(vovworld)- ກອງປະຊຸມໃຫຍ່ຜູ້ແທນທົ່ວປະເທດສະຫະພັນບັນດາສະມາຄົມວັນນະຄະດີສິລະປະຫວຽດນາມ ຄັ້ງທີ 9 ອາຍຸການ 2016- 2021 ດຳເນີນໄປໃນວັນທີ 9/1 ຢູ່ຮ່າໂນ້ຍ ແມ່ນເຫດການເພື່ອທົບທວນຄືນບັນດາການປະກອບສ່ວນອັນໃຫຍ່ຫລວງຂອງນັກປະພັນ, ນັກສິລະປິນ ກວ່າ 40.000 ຄົນທີ່ຂຶ້ນກັບບັນດາຂະແຫນງການ ທີ່ມີຕໍ່ການພັດທະນາຂອງພື້ນຖານວັດທະນະທຳຫວຽດນາມ. ກອງປະຊຸມໃຫຍ່ ກໍແມ່ນໂອກາດເພືື່ອໃຫ້ບັນດານັກປະພັນນັກສິລະປິນສັງເກດຕີລາຄືນບັນດາຫນ້າທີ່ໃຫມ່ຂອງຕົນໃນໄລຍະພັດທະນາໃຫມ່ຂອງປະເທດຊາດ.
ໃນປະຫວັດສາດແຫ່ງການຕໍ່ສູ້ປົກປັກຮັກສາປະເທດຊາດລ້ວນແຕ່ມີການປະກອບສ່ວນຂອງນັກປະພັນວັນນະຄະດີ, ນັກສິລະປິນໃນທົ່ວປະເທດ. ເພື່ອເສີມຂະຫຍາຍຈິດໃຈອຸທິດສ່ວນໃຫ້ແກ່ພາລະກິດຕໍ່ສູ້ປົກປັກຮັກສາປະເທດຊາດນັ້ນ, ຖັນແຖວ ນັກປະພັນ, ນັກສິລະປິນໃນທົ່ວປະເທດ ໃນ 5 ປີຜ່ານມາ ໄດ້ຮ່ວມ ກັບປະເທດຊາດ, ສູ້ຊົນເພື່ອຜົນປະໂຫຍດຂອງຊາດ, ບັນລຸໄດ້ບັນດາຜົນງານອັນໃຫຍ່ຫລວງ, ຮອບດ້ານ ຢ່າງແຮງ ກ່ຽວກັບການປະດິດແຕ່ງ, ການຮຽບຮຽງ, ຄົ້ນຄ້ວາທິດສະດີ, ວິຈານ, ໂຄສະນາບັນດາບົດປະພັນ, ບຳລຸງສ້າງຜູ້ມີຄວາມເກັ່ງກ້າສາມາດ ແລະ ເຊື່ອມໂຍງຢ່າງເລິກເຊິ່ງກວ້າງຂວາງເຂົ້າກັບໂລກ. ບັນດາ ນັກປະພັນ, ນັກສິລະປິນ ມີບົດປະພັນຫລາຍບົດທີ່ສ່ອງແສງເຖິງຄວາມມຸ່ງຫວັງອັນໃຫຍ່ຫລວງ ແລະ ເລິກເຊິ່ງ ຂອງປະຊາຊົນຫວຽດນາມກ່ຽວກັບຊີວິດທີ່ອີ່ມຫນຳສຳລານສົມບູນພູນສຸກ. ວັນນະຄະດີ ໄດ້ກັບຄືນສູ່ສ່ອງແສງເຖິງບັນດາຫົວເລື່ອງກ່ຽວກັບປະຫວັດສາດ, ກ່າວປະນາມຢ່າງແຮງເຖິງບັນຫາທີ່ຂຶ້ນກັບຄຸນສົມບັດສັງຄົມ, ກ່າວປະນາມ, ຕຳຫນິຕິຕຽນ, ກ່າວເຕືອນທຸກຄົນກ່ຽວກັບປະກົດການເສຍທາດຂາດຄຸນ, ແບບແຜນການດຳລົງຊີວິດ, ປົກປ້ອງສິ່ງທີ່ຖືກຕ້ອງ, ປົກປ້ອງກຽດຕິຄຸນຂອງມະນຸດ. ນັກປະພັນ, ນັກສິລະປິນ ໄດ້ສ້າງຂະບວນການປະດິດແຕ່ງ ປະກອບສ່ວນພ້ອມກັບທົ່ວປະເທດ ເດັດດ່ຽວປົກປັກຮັກສາອະທິປະໄຕເຂດທະເລໝູ່ເກາະ, ຜືນແຜ່ນດິນອັນຄົບຖ້ວນຂອງປະເທດຊາດ. ຕີລາຄາສູງການປະກອບສ່ວນຂອງວົງການ ນັກປະພັນ, ນັກສິລະປິນ, ໃນບົດກ່າວປາໄສທີ່ກອງປະຊຸມໃຫຍ່ຜູ້ແທນທົ່ວປະເທດ ສະຫະພັນບັນດາສະມາຄົມວັນນະຄະດີສິລະປະ ຫວຽດນາມ ຄັ້ງທີ 9, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ຢືນຢັນວ່າ:
ກອງປະຊຸມໃຫຍ່ຜູ້ແທນທົ່ວປະເທດສະຫະພັນບັນດາ
ສະມາຄົມວັນນະຄະດີສິລະປະຫວຽດນາມ
ພາບ:internet |
“ບັນດາບົດປະພັນ, ສິ່ງພິມວັດທະນະທຳ, ວັນນະຄະດີ, ສິລະປະ ນັບມື້ນັບອຸດົມສົມບູນ, ຫລາຍຮູບຫລາຍແບບ ແລະ ເພີ່ມປະລິມານ ແລະ ຄຸນນະພາບຫລາຍສົມຄວນ. ສິດເສລີໃນການປະດິດຄິດແຕ່ງຂອງ ນັກປະພັນ, ນັກສິລະປິນ ໄດ້ຮັບການເຄົາລົບ, ບັນຍາກາດປະຊາທິປະໄຕໄດ້ຮັບການເປີດກວ້າງ. ບັນດາສະມາຄົມວັນນະຄະດີ, ສິລະປະ ໄດ້ເຕົ້າໂຮມ, ມີຄວາມສາມັກຄີ, ສ້າງເງື່ອນໄຂ, ລະດົມກຳລັງໃຈ ນັກປະພັນ, ນັກສິລະປິນ ປະດິດຄິດແຕ່ງຢ່າງບໍ່ຢຸດຢັ້ງ, ມີຄວາມຜູກພັນກັບຊີວິດການເປັນຢູ່ຂອງປະຊາຊົນ, ປະກອບສ່ວນເໝາະສົມເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ. ການເຄື່ອນໄຫວປະດິດຄິດແຕ່ງ, ຄົ້ນຄ້ວາທິດສະດີ, ວິຈານວັນນະຄະດີ, ສິລະປະ ມີການຫັນປ່ຽນຢ່າງຕັ້ງຫນ້າ.”
ພາບປະກອບ:tuyengiao.vn
|
ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ: ຍິ່ງກວ່າເວລາໃດໝົດ, ວັນນະຄະດີ, ສິລະປະ ຕ້ອງປະກອບສ່ວນຫລາຍກວ່າອີກໃຫ້ແກ່ວຽກງານແນວຄິດ, ວັດທະນະທຳຂອງພັກ. ມະຫາຊົນ, ຜູ້ອ່ານ ປາດຖະຫນາຢາກມີບົດປະພັນວັນນະຄະດີ, ສິລະປະທີ່ສ່ອງແສງຊີວິດການເປັນຢູ່, ປະເທດຊາດ ແລະ ຊາວຫວຽດນາມ ຖືກກັບ ຄວາມຈິງ, ເລິກເຊິ່ງກວ່າ ຢັ້ງຢືນບັນດາຄຸນຄ່າອັນໃຫຍ່ຫລວງ, ສິ່ງທີ່ດີງາມ, ວັດທະນະທຳມະນຸດ, ຕໍ່ສູ້ບໍ່ຜ່ອນສັ້ນຜ່ອນຍາວຕໍ່ສິ່ງທີ່ບໍ່ດີ ແລະ ຊົ່ວຮ້າຍໃນສັງຄົມ, ສູ້ຊົນເຮັດໃຫ້ບົດປະພັນວັນນະຄະດີ, ສິລະປະ ມີຄຸນຄ່າກ່ຽວກັບເນື້ອໃນ ແລະ ສິລະປະ, ຮັບໃຊ້ປະເທດຊາດ ແລະ ປະຊາຊົນ. ບັນດາຄວາມມຸ້ງມາດປາດຖະຫນາຂອງມະຫາຊົນນັ້ນແມ່ນຫນ້າທີ່ຂອງວົງການ ນັກປະພັນ, ນັກສິລະປິນ.
“ນັກປະພັນ, ນັກສິລະປິນ ແຕ່ລະຄົນ ຕ້ອງໃກ້ຊິດຕິດແທດກັບຊີວິດຕົວຈິງເພື່ອປະດິດແຕ່ງຢ່າງມີຫົວຄິດປະດິດສ້າງ, ເຮັດແນວໃດເຮັດໃຫ້ບົດປະພັນແຕ່ລະບົດຂອງຕົນ ສ່ອງແສງເຖິງຊີວິດຕົວຈິງ. ໃນໄລຍະພັດທະນາໃຫມ່ຂອງປະເທດຊາດ, ບັນດາບົດປະພັນວັນນະຄະດີ, ສິລະປະຄວນປະກອບສ່ວນເພີ່ມພູນຄູນສ້າງ, ຍົກສູງແນວຄິດ, ຈິດໃຈ, ບຸກຄະລິກກະພາບ, ຄຸນສົມບັດ, ແບບແຜນການດຳລົງຊີວິດຂອງຊາວຫວຽດນາມ, ປຸກລຸກຄວາມເອກອ້າງທະນົງໃຈ, ນ້ຳໃຈຮັກຊາດ, ຮັກສັງຄົມນິຍົມ, ມີຄວາມເຊື່ອໝັ້ນຕໍ່ ອຸດົມຄະຕິແລະ ແນວທາງຂອງພັກ.”
ນັກປະພັນ, ນັກສິລະປິນ ພ້ອມກັບກຳລັງຄວາມສາມາດປະດິດຄິດສ້າງສິລະປະຂອງເຂົາເຈົ້າໄດ້ປະກອບສ່ວນສ້າງພື້ນຖານວັດທະນະທຳຫວຽດນາມ ເຂັ້ມຂົ້ນໄປດ້ວຍສີສັນຊາດ. ໃນໄລຍະປະຈຸບັນ, ຖັນແຖວ ນັກປະພັນ, ນັກສິລະປິນ ສືບຕໍ່ລະດົມກຳລັງໃຈປະຊາຊົນ ຫວຽດນາມ ມີຄວາມເອກອ້າງທະນົງໃຈ ແລະ ເສີມຂະຫຍາຍມູນເຊື້ອ, ມຸ່ງໄປເຖິງຈຸດໝາຍນຳປະເທດຊາດພັດທະນາຢ່າງແຂງແຮງ ແລະ ເຊື່ອມໂຍງເຂົ້າກັບທົ່ວໂລກ.