(vovworld)- ງານວາງສະແດງເອກະສານ “ລາດຊະວົງຫງວຽນກັບການຮຽບຮຽງປື້ມປະຫວັດສາດຜ່ານ ເຈົາບ໋ານ ແລະ ມົກບ໋ານ - ມໍລະດົກເອກະສານໂລກ” ຫາກໍຈັດຂຶ້ນຢູ່ ສູນຮັກສາສຳເນົາເອກະສານແຫ່ງຊາດ I ຮ່າໂນ້ຍ ໄດ້ດຶງດູດຄວາມສົນໃຈຂອງບັນດານັກຄົ້ນຄ້ວາ ແລະ ມະຫາຊົນ. ນີ້ແມ່ນການເຄື່ອນໄຫວ ປະກອບສ່ວນເຊີດຊູຄຸນຄ່າ ມໍລະດົກວັດຖຸເອກະສານຂອງຫວຽດນາມ ຕໍ່ໂລກ, ພ້ອມທັງ ຢືນຢັນການປະກອບສ່ວນ ແລະ ຜົນງານຂອງລາດຊະວົງ ຫງວຽນ ໃນການຮຽບຮຽງປະຫວັດສາດ. ງານວາງສະແດງກໍແມ່ນເພື່ອໂຄສະນາ, ເສີມຂະຫຍາຍຄຸນຄ່າ ແລະ ນຳມໍລະດົກວັດຖຸເອກະສານໃກ້ຊິດກັບມະຫາຊົນກວ່າ. ບົດຂຽນຂອງນັກຂ່າວ ຮົ່ງບັກທີ່ມີຫົວຂໍ້ວ່າ:
ມົກບ໋ານ - ມໍລະດົກເອກະສານໂລກ
ພາບ:bandantoc
|
ງານວາງສະແດງ “ລາດຊະວົງຫງວຽນ ກັບການຮຽບຮຽງປະຫວັດສາດຜ່ານເຈົາບ໋ານ, ມົກບ໋ານ - ມໍລະດົກເອກະສານໂລກ” ໄດ້ແນະນຳເອກະສານກວ່າ 100 ສະບັບ ໂດຍໄດ້ຄັດເລືອກຈາກ ຊຸດ ເຈົາບ໋ານ ແລະ ມົກບ໋ານ ໃນສະໄຫມ ລາດຊະວົງຫງວຽນ ຊື່ງໄດ້ຮັບການຮັກສາໄວ້ຢູ່ສູນຮັກສາສຳເນົາເອກະສານແຫ່ງຊາດ I (ຮ່າໂນ້ຍ) ແລະ ສູນຮັກສາສຳເນົາເອກະສານແຫ່ງຊາດ IV (ດາລາດ ເລີມດົງ). ນີ້ແມ່ນບັນດາເອກະສານທີ່ເປັນເອກະລັກສະເພາະພິເສດ, ສ່ອງແສງຢ່າງຈະແຈ້ງ ແລະ ຄວາມຈິງ ກ່ຽວກັບຄວາມເອົາໃຈໃສ່ ແລະ ແຜນນະໂຍບາຍຂອງບັນດາເຈົ້າຊີວິດໃນສະໄຫມລາດຊະວົງ ຫງວຽນ ທີ່ມີຕໍ່ການຮຽບຮຽງປື້ມປະຫວັດສາດ.ທ່ານ ຮ່າວັນເຫ່ວ, ຜູ້ອຳນວຍການສູນຮັກສາສຳເນົາເອກະສານແຫ່ງຊາດ I ໃຫ້ຮູ້ວ່າ: ຈຸດພົ້ນເດັ່ນຂອງມໍລະດົກ ເຈົາບ໋ານ, ມົກບ໋ານ ແມ່ນບັນດາຂໍ້ມູນ ຕົ້ນສະບັບ ທີ່ອຸດົມສົມບູນກ່ຽວກັບປະຫວັດສາດ, ພູມສາດ, ການເມືອງ ສັງຄົມ, ກົດໝາຍ, ວັດທະນະທຳ ການສຶກສາ, ວັນນະຄະດີ, ພາສາ.. ສ່ອງແສງເຖິງຊີວິດສັງຄົມ ແລະ ຊາວຫວຽດນາມໃນ 143 ປີ ແຕ່ປີ 1802 -1945 ຢ່າງຈະແຈ້ງ. ທ່ານ ຮ່າວັນເຫ່ວ ໃຫ້ຂໍ້ສັງເກດວ່າ:
“ການຮຽບຮຽງປື້ມປະຫວັດສາດສະໄຫມລາດຊະວົງ ຫງວຽນ ແມ່ນມີຂອບຂະຫນາດ, ເປັນລະບົບ, ລະອຽດລະອໍ, ລອບຄອບຖີ່ຖ້ວນເພື່ອປະໄວ້ໃຫ້ຄົນລຸ້ນຫລັງບັນດາໝາກຜົນທີ່ເປັນຫນ້າຈົດຈ່ຳ. ບັນດາເອກະສານ ມົກບ໋ານ, ເຈົາບ໋ານ ອີກຄັ້ງຫນຶ່ງໄດ້ຢືນຢັນການປະກອບສ່ວນ ແລະ ຜົນງານຂອງສະໄຫມລາດຊະວົງຫງວຽນ ທີ່ມີຕໍ່ການຮຽບຮຽງບັນດາ ປື້ມປະຫວັດສາດທີ່ຍອດຢ້ຽມ. ລາດຊະວົງຫງວຽນ ແມ່ນລາດຊະວົງປະສົບຜົນສຳເລັດໃນການຮຽບຮຽງປື້ມປະຫວັດສາດໃນພື້ນຖານປະຫວັດສາດຂອງລະບອບລາຊາທິປະໄຕ.”
ງານວາງສະແດງຄັ້ງນີ້ໄດ້ສະແດງໃຫ້ເຫັນວ່າ ລາດຊະວົງ ຫງວຽນເອົາໃຈໃສ່ເປັນພິເສດເຖິງການຮຽບຮຽງປື້ມປະຫວັດສາດຕາມຂັ້ນຕອນຢ່າງແຫນ້ນແຟ້ນ ຈາກບັນດາອົງການຮຽບຮຽງຕະຫລອດຮອດການຈັດຕັ້ງບຸກຄະລາກອນ ແລະ ການສະສົມ, ຂຸດຄົ້ນກ່ຽວກັບເອກະສານ. ຮອງສາດສະດາຈານ, ດຣ ຫງວຽນກົງຫວຽດ, ອະດີດຫົວຫນ້າສະຖາບັນຄົ້ນຄ້ວາ ພາສາຈີນ, ກຳມະການສະພາມໍລະດົກວັດທະນະທຳແຫ່ງຊາດ ໃຫ້ຮູ້ວ່າ:
“ເອກະສານທີ່ນຳມາວາງສະແດງໃນຄັ້ງນີ້ແມ່ນສະແດງໃຫ້ເຫັນຄວາມເອົາໃຈໃສ່ຂອງລາດຊະວົງ ຫງວຽນທີ່ມີຕໍ່ ການຄົ້ນຄ້ວາ, ອະນຸລັກຮັກສາປື້ມປະຫວັດສາດ, ການຈັດຕັ້ງໂຄງປະກອບອົງການຮຽບຮຽງປະຫວັດສາດໃນສະໄຫມລາດຊະວົງ ຫງວຽນ. ການຮຽບຮຽງ ແລະ ການພິມຈຳຫນ່າຍໄດ້ຮັບການປະຕິບັດຢ່າງມີລັກສະນະວິທະຍາສາດ, ມີຄວາມໝາຍທາງການ. ເລື່ອງຮຽບຮຽງປະຫວັດສາດສຳລັບສັງຄົມວັດທະນະທຳປະຈຸບັນ ແມ່ນສຳຄັນທີ່ສຸດ. ງານວາງສະແດງເອກະສານ ມົກບ໋ານ ແລະ ເຈົາບ໋ານໃນສະໄຫມລາດຊະວົງຫງວຽນແມ່ນ ຢັ້ງຢືນເຖິງຄຸນຄ່າປະຫວັດສາດໃນການຄົ້ນຄ້ວາວັດທະນະທຳຫວຽດນາມ.”
ແຂກເຂົ້າຊົມງານວາງສະແດງ
ພາບ:bandantoc
|
ນອກຈາກຄຸນຄ່າປະກອບສ່ວນສຳລັບການຄົ້ນຄ້ວາ ແລະ ຮຽບຮຽງປຶ້ື້ມປະຫວັດສາດຂອງຊາດແລ້ວ, ເຈົາບ໋ານ ແລະ ມົກບ໋ານ ໃນສະໄຫມລາດຊະວົງຫງວຽນ ຍັງແມ່ນສາງວັດຖຸເອກະສານສຳຄັນກ່ຽວຂ້ອງເຖິງການກຳນົດອະທິປະໄຕທະເລໝູ່ເກາະຂອງປະເທດຊາດ, ໃນນັ້ນ ມີ 2 ໝູ່ເກາະ ຮ່ວາງຊາ ແລະ ເຈື່ອງຊາ. ສະນັ້ນ ການຍູ້ແຮງການໂຄສະນາ, ແນະນຳວັດຖຸເອກະສານ ມົກບ໋ານ, ເຈົາບ໋ານ ເຖິງມະຫາຊົນໃນຈຸດເວລາປະຈຸບັນແມ່ນມີຄວາມໝາຍອັນໃຫຍ່ຫລວງ. ທ່ານຮອງສາດສະດາຈານ, ດຣ ເລີມບານາມ, ປະທານ ສະພາຊົນເຜົ່າວິທະຍາ ແລະ ມະນຸດສາດ ຖືວ່າ:
“ຂ້າພະເຈົ້າຖືວ່າ ນີ້ແມ່ນງານວາງສະແດງທີ່ມີຄວາມໝາຍ ແລະ ດູດດື່ມ ບໍ່ພຽງແຕ່ສຳລັບບັນດານັກຄົ້ນຄ້ວາເທົ່ານັ້ນ ຫາກນັບທັງມະຫາຊົນອີກດ້ວຍ. ສະນັ້ນ ຕາມຂ້າພະເຈົ້າແລ້ວ ໃນອະນາຄົດໃກ້ໆນີ້ ຄວນໂຄສະນາເອກະສານນີ້ຢ່າງກວ້າງຂວາງ ຊ້ຳບໍ່ຫນຳແມ່ນນຳເຂົ້າໃນຫລັກສູດການຮຽນ ການສອນວິຊາປະຫວັດສາດອີກດ້ວຍ.”
ການຈັດຕັ້ງງານວາງສະແດງ ມົກບ໋ານ ກ່ຽວກັບເຈືື່ອງຊາ, ຮ່ວາງຊາ ແລະ ງານວາງສະແດງວັດຖຸເອກະສານ “ລາດຊະວົງຫງວຽນ ກັບການຮຽບຮຽງປື້ມປະຫວັດສາດຜ່ານ ເຈົາບ໋ານ, ມົກບ໋ານ” ໄດ້ຮັບການຕີລາຄາສູງຈາກຫາງສຽງ. ໄລຍະຈະມາເຖິງ, ສູນຮັກສາສຳເນົາເອກະສານແຫ່ງຊາດ I (ຮ່າໂນ້ຍ) ແລະ ສູນຮັກສາສຳເນົາເອກະສານ IV (ດາລາດ ເລີມດົງ) ຈະສືບຕໍ່ໂຄສະນາ, ແນະນຳຄຸນຄ່າຂອງ 2 ມໍລະດົກນີ້ ຕາມບັນດາຫົວເລື່ອງທີ່ແຕກຕ່າງກັນ ເພື່ອໃຫ້ມະຫາຊົນຮູ້ຈັກເຖິງບັນດາເອກະສານປະຫວັດສາດຊື່ງລຸ້ນພໍ່ລຸ້ນອ້າຍປະໄວ້, ປະກອບສ່ວນເພື່ອຢັ້ງຢືນລັກສະນະທີ່ເປັນເອກະລັກສະເພາະ, ລັກສະນະຊັດເຈນ, ມີພຽງຢ່າງດຽວເທົ່ານັ້ນ ແລະ ລະດັບຜົນສະທ້ອນຂອງບັນດາມໍລະດົກວັດຖຸເອກະສານລະດັບໂລກນີ້.