ການຟື້ນຟູງານບຸນໂຄມໄຟກວາງຈ້ຽວ ແມ່ນຮູບການໜຶ່ງເພື່ອເຊີດຊູ ຄຸນຄ່າ ມໍລະດົກວັດທະນະທຳໂລກ - ພະລາດຊະວັງ ທັງລອງ
(ພາບ : baomoi.com)
|
ມີເຫດການວັດທະນະທຳໜຶ່ງໄດ້ຮັບຄວາມສົນໃຈ ແລະ ຕອບສະໜອງຈາກບັນດານັກຄົ້ນຄ້ວາວັດທະນະທຳ ແລະ ບັນດາຜູ້ຊົມຊອບຮ່າໂນ້ຍ, ນັ້ນແມ່ນແນວຄວາມຄິດຟື້ນຟູງານບຸນໂຄມໄຟກວາງຈ້ຽວຢູ່ເຂດປູຊະນີຍະສະຖານພະລາດຊະວັງ ທັງລອງ. ແນວຄວາມຄິດນີ້ແມ່ນຫາກໍໄດ້ຮັບລາງວັນ “ ບຸຍຊວນຟ້າຍ-ເພື່ອຄວາມຮັກຮ່າໂນ້ຍ ” . ນັກຊ່ຽວຊານຫຼາຍຄົນຖືວ່າ : ຖ້າຫາກແນວຄວາມຄິດນີ້ປະກົດຜົນເປັນຈິງນັ້ນ, ເຂດປູຊະນີຍະສະຖານພະລາດຊະວັງ ທັງລອງ ຊຶ່ງແມ່ນມໍລະດົກວັດທະນະທຳໂລກ, ຈະສາມາດຊອກຫາວິນຍານພ້ອມກັບບັນດາຄຸນຄ່າວັດທະນະທຳມີຮູບຮ່າງທີ່ມີຢູ່ແລ້ວ.
ຕາມບັນດາເອກະສານເກົ່າ, ງານບຸນໂຄມໄຟກວາງຈ້ຽວແມ່ນງານບຸນແສງສະຫວ່າງພະລາດຊະວັງ ຊຶ່ງໄດ້ມີມາແຕ່ສະໄໝລາດຊະວົງຫຼີ( ສະຕະວັດທີ່ 12 ) ຈົນຮອດສະໄໝລາດຊະວົງເຈີນ( ສະຕະວັດ 13-14) ແລະ ເຄີຍຖືກດຳເນີນຢູ່ໃນພະລາດຊະວັງທັງລອງ. ບັນດານັກຄົ້ນຄ້ວາຖືວ່າ: ເຈົ້າຊີວິດອົງຕ່າງໆໃນສະໄໝລາດຊະວົງຫຼີ, ເຈີນ ແມ່ນເຄົາລົບນັບຖືສາດສະໜາພຸດ, ດັ່ງນັ້ນຈຸດປະສົງຂອງການເປີດ ງານບຸນໂຄມໄຟກວາງຈ້ຽວແມ່ນບໍ່ພຽງແຕ່ເພື່ອນຳແສງສະຫວ່າງທີ່ຮຸ່ງໄສຂອງສາສະໜາພຸດມາສູ່ເຈົ້າຊີວິດ, ພະລາດຊະວັງເທົ່ານັ້ນ, ຫາກຍັງນຳມາສູ່ມວນຊົນນັບທັງຢູ່ພາຍໃນປະເທດກໍຄືປະເທດບ້ານໃກ້ເຮືອນຄຽງອີກດ້ວຍ. ສາດສະດາຈານ Phan Huy Le ປະທານສະມາຄົມວິທະຍາສາດປະຫວັດສາດຫວຽດນາມໃຫ້ຮູ້ວ່າ
“ ຂ້າພະເຈົ້າຮູ້ສຶກປະທັບໃຈໃນ ງານບຸນໂຄມໄຟກວາງຈ້ຽວ, ເພາະວ່ານີ້ແມ່ນງານບຸນວັດທະນະທຳ ທັງມີລັກສະນະສາສະໜາ, ທັງມີລັກສະນະພະລາດຊະວັງ, ລັກສະນະພື້ນເມືອງ. 3 ລັກສະນະນີ້ປະສົມເຂົ້າກັນ ແມ່ນສາມາດເຮັດໃຫ້ງານບຸນມີຄວາມໝາຍທີ່ສຸດ ”
ຜ່ານການຜັນປ່ຽນຂອງປະຫວັດສາດ, ງານບຸນໂຄມໄຟກວາງຈ້ຽວ ໄດ້ໂກສູນຫາຍໄປ, ແຕ່ມາຮອດປະຈຸບັນ, ບັນດານັກຄົ້ນຄ້ວາໄດ້ຊອກຫາເອກະສານ, ວັດຖຸພັນແຫ່ງປະຫວັດສາດຫຼາຍຢ່າງທີ່ສາມາດພິສູດໃຫ້ເຫັນການຄົງຕົວຂອງງານບຸນນີ້. ປຶ້ມ “ ດ້າຍຫວຽດປະຫວັດສາດ ” ປີ 1110 ໄດ້ບັນທຶກວ່າ: ເດືອນຈຽງຍາມລະດູບານໃໝ່, ຈັດຕັ້ງ ງານບຸນໂຄມໄຟກວາງຈ້ຽວຢູ່ນອກປະຕູ ດ້າຍຮຶງ. ສ່ວນປຶ້ມ “ ດ້າຍຫວຽດປະຫວັດສາດຄົບຊຸດ ” ປິ 1126 ໄດ້ບັນທຶກວ່າ: “ ເດືອນຍີ່ຍາມລະດູບານໃໝ່, ເປີດ ງານບຸນໂຄມໄຟກວາງຈ້ຽວໃນ 7 ວັນຄືນ. ພິເສດໃນແຜ່ນສີລາຢູ່ວັດ ລອງດ້ອຍ ແຂວງຮ່ານາມໃນວັນນີ້ ມີບົດປະພັນໃນສະໃໝລາດຊະວົງຫຼີ, ແຕ່ງເມື່ອປີ 1121 ຊຶ່ງໄດ້ພັນລະນາໂດຍລະອຽດກ່ຽວກັບງານບຸນນີ້.
“ ກວາງຈ້ຽວ ” ຕາມພາສາຫວຽດເດີມແມ່ນໝາຍຄວາມວ່າ ສ່ອງແສງ , ຄືສ່ອງແສງສະຫວ່າງສູ່ບ່ອນທີ່ມືດມົວ, ປຸກລຸກຄວາມເມດຕາກະລຸນາໃນຈິດໃຈຂອງແຕ່ລະຄົນ, ພາວະນາໃຫ້ພະພຸດທະເຈົ້າອູ້ມຊູຊ່ວຍເຫຼືອມີຊີວິດຍືນຍາວ, ຂຸຂະພາບເຂັ້ມແຂງ. ແຕ່ຄວາມໝາຍລວມຂອງງານບຸນແມ່ນເພື່ອພາວະນາໃຫ້ປະເທດຊາດມີສັນຕິພາບ, ສົມບູນພຸນສຸກ ແລະ ຈະເລີນຮຸ່ງເຮືອງ. ຕາມບັນດານັກຄົ້ນຄ້ວາວັດທະນະທຳປະຫວັດສາດແລ້ວ, ການຟື້ນຟູງານບຸນໂຄມໄຟກວາງຈ້ຽວ ຈະເປັນການປະກອບສ່ວນຟື້ນຟູວັດທະນະທຳເຫຼື້ອມໄສທີ່ເປັນເອກະລັກສະເພາະຂອງກຸງເກົ່າ ທັງລອງ. ປະຈຸບັນ, ແນວຄວາມຄິດນີ້ພວມໄດ້ຮັບການສະໜັບສະໜູນຢ່າງສຸດໃຈຈາກບັນດານັກຄົ້ນຄ້ວາວັດທະນະທຳ, ນັກຄົ້ນຄ້ວາ ສາດສະໜາ ແລະ ປະຊາຊົນຢ່າງຫຼວງຫຼາຍ. ທ່ານ Tran Duc Hiep ພະນັກງານຂະແໜງທ່ອງທ່ຽວນະຄອນຮ່າໂນ້ຍ ໃຫ້ຂໍ້ສັງເກດວ່າ :
“ ເລື່ອງຂຸດຄົ້ນເຂດປູຊະນີຍະສະຖານພະລາດຊະວັງ ທັງລອງ ແມ່ນໄດ້ຊອກເຫັນສາງມໍລະດົກ, ກິດຈະກຳສະຖາປັດຕະຍະກຳ ບູຮານຄະດີທີ່ປະເສີດເລີດລ້ຳ, ເຮັດໃຫ້ລຸ່ນຄົນໃນອະນາຄົດສາມາດເຂົ້າໃຈໄດ້ສ່ວນໃດສ່ວນໜຶ່ງກ່ຽວກັບໄລຍະທາງແຫ່ງປະຫວັດສາດ, ນ້ຳໃຈຕ້ານສັດຕູຜູ້ຮຸກຮານຂອງຄົນລຸ່ນກ່ອນ. ຂ້າພະເຈົ້າມີຄວາມຕົກສະເງີ້ ແລະ ຕື້ນຕັນໃຈເມື່ອເປັນຄັ້ງທຳອິດໄດ້ຮັບຊົມເຄື່ອງປັ້ນດິນເຜົາຊະນິດຕ່າງໆຢ່າງລະອຽດອ່ອນທີ່ສຸດຊຶ່ງໄດ້ຮັບການຜະລິດກ່ອນນີ້ນັບພັນປີ. ຂ້າພະເຈົ້າບໍ່ສາມາດເຂົ້າໃຈວ່າ ພວກປູຍ່າຕາຍາຍໄດ້ຜະລິດເຄື່ອງເຫຼົ່ານັ້ນດ້ວຍ ວິທີໃດ, ແຕ່ເຊື່ອແນວ່າ ບັນດາຜູ້ຜະລິດ ແມ່ນຕ້ອງມີຊີວິດທີ່ອຸດົມສົມບູນ, ມີຄວາມປານິດ ແລະ ສືມືຄ່ອງແຄ້ວທີ່ສຸດ. ປະຈຸບັນ, ເປັນໜ້າພາກພູມໃຈຖ້າຫາກໄດ້ເຫັນຮູບພາບງານບຸນປະເພນີທີ່ມີມາກ່ອນນີ້ນັບພັນປີ. ຂ້າພະເຈົ້າພວມຄ່ອຍຖ້າຮັບຊົມ, ເພາະວ່າມັນຈະຊ່ວຍຂ້າພະເຈົ້າສາມາດເຂົ້າໃຈກ່ຽວກັບຊີວິດດ້ານຈິດໃຈຂອງຊາວຫວຽດເດີມຄືແນວໃດ ”
ຕາມທ່ານ ດຣ Nguyen Viet Chuc ຫົວໜ້າສະຖາບັນຄົ້ນຄ້ວາວັດທະນະທຳທັງລອງແລ້ວ, ແນວຄວາມຄິດຟື້ນຟູ ງານບຸນໂຄມໄຟກວາງຈ້ຽວ ແມ່ນພວມຢູ່ໃນໄລຍະຄົ້ນຄ້ວາ ແລະ ຕ້ອງເຮັດຢ່າງລະອຽດແລ້ວ, ຈຶ່ງກ້າວໄປສູ່ການສ້າງບົດລະຄອນຂອງງານບຸນ. ຕາມທ່ານແລ້ວ, ການຟື້ນຟູງານບຸນທີ່ມີມາກ່ອນນີ້ນັບພັນປີ ໃຫ້ຄືດັ້ງເດີມແມ່ນເປັນການຍາກທີ່ສຸດ ແລະ ພຽງສາມາດຟື້ນຟູຈຸດຕ່າງໆທີ່ເປັນພື້ນຖານຂອງງານບຸນເທົ່ານັ້ນ. ເມື່ອກ່ອນນີ້, ໃນງານບຸນແມ່ນໃຊ້ຕະກຽງ ແລະ ທູບ, ແຕ່ຖ້າຫາກນຳໃຊ້ມັນ ແມ່ນບໍ່ແທດເໝາະກັບສະຕະວັດທີ່ 21, ດັ່ງນັ້ນຕ້ອງຂຸດຄົ້ນປັດໃຈປະເພນີ ແລະ ທັນສະໄໝ. ແນວຄິດປະເທດຊາດສັນຕິພາບ, ປະຊາຊົນມີຄວາມອີ່ມໜຳສຳລານ ແລະ ສົມບູນພຸນສຸກແມ່ນບໍ່ພຽງແຕ່ຄົງຕົວໃນບັນດາສະໄໝສັກດີນາເທົ່ານັ້ນ, ຫາກຍັງຄົງຕົວຕະຫຼອດຮອດຍຸກສະໄໝໂຮ່ຈິມິນອີກດ້ວຍ. ແລະ ດ້ວຍແນວຄິດດັ່ງກ່າວ, ງານບຸນໂຄມໄຟກວາງຈ້ຽວ ບໍ່ພຽງແຕ່ສາມາດສ້າງວິນຍານ ມໍລະດົກວັດທະນະທຳພະລາດຊະວັງ ທັງລອງ ເທົ່ານັ້ນ, ຫາກຍັງເຮັດໃຫ້ພາບພົດຂອງປະເທດຊາດ ແລະ ຊາວຫວຽດນາມສວຍງາມຂຶ້ນຕື່ມ.