ງານບຸນ ແທ້ງຢ້ອງ ຢູ່ໝູ່ບ້ານ ຟູ່ດົງ
(ພາບ:vanhoadoisong.vn)
|
ແທ້ງຢ້ອງ ແມ່ນແມ່ນ 1 ໃນຈຳນວນພະອໍລະຫັນ 4 ອົງໄດ້ຮັບການເຊີດຊູແມ່ນ ວິລະບຸລຸດອະມະຕະຂອງຫວຽດນາມ. ປະຈຸບັນ ຢູ່ຫຼາຍແຫ່ງໄດ້ກໍ່ຕັ້ງວິຫານບູຊາແທ້ງຢ້ອງ ແລະ ຈັດຕັ້ງງານບຸນອາໄລຫາ, ແຕ່ງານບຸນຢູ່ຕາແສງ ຟູ່ດົງ ເມືອງ ຢາເລີມ ຮ່າໂນ້ຍ ແມ່ນງານບຸນທີ່ເປັນເອກະລັກສະເພາະກ່ວາໝູ່ຢູ່ຫວຽດນາມ. ນີ້ແມ່ນງານບຸນສະແດງໃຫ້ເຫັນນ້ຳໃຈຕ້ານສັດຕູຜູ້ຮຸກຮານຂອງຊາວຫວຽດເດີມ ທັງສະແດງໃຫ້ເຫັນຄວາມມຸ່ງຫວັງໃຫ້ປະເທດຊາດມີສັນຕິພາບ, ປະຊາຊົນມີຄວາມອີມໜຳສຳລານ ແລະ ຜາສຸກ..
ງານບຸນ ແທ້ງຢ້ອງ ຢູ່ໝູ່ບ້ານ ຟູ່ດົງ ແມ່ນໜຶ່ງໃນບັນດາງານບຸນປະເພນີທີ່ມີຂອບຂະໜາດໃຫຍ່ກ່ວາໝູ່ຢູ່ເຂດທົ່ງພຽງພາກເໜືອຫວຽດນາມ. ງານບຸນເລີ່ມແຕ່ວັນທີ 6 ຫາວັນທີ 14 ເດືອນ 4 ໄລ່ຕາມຈັນທະປະຕິທິນຫວຽດນາມ. ໃນລະຫວ່າງວັນທີ 6 ຫາວັນທີ 8 ເດືອນ 4, ຊາວບ້ານຈັດຕັ້ງພິທີແຫ່ທຸງໄປຍັງວິຫານພະແມ່ ເມົ້າ, ແຫ່ເຂົ້າໄປຍັງວິຫານເຖື້ອງ. ຕາມການເລົ່າຂານສືບທອດກັນມາວ່າ ວັນທີ 9 ເດືອນ 4 ໂດຍໄລ່ຕາມຈັນທະປະຕິທິນ ແມ່ນວັນ ແທ້ງຢ້ອງ ຕີເອົາຊະນະຕໍ່ສັດຕູ, ດັ່ງນັ້ນ ນີ້ແມ່ນວັນຈັດການເຄື່ອນໄຫວຕົ້ນຕໍ່ໃນງານບຸນ. ເພື່ອອາໄລຫາຄຸນງາມຄວາມດີຂອງນັກວິລະຊົນ, ຊາວບ້ານ ຟູ່ດົງ ຈັດຕັ້ງພິທີແຫ່ວໍຈາກວິຫານ ພະແມ່ເມົ້າ ຫາວິຫານເຖື້ອງ ແລະ ຈັດງານບຸນທີ່ວາດພາບເຖິງການສູ້ຮົບຕີເອົາຊະນະຕໍ່ສັດຕູ.
ງານບຸນ ແທ້ງຢ້ອງ ຢູ່ໝູ່ບ້ານ ຟູ່ດົງ ມີການເຂົ້າຮ່ວມຂອງ 5 ໝູ່ບ້ານ ຍ້ອນວ່າລ້ວນແຕ່ຕິດພັນກັບເລື່ອງເທບນິຍາຍ ແທ້ງຢ້ອງ. ໝູ່ບ້ານ ຟູ່ຢຶກແມ່ນແຫ່ງກຳເນີດ ແທ້ງຢ້ອງ, ໝູ່ບ້ານ ຟູ່ດົງ ແມ່ນແຫ່ງ ແທ້ງຢ້ອງຈັດຕັ້ງກຳລັງສູ້ຮົບ, ໝູ່ບ້ານດົງວຽນ ແມ່ນບ້ານເກີດຂອງພະມານດາ ແທ້ງຢ້ອງ, ສ່ວນ 2 ໝູ່ບ້ານຕັ້ງຢູ່ເຂດຝັ່ງທາງທິດໃຕ້ແມ່ນຳ້ ດ້ວງ ແມ່ນໝູ່ບ້ານ ດົງຊວຽນ ທີ່ຂຶ້ນກັບຕາແສງ ດັ້ງຊ້າ ເມືອງ ຢາເລີມ ຊຶ່ງແມ່ນແຫ່ງທີ່ມີໄລຍະໜຶ່ງ ພະມານດາ ແທ້ງຢ້ອງ ໄດ້ມາຕັ້ງຖິ່ນຖານ ແລະ ໝູ່ບ້ານ ໂຫ້ຍຊ້າ ທີ່ຂຶ້ນກັບຕາແສງ ຟຸກເຫຼື້ຍ ເມືອງ ລອງບຽນ ແມ່ນແຫ່ງທີ່ມີພວກເດັກລ້ຽງຄວາຍເດີນຕາມ ແທ້ງຢ້ອງ ໄປຕີສັດຕູ
ງານບຸນ ແທ້ງຢ້ອງ ຢູ່ໝູ່ບ້ານ ຟູ່ດົງ ແມ່ນ ງານບຸນທີ່ວາດພາບເຖິງການສູ້ຮົບດ້ວຍບົດລະຄອນທີ່ຖືກແຕ່ງຂຶ້ນມາແຕ່ດຶກດຳບັນ ຊຶ່ງລວມມີການເຂົ້າຮ່ວມຂອງນັບຮ້ອຍຕົວລະຄອນ. ນອກຈາກນັ້ນ, ວັດຖຸເຄື່ອງປະກອບ, ຊຸດເຄື່ອງແບບ, ການສະແດງແຕ່ລະພາກ, ແຕ່ລະຕົວລະຄອນລ້ວນແຕ່ຊ້ອນແຝງຄວາມໝາຍອັນເລິກເຊິ່ງ. ຄວາມດູດດື່ມຂອງ ງານບຸນ ແທ້ງຢ້ອງ ກ່ອນອື່ນໝົດຕ້ອງເວົ້າເຖິງຄວາມໝາຍສຶກສາອົບຮົມນ້ຳໃຈຮັກຊາດ, ເຈດຈຳນົງທີ່ອົງອາດກ້າແກ່ນ ແລະ ຄວາມມຸ່ງຫວັງຢາກມີເອກະລາດ, ອິດສະຫຼະພາບແຫ່ງຊາດ. ທ່ານ ຟານຊວນຈິ້ງ ຜູ້ອາຍຸສູງໃນໝູ່ບ້ານໃຫ້ຮູ້ວ່າ :
“ ປະຊາຊົນມີຄວາມປິຕິຊົມຊື່ນຍ້ອນມີມໍລະດົກຂອງປູຍ່າຕ່າຍາຍປະໄວ້ໃຫ້. ຜູ້ຄົນທັງຫຼາຍຮູ້ວ່າ ແທ້ງຢ້ອງ ແມ່ນຜູ້ຕີຂັບໄລ່ພວກສັດຕູຕ່າງດ້າວ. ໂດຍມີຄວາມຮູ້ບຸນຄຸນຕໍ່ຄຸນງາມຄວາມດີຂອງ ແທ້ງຢ້ອງ, ປະຈຸບັນປະຊາຊົນໄດ້ປະກອບສ່ວນຢ່າງຫຼວງຫຼາຍ ”
ງານບຸນ ແທ້ງຢ້ອງ ຢູ່ໝູ່ບ້ານ ຟູ່ດົງ ໃນທຸກໆປີລ້ວນແຕ່ດຶງດູດປະຊາຊົນນັບພັນຄົນເຂົ້າຮ່ວມການເຄື່ອນໄຫວງານບຸນ ແລະ ມີນັບແສນຄົນມາຊົມເບິ່ງ. ໂດຍສະເພາະໃນເມື່ອງານບຸນ ແທ້ງຢ້ອງ ໄດ້ຮັບການຮັບຮູ້ຈາກອົງການ UNESCO ແມ່ນ ມໍລະດົກວັດທະນະທຳບໍ່ມີຮູບຮ່າງ ເປັນຕົວແທນຂອງມວນມະນຸດໃນປີ 2010 ນັ້ນ, ຈຳນວນຜູ້ມາຮ່ວມງານບຸນນັບມື້ນັບຫຼາຍຂຶ້ນ. ເພາະສະນັ້ນວຽກງານກະກຽມ ແລະ ການເລືອກເຟັ້ນຜູ້ສວມບົດບັນດາຕົວລະຄອນ ແມ່ນໄດ້ຮັບການປະຕິບັດຢ່າງລະອຽດ. ທ່ານ ຟານຊວນຈິ້ງ ໃຫ້ຮູ້ວ່າ :
“ ຕ້ອງເລືອກເອົາຜູ້ສວມບົດຕົວລະຄອນ ເສນາທິການໃຫຍ່ກຳລັງທະຫານ, ເມື່ອໄດ້ຍິນສຽງກອງ 3 ບາດ ຈຶ່ງສາມາດຈູງມ້າໄປ ເພື່ອແຫ່ທຸງ. ນອກຈາກນັ້ນກໍຍັງເລືອກເອົາຜູ້ສວມບົດຕົວລະຄອນຕີກອງ, ຕົວລະຄອນລັ່ນຄ້ອງ, ຕົວລະຄອນເສືອນ້ອຍ.... ໃນເກັນອາຍຸແຕ່ 18 ຫາ ຕ່ຳກ່ວາ50 ປີ ຊຶ່ງມີສຸຂະພາບແຂງແຮງ, ເປັນຄົນເຈົ້າຊູ້ແມ່ນສາມາດຮັບໃຊ້ໄດ້. ແຕ່ມີພຽງຕົວລະຄອນວິລະສັດຕີແມ່ນຕ້ອງເລືອກເອົາຜູ້ບັນລຸມາດຖານທີ່ວ່າ ມີອາຍຸແຕ່ 10 ຫາ 13 ປີ. ”
ທ່ານ ຫງວຽນແມ້ງເຕືອງ ຜູ້ສວມບົດຕົວລະຄອນຈັບທຸງໃຫ້ຮູ້ວ່າ ເພື່ອກະກຽມໃຫ້ແກ່ງານບຸນປີນີ້, ພວກຂ້າພະເຈົ້າຝຶກແອບຕະຫຼອດເຄິ່ງເດືອນ. ເງິນໃຊ້ຈາຍທີ່ຄອບຄົວຂ້າພະເຈົ້າລົງທຶນຊື້ຊຸດເຄື່ອງແບບ, ທຳພິທີແຫ່ ແລະ ອື່ນໆ ແມ່ນຂຶ້ນເຖິງນັບສິບລ້ານດົງ, ແຕ່ດ້ວຍຄວາມຫວັງຢາກຮັກສາຈຸດຄວາມງາມດ້ານວັດທະນະທຳທີ່ເປັນມູນເຊື້ອຂອງບ້ານເກີດເມືອງນອນ, ພວກຂ້າພະເຈົ້າຖືວ່າ ນີ້ແມ່ນຄວາມເປັນກຽດ. ສ່ວນອ້າຍ ໂງວັນຫຍີບ ເຂົ້າຮ່ວມກອງ ອາຍລາວ ຊຶ່ງແມ່ນກອງກຳລັງຕີສັດຕູຂອງ ແທ້ງຢ້ອງ ໃຫ້ຮູ້ວ່າ
“ປີໃດກໍເຊັ່ນດຽວກັນ, ຂ້າພະເຈົ້າລ້ວນແຕ່ເຂົ້າຮ່ວມງານບຸນ. ຂ້າພະເຈົ້າຮູ້ສຶກພາກພູມໃຈ ແລະ ມີຄວາມເອກອ້າງທະນົງໃຈຕໍ່ເລື່ອງລາວເລົ່າຂານສືບທອດກັນແຕ່ໃດໆມາ. ກ່ອນນີ້ພໍ່ຂ້າພະເຈົ້າກໍສວມບົດຕົວລະຄອນຜູ້ນຳກອງກຳລັງ, ປະຈຸບັນຂ້າພະເຈົ້າກໍສືບທອດອາຊີບຈາກພໍ່. ເຮົາເຂົ້າຮ່ວມງານບຸນແມ່ນເພື່ອພາວະ ນາໃຫ້ຄອບຄົວຈົ່ງມີແຕ່ຄວາມດີ, ປະເທດຊາດມີສັນຕິພາບ, ປະຊາຊົນມີຄວາມອີ່ມໜຳສຳລານ ແລະ ສົມບູນພຸນສຸກ. ”
ສິ່ງທີ່ເປັນເອກະລັກຂອງງານບຸນ ແທ້ງຢ້ອງ ແມ່ນຊາວທ້ອງຖິ່ນຕັດສິນຮູບແບບຈັດງານບຸນ. ເຂົ້າເຈົ້າຈັດຕັ້ງງານບຸນເອງດ້ວຍບົດບາດເປັນເຈົ້າພາບ, ມີຄວາມເປັນເຈົ້າການ, ມີຫົວຄິດປະດິດສ້າງ. ຍ້ອນເຫດນີ້ເອງ, ງານບຸນ ແທ້ງຢ້ອງ ຢູ່ຕາແສງ ຟູ່ດົງ ມີຄວາມດູດດື່ມໃນການສ້າງບຸກຄະລິກກະພາບມະນຸດໃຫ້ສົມບູນແບບ. ໂດຍຜ່ານການວາດພາບຢ່າງມີຊີວິດຊີວາກ່ຽວກັບການຜັນແປໃນບັນດາການສູ້ຮົບຂອງ ແທ້ງຢ້ອງ ພ້ອມກັບປະຊາຊົນເພື່ອເຊີດຊູຄວາມຮັບຮູ້ ກ່ຽວກັບນ້ຳໃຈສາມັກຄີທົ່ວປວງຊົນໃນພາລະກິດປົດປ່ອຍຊາດ ແລະ ປົກປັກຮັກສາປະເທດຊາດ.