ໝູ່ບ້ານວ້ອງຫງວຽດ ທີ່ຂຶ້ນກັບຕາແສງຕາມຢາງເມືອງ ອຽນຟອງ ແຂວງບັກນິງ ບົນເສັ້ນທາງປ່ຽນແປງໃໝ່
(ພາບ: baobacninh)
|
ໝູ່ບ້ານວ້ອງຫງວຽດ ຕັ້ງຢູ່ແຄມແມ່ນ້ຳເກົາ ທີ່ຂຶ້ນກັບຕາແສງຕາມຢາງເມືອງ ອຽນຟອງ ແຂວງບັກຢາງ, ແຕ່ດົນນານມານີ້, ບໍ່ພຽງແຕ່ມີຊື່ສຽງດ້ວຍອາຊີບຕ່ຳຜ້າສາວໄໝເທົ່ານັ້ນ, ຫາກຍັງມີຊື່ສຽງໄປດ້ວຍມູນເຊື້ອມັກການຮ່ຳຮຽນ. ມູນເຊື້ອທີ່ດີງາມນີ້ຖືກຊາວບ້ານລຸ່ນຕ່າງໆຮັກສາໃຫ້ຍືນຍົງຄົງຕົວກັບການເວລາ. ມາຮອດປະຈຸບັນ, ໄປພ້ອມກັບການຮັກສາອາຊີບຫັດຖະກຳທີ່ມີມາແຕ່ດົນນານນັ້ນ, ຊາວບ້ານແຫ່ງນີ້ ຍັງຄົງເຊີດຊູ ມູນເຊື້ອມັກການຮ່ຳຮຽນ ແລະ ຖືວ່ານີ້ແມ່ນຄວາມເອກອ້າງທະນົງໃຈຂອງໝູ່ບ້ານເຂດບ້ານນາແຫ່ງອະລິຍະທຳ.
ວ້ອງຫງວຽດ ໝາຍເຖິງການຊົມພະຈັນ ແມ່ນໝູ່ບ້ານເກົ່າແກ່ທີ່ມີປະຫວັດສາດມາແຕ່ດົນນານດ້ວຍອາຊີບຫັດຖະກຳທີ່ມີມາແຕ່ດົນນານ, ການປູກມອນລ້ຽງມ້ອນ, ສາວໄໝຕ່ຳຜ້າ. ໃນປະຫວັດສາດແຫ່ງການຂະຫຍາຍຕົວ, ໝູ່ບ້ານອາຊີບວ້ອງຫງວຽດ ບໍ່ພຽງແຕ່ແມ່ນແຫ່ງທີ່ຜະລິດອອກບັນດາຜະລິດຕະພັນແພໄໝທີ່ຊື່ສຽງໃນທົ່ວປະເທດເທົ່ານັ້ນ, ຫາກຢູ່ແຫ່ງນີ້ຍັງລືຊື່ໄປດ້ວຍໝູ່ບ້ານເຂດດິນທີ່ມີ ມູນເຊື້ອມັກການຮ່ຳຮຽນອີກດ້ວຍ. ໃນທຸກໄລຍະ, ໝູ່ບ້ານວ້ອງຫງວຽດລ້ວນແຕ່ມີຜູ້ຮຽນເກັ່ງ ເສັງໄດ້ຄະແນນດີ. ໃນສະໄໝສັກດີນາ, ຫຼາຍວົງຕະກູນໃນ ໝູ່ບ້ານວ້ອງຫງວຽດສາມາດເສັງໄດ້ຄະແນນດີ, ໃນນັ້ນ ພົ້ນເດັ່ນຂຶ້ນ ແມ່ນວົງຕະກູນໂງ ຜ່ານ 5 ລຸ່ນຄົນຢ່າງລຽນຕິດມີຜູ້ເສັງໄດ້ລະດັບປະລິນຍາເອກ. ນອກຈາກວົງຕະກູນໂງແລ້ວນັ້ນ, ກໍຍັງມີວົງຕະກູນຫງວຽນ, ວົງຕະກູນຈູ ມີຫຼາຍຄົນ ຮຽນເກັ່ງ ເສັງໄດ້ຄະແນນດີ. ໃນປະຫວັດສາດແຫ່ງການສ້າງສາປະເທດຊາດ, ສະເພາະແຕ່ ໝູ່ບ້ານວ້ອງຫງວຽດມີ 8 ຄົນສາມາດເສັງໄດ້ລະດັບປະລິນຍາເອກ ແລະ ໄດ້ຖືກຄວັດຊື່ໃສ່ແຜ່ນສີລາຢູ່ວັນມ໋ຽວກວ໋ກຕືຢ້າມຊຶ່ງແມ່ນມະຫາວິທະຍາໄລແຫ່ງທຳອິດຂອງຫວຽດນາມ. ໃນທຸກວັນນີ້, ເພື່ອສືບທອດມູນເຊື້ອມັກການຮ່ຳຮຽນ, ໝູ່ບ້ານວ້ອງຫງວຽດຍັງແມ່ນແຫ່ງໃຫ້ກຳເນີດຜູ້ທີ່ມີຄວາມເກັ່ງກ້າສາມາດເພື່ອ ປະກອບສ່ວນໃຫ້ແກ່ປະເທດຊາດ. ມາຢ້ຽມຢາມໝູ່ບ້ານວ້ອງຫງວຽດໃນວັນນີ້, ເລື່ອງເບິ່ງແຍງການຮ່ຳຮຽນໃຫ້ແກ່ລູກເຕົ້າຍັງຄົງຖືກຊາວບ້ານຮັບຖືເປັນສຳຄັນ. ຢູ່ໝູ່ບ້ານວ້ອງຫງວຽດ, ໃຜໆກໍຮູ້ຈັກຄອບຄົວລຸງ ຈູກວາງຕວ໋ນ ມີລູກສາວ 2 ຄົນຮຽນເກັ່ງທີ່ສຸດ. ລຸງ ຈູກວາງຕວ໋ນ ເປີດເຜີຍວ່າ:
“ ຂ້າພະເຈົ້າໃນອະດີດເປັນທະຫານ, ສ່ວນເມັຍຂ້າພະເຈົ້າເປັນເອື້ອຍຄູ, ຄອບຄົວກໍທຸກຍາກຫຼາຍ, ສະພາບຄອບຄົວເມື່ອກ່ອນນີ້ປະສົບກັບຄວາມຫຍຸ້ງຍາກທີ່ສຸດ, ຂ້າພະເຈົ້າກໍຕ້ອງປະກອບອາຊີບຈອດ, ຕີເຫຼັກເພື່ອຫາເງິນລ້ຽງຄອບຄົວ, ໃຫ້ລູກເຕົ້າໄປໂຮງຮຽນ ”
ມາຮອດປະຈຸບັນ, ຊີວິດການເປັນຢູ່ຂອງຄອບຄົວລຸງ ຈູກວາງຕວ໋ນ ໄດ້ຮັບການປົວແປງຫຼາຍແລ້ວ. ລູກໆຂອງລຸງໄດ້ເຕີບໃຫຍ່, ໄດ້ມີການອຸທິດສ່ວນໃຫ້ແກ່ສັງຄົມ. ນີ້ແມ່ນຄວາມເບີກບານໃຈຢ່່າງຍິ່ງໃນຊີວິດຂອງລຸງ. ນາງຈູທິຮວ່ຽນ ຊຶ່ງແມ່ນເອື້ອຍຄູສອນເກັ່ງຂອງໂຮງຮຽນມັດທະຍົມຕອນປາຍ ອຽນຟອງ ແຂວງບັກນິງເປີດເຜີຍວ່າ:
“ ແຕ່ຄາວຍັງນ້ອຍ, ພໍ່ແມ່ຂ້າພະເຈົ້າມີຄວາມເອົາໃຈໃສ່ເຖິງ 2 ເອື້ອຍນ້ອງຂ້າພະເຈົ້າທີ່ສຸດ. ພໍ່ແມ່ຂ້າພະເຈົ້າເຄີຍລະດົມກຳລັງໃຈແກ່ 2 ເອື້ອຍນ້ອງຮ່ຳຮຽນເປັນປະຈຳ. ພວກເພິ່ນຍາມໃດກໍບອກວ່າ ຕ້ອງຮ່ຳຮຽນເພື່ອມີອະນາຄົດທີ່ດີ. ພວກຂ້າພະເຈົ້າກໍພະຍາຍາມຮ່ຳຮຽນເພື່ອຕອບສະໜອງຕາມຄວາມຄ່ອງຄອຍຂອງພໍ່ແມ່ ”
ສ່ວນຄອບຄົວລຸງ ໂງວັນຮ້າງ ກໍແມ່ນຄອບຄົວທີ່ທຸກຍາກໃນໝູ່ບ້ານ, ແຕ່ລູກເຕົ້າ ຜູ້ໃດກໍຮຽນເກັ່ງ, ເສັງໄດ້ຄະແນນດີ ແລະ ພວມຮຽນຢູ່ມະຫາ ວິທະຍາໄລແຫ່ງຕ່າງໆ. ໂດຍແມ່ນຜູ້ໃນວົງຕະກູນໂງທີ່ມີມູນເຊື້ອມັກການຮ່ຳຮຽນ ຢູ່ໝູ່ບ້ານ, ຍາມໃດລຸງກໍບອກສອນ, ລະດົມກຳລັງໃຈແກ່ລູກຫຼານຈົ່ງສືບທອດນ້ຳໃຈມັກການຮ່ຳຮຽນຈາກຄົນລຸ່ນກ່ອນໆ. ລຸງ ໂງວັນຮ້າງ ເວົ້າວ່າ :
“ ກ່ອນອື່ນໝົດ, ແມ່ນດ້ວຍສະພາບຄອບຄົວຂ້າພະເຈົ້າໃນວົງຕະກູນທີ່ມີ ຫຼາຍຄົນຮຽນເກັ່ງ, ເສັງໄດ້ຄະແນນດີ. ສະພາບເສດຖະກິດຂອງຄອບຄົວຖືກຈຳກັດ, ແຕ່ 2 ຜົວເມັຍຂ້າພະເຈົ້າຍັງຄົງພະຍາຍາມໃຫ້ລູກເຕົ້າໄດ້ຮ່ຳໄດ້ຮຽນ ເພື່ອຮັກສາມູນເຊື້ອມັກການຮ່ຳຮຽນຂອງວົງຕະກູນ ແລະ ນີ້ກໍແມ່ນຄວາມມຸ່ງຫວັງຂອງພວກລູກໃນຄອບຄົວພວກຂ້າພະເຈົ້າ. ”
ເລື່ອງລາວກ່ຽວກັບການກ້າວຂຶ້ນດ້ວຍເສັ້ນທາງຮ່ຳຮຽນ ໄດ້ຊຶມເລິກເຂົ້າແນວຄິດຈິດໃຈ ແລະ ເປັນກຳລັງຊຸກຍູ້ບັນດາຄອບຄົວໃນ ໝູ່ບ້ານວ້ອງຫງວຽດສູ້ຊົນບືນຕົວຂຶ້ນ, ສ້າງເປັນຂະບວນການຮ່ຳຮຽນ ແລະ ເປັນຄວາມເອກອ້າງທະນົງໃຈຂອງ ໝູ່ບ້ານ. ປີ 1995, ໝູ່ບ້ານວ້ອງຫງວຽດໄດ້ສ້າງຕັ້ງສະມາຄົມສົ່ງເສີມການຮ່ຳຮຽນ, ນັບແຕ່ນັ້ນເປັນຕົ້ນມາ, ຂະບວນການແຂ່ງຂັນຮ່ຳຮຽນລະຫວ່າງບັນດາວົງຕະກູນ, ບັນດາຄອບຄົວ ນັບມື້ນັບໄດ້ຮັບການເສີມຂະຫຍາຍປະສິດທິຜົນ. ທ່ານຫງວຽນວັນເລະ, ປະທ່ານ ສະມາຄົມສົ່ງເສີມການຮ່ຳຮຽນ ໝູ່ບ້ານວ້ອງຫງວຽດ ໃຫ້ຮູ້ວ່າ :
“ ແຕ່ລະໝູ່ບ້ານໃນຕາແສງພວກຂ້າພະເຈົ້າ, ລ້ວນແຕ່ມີສະພາສຶກສາ. ບົດບາດທີ່ສຳຄັນທີ່ສຸດແມ່ນເພື່ອສ້າງແບບແຜນການຮ່ຳຮຽນໃຫ້ແກ່ພວກຫຼານ, ພິເສດທາງຕາແສງໄດ້ສ້າງຂະບວນການ “ ສຽງກອງຮຽນຍາມຄ່ຳ”. ວັນທີ 17/11/1999, “ ສຽງກອງຮຽນຍາມຄ່ຳ” ໄດ້ເລີ່ມຖືກອອກອາກາດຜ່ານລະບົບໂທລະໂຄ່ງໃນທົ່ວຕາແສງ. ສະມາຄົມສົ່ງເສີມການຮ່ຳຮຽນ, ສະມາຄົມພໍ່ແມ່ນັກຮຽນຂັ້ນບ້ານ, ຕາແສງ ລ້ວນແຕ່ແຕ່ງຕັ້ງຜູ້ລົງໄປແຕ່ລະຄອບຄົວເພື່ອກວກກາ ລະດົມກຳລັງໃຈແກ່ລູກຫຼານໃນການຮ່ຳຮຽນ ”
ພາຍຫຼັງຍາມສອບເສັງເຂົ້າມະຫາວິທະຍາໄລໃນແຕ່ລະປີ, ຢູ່ໝູ່ບ້ານວ້ອງ ຫງວຽດ, ນັກຮຽນເກັ່ງນັບມື້ນັບປະກົດຕົວຫຼາຍຂຶ້ນ. ຫຼາຍຄອບຄົວທີ່ປະສົບກັບຄວາມຫຍຸ້ງຍາກ, ແຕ່ຍັງຄົງພະຍາຍາມເບິ່ງແຍງໃຫ້ລູກເຕົ້າຮ່ຳຮຽນ ແລະ ສາມາດບັນລຸຜົນງານດີເດັ່ນ. ຄອບຄົວໜຶ່ງມີ 3 ຄົນ, ຊ້ຳບໍໜຳມີເຖິງ 4-5 ຄົນຮຽນມະຫາວິທະຍາໄລ, ເໜືອມະຫາວິທະຍາໄລ ແມ່ນເລື່ອງທຳມະດາໃນ ໝູ່ບ້ານວ້ອງຫງວຽດ. ໃນທຸກວັນນີ້, ເມື່ອເວົ້າເຖິງ ໝູ່ບ້ານວ້ອງຫງວຽດນັ້ນ, ຜູ້ຄົນທັງຫຼາຍຄິດໂລດວ່າແມ່ນ “ ໝູ່ບ້ານມະຫາວິທະຍາໄລແຄມແມ່ນ້ຳເກົາ” ຊຶ່ງແມ່ນໝູ່ບ້ານ ມີມູນເຊື້ອມັກການຮ່ຳຮຽນ, ໜຶ່ງໃນບັນດາຄວາມງາມແຫ່ງອະລິຍະທຳຂອງໝູ່ບ້ານເຂດບ້ານນາຫວຽດນາມ.