ຮູບພາບຕົ້ນໄມ້ໄຜ່ຍາມໃດກໍຕິດພັນກັບຊີວິດການເປັນຢູ່ຂອງຊາວຫວຽດນາມ
(ພາບ: vanhoadoisong.com.vn)
|
vovworld - ແຕ່ດົນນານມາແລ້ວ, ຮູບພາບຕົ້ນໄມ້ໄຜ່ຍາມໃດກໍຜູກພັນ ຢ່າງສະໜິດແໜ້ນ ກັບຊີວິດການເປັນຢູ່ຂອງຊາວຫວຽດນາມ. ໃນໄລຍະປົກປັກຮັກສາປະເທດຊາດ, ໄມ້ໄຜ່ໄດ້ກາຍເປັນອາວຸດຕ້ານສັັດຕູຜູ້ຮຸກຮານ ແລະ ໃນໄລຍະສັນຕິພາບ, ໄມ້ໄຜ່ໄດ້ຖືກນຳໃຊ້ເພື່ອຜະລິດເຄື່ອງໃຊ້ພາຍໃນເຮືອນ. ໃນວິວັດທະນາການເຊື່ອມໂຍງເຂົ້າກັບເສດຖະກິດສາກົນ, ບັນດາຜະລິດຕະພັນທີ່ເຮັດດ້ວຍໄມ້ໄຜ່ໄດ້ກາຍເປັນສິນຄ້າປະເພດເຄື່ອງສິລະປະຫັດຖະກຳທີ່ມີຄວາມງາມສູງ ແລະ ໄດ້ຮັບຄວາມນິຍົມຊົມຊອບຈາກແຂກຕ່າງປະເທດ.
ນັບແຕ່ໃດໆມາ, ແຖວຕົ້ນໄມ້ໄຜ່ຂຽວອຸ່ມທຸ່ມ ຍາມໃດກໍກາຍເປັນຮູບພາບຂອງບັນດາໝູ່ບ້ານເຂດບ້ານນາທີ່ລຽບງ່າຍ ແລະ ສະໜິດຕິດພັນ. ເກືອບຄືວ່າກົກໄມ້ ໄຜ່ໄດ້ປະກົດມີຢູ່ທຸກໆແຫ່ງຫົນໃນທົ່ວປະເທດ ແລະ ຜູກພັນ ຢ່າງສະໜິດແໜ້ນ ກັບວົງຄະນະຍາດບັນດາເຜົ່າຫວຽດນາມ. ຕົ້ນໄມ້ໄຜ່ໄດ້ເຂົ້າສູ່ພື້ນຖານວັດທະນະທຳຫວຽດນາມຄືດັ່ງຮູບພາບທີ່ລຽບງ່າຍ ແລະ ເຕັມໄປດ້ວຍພະລັງຊີວິດ. ນີ້ແມ່ນຕົ້ນໄມ້ຊະນິດໜຶ່ງທີ່ທົນທານໜຽວແໜ້ນ, ສາມາດທົນທານຕໍ່ກັບໄພທຳມະຊາດ, ພາຍຸລົມແຮງ. ແຕ່ດົນນານມາແລ້ວ, ຮູບພາບຕົ້ນໄມ້ໄຜ່ໄດ້ປະກົດຕົວໃນເລື່ອງລາວພື້ນເມືອງທີ່ເລົ່າຂານກັນມາກ່ຽວກັບນັກວິລະຊົນ Thanh Giong ດ້ວຍວິລະກຳນຳໃຊ້ຕົ້ນໄມ້ໄຜ່ຕີສັດຕູເພື່ອປົກປັກຮັກສາປະເທດຊາດ. ສ່ວນໃນຊີວິດປະຈຳວັນ, ໄມ້ໄຜ່ຖືກນຳໃຊ້ດ້ວຍຄຸນປະໂຫຍດຫຼາຍຢ່າງຄື ຈາກການປຸກສ້າງເຮືອນຢູ່, ເຮັດເຄື່ອງຈັກສານຕະຫຼອດຮອດໄມ້ຖູ່ເພື່ອຮັບໃຊ້ການຮັບປະທານອາຫານ ແລະ ອື່ນໆ.
ຊຸດໂຕະຕັ່ງຖືກເຮັດດ້ວຍໄມ້ໄຜ່ (ພາບ: vanhoadoisong.com.vn)
|
ໃນທຸກວັນນີ້, ຮູບພາບຕົ້ນໄມ້ໄຜ່ກໍຍັງຍືນຍົງຄົງຕົວກັບການດຳລົງຊີວິດຂອງປະຊາຊົນ. ໄມ້ໄຜ່ ແລະ ບັນດາຜະລິດຕະພັນຈາກໄມ້ໄຜ່ ໄດ້ ແລະ ພວມຊ່ວຍໃຫ້ຫຼາຍໝູ່ບ້ານສາມາດຫຼຸດພົ້ນອອກຈາກຄວາມທຸກຍາກຍ້ອນ ມີການພັດທະນາໝູ່ບ້ານອາຊີບຫັດຖະກຳ. ມີວິສາຫະກິດຫຼາຍແຫ່ງສາມາດນຳລາຍໄດ້ນັບລ້ານ USD / ປີ ຈາກການສົ່ງອອກ ບັນດາຜະລິດຕະພັນໄມ້ໄຜ່. ລຸງ Nguyen Thanh Phong ຊາວນະຄອນຫຼວງຮ່າໂນ້ຍ ໃຫ້ຂໍ້ສັງເກດວ່າ :
“ຜະລິດຕະພັນໄມ້ໄຜ່ໃນທຸກວັນນີ້ ແມ່ນມີແຫຼ່ງວັດຖຸດິບຢ່າງຫຼວງຫຼາຍ, ຍິ່ງໄປກ່ວານັ້ນ, ທາງດ້ານຄວາມປານີດຂອງບັນດາ ບັນດາຜະລິດຕະພັນຈາກໄມ້ໄຜ່ໃນປະຈຸບັນແມ່ນເຮັດດີທີ່ສຸດ. ຂ້າພະເຈົ້າຫາກໍປຸກເຮືອນໃໝ່, ດັ່ງນັ້ນຂ້າພະເຈົ້າຢາກ ຊອກຫາບັນດາຜະລິດຕະພັນເຮັດດ້ວຍໄມ້ໄຜ່, ບໍ່ພຽງແຕ່ຍ້ອນລາຄາຖືກເທົ່ານັ້ນ, ຫາກຍັງມີຄຸນນະພາບດີກ່ວາ ຜະລິດຕະພັນໄມ້ອີກດ້ວຍ”
ບໍ່ພຽງແຕ່ໃຊ້ເປັນວັດສະດຸກໍ່ສ້າງເທົ່ານັ້ນ, ມີຫຼາຍກິດຈະກຳສະຖາປັດ ຕະຍະກຳທີ່ອີງໃສ່ແນວຄວາມຄິດນຳໃຊ້ວັດຖຸດ້ວຍ ໄມ້ໄຜ່ຂອງບັນດານັກສະຖາປານິກຫວຽດນາມໄດ້ຮັບການຕີລາຄາສູງຈາກສາກົນອີກດ້ວຍ. ພິເສດກິດຈະກຳສະຖາປັດຕະຍະກຳທີ່ໃຊ້ວັດສະດຸດ້ວຍໄມ້ໄຜ່ທີ່ມີຊື່ວ່າ : “ Bar Cafe ລົມ ແລະ ນ້ຳ ” ຢູ່ແຂວງບີງເຢືອງຂອງນັກສະຖາປານິກ Vo Trong Nghia ຂອງຫວຽດນາມ ໄດ້ຮັບຫຼຽນຄຳທີ່ງານປະກວດຂອງສະມາຄົມ ນັກສະຖາປານິກອາຊີປີ 2007-2008 . ກິດຈະກຳດັ່ງກ່າວກໍຍັງໄດ້ຮັບລາງວັນ ສະຖາປັດຕະຍະກຳສາກົນ International Architecture Award ( IAA) ອາເມລິກາ ປີ 2009. ດ້ວຍການອອກແບບທີ່ລຽບງ່າຍນັ້ນ, ບັນດາກິດຈະກຳນີ້ ໄດ້ໃຊ້ເຕັກນິກຢ່າງຄ່ອງແຄ້ວເມື່ອໄດ້ນຳຕົ້ນໄມ້ໄຜ່ຫວຽດນາມເຂົ້າໃນແນວຄວາມຄິດ ສະຖາປັດຕະຍະກຳແຕ່ລະຢ່່າງເພື່ອປະດັບປະດາ, ສ້າງຮູບຊົງໃຫ້ແກ່ເຮືອນຫຼັງນີ້. ທ່ານ Bui Thanh Luong ສັງກັດບໍລິສັດຫຸ້ນສ່ວນ Gio va nuoc ໃຫ້ຂໍ້ສັງເກດວ່າ :
“ ນີ້ແມ່ນກິດຈະກຳທີ່ເປັນເອກະລັກສະເພາະ. ຂ້າພະເຈົ້າໄດ້ເຄີຍເຮັດວຽກໃນຂະແໜງທ່ອງທ່ຽວເປັນເວລາ 16 ປີແລ້ວ, ໄດ້ໄປຢ້ຽມຢາມໂຮງແຮມຫຼາຍແຫ່ງຢູ່ປະເທດຕ່າງໆໃນໂລກ, ແຕ່ຂ້າພະເຈົ້າຍັງບໍ່ທັນເຫັນກິດຈະກຳໃດທີ່ມີຄວາມເປັນເອກະລັກສະເພາະຄືກິດຈະກຳນີ້. ໂດຍທົ່ວໄປແລ້ວ, ຢູ່ປະເທດຕ່າງໆໃນໂລກ, ເຂົາເຈົ້າເຄີຍກໍ່ສ້າງດ້ວຍວັດສະດຸເບຕົງເປັນຕົ້ນຕໍ, ຫຼືເຂົາເຈົ້າເຮັດດ້ວຍໄມ້, ແຕ່ສະເພາະ ກິດຈະກຳນີ້, ຖືກເຮັດດ້ວຍໄມ້ໄຜ່ເກືອບທັງໝົດ. ສິ່ງນີ້ໄດ້ເຮັດໃຫ້ຂ້າພະເຈົ້າຊົມຊອບທີ່ສຸດ ຍ້ອນຜູ້ຄົນທັງຫຼາຍມັກເວົ້າວ່າ : ຕົ້ນໄມ້ໄຜ່ແມ່ນສັນຍາລັກໃຫ້ແກ່ຊາວຫວຽດນາມ ”
ສ່ວນນັກສະຖາປານິກ Vo Trong Nghia ໃຫ້ຮູ້ວ່າ :
“ ໄມ້ໄຜ່ແມ່ນວັດສະດຸທີ່ບໍ່ສະໝ່ຳສະເໝີ ແລະ ເປັນການຍາກໃນການເຮັດໂຄງສ້າງໃຫຍ່. ແຕ່ເຖິງຢ່າງໃດກໍດີ, ເມື່ອເຮົາສາມາດແກ້ໄຂຄວາມຫຍຸ້ງຍາກນັ້ນໄດ້ ມັນກໍເປັນໂຄງສ້າງທີ່ເປັນເອກະລັກສະເພາະເມື່ອທຽບໃສ່ການເຮັດດ້ວຍເບຕົງ ຫຼືເຫຼັກກ້າ. ເພາະສະນັ້ນ, ໄມ້ໄຜ່ມີທ່າແຮງທາງດ້ານຄວາມປານີດ, ມັນສາມາດເຮັດຕາມຮູບໂຄ້ງແບບທຳມະຊາດ ແລະ ມີຄວາມງາມເມື່ອທຽບໃສ່ວັດສະດຸອື່ນໆ ”
ໄມ້ໄຜ່ໄດ້ຮັບການຕີລາຄາວ່າແມ່ນໜຶ່ງໃນບັນດາວັດສະດຸຂອງສະຕະວັດທີ່ 21, ຍ້ອນຄວາມສະໜິດຕິດພັນກັບສິ່ງແວດລ້ອມ. ຍ້ອນເຫດນີ້ເອງ, ມີຫຼາຍ ກິດຈະກຳສະຖາປັດຕະຍະກຳ, ວັດສະດຸກໍ່ສ້າງ, ເຄື່ອງປະດັບຢູ່ຫຼາຍປະເທດໃນໂລກລ້ວນແຕ່ມຸ່ງໄປສູ່ການນຳໃຊ້ ໄມ້ໄຜ່. ເລື່ອງເພີ່ມທະວີການໂຄສະນາບັນດາຜະລິດຕະພັນສົ່ງອອກທີ່ເຮັດດ້ວຍ ໄມ້ໄຜ່ ກໍເປັນການປະກອບສ່ວນຢັ້ງຢືນຄວາມ ຄ່ອງແຄ້ວ, ຄວາມປານີດໃນບັນດາຜະລິດຕະພັນ, ກິດຈະກຳທີ່ມີສີສັນຂອງຫວຽດນາມ.