ທ່ານນາງ Nguyen Thi Binh ໃນປະຈຸບັນ
(ພາບ: thethaovanhoa)
|
“ ຄອບຄົວ, ໝູ່ເພື່ອນ ແລະ ປະເທດຊາດ” ນີ້ແມ່ນຊື່ຂອງປຶ້ມບັນທຶກຄືນຫຼັງຂອງ ທ່ານນາງ Nguyen Thi Binh ອະດີດຮອງປະທານປະເທດ, ລັດຖະມົນຕີການຕ່າງປະເທດເພດຍິງຄົນທຳອິດ, ຫົວໜ້າຄະນະນັກເຈລະຈາຂອງລັດຖະບານປະຕິວັດຊົ່ວຄາວແຫ່ງສາທາລະນະລັດພາກໃຕ້ຫວຽດນາມຢູ່ທີ່ການເຈລະຈາ ປາຣີ. ປຶ້ມບັນທຶກ ຄືນຫຼັງຫົວນີ້ ໄດ້ວາດພາບຊີວິດຂອງທ່່ານນາງ ຊຶ່ງແມ່ນຕົວພະຍານໄດ້ເຂົ້າຮ່ວມ ແລະ ເປັນສັກຂີພະຍານ ການຫັນປ່ຽນຜ່ານບັນດາໄລຍະແຫ່ງປະຫວັດສາດ, ນັບແຕ່ຄາວເຍົາໄວຈົນຮອດໄລຍະເຂົ້າຮ່ວມການເຄື່ອນໄຫວປະຕິວັດ, ບັນດາຂີດໝາຍທີ່ສຳຄັນໃນການຕໍ່ສູ້ຍາດເອົາເອກະລາດແຫ່ງຊາດ ແລະ ນັບທັງໄລຍະອອກພັກກິນເບັ້ຍບຳນານ.
ທ່ານນາງ Nguyen Thi Binh ໄດ້ຕັ້ງຊື່ໃຫ້ແກ່ ປຶ້ມບັນທຶກຄືນຫຼັງຂອງຕົນທີ່ໜ້າລຽບງ່າຍ ແລະ ສາມາດເຂົ້າໃຈງ່າຍ, ນັ້ນແມ່ນ “ ຄອບຄົວ, ໝູ່ເພື່ອນ ແລະ ປະເທດຊາດ”. ທ່ານນາງ Nguyen Thi Binh ບອກວ່າ, ນັ້ນແມ່ນຕົ້ນກຳນົດເພື່ອສ້າງໃຫ້ມີກຳລັງແຮງພິເສດໃນຈິດໃຈຂອງຕົນ. ທ່ານນາງໃຫ້ຮູ້ວ່າ ໄດ້ສະຫງວນເວລາຫຼາຍຈຶ່ງຈະສຳເລັດປຶ້ມບັນທຶກຄືນຫຼັງຫົວນີ້. ທ່ານນາງ Nguyen Thi Binh ໃຫ້ຮູ້ວ່າ :
“ ໃນໄລຍະເຄືອ່ນໄຫວ, ແມ່ນບໍ່ມີເວລາເພື່ອຂຽນບັນທຶກປະຈຳວັນກ່ຽວກັບບັນດາການເຄື່ອນໄຫວຂອງຂ້າພະເຈົ້າ. ນັບທັງກອງປະຊຸມປາຣີ, ຂ້າພະເຈົ້າກໍບໍ່ ຂຽນບັນທຶກໄດ້ຫຍັງເລີຍ. ເພາະສະນັ້ນ ຂ້າພະເຈົ້າໄດ້ສະຫງວນເວລາເພື່ອຫວນຄືນຫຼັງກ່ຽວກັບທຸກສິ່ງທຸກຢ່າງທີ່ຕົນໄດ້ຜ່ານຜ່າ. ຂ້າພະເຈົ້າໄດ້ໃຊ້ເວລາ 2-3 ປີເພື່ອຂຽນບົດ ບັນທຶກຄືນຫຼັງຫົວນີ້ ແລະ ໄດ້ສຳເລັດໃນປີ 2009, ແຕ່ຂ້າພະເຈົ້າບໍ່ຮູ້ວ່າ ຈະນຳໄປພິມຈຳໜ່າຍຫຼືບໍ່. ໃນໂອກາດ ລະນຶກ 85 ປີ ແຫ່ງວັນຄ້າຍວັນເກີດຂອງຕົນ, ຂ້າພະເຈົ້າຄິດວ່າຈະນຳສະເໜີຕໍ່ຜູ້ອ່ານ ”
ກ່ອນທີ່ຈະລົງມືຂຽນບົດບັນທຶກຄືນຫຼັງ, ທ່ານນາງ Nguyen Thi Binh ໄດ້ລັ່ງເລໃຈວ່າ ຈະຂຽນຫຼືບໍ່, ຂຽນຫຍັງແດ່? ແລະ ເມື່ອຂຽນຮຽບຮ້ອຍແລ້ວ, ຈະນຳໄປຈຳໜ່າຍຫຼືບໍ່? ແລະ ສຸດທ້າຍປຶ້ມບັນທຶກຄືນຫຼັງໄດ້ຂຽນສຳເລັດ ດ້ວຍຈຸດປະສົງບັນທຶກຄືນຫຼັງບັນດາພຶດຕິກຳຕົວຈິງ ແລະ ບັນດາອະນຸສອນທີ່ດີງາມໃນໄລຍະດຳລົງຊີວິດໃນຄອບຄົວ, ກັບໝູ່ເພື່ອນ ແລະ ການເຄື່ອນໄຫວປະຕິວັດ. ທ່ານນາງ Nguyen Thi Binh ເວົ້າວ່າ
“ປຶ້ມບັນທຶກຄືນຫຼັງຫົວນີ້ ໄດ້ຫວນຄືນທັງໄລຍະທີ່ຂ້າພະເຈົ້າດຳລົງຊີວິດໃນຄອບຄົວ, ກັບໝູ່ເພື່ອນ ແລະການເຄື່ອນໄຫວຕ່າງໆ, ມີຫຼາຍສິ່ງເປັນໜ້າຈົດຈຳແທ້ໆ. ເມື່ອຫວນຄືນບັນດາອະນຸສອນ, ຮູບພາບເມື່ອກ່ອນນີ້, ພິເສດຮູບພາບບັນດາຜູ້ເປັນສ່ຽວພັດປະກົດຂື້ນໃນສາຍຕາຂອງຂ້າພະເຈົ້າ. ຂ້າພະເຈົ້າເຫັນວ່າ ຊີວິດຂອງຕົນແມ່ນໂຊກດີຫຼາຍຍ້ອນວ່າໄດ້ຕິດພັນກັບບັນດາເຫດການປະຫວັດ ສາດທີ່ສຳຄັນໃນຕະຫຼອດສະຕະວັດທີ່ 20. ນັ້ນແມ່ນການຕໍ່ຕ້ານຕ້ານພວກລ່າເມືອງຂຶ້ນຝະລັ່ງ, ການຕໍ່ຕ້ານຕ້ານຈັກກະພັດອາເມລິກາ. ແລະ ໄລຍະພາຍຫຼັງປະເທດຊາດມີສັນຕິພາບ ມາຮອດປະຈຸບັນ. ”
ໂດຍຕາງໜ້າໃຫ້ບັນດາຜູ້ຄົນໃນລຸ້ນລາວຄາວດຽວ, ມີບາງຄົນຍັງມີຊີວິດຢູ່, ແຕ່ກໍມີບາງຄົນໄດ້ລ່ວງລັບໄປແລ້ວ, ທ່ານນາງ Nguyen Thi Binh ໄດ້ແບ່ງປັນບັນດາຄວາມໃນໃຈຢ່າງເລິກເຊິ່ງຂອງລຸ້ນຊາວໜຸ່ມໃນໄລຍະຕໍ່ສູ້ປະຕິວັດ. ຈາກຈິດໃຈອັນແຮງກ້າຂອງລຸ້ນຄົນໃນຍຸກສະໄໝນັ້ນ, ທ່ານນາງຈຶ່ງເອີ້ນເຂົາເຈົ້າວ່າແມ່ນ “ ບັນດາບຸກຄົນປະຕິຫານ ” ທີ່ໄດ້ຕໍ່ພະລັງແຮງໃຫ້ຄົນລຸ້ນໜຸ່ມໃນໄລຍະສ້າງສາປະເທດຊາດປະຈຸບັນ . ຜ່ານປຶ້ມບັນທຶກ ຄືນຫຼັງ, ທ່ານນາງ Nguyen Thi Binh ຢາກໃຫ້ຄຳຕັກເຕືອນເຖິງນ້ຳໃຈມະຫາສາມັກຄີທົ່ວປວງຊົນທັງຊາດ ແມ່ນກຳລັງແຮງຂອງທຸກໆໄຊຊະນະເຖິງວ່າຈະຢູ່ໃນຍຸກສະໄໝໃດໆກໍຕາມ. ທ່ານນາງ Nguyen Thi Binh ໃຫ້ຮູ້ອີກວ່າ :
“ຂ້າພະເຈົ້າຄິດວ່າ ບົດຮຽນອັນລ້ຳຄ່າກ່ວາໝູ່ຂອງປະຊາຊົນຫວຽດນາມແມ່ນ ຄວາມສາມັກຄີ. ສາມັກຄີທັງຊາດເພື່ອຈຸດໝາຍລວມ. ນັ້ນແມ່ນທິດນຳໄດ້ຮັບໄຊຊະນະໃນອະດີດຕະການ. ທິດນຳນີ້ກໍແມ່ນທິດນຳທີ່ປະສົບຜົນສຳເລັດໃນປະຈຸບັນ ແລະ ອະນາຄົດ. ພວກເຮົາມີພື້ນຖານເພື່ອສ້າງມະຫາສາມັກຄີທົ່ວປວງຊົນທັງຊາດ. ໝາຍຄວາມວ່າ ພວກເຮົາຮ່ວມກົກເຄົ້າເຫງົ້າກໍ, ຮ່ວມກັນຢູ່ຕໍ່ໜ້າໄພນາບຂູ່ອັນດຽວກັນ ແລະ ຮ່ວມອະນາຄົດທີ່ຮຸ່ງເຮືອງເຫຼືອງເຫຼື້ອມຂອງປະເທດ ຊາດ. ເພື່ອກໍ່ສ້າງປະເທດຫວຽດນາມເຂັ້ມແຂງ, ເພື່ອໃຫ້ພວກເຮົາມີກຳລັງແຮງຢ່າງພຽງພໍເພື່ອປົກປັກຮັກສາປະເທດຊາດ... ພວກເຮົາຕ້ອງມີບັນດາບຸກຄົນໃໝ່, ມີບຸກຄະລິກກະພາບທີ່ດີ, ມີອຸດົມຄະຕິ ແລະ ຄວາມເຊື່ອໝັ້ນ. ພວກເຮົາກໍສາມາດເກັ້ຍກອມມານະຈິດຂອງມະນຸດ.... ນັ້ນກໍແມ່ນທຸກສິ່ງທີ່ຂ້າພະເຈົ້າຢາກເວົ້າເຖິງຜ່ານປຶ້ມບັນທຶກຄືນຫຼັງຫົວນີ້ ”
ນັກປະພັນວັນນະຄະດີ Nguyen Ngoc ຜູ້ໄດ້ເຮັດວຽກກັບທ່ານນາງ Nguyen Thi Binh ໃນຕະຫຼອດເວລາທີ່ທ່ານນາງຂຽນປຶ້ມຫົວນີ້ສຳເລັດ ໃຫ້ຮູ້ວ່າ ຜ່ານປຶ້ມບັນທຶກຄືນຫຼັງຫົວນີ້, ສາມາດເຫັນໄດ້ວ່າ ທ່ານນາງໄດ້ມີການປະສານສົມທົບລະຫວ່າງສິ່ງທີ່ລຽບງ່າຍ ກັບ ທັນສະໄໝ, ສິ່ງທີ່ທຳມະດາສາມັນກັບສິ່ງຍອດຍິ່ງ, ຄວາມອ່ອນຍົນກັບໜັກແໜ້ນ. ນັກປະພັນວັນນະຄະດີ Nguyen Ngoc ໃຫ້ຮູ້ວ່າ :
“ ເມື່ອຈັບປຶ້ມຫົວນີ້, ເບິ່ງຄືວ່າ ທຸກໆຄົນມີຄວາມຫວັງຄ່ອຍຖ້າຊອກຮູ້ທຸກເລື່ອງມະຫັດສະຈັນກ່ຽວກັບກອງປະຊຸມປາຣີ, ຊຶ່ງແມ່ນກອງປະຊຸມທີ່ເຄັ່ງຕຶງທີ່ສຸດ, ແລະ ຕາມທຸກໆຄົນແລ້ວ, ນັ້ນແມ່ນການເຈລະຈາທີ່ແກ່ຍາວທີ່ສຸດໃນການເຄື່ອນໄຫວທາງການທູດໃນໂລກ, ຊຶ່ງໃນນັ້ນທ່ານນາງ Nguyen Thi Binh ແມ່ນໜຶ່ງໃນບັນດາບຸກຄົນທີ່ສຳຄັນທີ່ການເຈລະຈາ. ຕາມຂ້າພະເຈົ້າແລ້ວ, ໃນປຶ້ມບັນທຶກຄືນຫຼັງຫົວນີ້, ກໍມີສິ່ງມະຫັດສະຈັນທີ່ເລິກເຊິ່ງກ່ຽວກັບມະນຸດ, ເສັ້ນທາງກ້າວເດີນ, ກ່ຽວກັບບັນດາຕົ້ນກຳເນີດຊຶ່ງໄດ້ສ້າງເປັນກຳລັງແຮງພິເສດຢູ່ໃນກະໂຕຂອງຜູ້ຍິງທີ່ມີຄີງບາງຮ່າງນ້ອຍ ແລະ ສະຫງ່ຽມຄຽມຄົມນີ້, ເພື່ອໃຫ້ທ່ານນາງສວມບົດບາດເປັນບຸກຄົນທັນສະໄໝໃນປະຫວັດສາດຂອງປະເທດຊາດ ”
ເຖິງວ່າໄດ້ກ້າວເຂົ້າສູ່ອາຍຸ 85 ປີແລ້ວກໍຕາມ, ແຕ່ທ່ານນາງ Nguyen Thi Binh ຍັງຄົງສາມາດຮັກສາໄດ້ນ້ຳໃຈຂອງຜູ້ທີ່ມີຄວາມກະຕືລືລົ້ນ, ສຸດຈິດສຸດໃຈຕໍ່ວຽກງານ, ອຸທິດສວ່ນຕະຫຼອດຊີວິດຂອງຕົນໃຫ້ແກ່ການຕໍ່ສູ້ເພື່ອຍາດເອົາເອກະລາດຂອງຊາດ. ທ່ານນາງ Nguyen Thi Binh ໄດ້ຖ່າຍທອດໃຫ້ຄົນລຸ້ນຫຼັງກ່ຽວກັບບັນດາບົດຮຽນດ້ວຍຊີວິດ ແລະ ນ້ຳໃຈປະຕິວັດຜ່ານປຶ້ມບັນທຶກ ຄືນຫຼັງ “ ຄອບຄົວ, ໝູ່ເພື່ອນ ແລະ ປະເທດຊາດ” .