ຊາວເຜົ່າຈຳນະຄອນ ໂຮ່ຈີມິນ ສ່ວນຫຼາຍແມ່ນເຊື່ອຖືສາສະໜາ ອິດສະລາມ ດັ່ງນັ້ນບຸນປີໃໝ່ຂອງເຂົາເຈົ້າແມ່ນບຸນ Roya ເຊິ່ງຈັດຂຶ້ນພາຍຫຼັງສິ້ນສຸດເດືອນກິນເຈ Ramadan ໄລ່ຕາມຈັນທະປະຕິທິນຂອງສາສະໜາອິດສະລາມ. ແຕ່ເຈື່ອຈານພ້ອມກັບບັນຍາກາດຕ້ອນຮັບປີໃໝ່ປະຈຳຊາດຂອງຊາວຫວຽດນາມໃນທົ່ວປະເທດ, ວົງຄະນາຍາດຊາວເຜົ່າຈຳຢູ່ນະຄອນ ໂຮ່ຈີມິນ ກໍ່ກະກຽມຕ້ອນຮັບບຸນປີໃໝ່ປະຈຳຊາດດ້ວຍຄວາມເບິກບານມ່ວນຊື່ນ. ເມື່ອໄປຢ້ຽມຢາມຄຸ້ມຖະໜົນຂອງຊາວເຜົ່າຈຳຢູ່ຕາແສງ 17, ເມືອງ ບິ່ງແທ້ງ, ພວກເຮົາຈະເຫັນໄດ້ຄວາມເບິກບານມ່ວນຊື່ນຂອງບັນດາຄອບຄົວທີ່ທຸກຍາກ ເມື່ອໄດ້ຮັບຄວາມເອົາໃຈໃສ່ຈາກອຳນາດການປົກຄອງທ້ອງຖີ່ນ. ດ້ວຍນ້ຳໃຈອຸ້ມຊູຊ່ວຍເຫຼືອເຊິ່ງກັນ ແລະ ກັນ, ປະຊາຊົນທີ່ດຳລົງຊີວິດໃນຕາແສງ 17, ໄດ້ມອບຂອງຂວັນຊ່ວຍເຫຼືອໃຫ້ບັນດາຄອບຄົວຊາວເຜົ່າຈຳທີ່ປະສົບກັບຄວາມຫຍຸ້ງຍາກ. ເຖິງວ່າຂອງຂວັນມີມູນຄ່າບໍ່ຫຼາຍກໍ່ຕາມ ແຕ່ມັນໄດ້ສະແດງໃຫ້ເຫັນຄວາມສາມັກຄີ, ຮັກແພງອຸ້ມຊູຊ່ວຍເຫຼືອເຊິ່ງການ ແລະ ກັນຂອງຊາວຫວຽດນາມ. ທ່ານ ຫວູນາມຈູງ, ເລຂາຄະນະພັກ, ທັງເປັນປະທານ ຕາແສງ 17, ເມືອງ ບິ່ງແທ້ງ, ນະຄອນ ໂຮ່ຈີມິນ ໃຫ້ຮູ້ວ່າ.
”ໃນຊຸມປີມໍ່ໆມານີ້, ຊີວິດການເປັນຢູ່ຂອງຊາວເຜົ່າຈຳຢູ່ຕາແສງ 17 ໄດ້ຮັບການຍົກສູງຂຶ້ນບາດກ້າວໜຶ່ງ. ແຕ່ຍັງຄົງປະສົບກັບຄວາມຫຍຸ້ງ ຍາກຢູ່. ທາງຕາແສງໄດ້ໜູນຊ່ວຍຊາວເຜົ່າຜ່ານຫຼາຍຮູບການຄື: ມອບທຶນສຶກສາໃຫ້ລູກຫຼານຊົນເຜົ່າຈຳ, ໃຫ້ກູ້ຢືມທຶນໃນໂຄງການ ”ຫຼຸດຜ່ອນຄວາມທຸກຍາກ” ເພື່ອແນໃສ່ປັບປຸງຊີວິດການເປັນຢູ່ຂອງວົງຄະນາຍາດຊາວເຜົ່າຈຳໃຫ້ດີຂຶ້ນເທື່ອລະກ້າວ ແລະ ສ້າງກຳລັງໜູນໃຫ້ວົງຄະນາຍາດຊາວເຜົ່າຈຳເຂົ້າຮ່ວມຂະບວນການຕ່າງໆໃນທ້ອງຖີ່ນ”.
ທ່ານ Samael, ແມ່ນຊາວເຜົ່າຈຳຜູ້ໜຶ່ງ, ປີນີ້ຄອບຄົວທ່ານໄດ້ຕ້ອນຮັບບຸນປີໃໝ່ປະຈຳຊາດໃນເຮືອນແຫ່ງສາຍຈິດມິດໃຈ, ເຊິ່ງຄອບຄົວທ່ານຫາກໍ່ໄດ້ຮັບ. ທ່ານໄດ້ເວົ້າດ້ວຍຄວາມຕື້ນຕັນໃຈວ່າ, ປີນີ້ທ່ານມີອາຍຸ 75 ປີ, ບ້ານເກີດເມືອງນອນຢູ່ ອານຢາງ, ຄອບຄົວທ່ານໄດ້ຍ້າຍໄປດຳລົງຊີວິດຢູ່ ໄຊງ່ອນ ມາຫຼາຍປີແລ້ວ, ແຕ່ຍ້ອນມີລູກຫຼາຍຄົນ, ຄອບຄົວພັດທຸກຍາກ, ຊີວິດປະສົບກັບຄວາມຫຍຸ້ງຍາກຫຼາຍ. ປີນີ້, ຄອບຄົວຂອງທ່ານດີໃຈຫຼາຍເມື່ອໄດ້ຕ້ອນຮັບປີໃໝ່ປະຈຳຊາດໃນເຮືອນຫຼັງໃໝ່ ໂດຍແນວໂຮມປະເທດຊາດນະຄອນຊ່ວຍກໍ່ສ້າງໃຫ້.
”ຂ້າພະເຈົ້າໄດ້ຮັບເຮືອນແຫ່ງສາຍຈິດມິດໃຈຈາກລັດ ທີ່ມີມູນຄ່າ 30 ລ້ານດົ່ງ. ບຸນປີໃໝ່ນີ້, ຄອບຄົວຂ້າພະເຈົ້າຮູ້ສຶກເບິກບານມ່ວນຊື່ນ, ແລະອຸ່ນອ່ຽນໃຈຫຼາຍ ຍ້ອນໄດ້ດຳລົງຊີວິດໃນເຮືອນໃໝ່”
ທາງນະຄອນກໍ່ໄດ້ສືບຕໍ່ຍົກເວັ້ນຄ່າຮຽນໃຫ້ນັກຮຽນຊົນເຜົ່າຈຳທີ່ຮຽນແຕ່ຊັ້ນອະນຸບານເຖິງຊັ້ນມັດທະຍົມຕອນປາຍ. ຍ້ອນເຫດນັ້ນ, ລູກຫຼານຊາວເຜົ່າຈຳຈຶ່ງມີເງືອ່ນໄຂໄປຮຽນ, ປະກອບສ່ວນຍົກສູງລະດັບຄວາມຮູ້. ທ່ານ Kim So ຜູ້ເຊື່ອຖືສາສະໜາອິດສະລາມ, ເມືອງ 8, ແຫ່ງທີ່ເຕົ້າໂຮມຊາວເຜົ່າຈຳ ເຖິງ 240 ຄອບຄົວ, ໃຫ້ຮູ້ວ່າ, ຢູ່ເຂດນີ້ຜູ້ມີລະດັບປະລິຍາຕີເຖິງ 15 ຄົນ, ໃນນັ້ນ 3 ຄົນ ພາຍຫຼັງຮຽນຈົບຢູ່ຕ່າງປະເທດໄດ້ກັບເມືອເຮັດວຽກໃນທ້ອງຖີ່ນ.
”ໃນປີຜ່ານມາ, ໂດຍໄດ້ຮັບການໜູນຊ່ວຍຈາກອຳນາດການປົກຄອງ, ແນວໂຮມປະເທດຊາດເມືອງ 8 ໄດ້ເອົາໃຈໃສ່ເບິ່ງແຍງເຖິງຊີວິດການເປັນຢູ່ຂອງຊາວເຜົ່າຈຳຢູ່ທ້ອງຖີ່ນຄືຊ່ວຍກໍ່ສ້າງເຮືອນແຫ່ງສາຍຈິດມິດໃຈ, ເອົາໃຈໃສ່ເຖິງການຮ່ຳຮຽນ, ຍົກສູງລະດັບຄວາມຮູ້ໃຫ້ແກ່ລູກຫຼານເຜົ່າຈຳ”.
ປີ 2012, ວົງຄະນາຍາດຊາວເຜົ່າຈຳນະຄອນ ໂຮ່ຈີມິນ ສືບຕໍ່ເສີມຂະຫຍາຍກຳລັງຄວາມສາມາດ, ຕັ້ງໜ້າເຂົ້າຮ່ວມຂະບວນການ ”ຫຼຸດຜ່ອນຄວາມທຸກຍາກ”, ປະກອບສ່ວນພັດທະນາເສດຖະກິດດ ປັບປຸງຊີວິດການເປັນຢູ່ໃຫ້ດີຂຶ້ນ. ພ້ອມທັງມີມາດຕະການສົ່ງເສີມໃຫ້ລູກຫຼານຊາວເຜົ່າຈຳຮ່ຳຮຽນວັດທະນະທຳ, ຍົກສູງລະດັບຄວາມຮູ້, ຫຼີກເວັ້ນໄພສັງຄົມ. ທ່ານ ຫຼີຢູໂຊ, ຮອງຫົວໜ້າຄະນະຜູ້ຕ່າງໜ້າວົງຄະນາຍາດຊາວເຜົ່າຈຳ ທີ່ເຊື່ອຖືສາສະໜາ ອິດສະລາມ ຢູ່ນະຄອນ ໂຮ່ຈີມິນ, ເວົ້າວ່າ:
”ປີ 2012, ວົງຄະນາຍາດຊາວເຜົ່າຈຳເຊື່ອຖືສາສະໜາ ອິດສະລາມ ຢູ່ນະຄອນ ໂຮ່ຈີມິນ ຈະພ້ອມກັບປະຊາຊົນນະຄອນສູ້ຊົນປະຕິບັດບາງຕົວເລກຄາດໝາຍຂອງນະຄອນໃຫ້ດີຄື: ແກ້ໄຂວຽກເຮັດງານທຳ, ຫຼຸດຜ່ອນອັດຕາສ່ວນຫວ່າງງານ, ຄວບຄຸມບໍ່ໃຫ້ວັດທະນະທຳທີ່ເສື່ອມເສຍສົ່ງຜົນສະທ້ອນເຖິງຄຸນສົມບັດໃນສັງຄົມ”.
ລະດູບານໃໝ່ວຽນມາ ເຕັມໄປດ້ວຍຄວາມເຊື້ອໝັ້ນ ແລະຄວາມຫວັງ. ຕ້ອນຮັບລະດູບານໃໝ່. ວົງຄະນາຍາດຊາວເຜົ່າຈຳຢູ່ນະຄອນ ໂຮ່ຈີມິນ ຈະມານະພະຍາຍາມບືນຕົວຂຶ້ນ ເພື່ອສ້າງອະນາຄົດທີ່ສົດໄສ, ປະກອບສ່ວນກໍ່ສ້າງນະຄອນໃຫ້ນັບມື້ນັບພັດທະນາ.