່ານພົນເອກດ້ວຍໄລຍະໃກ້. ນັກກະວີ ເຈີນດັງຄວາ, ຮອງປະທານຜູ້ປະຈຳການສະມາຄົມນັກປະພັນວັນນະຄະດີຫວຽດນາມໃຫ້ຮູ້ວ່າ :
“ ຖ້າຫາກບັນດານັກຖ່າຍຮູບຄົນນັ້ນ, ຖ່າຍເອົາຮູບທ່ານພົນເອກຈາກບ່ອນໄກນັ້ນ, ແຕ່ຮູບຖ່າຍຂອງເຈີນຮົ່ງ ແມ່ນຖ່າຍໃກ້ໆ ໝາຍວ່າ ຖືທ່ານພົນເອກຄືດັ່ງຍາດຕິພີນ້ອງໃນຄອບຄົວ. ດັ່ງນັ້ນໃນຈຳນວນຮູບຖ່າຍນັ້ນ, ມີຮູບທີ່ຖ່າຍໃນກໍລະນີພິເສດເຊັ່ນ: ທ່ານພົນເອກພວມເສບເຄື່ອງດົນຕີ, ທ່ານພົນເອກພວມຫຼິ້ນກັບລູກ.... ”
ໃນພາລະກິດການເຄື່ອນໄຫວດ້ານສິລະປະຂອງຕົນ, ນັກຖ່າຍຮູບເຈີນຮົ່ງ ໄດ້ມີງານວາງສະແດງຮູບຖ່າຍ 8 ຄັ້ງກ່ຽວກັບ ພົນເອກ ວໍ້ງວຽນຢາບ. ນີ້ເປັນຄັ້ງທຳອິດທີ່ທ່ານປະກາດຮູບຖ່າຍຜ່ານປຶ້ມພາບ ແລະ ຮູບຖ່າຍກ່ຽວກັບພົນເອກ ວໍ້ງວຽນຢາບດ້ວຍຊີວິດປະຈຳວັນທີ່ລຽບງ່າຍ ກໍແມ່ນອາລົມຈິດຄວາມເຄົາລົບນັບຖື ແລະ ຮັກແພງຂອງນັກຖ່າຍຮູບເຈີນຮົ່ງ ສະຫງວນໃຫ້ສະເພາະທ່ານພົນເອກແຫ່ງເທບນິຍາຍດ້ວຍຄວາມສຳນຶກກ່ຽວກັບສິລະປະຖ່າຍຮູບທີ່ໃກ້ຊິດສະໜິດສະໜົມທີ່ສຸດ; ສິລະປະກໍແມ່ນຊີວິດ.