(vovworld)-
ລາຍການ “ມະຫາຄອບຄົວບັນດາຊົນເຜົ່າຫວຽດນາມ ກັບພາລະກິດສ້າງສາ ແລະ ປົກປັກຮັກສາປະເທດຊາດ“ ຫາກໍ່ຖືກຈັດຂຶ້ນຢູ່ບ້ານວັດທະນະທຳບັນດາຊົນເຜົ່າຫວຽດນາມ ທີ່ດົ່ງໂມ-ເຊີນໄຕ-ຮ່າໂນ້ຍ. ລາຍການມີການເຂົ້າຮ່ວມຂອງຊາວເຜົ່າກ່ວາ 200 ຄົນຂຶ້ນກັບ 32 ເຜົ່າທີ່ມາຈາກ 8 ແຂວງ, ນະຄອນ. ບັນດາການເຄື່ອນໄຫວມຸ່ງໄປສູ່ເຂດທະເລໝູ່ເກາະ, ເຂດຊາຍແດນ ແລະ ອະທິປະໄຕຂອງປະເທດຊາດໄດ້ຖືກຈັດຂຶ້ນໃນໂອກາດນີ້.
(ພາບ: vov.vn)
ເລິ່ມຕົ້ນບັນດາການເຄື່ອນໄຫວມຸ່ງໄປສູ່ເຂດທະເລໝູ່ເກາະ, ເຂດຊາຍແດນ ແລະ ອະທິປະໄຕຂອງປະເທດຊາດແມ່ນພິທີບູຊາເຈົ້າຄື້ນຟອງທະເລຂອງຊາວເຜົ່າຈຳ ຢູ່ແຂວງນິງທ້ວນ.
ເມື່ອສຽງກອງປາຣານຶງ, ສຽງແຄນຊາຣານາຍດັງຂຶ້ນ, ທ່ານກີອາງ ໄດ້ຟ້ອນ, ພາຍເຮືອ, ພາວະນາຂໍໃຫ້ເຈົ້າຄື້ນຟອງທະເລປ້ອງກັນຊ່ວຍເຫຼືອປະມົງໄປຫາປາຢູ່ທະເລ, ຊ່ວຍກູ້ຊີວິດເຂົາເຈົ້າເມື່ອປະສົບກັບອຸບັດຕິເຫດ. ນີ້ແມ່ນພິທີກຳອັນເປັນປະເພນີຂອງຊາວເຜົ່າຈຳ ຊື່ງຖືກຈັດຂຶ້ນໃນເດືອນ 4, ເດືອນ 5 ຂອງແຕ່ລະປີ. ພິທີດັ່ງກ່າວໂດຍ, ໝໍກາອີງ ແລະ ວົງດົນຕີໃນພິທີປະຕິບັດ.
ປະຈຸບັນ, ຄວາມເຊື່ອໝັ້ນຕໍ່ເຈົ້າທະເລຂອງຊາວເຜົ່າຈຳ ຍັງມີຄວາມເລິກເຊິ່ງທີ່ສຸດ. ປ້າທ້ວນທິຮ່ອນ, ຢູ່ຕາແສງບັກເຊີນ, ເມືອງທ້ວນບັກ, ແຂວງນິງທ້ວນ ກ່າວວ່າ:
“ຊາວເຜົ່າຈຳມີຄວາມພາກພູມໃຈທີ່ສຸດຍ້ອນການເດີນທະເລຫາປາໄດ້ຮັບຜົນດີ, ເຮັດໃຫ້ລູກຫຼານສາມາດມີການກິນການຢູ່. ເມື່ອກ່ອນ, ຊາວເຜົ່າຈຳ ກໍ່ໄດ້ບູຊາເຈົ້າທະເລຂໍໃຫ້ຊາວເຜົ່າຕົນມີຄວາມຮັ່ງມີສີສຸກ“.
(ພາບ: vov.vn)
ສຳລັບຊາວເຜົ່າຈຳ ຢູ່ຕາແສງບັກເຊີນ, ເມືອງທ້ວນບັກ, ແຂວງນິງທ້ວນ ແລ້ວ, ການສະແດງພິທີບູຊາເຈົ້າຄື້ນຟອງທະເລຄືນໃໝ່ ບໍ່ພຽງແຕ່ແມ່ນໂອກາດແນະນຳຮີດຄອງປະເພນີທີ່ເປັນມູນເຊື້ອເທົ່ານັ້ນ, ຫາກຍັງແມ່ນໂອກາດສະແດງໃຫ້ເຫັນອາລົມຈິດຂອງຊາວເຜົ່າຈຳ ທີ່ມີຕໍ່ທະເລໝູ່ເກາະ, ຢັ້ງຢືນເຈດຈຳນົງປົກປັກຮັກສາອະທິປະໄຕຂອງປະເທດຊາດອີກດ້ວຍ. ທ່ານທ້ວນຖູ, ສະມາຊິກຄະນະສິລະປະກອນຊາວເຜົ່າຈຳ-ນິງທ້ວນ ໃຫ້ຮູ້ວ່າ:
“ປະຊາຊົນເຮົາຕ້ອງສາມັກຄີກັນ, ເປັນຈິດໜຶ່ງໃຈດຽວ. ພິທີບູຊາເຈົ້າທະເລນີ້ແມ່ນເພື່ອລະດົມກຳລັງໃຈລວມ, ລະດົມກຳລັງໃຈລູກຫຼານກ່ຽວກັບສະພາບການຢູ່ທະເລຕາເວັນອອກ. ເຮົາຕ້ອງເລົ່າເລື່ອງກ່ຽວກັບລຸ້ນພໍ່ລຸ້ນອ້າຍ ຜູ້ທີ່ໄດ້ສ້າງເງື່ອນໄຂສະດວກໃຫ້ແກ່ພວກເຮົາໄປຫາປາຢູ່ທະເລຕາເວັນອອກສູ່ລູກຫຼານຟັງ“.
ລາຍການພົບປະແລກປ່ຽນ ແລະ ເກັບກຳລາຍເຊັນຂອງຜູ້ຕາງໜ້າບັນດາຊົນເຜົ່າຫວຽດນາມ ໃນແຜນທີ່ທີ່ມີເນື້ອທີ່ 680 ມ2 ແມ່ນໂອກາດສະແດງໃຫ້ເຫັນນ້ຳໃຈສາມັກຄີໃນທົ່ວປວງຊົນ. ຜູ້ຕາງໜ້າບັນດາຊົນເຜົ່າຫວຽດນາມ, ກຳລັງສະມາຊິກຊາວໜຸ່ມ, ໄວໜຸ່ມ ແລະ ແຂກທ່ອງທ່ຽວໄດ້ພ້ອມກັນລົງລາຍເຊັນໃນແຜນທີ່, ຫຼັງຈາກນັ້ນໄດ້ມອບໃຫ້ບັນດານັກຮົບ, ປະຊາຊົນຢູ່ເມືອງເກາະເຈື່ອງຊາ… ທ່ານລຶວເຊິ່ນວ້ານ, ຊາວເຜົ່າເກີ່ລາວ ຢູ່ເມືອງດົ່ງວັນ, ແຂວງຮ່າຢາງ, ຜູ້ທຳອິດທີ່ໄດ້ລົງລາຍເຊັນໃນແຜນທີ່ຫວຽດນາມ ໃຫ້ຮູ້ວ່າ:
“ຂ້າພະເຈົ້າເຫັນວ່າ, ລາຍການ “ມະຫາຄອບຄົວບັນດາຊົນເຜົ່າຫວຽດນາມ ກັບພາລະກິດສ້າງສາ ແລະ ປົກປັກຮັກສາປະເທດຊາດ“ ມີຄວາມໝາຍທີ່ສຸດຍ້ອນວ່າໄດ້ເຕົ້າໂຮມບັນດາຊົນເຜົ່າເຂົ້ານຳກັນ. ການເກັບກຳລາຍເຊັນໃນແຜນທີ່ຫວຽດນາມ ສະແດງໃຫ້ເຫັນອາລົມຈິດ, ນ້ຳໃຈສາມັກຄີແຫ່ງຊາດ ກັບພາລະກິດສ້າງສາ ແລະ ປົກປັກຮັກສາປະເທດຊາດ, ລະດົມກຳລັງໃຈບັນດານັກຮົບພວມປະຕິບັດໜ້າທີ່ປົກປັກຮັກສາເຂດຊາຍແດນ, ໝູ່ເກາະທະເລ“.
ໃນງານລາຕີພົບປະແລກປ່ຽນມະຫາສາມັກຄີບັນດາຊົນເຜົ່າຫວຽດນາມ, ລາຍການທີ່ມີຊື່ວ່າ: “ສາມັກຄີ“ ຂອງບັນດານັກສິລະປະກອນຊາວເຜົ່າປາໂກ ຢູ່ຕາແສງຕ່າຣຸດ, ເມືອງດັກຣົງ, ແຂວງກວາງຈິ ໄດ້ນຳມາເຊິ່ງການລະດົມກຳລັງໃຈທີ່ໃຫ່ຍຫຼວງ. ທ່ານໄກຼຊຶກ ຜູ້ກຳກັບລາຍການສະແດງ “ສາມັກຄີ“ ໃຫ້ຮູ້ວ່າ: ຊາວເຜົ່າປາໂກ ປາດຖະໜາຢາກໃຫ້ບັນດາຊົນເຜົ່າຫວຽດນາມ ພ້ອມກັນສາມັກຄີ, ສ້າງສາ ແລະ ປົກປັກຮັກສາປະເທດຊາດ:
“ປະຈຸບັນ, ຂ້າພະເຈົ້າຢາກປຸກລຸກນ້ຳໃຈສາມັກຄີຂອງຊາວເຜົ່າຕົນຄືນໃໝ່ຜ່ານບັນດາບົດເພງນີ້. ນ້ຳໃຈສາມັກຄີໄດ້ມີມາແຕ່ສະໄໝສົງຄາມ, ນັບແຕ່ທ້າຍສັດຕະວັດທີ 19 ແລ້ວ, ແຕ່ສະໄຫມລ່າເມືອງຂຶ້ນຝະລັ່ງ. ໃນຈຸດເວລານີ້, ນ້ຳໃຈສາມັກຄີຂອງປະຊາຄົມ ພ້ອມກັບແຜນນະໂຍບາຍຂອງພັກ, ໂດຍສະເພາະແມ່ນໃນສະພາບການປະຈຸບັນ, ພວກຂ້າພະເຈົ້າຢາກນຳມາເຊິ່ງບັນດາສຽງເວົ້າ, ບົດເພງເພື່ອລະດົມກຳລັງໃຈທຸກຄົນໃນປະຊາຄົມ“.
ສຳລັບຊາວຫວຽດນາມ ແຕ່ລະຄົນແລ້ວ, ທະເລໝູ່ເກາະບໍ່ພຽງແຕ່ແມ່ນເຂດໄປຫາປາລ້ຽງຊີບເທົ່ານັ້ນ, ຫາກມັນຍັງແມ່ນແຫຼ່ງກຳເນີດຂອງການພັດທະນາແບບຍືນຍົງຂອງປະເທດຊາດອີກດ້ວຍ. ນ້ຳໃຈຕໍ່ທະເລ, ຕໍ່ປະເທດຊາດໄດ້ນຳປະເທດຊາດຫວຽດນາມ ຜ່ານຜ່າສິ່ງທ້າທາຍນາໆປະການ, ສ້າງສາປະເທດຊາດເປັນເອກະພາບ. ລາຍການ “ມະຫາຄອບຄົວບັນດາຊົນເຜົ່າຫວຽດນາມ ກັບພາລະກິດສ້າງສາ ແລະ ປົກປັກຮັກສາປະເທດຊາດ“ ໄດ້ຈັດຕັ້ງຂຶ້ນແມ່ນການພິສູດໃຫ້ເຫັນກ່ຽວກັບອະທິປະໄຕເຂດຊາຍແດນ, ທະເລໝູ່ເກາະຫວຽດນາມ ທີ່ຍາມໃດປະຊາຊົນ ຫວຽດນາມ ບັນດາເຜົ່າກໍ່ຮ່ວມແຮງຮ່ວມໃຈປົກປັກຮັກສາໄວ້./.