(vovworld)- ສາທາລະນະຊົນນິຍົມຂັບກ໋າຍເລືອງ ແລະ ເດີນກາຕາຍຕື໋(ເພງພື້ນເມືອງຂອງພາກໃຕ້ຫວຽດນາມ) ຢູ່ ພາກໃຕ້ຫວຽດນາມ ສ່ວນຫລາຍແມ່ນຮູ້ຈັກເຖິງນັກສິລະປິນດີເດັ່ນ ຈຸກລີງ, ພິເສດ ແມ່ນບັນດານັກສິລະປິນ, ນັກສິລະປະການຫນຸ່ມຢູ່ນະຄອນເກີນເທີ ທີ່ໄດ້ຮັບການເບິ່ງແຍງ, ແນະນຳວິທີຂັບລຳຈາກທ່ານນາງ. ໂດຍ ເຕີບໃຫຍ່ຈາກການເຄື່ອນໄຫວສິລະປະອາຊີບໃນການຕໍ່ຕ້ານຕ້ານຈັກກະພັດອາເມລິກາ ແລະ ໃນ 50 ກວ່າປີທີ່ເຮັດອາຊີບເປັນນັກສິລະປິນຂັບກ໋າຍເລືອງ ແລະ ເດີນກາຕາຍຕື, ນັກສິລະປິນ ຈຸກລີງ ຍັງຄົງມີຄວາມມຸ້ງມາດປາດຖະຫນາຢາກອຸທິດສ່ວນໃຫ້ສິລະປະເດີນກາຕາຍຕື ແລະ ຂັບກ໋າຍເລືອງບົນເວທີ ຊື່ງສະຫນິດຕິດພັນກັບທ່ານນາງຕະຫລອດຊີວິດ. ບົດຂຽນຂອງນັກຂ່າວ ເລ້ຮວາທີ່ມີຫົວຂໍ້ວ່າ: ນັກສິລະປິນດີເດັ່ນ ຈຸກລີງ, ຜູ້ຖ່າຍທອດຂັບກ໋າຍເລືອງ ແລະ ເດີນກາຕາຍຕື໋ໃຫ້ຄົນລຸ້ນຫລັງຢ່າງສຸດຈິດສຸດໃຈ
ນັກສິລະປິນດີເດັ່ນ ຈຸກລີງ
ພ່າບ:ອິນເຕີແນັດ
|
ປະຈຸບັນ ນັກສິລະປິນດີເດັ່ນ ຈຸກລີງ ມີອາຍຸສູງແລ້ວກໍຕາມ ແຕ່ທ່ານນາງ ຍັງຄົງສືບຕໍ່ແນະນຳໃຫ້ຊຸດຝືກອົບຮົມບຳລຸງ, ຍົກສູງດ້ານເຕັກນິກໃນການຂັບກ໋າຍເລືອງ ທີ່ສະຫງວນໃຫ້ແກ່ນັກສິລະປິນເດີນກາຕາຍຕື໋ ຫລັກແຫລ່ງ 30 ຄົນຢູ່ ນະຄອນເກີນເທີ. ຊຸດອົບຮົມນີ້ ພຽງແຕ່ແມ່ນຫນຶ່ງໃນບັນດາການເຄື່ອນໄຫວແນະນຳຖ່າຍທອດອາຊີບ ຊື່ງນັກສິລະປິນ ຈຸກລີງ ໄດ້ມີຄວາມສຸດຈິດສຸດໃຈເພື່ອສອນໃຫ້ລຸ້ນຫນຸ່ມ. ມີນັກສິລະປິນ, ນັກສິລະປະການຫລາຍຄົນຢູ່ ນະຄອນ ເກີນເທີ ໄດ້ເຕີບໃຫຍ່ຂຶ້ນ ແລະ ກາຍເປັນນັກສິລະປິນດີເດັ່ນໃນການຂັບກ໋າຍເລືອງ, ເດີນກາຕາຍຕື໋ ແລະຍາດໄດ້ລາງວັນໃນງານປະກວດ, ງານມະໂຫລານຂັບກ໋າຍເລືອງ ແລະ ເດີນກາຕາຍຕືຄັ້ງຕ່າງໆ ລ້ວນແຕ່ມີຄວາມເຄົາລົບນັບຖື ນັກສິລະປິນດີເດັ່ນ ຈຸກລີງ ແລະ ເອີ້ນທ່ານນາງວ່າ ແມ່ນອາຈານ, ແມ່ນແມ່ ຫລື ແມ່ເຖົ້າ. ສຳລັບ ນັກສິລະປິນ ຈຸກລີງ ແລ້ວ, ການທະວີຄູນຄວາມຮັກຕໍ່ການຂັບກ໋າຍເລືອງ, ເດີນກາຕາຍຕື໋, ການຄົ້ນພົບ ແລະ ບຳລຸງ ຄວາມເກັ່ງກ້າໃຫ້ຄົນລຸ້ນຫລັງ ຍາມໃດກໍແມ່ນຄວາມສຸກ, ຄວາມເບີກບານມ່ວນຊື່ນ ແລະ ມີຄວາມໝາຍໃນຊີວິດແຫ່ງການເຄື່ອນໄຫວສິລະປະຂອງທ່ານນາງ. ນັກສິລະປິນ ດີເດັ່ນຈຸກລີງ ແບ່ງປັນວ່າ:
“ການບຳລຸງໃຫ້ລຸ້ນຄົນສືບທອດ ທັງແມ່ນການສະຫນອງໃຫ້ປະເພດສິລະປະເດີນກາຕາຍຕື໋, ຜ່ານນັ້ນ ພວກເຮົາຈະມີຖັນແຖວນັກສິລະປິນຫລັກແຫລ່ງ. ຂ້າພະເຈົ້າຄິດວ່າ ພວກເຮົາຕ້ອງເຮັດແນວໃດເພື່ອໃຫ້ນັບມື້ນັບມີນັກສິລະປິນຫນຸ່ມຫລາຍຄົນຂັບກ໋າຍເລືອງ ແລະ ເດີນກາຕາຍຕື໋ ມ່ວນກວ່າ. ຂ້າພະເຈົ້າພ້ອມແລ້ວທີ່ຈະພ້ອມກັບພວກນ້ອງ ແລະ ບັນດາຄູອາຈານອ່ື່ນເພື່ອລ້ຽງດູ ແລະ ບຳລຸງຖັນແຖວນັກສິລະປິນຫນຸ່ມໃຫ້ນະຄອນ ເກີນເທີ.”
ນັກສິລະປິນດີເດັ່ນ ຈຸກລີງ ເກີດປີ 1951 ຢູ່ ຕາແສງ ລອງອານ ເມືອງ ເຈົາແທ່ງ ແຂວງຕຽນຢາງ. ເຂດແມ່ນ້ຳລຳເຊ ຕຽນຢາງ ແມ່ນອູ່ຂອງສິລະປະເດີນກາຕາຍຕື໋ ຢູ່ ພາກໃຕ້. ເມື່ອມີອາຍຸ 10 ປີ, ຈຸກລີງ ໄດ້ຂັບກ໋າຍເລືອງຫລາຍບົດແລ້ວ. ຮອດອາຍຸ 12 ປີ ຈຸກລີງ ໄດ້ຮັບສະໝັກເຂົ້າກອງສິລະປະຂອງພາກໃຕ້ ໂດຍອະດີດນັກດົນຕີ ຊວນຮົ່ງ ເປັນຫົວຫນ້າ, ຈາກນັ້ນນັກສິລະປິນ ຈຸກລີງ ເລີ່ມອາຊີບຂັບກ໋າຍເລືອງ. ຢູ່ທີ່ນີ້ ຈຸກລີງ ໄດ້ຮັບການບຳລຸງສ້າງດ້ານເຕັກນິກດົນຕີ, ວິທີຂັບລຳ ແລະ ທັງຮ່ຳຮຽນ, ຝືກຝົນຫລໍ່ຫລອມເພື່ອ ຮັບໃຊ້ປະຊາຊົນ, ນັກຮົບໃນເງື່ອນໄຂຫຍຸ້ງຍາກທີ່ສຸດໃນໄລຍະສົງຄາມ. ນັກສິລະປິນ ຈຸກລີງ ໄດ້ເຕີບໃຫຍ່ເທື່ອລະກ້າວ ແລະ ກາຍເປັນນັກສິລະປິນທີ່ມີສຽງຂັບລຳມ່ວນ, ຜູ້ຊົມຫລາຍຄົນຮູ້ຈັກເຖິງ ແລະ ໄດ້ຮັບຄວາມຮັກແພງຈາກສາທາລະນະຊົນ ຜ່ານຄື້ນກະຈາຍສຽງໃນທົ່ວປະເທດ ແລະ ບົນເວທີສະແດງຂັບກ໋າຍເລືອງ. ໃນນັ້ນ ຄວາມປະທັບໃຈທີ່ສຸດ ນັ້ນແມ່ນ ນັກສິລະປິນຈຸກລີງໄດ້ສວມເປັນຕົວລະຄອນເອກ ເປັນວິລະຊົນ ຫງວຽນທິແຫ້ງ ໃນບົດລະຄອນຂັບກ໋າຍເລືອງ “ຜູ້ບໍ່ຢູ່ໂດດດ່ຽວ” ຂອງນັກປະພັນ ມີງຄວາ. ໄລຍະທີ່ນັກສິລະປິນ ຈຸກລີງ ມີຊື່ສຽງໂດງດັ່ງ ນັ້ນແມ່ນຊຸມປີພາຍຫລັງທີ່ນັກສິລະປິນ ຈຸກລີງ ໄປຮຽນຢູ່ໂຮງຮຽນບຳລຸງນັກສະແດງຊັ້ນກາງ ແລະ ກັບຄືນເຄື່ອນໄຫວໃນກອງສິລະປະ ທະຫານເຂດ 9. ນັ້ນກໍແມ່ນຊຸມປີທີ່ການສະແດງຂັບກ໋າຍເລືອງບົນເວທີຢູ່ພາກໃຕ້ໄດ້ຮັບຄວາມນິຍົມທີ່ສຸດພາຍຫລັງພາກໃຕ້ໄດ້ຮັບການປົດປ່ອຍຢ່າງສົມບູນ, ທ້ອນໂຮມປະເທດຊາດເປັນເອກະພາບເມື່ອປີ 1975. ຈາກນັ້ນ ນັກສິລະປິນ ຈຸກລີງທັງພ້ອມກັບກອງສິລະປະໄປສະແດງ, ທັງເຂົ້າຮ່ວມການແນະນຳ, ສ້າງຂະບວນການຂັບເດີນກາຕາຍຕື໋ຢູ່ທົ່ວທຸກແຫ່ງ, ນັບທັງໃນກອງທັບ ແລະ ທ້ອງຖິ່ນຕ່າງໆຢູ່ເຂດທົ່ງພຽງແມ່ນ້ຳຂອງທາງພາກໃຕ້. ປີ 1993, ນັກສິລະປິນ ຈຸກລີງ ໄດ້ຮັບນາມມະຍົດອັນສູງສົ່ງແມ່ນສິລະປີນດີເດັ່ນໂດຍລັດມອບໃຫ້.
ສະໂມສອນເດີນກາຕາຍຕື໋
ພາບ:ອິນເຕີແນັດ
|
ເມື່ອເວົ້າເຖິງຜູ້ມີຄຸນງາມຄວາມດີຕໍ່ຂະບວນການສ້າງຕັ້ງສະໂມສອນເດີນກາຕາຍຕື໋ ແລະ ການເຕົ້າໂຮມ, ແນະນຳໃຫ້ນັກສິລະປິນຫນຸ່ມຢູ່ເຂດທົ່ງພຽງແມ່ນ້ຳຂອງ, ນັກສິລະປິນດີເດັ່ນ, ນັກດົນຕີ ຮີ່ງຂາຍ, ຫົວຫນ້າພະແນກດົນຕີພື້ນເມືອງ, ສະຖາບັນດົນຕີ ນະຄອນ ໂຮ່ຈິມີນ ມີຂໍ້ສັງເກດວ່າ:
”ຂ້າພະເຈົ້າເຫັນວ່າ, ຢູ່ ນະຄອນ ເກີນເທີ ມີ ນັກສິລະປິນ ຈຸກລີງ ແມ່ນນັກສິລະປິນດີເດັ່ນ, ຂັບກ໋າຍເລືອງມ່ວນທີ່ສຸດ ແລະ ເຄີຍເຂົ້າຮ່ວມຂະບວນການສ້າງຕັ້ງສະໂມສອນ ເດີນກາຕາຍຕື໋. ການປະກອບສ່ວນຂອງ ນັກສິລະປິນ ຈຸກລີງ ໄດ້ເຮັດໃຫ້ຄຸນນະພາບຂອງຜູ້ຂັບເດີນກາຍຕາຍຕື໋ເພີ່ມຂຶ້ນ.”
ປະຈຸບັນ, ນັກສິລະປິນດີເດັ່ນ ຈຸກລີງ ໄດ້ອອກກິນເບ້ຍບຳນານແລ້ວ, ແຕ່ທ່ານນາງ ຍັງຄົງສືບຕໍ່ອຸທິດສ່ວນໃຫ້ແກ່ສິລະປະ. ແຕ່ລະມື້ ນັກສິລະປິນ ຈຸກລີງ ຍັງຄົງຄ້າງຄາກັບບັນດາວຽກງານຄື: ປະດິດແຕ່ງບົດລະຄອນຂັບກ໋າຍເລືອງ, ແນະນຳໃຫ້ບັນດານັກສິລະປິນປະຕິບັດລາຍການເຂົ້າຮ່ວມງານປະກວດ, ງານມະໂຫລານ. ນັກສິລະປິນ ຈຸກລີງ ຍັງໄດ້ເຂົ້າຮ່ວມຄະນະກຳມະການກວດສອບໃນງານປະກວດຕ່າງໆ ແລະ ສະແດງບັນດາລາຍການສິລະປະຜ່ານຄື້ນວິທະຍຸ ໂທລະພາບນະຄອນເກີນເທີ. ນັກສິລະປິນ ຈຸກລີງ ບໍ່ພຽງແຕ່ແມ່ນນັກສິລະປິນມີຊື່ສຽງໂດງດັ່ງດ້ວຍການຂັບລຳມ່ວນອ່ອນຊອນເທົ່ານັ້ນ ຫາກທ່ານນາງຍັງເປັນຜູ້ຖ່າຍທອດອາຊີບຂັບກ໋າຍເລືອງໃຫ້ແກ່ຄົນລຸ້ນຫລັງ, ປະກອບສ່ວນໃຫ້ຂັບກ໋າຍເລືອງບົນເວທີ ແລະ ສິລະປະເດີນກາຕາຍຕື໋ ນັບມື້ນັບພັດທະນາອີກດ້ວຍ.