ຄຸ້ມຖະໜົນເກົ່າຮ່າໂນ້ຍປະກອບດ້ວຍເຮືອນຫ້ອງແຖວ, ມີຫຼັງຄ່າຖືກມຸງດິນຂໍທີ່ເກົ່າແກ່, ແຕ່ດົນນານມາແລ້ວໄດ້ຮັບຖືວ່າແມ່ນຄວາມງາມເປັນເອກະລັກສະເພາະຂອງນະຄອນຫຼວງຮ່າໂນ້ຍ. ພ້ອມກັບການເວລາ, ໂສມໜ້າຂອງ ຄຸ້ມຖະໜົນເກົ່າຮ່າໂນ້ຍໄດ້ມີການປ່ຽນແປງໄປຫຼາຍຢ່າງ. ສຳລັບແຂກທ່ອງທ່ຽວທີ່ມາຢ້ຽມຢາມແຫ່ງນີ້ເປັນຄັ້ງທຳອິດນັ້ນ, ແມ່ນອາດຈະເຫັນຈຸດເກົ່າແກ່ຜ່ານຊື່ຂອງຖະໜົນ ແລະ ເຮືອນເກົ່າໂດຍລະອຽດ. ແຕ່ຖ້າຫາກມີໂອກາດມາຢ້ຽມຢາມຄຸ້ມຖະໜົນເກົ່າ, ໂດຍສະເພາະແມ່ນໄດ້ເຂົ້າຮ່ວມງານບຸນຢູ່ຄຸ້ມຖະໜົນເກົ່ານັ້ນ, ແຂກທ່ອງທ່ຽວສາມາດຮູ້ສຶກ ແລະ ວາດພາບໄດ້ເຖິງຊີວິດການເປັນຢູ່, ຈຸດວັດທະນະທຳພື້ນເມືອງຂອງຊາວຮ່າໂນ້ຍ.
ເຂດຕະຫຼາດຂາຍເຄື່ອງຫຼິ້ນບຸນວັນເພັງເດືອນ 8 (ພາບ:vietgiaitri.com) |
ກໍເຊັ່ນດຽວກັນກັບຫຼາຍປະເທດຢູ່ອາຊີ, ຫວຽດນາມມີບຸນວັນເພັງເດືອນ 8. ແຕ່ລະປີ ຮອດມື້ວັນເພັງເດືອນ 8 ກໍແມ່ນຍາມກາງລະດູໃບໄມ້ຫຼົ່ນ, ແລະ ກໍແມ່ນມື້ທີ່ພະຈັນເຕັມດວງ. ໃນຄວາມສຳນຶກຂອງຊາວຫວຽດນາມ, ພະຈັນເຕັມດວງ ແມ່ນປະກົດການຂອງຄວາມສົມບູນພຸນສຸກ, ເພາະສະນັ້ນໃນຄ່ຳຄືນມື້ວັນເພັງເດືອນ 8 ກໍແມ່ນໂອກາດເພື່ອໃຫ້ທຸກໆຄົນໃນຄອບຄົວໄດ້ເຕົ້າໂຮມກັນເພື່ອໂອ້ລົມຢ່າງເບີກບານມ່ວນຊື່ນ, ສ່ວນເດັກນ້ອຍກໍມີໂອກາດລະຫຼິ້ນມວນຊ່ືນ, ໄດ້ກິນເຂົ້າໜົມ, ຟ້ອນສິງໂຕ, ກະກຽມໝາກໄມ້ ເຂົ້າໜົມເພື່ອໄຫວ້ພະຈັນ. ໃນເວລາມໍ່ໃກ້ຈະຮອດບຸນວັນເພັງເດືອນ 8, ບັນຍາກາດການເຄື່ອນໄຫວຊື້ຂາຍເຄື່ອງຫຼິ້ນເດັກນ້ອຍ ແລະ ເຂົ້າໜົມ, ແມ່ນຄຶກຄື້ນມ່ວນຊື່ນຢູ່ທົ່ວທຸກບ່ອນໃນຄຸ້ມຖະໜົນເກົ່າຮ່າໂນ້ຍ. ປີນີ້ ຄະນະກຳມະການປະຊາຊົນເມືອງ ຮ່ວານກ໋ຽມ - ຮ່າໂນ້ຍ ໄດ້ຈັດງານຕະຫຼາດນັດ ແລະ ບຸນວັນເພັງເດືອນ 8 ຢູ່ຄຸ້ມຖະໜົນເກົ່າແຕ່ວັນທີ 19/9 (ກົງກັບວັນທີ 1 ເດືອນ 8 ໄລ່ຕາມຈັນທະປະຕິທິນ ) ຫາວັນທີ 30/9 (ກົງກັບວັນທີ 15 ເດືອນ 8 ໄລ່ຕາມຈັນທະປະຕິທິນ ) ເພື່ອແນໃສ່ເຊີດຊູຄຸນຄ່າດ້ານປະຫວັດສາດ, ວັດທະນະທຳແຫ່ງຊາດຂອງຄຸ້ມຖະໜົນເກົ່າຮ່າໂນ້ຍ. ທ່ານ Do Xuan Thuy ຜູ້ອຳນວຍການບໍລິສັດຫຸ້ນສ່ວນດົງຊວນ, ສະມາຊິກໃນຄະນະຈັດຕັ້ງໃຫ້ຮູ້ວ່າ :
“ບຸນວັນເພັງເດືອນ 8 ຢູ່ຄຸ້ມຖະໜົນເກົ່າປີນີ້ ແມ່ນບໍ່ພຽງແຕ່ຖືກຈັດຕັ້ງຂຶ້ນຢູ່ສະຖານທີດຽວເທົ່ານັ້ນ, ຫາກຍັງຖືກຈັດຕັ້ງຢູ່ທຸກໆບ່ອນໃນບໍລິເວນເມືອງ ຊຶ່ງຈັດຕັ້ງຢູ່ຕາມສະຖານທີເປັນມໍລະດົກວັດທະນະທຳໃນບໍລິເວນຄຸ້ມຖະໜົນເກົ່າ. ນີ້ແມ່ນຈຸດໃໝ່ເພື່ອດຶງດູດບັນດາການເຄື່ອນໄຫວ, ທັງເປັນທະວີຄູນ, ເປີດກ້ວາງການເຄື່ອນໄຫວເຫຼົ່ານີ້ໃນບໍລິເວນທົ່ວເມືອງ ”
ເຖິງແມ່ນວ່າຍັງອີກ 2 ອາທິດຈຶ່ງຈະຮອດບຸນວັນເພັງເດືອນ 8, ແຕ່ບັນຍາກາດຕ້ອນຮັບບຸນວັນເພັງເດືອນ 8 ໄດ້ຟົດຟື້ນມ່ວນຊື່ນໄປທົ່ວຄຸ້ມຖະໜົນເກົ່າ
ການຟ້ອນສິງໂຕຍາມບຸນວັນເພັງເດືອນ 8 (ພາບ : baomoi.com )
|
ສະຖານທີມີຄວາມຟົດຟື້ນມ່ວນຊື່ນກ່ວາໝູ່ ນັ້ນແມ່ນເຂດຕະຫຼາດຖະໜົນ ຮ່າງມ້າ, ຮ່າງທຽກ. ຢູ່ແຫ່ງນີ້ ມີເຄື່ອງຫຼິ້ນເດັກນ້ອຍຄົບທຸກຊະນິດຖືກວາງຂາຍຢູ່ຕາມ 2 ຂອບທາງ, ແຕ່ຫຼາຍກ່ວາໝູ່ຍັງແມ່ນໂຄມໄຟຫຼິ້ນບຸນວັນເພັງເດືອນ 8. ທ້າວ Vu Nhat Quang ຢູ່ເມືອງ ຮາຍບ່າຈຶງ ໃຫ້ຮູ້ວ່າ :
“ ຂ້າພະເຈົ້າພາລູກໄປທ່ຽວຊົມຢູ່ຖະໜົນ ຮ່າງມ້າ ແລະ ຖະໜົນບາງສາຍອື່ນຢູ່ໃນບໍລິເວນຄຸ້ມຖະໜົນເກົ່າຮ່າໂນ້ຍ. ບ່ອນໃດມ່ວນກໍໄປ ”
ບໍ່ສະເພາະແຕ່ເດັກນ້ອນເທົ່ານັ້ນ, ຫາກຍັງມີຊາວໜຸ່ມຫຼາຍຄົນມັກໄປທ່ຽວຊົມຕະຫຼາດຄຸ້ມຖະໜົນເກົ່າເພື່ອເລືອກຊື້ເຄື່ອງຫຼິ້ນໃຫ້ແກ່ຕົນອີກດ້ວຍ. ນາງ Vu Thi Thuy ໄປຊື້ເຄື່ອງປັ້ນ ຕໍ່ແຮ ຢູ່ຕະຫຼາດຄຸ້ມຖະໜົນເກົ່າ ເປີດເຜີຍວ່າ :
“ ມື້ວານນີ້, ນ້ອງໄດ້ອ່ານໜັງສືພິມ ແລະ ຮູ້ວ່າ ຄຸນຄ່າທີ່ເປັນປະເພນີຂອງບຸນວັນເພັງເດືອນ 8 ປະຈຸບັນ ໄດ້ຖືກສູນຫາຍໄປສ່ວນໃດສ່ວນໜຶ່ງ. ນ້ອງຄິດວ່າ ນ້ອງໄປຊື້ ເຄື່ອງປັ້ນ ຕໍ່ແຮນີ້ ກໍເປັນການປະກອບສ່ວນຮັກສາສິ່ງທີ່ເກົ່າແກ່ໃດໜຶ່ງຂອງຮ່າໂນ້ຍເມື່ອກ່ອນນີ້ ”
ການເຄື່ອນໄຫວສຸດຍອດຂອງບຸນວັນເພັງເດືອນ 8 ຢູ່ຄຸ້ມຖະໜົນເກົ່າຮ່າໂນ້ຍແມ່ນໃນຄ່ຳຄືນວັນທີ 14 ເດືອນ 8 ໄລ່ຕາມຈັນທະປະຕິທິນ, ມີປະຊາຊົນນັບພັນຄົນພາກັນຫຼັ່ງໄຫຼມາຄຸ້ມຖະໜົນເກົ່າ ຍ່າງລຽບຕາມຖະໜົມສະຫງວນໃຫ້ຄົນຍ່າງຄື ຖະໜົນຮ່າງດາວ, ຮ່າງງາງ, ຮ່າງເດືອງ, ດົງຊວນ ແລະ ຖະໜົມຕ່າງໆອ້ອມແອ້ມໜອງ ໂຮ່ຮ່ວານກ໋ຽມ ໃນທ່າມກາງແສງໂຄມໄຟຫຼາກຫຼາຍສີ ແລະ ສຽງກອງສຽງຄ້ອງຮັບໃຊ້ການຟ້ອນສິງໂຕ, ຟ້ອນມັງກອນ..... ທ່ານນາງ Cao Bich Lan ຮອງປະທານຄະນະກຳມະການປະຊາຊົນເມືອງ ຮ່ວານກ໋ຽມ ໃຫ້ຮູ້ວ່າ : “ ສຳລັບການເຄື່ອນໄຫວຂອງ ບຸນວັນເພັງເດືອນ 8 ຢູ່ຄຸ້ມຖະໜົນເກົ່າຮ່າໂນ້ຍປີນີ້, ພວກຂ້າພະເຈົ້າຢາກມີບັນດາການເຄື່ອນໄຫວຢູ່ຕາມເຂດຊຸມຊົນໃນ ຄຸ້ມຖະໜົນເກົ່າ. ພິເສດແມ່ນສຳລັບເຮືອນເກົ່າ 4 ຫຼັງທີ່ເປັນມໍລະດົກໃນບໍລິເວນ ຄຸ້ມຖະໜົນເກົ່າຮ່າໂນ້ຍນັ້ນ, ໄດ້ຈັດການເຄື່ອນໄຫວຫຼາຍຢ່າງທີ່ມີຊີວິດຊີວາຄື ງານວາງສະແດງຮູບແຕ້ມ, ຈັດຕັ້ງໃຫ້ພວກນາຍຊ່າງສະແດງສີມືເຮັດເຄື່ອງຫຼິ້ນ....ຜ່ານນີ້, ແຂກທ່ອງທ່ຽວ ແລະ ພວກເດັກສາມາດຮູ້ສຶກ ແລະ ວາດພາບເຖິງ ບຸນວັນເພັງເດືອນ 8 ເມື່ອກ່ອນນີ້ ”
ບຸນວັນເພັງເດືອນ 8 ຢູ່ຄຸ້ມຖະໜົນເກົ່າຖືກຈັດຂຶ້ນໃນແຕ່ລະປີ, ຊຶ່ງບໍ່ພຽງແຕ່ປະກອບສ່ວນຮັກສາຈຸດວັດທະນະທຳພື້ນເມືອງເທົ່ານັ້ນ, ຫາກຍັງແນະນຳ ໃຫ້ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດຮັບຊາບກ່ຽວກັບ ບຸນວັນເພັງເດືອນ 8 ທີ່ເປັນປະເພນີ ແລະ ແມ່ນຄວາມງາມດ້ານວັດທະນະທຳໃນຊີວິດການເປັນຢູ່ຂອງປະຊາຊົນໃນຄຸ້ມຖະໜົນເກົ່າຮ່າໂນ້ຍ.