ງານບຸນວິຫານຮຸ່ງ - ຟູ່ເຖາະ
(ພາບ: baophutho.com)
|
ປະຈຸບັນ, ຢູ່ຫວຽດນາມມີປະມານ 8000 ງານບຸນໃນປີໜຶ່ງ, ຊຶ່ງຕົ້ນຕໍແມ່ນຖືກ ດຳເນີນຍາມ ລະດູບານໃໝ່ແຕ່ເດືອນ 1 ຫາເດືອນ 4 ໄລ່ຕາມຈັນທະປະຕິທິນ. ເຖິງວ່າແມ່ນງານບຸນ ໃຫຍ່ຫຼື ນ້ອຍກໍຕາມ, ບໍ່ວ່າຢູ່ໝູ່ບ້ານໃດໆ ກໍລ້ວນແຕ່ມີງານບຸນ. ມີບັນດາງານບຸນທີ່ມີຊື່ສຽງຄື : ງານບຸນວິຫານຮຸ່ງ - ຟູ່ເຖາະ, ງານບຸນລິມ, ງານບຸນພະແມ່ຈົ້ວຄໍຢູ່ແຂວງບັກນິງ, ງານບຸນວັດແກວໃນແຂວງທ້າຍບິງ, ງານບຸນອຽນຕືໃນແຂວງກວາງນິງ, ງານບຸນນະມັດສະການວັດເຮືອງ-ຮ່າໂນ້ຍ.... ງານບຸນຢູ່ຫວຽດນາມແມ່ນຕິດພັນກັບໝູ່ບ້ານ, ຕາແສງ ແລະ ເປັນປັດໄຈວັດທະ ນະທຳທີ່ຂາດບໍ່ໄດ້ໃນຊີວິດຂອງປະຊາຊົນ.
ລະດູການຈັດງານບຸນຄັ້ງໃໝ່ພວມວຽນມາສູ່ທົ່ວທຸກແຫ່ງໃນເຂດບ້ານນາຂອງຫວຽດນາມ. ບັນຍາກາດທີ່ຟົດຟື້ນມ່ວນຊື່ນຂອງ ງານບຸນໄດ້ດຶງດູດການເຂົ້າຮ່ວມຂອງແຂກທ່ອງທ່ຽວມາຈາກສາລະທິດ. ທຸກໆຄົນເມື່ອເຂົ້າຮ່ວມ ງານບຸນກໍລ້ວນແຕ່ຫວັງຢາກໄດ້ສິ່ງທີ່ດີງາມ, ພາວະນາໃນປີໃໝ່, ດິນຟ້າອາກາດຈະອຳນວຍຄວາມສະດວກ, ລະດູການຜະລິດ, ການທຳມາຄ້າຂາຍຈະໄດ້ຮັບຜົນດີ. ນັກຄົ້ນຄ້ວາ ວູ້ຮົ່ງທວດ ພະນັກງານຫໍພິພິທະພັນຊົນເຜົ່າວິທະຍາໃຫ້ຮູ້ວ່າ ຈຸດລວມ ຂອງງານບຸນຍາມລະດູບານໃໝ່ ແມ່ນເລີ່ມມາຈາກຈິດໃຈສະແດງຄວາມຮູ້ບູນຄຸນຂອງມວນຊົນທີ່ມີຕໍ່ເທວະດາຟ້າແຖນ, ເຈົ້າຖິ່ນເຈົ້າຖານ. ນັກຄົ້ນຄ້ວາ ວູ້ຮົ່ງທວດ ເວົ້າວ່າ :
“ ຂັ້ນຕອນຈັດພິທີໃນງານບຸນແມ່ນສະແດງໃຫ້ເຫັນບັນດາຮູບການໄຫວ້ບູຊາ, ແຫ່, ອ່ານຄຳສະດຸດີ ແລະ ຖະຫວາຍເຄື່ອງຂອງບູຊາ. ແຕ່ໃນແຕ່ລະງານບຸນ, ແຕ່ລະໝູ່ບ້ານ ກໍລ້ວນແຕ່ມີຈຸດສະເພາະຂອງໃຜຂອງລາວ. ຈຸດສະເພາະເຫຼົ່ານັ້ນແມ່ນຍ້ອນການສືບທອດຈາກຄົນລຸ່ນນີ້ສູ່ຄົນລຸ່ນອື່ນ, ແມ່ນບັນດາສິ່ງຄະລຳ ”
ໂດຍມີລັກສະນະການເຫຼື້ອມໃສເທວະດາຟ້າແຖນໃນຊີວິດການເປັນຢູ່ຂອງ ບັນດາເຜົ່າໃນເຂດໄຕງວຽນ, ຈິດໃຈກ້າຫານອັນສູງສົ່ງໃນງານບຸນຂອງເຂົາເຈົ້າພັດມີສີສັນການເຫຼື້ອມໃສແຕ່ມີລັກສະນະວັດທະນະທຳມະນຸດ. ສາດສະດາຈານ ໂງດຶກທິ້ງ ກຳມະການໃນສະພາມໍລະດົກແຫ່ງຊາດໃຫ້ຮູ້ຄວາມໃນໃຈເມື່ອໄດ້ອ່ານບົດສະດຸດີຂ້າຄວາຍເພື່ອຖະຫວາຍບູຊາເທວະດາຟ້າແຖນ ວ່າ:
“ ເມື່ອຂ້າພະເຈົ້າໄດ້ຮັບບົດສະດຸດີ, ຂ້າພະເຈົ້າມີຄວາມສະເທື່ອນໃຈ ແລະ ໄດ້ຫຼັ່ງນ້ຳຕາຍ້ອນໄດ້ເຫັນຄວາມຮັກແພງຂອງມະນຸດ, ຄວາມອີດູສົງສານຂອງແມ່ຕູ້ຄົນໜຶ່ງທີ່ມີຕໍ່ຄວາມໂຕໜຶ່ງວ່າ : ມີ້ນີ້ມຶງກິນຫຍ້າຄາບສຸດທ້າຍ, ນັບແຕ່ນີ້ເປັນຕົ້ນໄປ, ກູຈະບໍ່ໄດ້ຍິນສຽງຮ້ອງຂອງມຶງອີກແລ້ວ, ແຕ່ມຶງຮູ້ບໍ່ວ່າ ເຂົ້າຢູ່ບ້ານເຮົາປະຈຸບັນເຫຼືອພຽງບໍ່ເທົ່າໃດ, ເພາະເທວະດາຟ້າແຖນຍັງບໍ່ທັນໄດ້ຮັບຂອງຖະຫວາຍບູຊາ, ດັ່ງນັ້ນກໍຍັງບໍ່ທັນອຳນວຍຄວາມສະດວກໃຫ້ລະດູການຜະລິດ. ດັ່ງນັ້ນທາງບ້ານຕ້ອງຂ້າມຶງເພື່ອເປັນຂອງຖະຫວາຍບູຊາ, ມຶງນີ້ເອງໄດ້ນຳມາເຊິ່ງຄວາມອີ່ມໜຳສຳລານໃຫ້ແກ່ຊາວບ້ານ”
ແຕ່ລະງານບຸນ,ເຖິງວ່າຈະໃຫຍ່ຫຼືນ້ອຍ,ຖືກຈັດຂຶ້ນຢູ່ເຂດທົ່ງພຽງຫຼືເຂດພູດອຍ ກໍຕາມ, ກໍລ້ວນແຕ່ສະແດງໃຫ້ເຫັນລັກສະນະຮ່ວມສຳພັນໃນວົງຄະນະຍາດ, ຊຶ່ງເປັນພະຍານຫຼັກຖານຢັ້ງຢືນຄວາມງາມດ້ານວັດທະນະທຳທີ່ມີມານັບພັນປີຂອງຊາດຫວຽດນາມ. ບັນດາງານບຸນສ່ວນຫຼາຍຢູ່ຫວຽດນາມ ແມ່ນເຄີຍຕິດພັນກັບເຫດການປະຫວັດສາດ, ສະແດງຄວາມຮູ້ບູນຄຸນຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດໃນສົງຄາມຕ້ານສັດຕູຜູ້ຮຸກຮານ. ນັກຄົ້ນຄ້ວາ ວູ້ຮົ່ງທວດ ເປີດເຜີຍວ່າ :
“ ໃນງານບຸນຢູ່ແຕ່ລະໝູ່ບ້ານ, ຈິດໃຈກ້າຫານ ອັນສູງສົ່ງເພື່ອມະນຸດ ດ້ວຍກັນ ໄດ້ສະແດງອອກດ້ວຍຫຼາຍຮູບຫຼາຍແບບ, ບໍ່ຄືກັນ. ຢູ່ບາງໝູ່ບ້ານ ໄດ້ສະແດງອອກຜ່ານການຕີມວຍປ້ຳ, ມີບາງໝູ່ບ້ານກໍສະແດງອອກຜ່ານຮີດຄອງປະເພນີ. ບັນດາເຜົ່າສ່ວນໜ້ອຍກໍສະແດງອອກຜ່ານການແຂ່ງຂັນຍິງທະນູ, ແຂ່ງມ້າ. ປະກົດການທີ່ຈະແຈ້ງທີ່ສຸດແມ່ນນ້ຳໃຈສາມັກຄີທົ່ວປວງຊົນ ”
ນອກຈາກບັນດາພິທີກຳເພື່ອອາໄລຫາເຖິງພາລະກິດສ້າງສາ ແລະ ປົກປັກຮັກສາປະເທດຊາດຂອງບັນດາບຸກຄົນໃນປະຫວັດສາດ, ໃນບັນດາງານບຸນ, ປະຊາຊົນຍັງໄດ້ເຂົ້າຮ່ວມບັນດາການເຄື່ອນໄຫວທີ່ຟົດຟື້ນມ່ວນຊື່ນຄື : ແຫ່ຊ້າງ, ແຫ່ວໍ, ຕີມວຍ, ຊ່ວງເຮືອ... ບັນດາການເຄື່ອນໄຫວວັດທະນະທຳກິລານີ້ ຍັງເປັນການຢັ້ງຢືນ ແລະ ເຊີດຊູກຳລັງສຸຂະພາບ ພ້ອມກັບກຳລັງແຮງທາງດ້ານຈິດໃຈຂອງບັນດາສ່ວນບຸກຄົນໃນສາຍພົວພັນກັບລວມໝູ່, ວົງຄະນະຍາດ.
ບັນດາຄວາມງາມຂອງມູນເຊື້ອພິລະອາດຫານ, ນ້ຳໃນອັນສູງສົ່ງຂອງມະນຸດທີ່ໄດ້ສະແດງອອກໃນບັນດາງານບຸນ ແມ່ນບໍ່ພຽງແຕ່ເຊີດຊູກຳລັງແຮງດ້ານສຸຂະພາບຮ່າງກາຍເທົ່ານັ້ນ, ຫາກຍັງແມ່ນກຳລັງແຮງທັງດ້ານສະຕິປັນຍາ ແລະ ຈິດວິນຍານ, ແມ່ນການເຊີດຊູຈິດໃຈນ້ຳໃຈພິລະອາດຫານໃນການຕໍ່ສູ້ຂອງມະນຸດເພື່ອພາລະກິດປົກປັກຮັກສາປະເທດຊາດ, ເພື່ອຄວາມຢູ່ເຢັນເປັນສຸກຂອງປະຊາຊົນອີກດ້ວຍ. ມີງານບຸນນັບພັນງານງານບຸນຖືກຈັດຂຶ້ນໃນທົ່ວທຸກແຖບຖິ່ນຂອງປະເທດຊາດຫວຽດນາມ, ພິເສດບັນດາງານບຸນຍາມລະດູບານໃໝ່, ອັນໄດ້ປະກອບສ່ວນຮັກສາບັນດາຄຸນຄ່າປະຫວັດສາດ, ວັດທະນະທຳຂອງຊາດຫວຽດນາມ .