ໃນຂະນະທີ່ເວທີສະແດງພວມບໍ່ປະກົດມີບົດລະຄອນທີ່ດຶງດູດຜູ້ຊົມນັ້ນ, ເລື່ອງໂຮງລະຄອນຫວຽດນາມບໍ່ມີບ່ອນນັ່ງວ່າງໃນຕະຫຼອດ 5 ຄ່ຳຄືນທີ່ດຳເນີນການສະແດງທົດລອງ ແລະ ຜູ້ຊົມຕ້ອງຈ່າຍເງິນນັບລ້ານດົງເພື່ອຊື້ປີ້ຊົມລາຍການສະແດງບົດລະຄອນ “ ຮຳແລດ” ຊຶ່ງຖືກຖືວ່າ ແມ່ນບົດລະຄອນທີ່ສ້າງຄວາມປະທັບໃຈທີ່ສຸດໃຫ້ແກ່ຜູ້ຊົມ. ສິ່ງທີ່ສຳຄັນກວ່ານັ້ນ, ແມ່ນຜູ້ມາຊົມບໍ່ແມ່ນເພື່ອຄວາມດູດດື່ມຍ້ອນການໂຄສະນາ, ຫຼືບົດລະຄອນນີ້ມີຊື່ສຽງໃນໂລກເທົ່ານັ້ນ, ຫາກຍັງຖືກດຶງດູດໃຈຢູ່ບ່ອນວ່າ ບົດລະຄອນ “ ຮຳແລດ” ໂດຍແມ່ນໂຮງລະຄອນຫວຽດນາມກຳກັບການສະແດງ.
ຕອນໜຶ່ງໃນບົດລະຄອນ “ ຮຳແລດ” |
ບົດລະຄອນ “ ຮຳແລດ” ແມ່ນໜຶ່ງໃນບັນດາບົດລະຄອນໂດດເດັ່ນຂອງຜູ້ແຕ່ງບົດລະຄອນ ທ່ານ William Shakespeare ຊຶ່ງໄດ້ສະແດງຢູ່ຫຼາຍປະເທດໃນໂລກ. ໂດຍຜ່ານ 4 ສະຕະວັດ ນັບແຕ່ໄລຍະທີ່ຜູ້ແຕ່ງບົດລະຄອນ ທ່ານ William Shakespeare ແຕ່ງບົດລະຄອນ “ ຮຳແລດ” ມາຮອດປະຈຸບັນ, ຄຸນຄ່າຍຸກສະໄໝຂອງບົດລະຄອນກໍບໍ່ຖືກສູນເສຍໄປ. ໂດຍແມ່ນບົດລະຄອນນາດຕະກຳແຫ່ງການເດີນທາງໄປຊອກຫາຄວາມຈິງ ຊຶ່ງແມ່ນຄວາມຈິງເພື່ອຮັກສາກຽດສັກສີ ແລະ ວິຖີຊີວິດຂອງມະນຸດ. ນັບແຕ່ຕົ້ນເດືອນ 11 ນີ້, ໂຮງລະຄອນຫວຽດນາມໄດ້ເລີ່ມສະແດງບົດລະຄອນ “ ຮຳແລດ” ເພື່ອຮັບໃຊ້ມວນຊົມ, ຊຶ່ງເປັນການເປີດສາກໃຫ້ແກ່ຄວາມມານະພະຍາຍາມຟື້ນຟູບັນດາບົດລະຄອນທີ່ໂດດເດັ່ນຂອງໂຮງລະຄອນຫວຽດນາມ. ທ່ານນາງ ຫງວຽນທິກຸກ ຜູ້ມາຊົມການສະແດງບົດລະຄອນ “ ຮຳແລດ” ໂດຍໂຮງລະຄອນຫວຽດນາມກຳກັບການສະແດງໄດ້ເວົ້າຄວາມໃນໃຈສູ່ຟັງວ່າ :
“ ຂ້າພະເຈົ້າໄດ້ຊົມບົດລະຄອນ “ ຮຳແລດ” ຫຼາຍເທື່ອແລ້ວ, ນັບທັງສະແດງຢູ່ລັດເຊຍ, ນີ້ແມ່ນ ບົດລະຄອນທີ່ໂດດເດັ່ນ, ມັນມີສີສັນດ້ານການເມືອງ, ທິດສະດີກ່ຽວກັບການດຳລົງຊີວິດຢ່າງເລິກເຊິ່ງ. ຂ້າພະເຈົ້າເຫັນວ່າ ສຳລັບການສະແດງ ບົດລະຄອນ “ ຮຳແລດ”ຂອງໂຮງລະຄອນຫວຽດນາມ ແມ່ນປະທັບໃຈທີ່ສຸດ. ວິທີການສະແດງແມ່ນມີລັກສະນະຍຸກປະຈຸບັນ ”
ໃນການສະແດງຄັ້ງໜຶ່ງບົນເວທີສະແດງຂອງໂຮງລະຄອນຫວຽດນາມ, ບົດລະຄອນ “ ຮຳແລດ”ໄດ້ເປັນຂີດໝາຍກ່ຽວກັບວິທີສຳນຶກ, ວິທີເວົ້າຂອງຊາວຫວຽດນາມໃນສະຕະວັດທີ 21; ບົດລະຄອນໄດ້ສະແດງໃຫ້ເຫັນຄວາມລຳບາກຂອງແຕ່ລະຄົນຢ່າງແທ້ຈິງ; ບົດລະຄອນ “ ຮຳແລດ” ໄດ້ກ້າຫານປະເຊີນໜ້າກັບສິ່ງທີ່ຮ້າຍກາດ ແລະ ເດັດດຽວດັບສູນສິ່ງທີ່ກໍ່ໂທດກຳເຖິງກົກເຖິງຮາກ. ນັກສະແດງລະຄອນ ຕະມິນ ຜູ້ສວມບົດຕົວລະຄອນ “ ຮຳແລດ” ໃຫ້ຮູ້ວ່າ : ນີ້ແມ່ນສິ່ງທ້າທາຍອັນໃຫຍ່ຫຼວງ, ດັ່ງນັ້ນ ລາວຕ້ອງຊອກຫາເອກະສານ, ຟິມຮູບເງົາ, ບັນດາບົດລະຄອນທັງຢູ່ພາຍໃນ ແລະ ຕ່າງປະເທດເພື່ອຊອກຮູ້ກ່ຽວກັບກ່ຽວກັບຍຸກສະໄໝ ຮຳແລດ ພວມດຳລົງຊີວິດ, ກ່ຽວກັບສະພາບປະຫວັດສາດ. ນັກສະແດງລະຄອນ ຕະມິນ ແບ່ງປັນວ່າ :
“ ທຳອິດແມ່ນຄວາມໃກ້ຊິດຕິດພັນທາງດ້ານວັດທະນະທຳ. ຊາວອາຊີຕາເວັນອອກພວກເຮົາເຄີຍຖືເປັນສຳຄັນດ້ານອາລົມຈິດຄວາມຮັກແພງ. ຮຳແລດໃກ້ຊິດສະໜິດສະໜົມກັບຊາວຫວຽດນາມຢູ່ບ່ອນ: ສາຍພົວພັນລະຫວ່າງພໍ່ກັບລູກ, ອ້າຍກັບນ້ອງ, ອ່າວກັບຫຼານ, ໝູ່ເພື່ອນ….ແຕ່ແນ່ນອນ ບໍ່ອາດເຫີນຫ່າງກັບແນວຄິດຊຶ່ງ Shakespeare ໄດ້ຝາກຝັງ. ຢູ່ທີ່ນັ້ນ, ຜູ້ຊົມຊາວຫວຽດນາມຈະມີຄວາມເຫັນໃຈນຳ ແລະ ໃກ້ຊິດສະໜິດສະໜົມກວ່າ ແລະ ຂ້າພະເຈົ້າຄິດວ່າ ສິ່ງສຳຄັນທີ່ສຸດແມ່ນສາມາດເຂົ້າໃຈໄດ້ຢ່າງງ່າຍດາຍກວ່າ ”
ບົນເວທີສະແດງຂອງໂຮງລະຄອນຫວຽດນາມ, ເລື່ອງລາວກ່ຽວກັບເຊົ້າຊາຍແດນໝາກ ແມ່ນບໍ່ແປກປະຫຼາດກັບຊາວຫວຽດນາມອີກແລ້ວ. ຄວາມສັບສົນຂອງຊັ້ນຄວາມໝາຍ, ບັນດາຄວາມຂັດແຍ້ງໃນບົດລະຄອນໄດ້ຖືກຜູ້ກຳກັບການສະແດງ ທ່ານແອງຕູ້ແກ້ໄຂຕາມວິທີເພາະຂອງຕົນ. ບົດລະຄອນບໍ່ພຽງແຕ່ແມ່ນເລື່ອງລາວຂອງຄົນດີແຕ່ອ້າງວ້າງບົນເສັ້ນທາງໄປຊອກຫາສັດຈະທຳເທົ່ານັ້ນ ຫາກຍັງໄດ້ເຊີດຊູເປັນການກະທຳຕໍ່ສູ້ເພື່ອຄວາມເປັນທຳ, ເພື່ອພື້ນຖານຍຸດຕິທຳຖືກຢຽບຢຳ ແລະ ເພື່ອຄວາມຜາສຸກຂອງມະນຸດ. ຜູ້ແຕ່ງບົດລະຄອນ ເລກີ້ຫຽນ ເປີດເຜີຍວ່າ :
“ ຜູ້ກຳກັບການສະແດງລະຄອນບໍ່ຢາກຫັນມາເປັນບົດລະຄອນຫວຽດນາມ, ແຕ່ລາວໄດ້ຫັນບົດລະຄອນຂອງ Shakespeare ດ້ວຍຈິດວິນຍານຫວຽດນາມ, ວິທິສຳນຶກຫວຽດນາມ, ດັ່ງນັ້ນເຖິງວ່າ ບໍ່ມີເຈດຈຳນົງ ຫັນມາເປັນບົດລະຄອນຫວຽດນາມກໍຕາມ, ແຕ່ມັນໄດ້ກາຍເປັນບົດລະຄອນຂອງຜູ້ຊົມຫວຽດນາມ ແລະ ມັນໄດ້ຊຶມເລິກເຂົ້າໃນຈິດໃຈຂອງມວນຊົນຫວຽດນາມ ”
ການນຳໃຊ້ບັນດານັກສະແດງລະຄອນທີ່ຍັງໜຸ່ມແໜ້ນໃນບົດລະຄອນ “ ຮຳແລດ” ກໍໄດ້ນຳມາເຊິ່ງສີສັນໃໝ່ອຽມໃຫ້ແກ່ບົດລະຄອນ ຫຼືການນຳວາດຟ້ອນ ຊວນຝາ ຂອງຊາວແທງຮ້ວາເຂົ້າໃນບົດລະຄອນຢ່າງຄ່ອງແຄ້ວນັ້ນ ກໍໄດ້ເຮັດໃຫ້ ບົດລະຄອນ “ ຮຳແລດ” ຂອງໂຮງລະຄອນຫວຽດນາມເພີ່ມຄວາມດູດດື່ມຫຼາຍຂຶ້ນ, ມີຊີວິດຊີວາ ແລະ ມີສີສັນກວ່າເກົ່າ. ນັກວິຈານການສະແດງບົນເວທີ ຝ້າມວັນຟຸກ ໃຫ້ຂໍ້ສັງເກດວ່າ :
“ບົດລະຄອນ “ ຮຳແລດ” ໄດ້ເປັນຂີດໝາຍໄລຍະໃໝ່ຂອງໂຮງລະຄອນຫວຽດນາມ. ຂ້າພະເຈົ້າຖືວ່າ ຜູ້ຊົມຫວຽດນາມເຖິງວ່າມີການເລືອກເຟັ້ນກໍຕາມ, ແຕ່ກໍຍັງຄົງຍ້ອງຍໍບົດລະຄອນ “ ຮຳແລດ” ແມ່ນບົດລະຄອນຖືກສະແດງໂດຍຫຍໍ້ລົງ ແລະ ໄດ້ສະແດງໃນເວລາພຽງປະມານ 2 ຊົ່ວໂມງເທົ່ານັ້ນ, ເພາະ Shakespeare ແຕ່ງບົດລະຄອນຍາວຫຼາຍ ປະກອບດ້ວຍ 170 ໜ້າ ແລະ ມີ 21 ຕົວລະຄອນ”
ໃນຍຸກສະໄໝທີ່ເວທີສະແດງພວມຖືກມິດງຽບລົງຍ້ອນຂາດແຄນບັນດາບົດລະຄອນມ່ວນນັ້ນ, ການກັບຄືນສູ່ເວທີສະແດງຫວຽດນາມຂອງບົດລະຄອນ “ ຮຳແລດ” ແມ່ນປະກົດການທີ່ພົ້ນເດັ່ນ. ດ້ວຍຄວາມມານະພະຍາຍາຍ ແລະ ມີຫົວຄິດປະດິດສ້າງຂອງບັນດາຜູ້ກຳກັບການສະແດງ, ນັກສະແດງລະຄອນໄດ້ເຮັດໃຫ້ບົດລະຄອນ “ ຮຳແລດ” ຂອງ Shakespeare ບົນເວທີສະແດງຂອງໂຮງລະຄອນຫວຽດນາມ ເພີ່ມຄວາມດູດດື່ມ ແລະ ເຮັດໃຫ້ຜູ້ຊົມຫວຽດນາມເພິ່ງພໍໃຈ.