ໝູ່ບ້ານ ຟູ່ລິວໃນແຂວງບັກນິງ
(ພາບ:vanhoadoisong.com)
|
ຟູ່ລິວແມ່ນໝູ່ບ້ານຕະຫຼາດທີ່ມີຊື່ສຽງໃນແຂວງບັກນິງ ຊຶ່ງມີປູຊະນີຍະສະຖານ ປະຫວັດສາດຫຼາຍແຫ່ງ ແລະ ກໍແມ່ນແຫ່ງທີ່ບັນດາຮີດຄອງປະເພນີ ວັດທະ ນະທຳພື້ນເມືອງທີ່ມີຊື່ສຽງໃນທົ່ວປະເທດ. ຜ່ານການເວລາ, ໝູ່ບ້ານເກົ່າໄດ້ກາຍເປັນຄຸ້ມຖະໜົນ, ແຕ່ບັນດາສິ່ງຍອດຍິ່ງວັດທະນະທຳທີ່ເປັນມູນເຊື້ອ ຍັງຄົງໄດ້ຮັບການຮັກສາ ແລະ ເສີມຂະຫຍາຍໃນການດຳລົງຊີວິດຍຸກທັນສະໄໝ.
ໝູ່ບ້ານ ຟູ່ລິວຕັ້ງຢູ່ຫ່າງຈາກນະຄອນຫຼວງຮ່າໂນ້ຍໄປທາງທິດເໜືອປະມານ 16 ກິໂລແມດ. ແຕ່ປາງກ່ອນ, ຢູ່ແຫ່ງນີ້ມີເຂດຕະຫຼາດຂາຍໝາກ, ໃບພູ ຊຶ່ງແມ່ນສິນພິເສດຂອງຊາວຫວຽດເດີມ. ແຕ່ພາຍຫຼັງໄລຍະເວລາເປັນຫຼາຍສະຕະວັດ, ໝູ່ບ້ານ ຟູ່ລິວ ໄດ້ກາຍເປັນຄຸ້ມຕະຫຼາດທີ່ມີຊື່ສຽງໃນທົ່ວປະເທດ, ຊຶ່ງຄ້າຂາຍສິນຄ້າທຸກໆປະເພດ. ຊາວບ້ານ ຟູ່ລິວ, ເປັນຕົ້ນແມ່ນແມ່ຍິ່ງ ແມ່ນບັນດາຜູ້ທີ່ມີຄວາມສາມາດດຳເນີນທຸລະກິດເກັ່ງ, ມີຄວາມລຶ້ງເຄີຍກັບການຄ້າຂາຍໃນທ້ອງຕະຫຼາດ. ບໍ່ພຽງແຕ່ສາມາດສ້າງຄວາມຮັ່ງມີໃຫ້ແກ່ບັນດາຄອບຄົວໃນໝູ່ບ້ານເທົ່ານັ້ນ, ການຄ້າຂາຍຂອງເຂົາເຈົ້າຍັງສາມາດນຳຄວາມອຸດົມຮັ່ງມີມາສູ່ບ້ານເກີດເມືອງນອນອີກດ້ວຍ. ມາຢ້ຽມຢາມ ໝູ່ບ້ານ ຟູ່ລິວໃນທຸກວັນນີ້, ສິ່ງທີ່ເຫັນໄດ້ງ່າຍ ແມ່ນຄວາມເກົ່າແກ່ຂອງ ໝູ່ບ້ານເກົ່າກໍຍັງຄົງຕົວດ້ວຍບັນດາຜູ້ຄົນມາຊື້ຂາຍຢ່າງຄັບຄາໜາແໜ້ນ, ອັນໄດ້ພາໃຫ້ແຂກຄົນທັງຫຼາຍຮູ້ສຶກຄືພວມກັບຄືນສູ່ໄລຍະສະຕະວັດທີ 18, ແຕ່ແລ້ວ ກໍເຫັນໄດ້ວ່າ ແຫ່ງນີ້ກໍບໍ່ແຕກຕ່າງຫຍັງກັບເຂດ ຕົວເມືອງ. ປະຕູໂຂງຂອງ ໝູ່ບ້ານຍັງຄົງຕົວຢູ່ ແລະ ເສັ້ນທາງພາໄປຮອດບັນດາປູຊະນີຍະສະຖານປະຫວັດສາດໄດ້ຖືກປູດ້ວຍກະເບື້ອງຫີນ. ລຽບຕາມເສັ້ນທາງ ແມ່ນເຕັມໄປດ້ວຍຮ້ານຂາຍເຄື່ອງຂອງຕາ່ງໆຢ່າງໜາແໜ້ນ, ເຮືອນຫຼາຍຊັ້ນ ຕິດປ້າຍໂຄສະນາຖືກປຸກສ້າງຢ່າງຫຼວງຫຼາຍ, ລົດໂອໂຕບັນທຸກສິນຄ້າ ພ້ອມດ້ວຍລົດຈັກແລ່ນໄປມາຢ່າງຟົດຟື້ນເນືອງນັນ. ພໍ່ຕູ້ ເລເຈິນຖີ້ ຜູ້ມີອາຍຸສູງໃນໝູ່ບ້ານໃຫ້ຮູ້ວ່າ :
“ຟູ່ລິວ ແມ່ນໝູ່ບ້ານຕະຫຼາດ, ດັ່ງນັ້ນໃນໝູ່ບ້ານຍາມໃດກໍຟົດຟື້ນເນື່ອງນັນ, ຊາວບ້ານຜູ້ໃດກໍເປີດອົກເປີດໃຈ, ບໍ່ມິດງຽບຄືໝູ່ບ້ານອື່ນໆ. ດັ່ງນັ້ນການດຳເນີນຊີວິດໃນໝູ່ບ້ານ ທັງແມ່ນການຮັບເອົາສິ່ງທີ່ໃໝ່ອຽມຂອງຄວາມອະລີຍະທຳເຂດຕົວເມືອງ, ແຕ່ຊາວບ້ານກໍຍັງຄົງຕັກເຕືອນກັນ ເພື່ອຮັກສາສີສັນຂອງໝູ່ບ້ານເຂດບ້ານນາ”
ເລາະໄປຕາມຕະຫຼາດທາງຮ່ອມ, ຢູ່ໃສກໍເຫັນປະຈັກຕາຄວາມງາມຂອງໝູ່ບ້ານເຂດບ້ານນາທີ່ສະຫງົບງຽບສາລາຂອງໝູ່ບ້ານ ຟູ່ລິວ ຍັງຄົງຕົວດ້ວຍຫຼັງຄາມີຮູບໂຄ້ງ ຖືກປົກຄຸມໄປດ້ວຍຮົ່ມເຢັນຂອງຕົ້ນໂພໃຫຍ່. ສາລາຂອງໝູ່ບ້ານຟູ່ລິວ ໄດ້ຮັບຖືວ່າແມ່ນໜຶ່ງໃນຈຳນວນສາລາຂອງ 3 ໝູ່ບ້ານທີ່ງາມກ່ວາໝູ່ຢູ່ພາກເໜືອຫວຽດນາມ. ຕິດກັບສາລາ ແມ່ນວັດ ຟາບກວາງ ຊຶ່ງວັດເກົ່າແກ່ດ້ວຍທາດລະຄັງທີ່ເປັນເອກະລັກສະເພາະ. ໃນໝູ່ບ້ານກໍຍັງມີປູຊະນີຍະສະຖານ ວັດເຮືອງຮ່ຽນ ແຫ່ງທີ່ຍັງເກັບຮັກສາບັນດາແຜ່ນສີລາ ເພື່ອເຊີດຊູບັນດາບຸລຸດຜູ້ມີຊື່ສຽງ, ຜູ້ທີ່ມີຄຸນງາມຄວາມດີໃນການສ້າງບ້ານແປງເມືອງ, ຕັ້ງຕະຫຼາດ. ພໍ່ຕູ້ ເລແທງບິງ ຜູ້ຮັບຜິດຊອບວຽກງານໃນສາລາໝູ່ບ້ານ ຟູ່ລິວ ໃຫ້ຮູ້ວ່າ :
“ ນັບແຕ່ກ່ອນເປັນຕົ້ນມາ, ຊາວບ້ານຟູ່ລິວ ສ່ວນຫຼາຍແມ່ນປະກອບອາຊີບຄ້າຂາຍ, ແລະ ເປັນຜູ້ເຮັດວຽກງານຄຸ້ມຄອງບ້ານເມືອງ. ແຕ່ປາງກ່ອນ, ເພດຊາຍສ່ວນຫຼາຍໃນໝູ່ບ້ານແມ່ນຮຽນເກັ່ງ, ເສັງໄດ້ຄະແນນ, ແລ້ວກໍກາຍເປັນເຈົ້າເສນາ. ຢູ່ໝູ່ບ້ານ ຟູ່ລິວ ກໍຍັງປະກອບອາຊີບເຮັດນາຢູ່, ແຕ່ການເຮັດນາບໍ່ແມ່ນອາຊີບຕົ້ນຕໍ່, ສ່ວນຫຼາຍແມ່ນຈ້າງຄົນມາເຮັດ.”
ໝູ່ບ້ານ ຟູ່ລິວເກົ່າ ໄດ້ກາຍເປັນຄຸ້ມຖະໜົນແລ້ວ, ແຕ່ໃນເຂດຊຸມຊົນແຫ່ງນີ້ ຍັງຄົງສາມາດຮັກສາບັນດາຮີດຄອງປະເພນີທີ່ມີມາແຕ່ດົນນານຄື ປະເພນີຮັບເປັນລູກມາລ້ຽງ,ຝາກລູກໃຫ້ຄອບຄົວອື່ນລ້ຽງ . ພໍ່ຕູ້ ເລແທງບິງ ຜູ້ຮັບຜິດຊອບວຽກງານໃນສາລາໝູ່ບ້ານ ຟູ່ລິວ ໃຫ້ຮູ້ວ່າ :
“ ຢູ່ໝູ່ບ້ານ ຟູ່ລິວ, ມີ ປະເພນີຮັບເປັນລູກມາລ້ຽງແຕ່ດົນນານແລ້ວ, ຊຶ່ງບໍ່ສາມາດຫາໄດ້ຢູ່ແຫ່ງໃດໃນໂລກນີ້. ຕາມປະເພນີແລ້ວ, ແມ່ຍິງຫຼາຍຄົນມັກໄປຂ້າຂາຍຢູ່ແດນໄກ, ດັ່ງນັ້ນຢູ່ຄອບຄົວໃດ ຕ່າງກໍມີລູກລ້ຽງ. ມີຄອບຄົວມີລູກເຖິງ 5-6 ຄົນ ລ້ວນແຕ່ ຝາກໃຫ້ຄອບຄົວອື່ນລ້ຽງ. ເພາະສະນັ້ນ, ໃນຫຼາຍຄອບຄົວ, ລູກເຕົ້າຂອງເຂົາເຈົ້າຖືຮອດ 2 ນາມສະກຸນ, ຍອ້ນຖືທັງນາມສະກຸນຂອງພໍ່ແມ່ລ້ຽງອີກນຳ ”
ໃນຈາກການຄ້າຂາຍ ເພື່ອສ້າງຄວາມຮັ່ງມີ, ໃນໝູ່ບ້ານ ຟູ່ລິວ ກໍຍັງມີຫຼາຍວົງຕະກຸນມີມູນເຊື້ອມັກຮຽນ, ມີຫຼາຍຄົນຮຽນເກັ່ງ, ເສັງໄດ້ຄະແນນດີ ແລະ ໄດ້ກາຍເປັນຜູ້ດຳລົງຕຳແໜ່ງສຳຄັນຂອງປະເທດຊາດ. ນັກປະພັນວັນນະຄະດີ ຮ່ວາງຖີ້ຕວານ, ບ້ານເກີດຢູ່ຟູ່ລິວ ໃຫ້ຮູ້ວ່າ :
“ ຊາວບ້ານ ຟູ່ລິວ ຕ່າງກໍມີຄວາມເອກອ້າງທະນົງໃຈກ່ຽວກັບ ໝູ່ບ້ານທີ່ມີມູນເຊື້ອວັດທະນະທຳທີ່ມີມາແຕ່ດົນນານ. ໝູ່ບ້ານພວກຂ້າພະເຈົ້າແມ່ນໜຶ່ງໃນບັນດາ ໝູ່ບ້ານຢູ່ເຂດພາກເໜືອ ໄດ້ມີຜູ້ເສັງໄດ້ລະດັບປະລິນຍາເອກແຕ່ສະຕະວັດທີ 16 ຄື ພໍ່ຕູ້ ຈູຕາມຢີ. ແລ້ວກໍມາຮອດສະຕະວັດທີ 19 ກໍມີພໍ່ຕູ້ ຫງວຽນດຶກເລິນ, ພໍ່ຕູ້ ຮ່ວາງວັນແຮ່ ”
ຫຼາຍສະຕະວັດໄດ້ຜ່ານພົ້ນໄປ, ຟູ່ລິວ ກໍແມ່ນບ້ານເກີດຂອງນັກປັນຍາຊົນ, ນັກສິລະປິນທີ່ມີຊື່ສຽງໃນທົ່ວປະເທດ. ໃນຖັນແຖງກອງທັບ, ມີຫຼາຍຄົນເປັນນາຍພົນ, ມີຄົນດຳລົງຕຳແໜ່ງລັດຖະມົນຕີ ແລະ ບັນດາຕຳແໜ່ງທີ່ສຳຄັນຂອງພັກ ແລະ ລັດ. ແຕ່ພ້ອມກັນນັ້ນ, ອາຊີບຄ້າຂາຍໄດ້ນຳມາເຊິ່ງຄວາມອຸດົມຮັ່ງມີໃຫ້ແກ່ ໝູ່ບ້ານ ຟູ່ລິວ ແລະ ນີ້ກໍແມ່ນສິ່ງເພື່ອເພິ່ງພາອາໄສ ແລະ ລ້ຽງດູດ້ານຈິດໃຈ, ເຈດຈຳນົງສູ້ຊົນບືນຕົວຂຶ້ນຂອງຊາວບ້ານລຸ່ນຕ່າງໆ. ທັງນີ້ກໍໄດ້ສ້າງຄວາມງາມດ້ານວັດທະນະທຳທີ່ເປັນເອກະລັກສະເພາະໃຫ້ແກ່ ໝູ່ບ້ານ ຟູ່ລິວ.