ວັດຂະແມນິກາຍນິລະຍານ ປີຕູໂຄຊາຣັງໄຊ ຫຼືເອີ້ນວ່າ ວັດວ້ຽນກວາງ ຕັ້ງຢູ່ຖະໜົນ ໝາກດິງຈີ, ຕາແສງ ອານກື, ເມືອງ ນິງກ່ຽວ, ນະຄອນ ເກີນເທີ ບໍ່ພຽງແຕ່ແມ່ນບ່ອນທີ່ບັນດາພະສົງສຳມະເນັນຮຽນສາດສະໜາເທົ່ານັ້ນ, ຫາກຍັງແມ່ນແຫ່ງທີ່ບັນດານັກສຶກສາທີ່ທຸກຍາກມີເງື່ອນໄຂເພື່ອກິນຢູ່, ຮ່ຳຮຽນເພື່ອກາຍເປັນຜູ້ທີ່ມີປະໂຫຍດຕໍ່ສັງຄົມ. ວັດນີ້ ໄດ້ມີບັນດາການເຄື່ອນໄຫວທີ່ແທດຈິງເພື່ອຊ່ວຍເຫຼືອນັກຮຽນ, ນັກສຶກສາ, ຜູ້ທຸກຍາກ ແລະ ທັງແມ່ນບ່ອນຢູ່ຂອງບັນດານັກຮຽນໃນຍາມສອບເສັງເຂົ້າມະຫາວິທະຍາໄລ.
ວັດຂະແມນິກາຍນິລະຍານ ປີຕູໂຄຊາຣັງໄຊ ຕັ້ງຢູ່ຖະໜົນ ໝາກດິງຈີ, ຕາແສງ ອານກື, ເມືອງ ນິງກ່ຽວ, ນະຄອນ ເກີນເທີ |
ໂດຍຖືກຕັ້ງຢູ່ຖະໜົນ ໝາກດິງຈີ, ຕາແສງ ອານກື, ເມືອງ ນິງກ່ຽວ, ເຖິງວ່າ ວັດມີເນື້ອທີ່ບໍ່ກ້ວາງຂວາງກໍຕາມ, ແຕ່ຢູ່ວັດນີ້ ແມ່ນບ່ອນເພື່ອໃຫ້ບັນດາພະສົງສຳມະເນັນຮຽນສາດສະໜາ, ນອກຈາກນັ້ນ ກໍຍັງມີອາຄານ 2 ຊັ້ນເພື່ອໃຫ້ພວກນັກຮຽນ, ນັກສຶກສາຮ່ຳຮຽນອີກດ້ວຍ. ນ້ອງ ກິມແທງເລີມ ນັກສຶກສາປີທີ 1 ມະຫາວິທະຍາໄລການແພດ-ການຢາ ເກີນເທີ , ບ້ານເກີດຢູ່ເມືອງ ຈາກູ້, ແຂວງ ຈາວິງ ໃຫ້ຮູ້ວ່າ
“ ນ້ອງດີໃຈຫຼາຍ ເມື່ອໄດ້ຢູ່ໄດ້ກິນໃນວັດ, ທາງວັດໄດ້ຊ່ວຍນ້ອງມີເງື່ອນໄຂຮ່ຳຮຽນເປັນຢ່າງດີ. ຖ້າຫາກບໍ່ໄດ້ຮຽນຢູ່ນີ້, ເບິ່ງຄືວ່າການຮ່ຳຮຽນຂອງນ້ອງກໍປະສົບກັບຄວາມຫຍຸ້ງຍາກຫຼາຍ. ”
ໂດຍມີສະພາບເຊັ່ນດຽວກັນກັບນ້ອງເລີມ, ນ້ອງແຢງດາດມິງ ນັກສຶກສາປີທີ 3 ຂະແໜງກໍ່ສ້າງ, ມະຫາວິທະຍາໄລເກີນເທີ , ບ້ານເກີດຢູ່ເມືອງຮ່ວາບີງ, ແຂວງ ບາກລຽວ. ຍ້ອນເງື່ອນໄຂດ້ານເສດຖະກິດຂອງຄອບຄົວຍັງປະສົບຄວາມຫຍຸ້ງຍາກ, ເມື່ອໄດ້ຮັບຂ່າວເສັງໄດ້ຄະແນນເຂົ້າມະຫາວິທະຍາໄລ, ຄອບຄົວຂອງນ້ອງມີຄວາມເປັນຫ່ວງເປັນໄຍທີ່ສຸດເພາະບໍ່ມີເງິນພຽງພໍເພື່ອຈ່າຍຄ່າກິນຄ່າຢູ່ ແລະ ຄ່າໂຮງຮຽນໃຫ້ນ້ອງ. ໂດຍໄດ້ເຂົ້າໃຈກ່ຽວກັບສະພາບຄອບຄົວຂອງນ້ອງ, ພະອາຈານໃຫຍ່ ຫຼີຮຸ່ງ ເຈົ້າອະທິການວັດ ປີຕູໂຄຊາຣັງໄຊ ໄດ້ຮັບນ້ອງມາຢູ່ວັດນີ້ໃນຕະຫຼອດໄລຍະຮ່ຳຮຽນ. ນ້ອງແຢງດາດມິງ ໃຫ້ຮູ້ວ່າ :
“ ບັນດາພະພິກຂຸຢູ່ວັດນີ້ໄດ້ຊ່ວຍນ້ອງຫຼາຍຢ່າງ, ດັ່ງນັ້ນ ກໍສາມາດຫຼຸດຜ່ອນຄ່າໃຊ້ຈ່າຍໃນການກິນການຢູ່, ການຈ່າຍຄ່າເຊົ່າເຮືອນ ແລະ ອື່ນໆ. ຖ້າຫາກບໍ່ໄດ້ຮັບການຊ່ວຍເຫຼືອຈາກພະພິກຂຸ, ການຮ່ຳຮຽນຂອງນ້ອງອາດຈະຖືກຕັດຕອນ ແລະ ບາງເທື່ອບໍ່ສາມາດສືບຕໍ່ໄດ້ ”
2 ກໍລະນີດັ່ງກ່າວແມ່ນນອນໃນຈຳນວນນັກສຶກສາກວ່າ 600 ຄົນທີ່ມີສະພາບຄອບຄົວຫຍຸ້ງຍາກຢູ່ບັນດາແຂວງເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ຊຶ່ງໄດ້ຮັບການຊ່ວຍເຫຼືອຈາກພະອາຈານໃຫຍ່ ຫຼີຮຸ່ງ ນັບແຕ່ກ່ອນເປັນຕົ້ນມາ. ພະອາຈານໃຫຍ່ ຫຼີຮຸ່ງ ໃຫ້ຮູ້ວ່າ :
“ ໃນຊຸມປີກ່ອນນີ້, ຊີວິດການເປັນຢູ່ຂອງພໍ່ແມ່ພີນ້ອງຊາວເຜົ່າຂະແມກໍປະສົບກັບຄວາມຫຍຸ້ງຍາກທີ່ສຸດ. ພໍ່ປູ່, ແມ່ຍາ ແລະ ພໍ່ແມ່ກໍມີຄວາມເປັນຫ່ວງເປັນໄຍຕໍ່ການຮ່ຳຮຽນຂອງພວກນ້ອງ. ພວກນ້ອງມັກຮຽນ ແຕ່ຄອບຄົວພັດທຸກຍາກ, ບໍ່ມີເງື່ອນໄຂຊ່ວຍພວກນ້ອງເຂົ້າຮຽນຂັ້ນມະຫາວິທະຍາໄລ. ດັ່ງນັ້ນ, ໂດຍເລີ່ມມາຈາກນ້ຳໃຈຄວາມຮັກແພງມະນຸດດ້ວຍກັນ, ອາດຕະມາຢາກສະແດງຄວາມຮູ້ບຸນຄຸນຕໍ່ບັນດາຜູ້ທີ່ໄດ້ຊ່ວຍເຫຼືອຕົນເອງ, ດັ່ງນັ້ນເພື່ອເປັນສືບທອດສິ່ງທີ່ດີງາມນັ້ນ, ອາດຕະມາ ຈຶ່ງຕົກລົງຮັບເອົານັກສຶກສາທີ່ທຸກຍາກມາຢູ່ວັດເພື່ອຮ່ຳຮຽນ ”
ນັບແຕ່ປີ 1996 ມາຮອດປະຈຸບັນ, ພະອາຈານໃຫຍ່ ຫຼີຮຸ່ງ ໄດ້ຮັບເອົານັກສຶກສາ 50 ຄົນທີ່ມີສະພາບຄອບຄົວຫຍຸ້ງຍາກ, ພວມຮຽນຢູ່ມະຫາວິທະຍາໄລຕ່າງໆ ມາຢູ່ວັດ. ທາງວັດໄດ້ຊ່ວຍເຫຼືອດ້ານການກິນ, ການຢູ່. ພະອາຈານໃຫຍ່ ຫຼີຮຸ່ງໃຫ້ຮູ້ວ່າ ໃນຊຸມປີທຳອິດທີ່ປະສົບກັບຄວາມຫຍຸ້ງຍາກ, ທາງວັດສາມາດຮັບເອົານັກສຶກສາພຽງ 2-3 ຄົນມາຢູ່ໃນບໍລິເວນອັນຄັບແຄບ, ຫຼັງຈາກນັ້ນ ກໍຕົກລົງປຸກສ້າງຫໍພັກເພື່ອພວກນ້ອງມີເງື່ອນໄຂດີກວ່າ. ມາຮອດປະຈຸບັນ, ຫໍພັກກໍສາມາດຮັບເອົານັກສຶກສາແຕ່ 40 ຫາ 60 ຄົນມາຢູ່ ແລະ ຈຳນວນນັກສຶກສາມາຢູ່ກໍເພີ່ມຂຶ້ນໃນແຕ່ລະປີ.
ທ່ານຫຼີຊິງ ຫົວໜ້າຄະນະຊົນເຜົ່າແຂວງເກີນເທີ ໃຫ້ຮູ້ວ່າ : ວັດນີ້ ບໍ່ພຽງແຕ່ແມ່ນບ່ອນຊ່ວຍເຫຼືອນັກສຶກສາທີ່ທຸກຍາກເທົ່ານັ້ນ, ຫາກຍັງແມ່ນບ່ອນສຶກສາອົບຮົມກ່ຽວກັບຄຸນສົມບັດ, ມູນເຊື້ອວັດທະນະທຳ, ສອນພາສາຂະແມໃຫ້ແກ່ນັກຮຽນອີກດ້ວຍ. ແຕ່ລະປີ, ທາງວັດ ຍັງຂົນຂວາຍການແຜ່ບໍລິຈາກເງິນເພື່ອຊ່ວຍເຫຼືອຄົນທຸກຍາກ, ມອບທຶນສຶກສາໃຫ້ແກ່ ນັກສຶກສາທີ່ທຸກຍາກ, ກໍ່ສ້າງທາງຄົມມະນາຄົມຢູ່ບັນດາທ້ອງຖິ່ນຢູ່ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ. ຍອດຈຳນວນເງິນທີ່ນຳໃຊ້ສຳລັບວຽກງານສັງຄົມນັບແຕ່ກ່ອນມາຮອດປະຈຸບັນແມ່ນກວ່າ 1 ຕື້ດົງ. ທ່ານຫຼີຊິງ ຫົວໜ້າຄະນະຊົນເຜົ່າແຂວງເກີນເທີ ເວົ້າວ່າ :
“ ພ້ອມກັບການເຄື່ືອນໄຫວທາງສາດສະໜາ, ພະອາຈານໃຫຍ່ ຫຼີຮຸ່ງ ກໍຕັ້ງໜ້າ ເຂົ້າຮ່ວມວຽກງານເພື່ອການກຸສົນ, ມະນຸດສະທຳສັງຄົມ, ຂົນຂວາຍພໍ່ແມ່ຊາວພຸດແຜ່ບໍລິຈາກເງິນ, ວັດຖຸເພື່ອຊ່ວຍເຫຼືອຄົນທຸກຍາກ. ພິເສດ, ພະອາຈານໃຫຍ່ ຫຼີຮຸ່ງເອົາໃຈໃສ່ເຖິງຂົງເຂດສຶກສາໃຫ້ແກ່ພໍ່ແມ່ປະຊາຊົນຜູ້ທຸກຍາກ, ນັກຮຽນບໍ່ມີເງື່ອນໄຂໄປໂຮງຮຽນ ”
ນັບແຕ່ເມື່ອຊ່ວຍເຫຼືອນັກສຶກສາທຸກຍາກມາຮອດປະຈຸບັນ, ພະອາຈານໃຫຍ່ ຫຼີຮຸ່ງ ໄດ້ປະກອບສ່ວນຊ່ວຍນັກສຶກສານັບຮ້ອຍຄົນ ໃຫ້ມີເງື່ອນໄຂຮ່ຳຮຽນ ແລະ ນັກຮຽນນັກພັນຄົນມາຢູ່ເພື່ອກະກຽມການສອບເສັງເຂົ້າມະຫາວິທະຍາໄລໃນສົກຮຽນຕ່າງໆ. ມີນັກສຶກສາຫຼາຍຄົນເມື່ອຮຽນຈົບ ໄດ້ກາຍເປັນພະນັກງານທີ່ດຳລົງຕຳແໜ່ງຕ່າງໆທີ່ສຳຄັນ, ໄດ້ກັບມາອຸທິດສ່ວນຢູ່ທ້ອງຖິ່ນ ແລະ ກັບຄືນໜູນຊ່ວຍເງິນໃຊ້ຈ່າຍເພື່ອພ້ອມກັບວັດຊ່ວຍເຫຼືອບັນດານັກສຶກສາມີເງື່ອນໄຂສືບຕໍ່ການຮ່ຳຮຽນ.